Jâan 18
18
Aturûgu zä Jezü
(Mat 26.47-56; Mar 14.43-50; Luk 22.47-53)
1Pânə̈ ndə̂ tche tô rə̂ käko, Jezü la adjisîpili ndə̂ yê rô atə̂ kalâ ngû ndə̂ Sedrön. Ngâ kɨ̈ndɨ̈ kä tchâme ndə̂ tche lî la adjisîpili ndə̂ yê lə̂nə̈. 2Jüdâse, tchanə̈ ndə̂ tche wâ ndə̂kə̂ yosə̂ Jezü wûnsə̂ tchô nə̈ nə̂, bëte Jezü la adjisîpili ndə̂ yê päla tchê tə̂ andjê tâ. 3Käko Jüdâse wûtu tchâme. Tche sə̈ alême tə̂ küma ngâ kpûlû aturûgu ndə̂ Rômo la aturûgu ndə̂ gbölö nda Ndjapä, ndə̂ agbölö a-earə̂ kə̂ wa ngela sə̈ Ndjapä la afarizïɛ̈n wân andjê. Andjë wûtu sə̂ tchô nə̈ lâme la lâmba tchânə̂ andjê, la arə kʉ̈ʉ̈, la wo ndə̂ andjë tâ rə̂. 4Jezü wûnsə̂ arə gbɛ̂ ndə̂ âwâ ndə̂kə̂ gbo tchë nə̂. Tche gîtə̂ yê pu andjê kə̈ tô rə̂ päkëdə̂: «Tchabâ kä ndə̂ nyê pu tchë?» 5Andjë tô rə̂ sə̈ tchë päkëdə̂: «Jezü, akrə gö ndə̂ Näzärête kä ndə̂ ârâ pu tchë.» Tche tô rə̂ sə̈ andjê päkëdə̂: «Mëmê kä âtə.» Jüdâse, tchanə̈ ndə̂ tche wâ ndə̂kə̂ yosə̂ Jezü kä lə̂ gûtə̂ andjê. 6Ndə̂ Jezü tô rə̂ sə̈ andjê päkëdə̂: «Mëmê kä âtə», andjë mbrô katə̂ ngbânə̈ kə̈ tê bêche. 7Jezü kâ yû andjê tə̂ bïchuû nə̈ päkëdə̂: «Tchabâ kä ndə̂ nyê pu tchë?» Andjë tô rə̂ päkëdə̂: «Jezü, akrə gö ndə̂ Näzärête kä ndə̂ ârâ pu tchë.» 8Jezü tô rə̂ sə̈ andjê päkëdə̂: «Më tô rə̂ sə̈ nyê nə̂ päkëdə̂: ‹Mëmê kä âtə.› Âdə mëmê kä ndə̂ nyê pu mê, nyë gbötə̂ adɨ̂ azü nə̈ andjë gû etə̂.»
9Rə nə̈ wütu ndə̂kə̂ pa pö ndə̂ Jezü tô rə̂ mbo gundə̂sə̂ nə̈, tche tö rə̂ alême päkëdə̂: «Andjanə̈ ndə̂ mo kʉ̂ andjê sə̈ mê, ngânə̈ balë lə̂ gûtə̂ andjê yûâbo-a.» 10Chemôn-Pîêre kä alême la besala lə̂ wû tə̂ yê, tche gbɨ̂tɨ rə̂ lə̂ kʉ̂kâ nə̈, kə̈ bhî earə̂ kua ndə̂ gbölö earə̂ kə̂ wa ngela sə̈ Ndjapä la rə̂ ânyë kə̈ ngâla tü yê ndjrâ də ndôkö. Rə̈ earə̂ kua nə̈ lâme wü pä Mälëkûse. 11Käko Jezü tô rə̂ sə̈ Pîêre päkëdə̂: «Ka la besala ndə̂ zə̈ ëlə̂ kʉ̂kâ nə̈ ngbânə̈. Mo wüntî pä kangûchi yûkü ndə̂ Bha mê zâ rə̂ sə̈ mê ndə̂kə̂ ndjo rə̂ lâme, më wâbo ndə̂kə̂ ndjo rə̂?»
A ë la Jezü atə̂ tchâtchu Hâne
(Mat 26.57-58; Mar 14.53-54; Luk 22.54)
12Pânə̈ kpûlû aturûgu ndə̂ Rômo, la makündji ndə̂ andjê, la aturûgu ndə̂ ajuîfu zâ Jezü, kə̈ î tchë la wû kömä. 13Andjë ê la tchë dokʉ̈tchê bhândə̂ Hâne, bha ɛ̈chë ndə̂ Käyîfu, gbölö earə̂ kə̂ wa ngela sə̈ Ndjapä lə̂ ngû nə̈ lâme. 14Käyîfu kä ndə̂ âzâ wängö alême sə̈ ajuîfu päkëdə̂: «Ädäka ndə̂kə̂ pa ngâ akrə balë tchu lə̂ kpâlâ azü gö nə̈.»
