Lûke 16
16
Ndoka pâ ngbongbo earə̂ kə̂ bata rə
1Jezü tô rə̂ sə̈ adjisîpili ndə̂ yê päkëdə̂: «Ngâ earə̂ rə alême kä tâ ndə̂ tche wâ la ngâ akrə ndə̂ tche zâ tchë ndə̂kə̂ wün tchô pâ arə ndə̂ yê. Azü nə̂ kə̈ tô rə̂ sə̈ earə̂ rə lâme pä earə̂ kua ndə̂ yê kä lakə̂ ndɨ arə ndə̂ yê. 2Gbölö akrə lâme ê earə̂ kua nə̈, kə̈ tô rə̂ sə̈ tchë päkëdə̂: ‹Pö giamâ kä ndə̂ më djê rə̂ tə̂ zə̈ kâkë? Amö nyisə̂ tchêngbâ kə̈ bata rə ndə̂ zə̈ sə̈ mê! Bëte më nyî bata ndə̂nə̈ pä mo ka wûn tchô pâ arə ndə̂ mê-a.› 