Pîêre vüsə̂ Jezü
(Mat 26.69-70; Mar 14.66-68; Luk 22.55-57)
15Chemôn-Pîêre la ngâ djisîpili balë zâ tchêngbâ Jezü. Gbölö earə̂ kə̂ wa ngela sə̈ Ndjapä wûnsə̂ djisîpili nə̈ lâme nə̂, djisîpili nə̈ lâme lî ngbâ Jezü atə̂lə̂ gbadja ndə̂ gbölö earə̂ kə̂ wa ngela sə̈ Ndjapä. 16Pîêre sə̂ də sûwu ndola manda gbadja nə̈. Djisîpili ndə̂ gbölö earə̂ kə̂ wa ngela sə̈ Ndjapä ndə̂ tche wûnsə̂ yê lâme wûtu, kə̈ tô pö sə̈ ɛ̈chë ndə̂ tche wun tchô pâ manda gbadja nə̈, ânyë tche gbôtə̂ Pîêre ndə̂kə̂ pa tche li. 17Ɛ̈chë ndə̂ tche wun tchô pâ manda gbadja lâme tô rə̂ sə̈ Pîêre päkëdə̂: «Momö ndjë gbɛ̂, mo wätə̂ ngâ akrə lə̂ gûtə̂ adjisîpili ndə̂ köchë âtə!» Pîêre tô rə̂ päkëdə̂: «Ɛ̂n-ɛ̈n! Më wâbo tə̂ djisîpili ndə̂ yê-a.»
18A-earə̂ kua la aturûgu ndə̂ gbölö nda Ndjapä ngbô wo ndə̂kə̂ sə tâ, bëte zɨ kä lakə̂ mbo. Pîêre gîtə̂ yê ndə̂kə̂ sə ndro wo nə̈ lə̂ gûtə̂ andjê.
Gbölö earə̂ kə̂ wa ngela sə̈ Ndjapä yü Jezü la apö
(Mat 26.59-66; Mar 14.55-64; Luk 22.66-71)
19Gbölö earə̂ kə̂ wa ngela sə̈ Ndjapä yû Jezü la pö pâ adjisîpili ndə̂ yê, lakə̂ nyisə̂ rə ndə̂ yê. 20Jezü tô rə̂ sə̈ tchë päkëdə̂: «Më tö pö kraâ tchâtchu azü logbɛ̂, më kä lakə̂ nyisə̂ rə kulə̂ anda kə̂ voga Ndjapä, ndjë lə̂ gbölö nda Ndjapä, sə̂ tchô ndə̂ ajuîfu pala tchê tə̂ andjê tâ. Më tôâbo pö lə̂ hûɛ̂-a. 21Mo yü mê la pö bëte giamâ? Amö yu azü ndə̂ andjë djê mê, arə ndə̂ më tô pö ndə̂nə̈ lâme, andjë wûnsə̂ nə̈ nə̂.» 22Ndə̂ Jezü tô pö lâme käko, ngâ turûgu ndə̂ tche sə̂ ndola tchë rʉ̂â ngälâ yê, kə̈ tô rə̂ päkëdə̂: «Mo to pö sə̈ gbölö earə̂ kə̂ wa ngela sə̈ Ndjapä käko-ë?» 23Jezü tô rə̂ sə̈ tchë päkëdə̂: «Âdə mê âto ngbongbo pö, amö nyisə̂ nə̈, praâbalë âdə mê âto pö la köbo nə̈, bëte giamâ kä ndə̂ mo bhî mê?» 24Pânə̈ Hâne wân Jezü sə̈ Käyîfu gbölö earə̂ kə̂ wa ngela sə̈ Ndjapä, dëkë gbô tchë kä lə̂ wû kömä ndə̂ a î tchë la rə̂.
Pîêre kâ vûsə̂ Jezü
(Mat 26.71-75; Mar 14.69-72; Luk 22.58-62)
25Dëkë gbô Chemôn-Pîêre kä ndro wo nə̈, ngâ akrə yû tchë päkëdə̂: «Momö ndjë gbɛ̂ mo wätə̂ ngâ djisîpili ndə̂ köchë âtə?» Pîêre vûsə̂ nə̈, kə̈ tô rə̂ päkëdə̂: «Ɛ̂n-ɛ̈n, më wâbo tə̂ djisîpili ndə̂ yê-a!» 26Ngâ earə̂ kua ndə̂ gbölö earə̂ kə̂ wa ngela sə̈ Ndjapä, ndə̂ tche wâtə̂ akrə pâ mawo ndə̂ köchë ndə̂ Pîêre ngâla tü yê lâme, tche yû Pîêre päkëdə̂: «Âdə̂âbo momö kä ndə̂ më wûn mö la tchë bhâlə̂ kɨ̈ndɨ̈ lâme?» 27Pîêre kâ vûsə̂ nə̈, posə̂nə̈ kö ngötö kɨ̂.
A ë la Jezü atə̂ tchâtchu Pïlâte
(Mat 27.1-2,11-14; Mar 15.1-5; Luk 23.1-5)
28Po mbatchâ, andjë zâ Jezü bhândə̂ Käyîfu kə̈ ê la tchë bhâlə̂ gbadja ndə̂ goverenëre ndə̂ Judë. Agbölö azü gö ndə̂ ajuîfu lîâbo atə̂lə̂ gbadja nə̈-a, bëte andjë nyîâbo ndə̂kə̂ wa la kâkpö lə̂ la Ndjapä ânyë kə̂ zɨ kɨ̈zɨ̂ Pâke-a. 29Bëte rə̂ kä ndə̂ Pïlâte wûtu, kə̈ gbô andjê, kə̈ yû andjê päkëdə̂: «Pö giamâ kä ndə̂ nyë yî rə̂ lə̂ küma köchë âtə?» 30Andjë tô rə̂ sə̈ tchë päkëdə̂: «Âdə tche âmboabô ngbongbo rə mbô-ê, ârâ nəabô la tchë sə̈ mö tee-a.» 31Pïlâte tô rə̂ sə̈ andjê päkëdə̂: «Nyënyê la tə̂ nyê, nyë zä tchë kə̈ wâ ngbanga pâ yê gundə̂sə̂ ndïɛ̈ ndə̂ nyê.» Praâbalë ajuîfu kâ tô rə̂ päkëdə̂: «A zâbo köbo sə̈ ârâ ndə̂kə̂ won akrə-a.»
32Rə lâme wütu käko ndə̂kə̂ pa pö ndə̂ Jezü tô rə̂ alême, ndə̂kə̂ nyisə̂ köbo ndə̂ tchê tchuadje la rə̂ mbo gundə̂sə̂ nə̈. 33Pïlâte lî bhâlə̂ gbadja nə̈ kə̈ ê Jezü, kə̈ yû tchë päkëdə̂: «Mo də̈ gbïɛ̈ ndə̂ ajuîfu?» 34Jezü tô rə̂ ndə̂nə̈ päkëdə̂: «Pö ndə̂ mo yû mê la rə̂ lâme tö bhândə̂ zə̈ la tə̂ zə̈? Âdəndjë rə̂ pä ngâ akrə kä ndə̂ âtô pö nə̈ lâme pâ mê sə̈ mö.» 35Pïlâte tô rə̂ ndə̂nə̈ sə̈ tchë päkëdə̂: «Mëmê, më wätə̂ juîfu? Azü gö ndə̂ zə̈ la tə̂ zə̈, la agbölö a-earə̂ kə̂ wa ngela sə̈ Ndjapä kä ndə̂ ânə̂ la mö sə̈ mê! Giamâ kä ndə̂ mo mbô rə̂?» 36Jezü tô rə̂ ndə̂nə̈ sə̈ tchë päkëdə̂: «Gbölö gö-gbïɛ̈ ndə̂ mê wâbo bêche âtə-a; âdə Gbölö gö-gbïɛ̈ ndə̂ mê âwa alême bêche âtə, dëkë azü ndə̂ mê âmbo kʉ̈ʉ̈ alême ndə̂kə̂ pa a gboabô gbôtə̂ mê tchânə̂ agbölö azü gö ndə̂ ajuîfu-î. Gbölö gö-gbïɛ̈ ndə̂ mê wâbo tchâtə-a.» 37Käko Pïlâte tô rə̂ sə̈ tchë päkëdə̂: «Mo wätə̂ gbïɛ̈?» Jezü tô rə̂ ndə̂nə̈ sə̈ tchë päkëdə̂: «Momö kä ndə̂ âtô rə̂ pä më wätə̂ gbïɛ̈. A zɨ̈ mê ânyë më nə̂ atə̂ bêche âtə ndə̂kə̂ nyisə̂ lëge pö sə̈ azü. Akrə ndə̂ tche wâtə̂ akrə ndə̂ lëge pö, tche djë ma mê.» 38Pïlâte tô rə̂ sə̈ tchë päkëdə̂: «Lëge pö nə̈ wätə̂ giamâ?»
A wä ngbanga kuzü lə̂ küma Jezü
(Mat 27.15-31; Mar 15.6-20; Luk 23.13-25)
Pâ pö nə̈ lâme, Pïlâte kâ wûtu, kə̈ gbô agbölö azü ndə̂ ajuîfu kə̈ tô rə̂ sə̈ andjê päkëdə̂: «Më gbôâbo ngâ pö balë lə̂ küma köchë âtə-a. 39Batə̂ rə̂ ndə̂ nyê mbo tchê rə̂ lə̂ gö ndə̂ nyê ndə̂kə̂ pa më ji ngâ akrə sə̈ nyê lə̂ lö kpülü ndə̂ Pâke lâme, käko nyë nyïndə̂ nə̈ pä më ji gbïɛ̈ ndə̂ ajuîfu sə̈ nyê?» 40Azü nə̈ sə̂ lakə̂ ta wârə̂ päkëdə̂: «Ɛ̂n-ɛ̈n, âdə̂âbo tchanə̈ lâme-a, praâbalë Bäräbâse kä ndə̂ mo ji tchë!» Dëkë, Bäräbâse wätə̂ ngbongbo akrə.
Currently Selected:
Jâan 18: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
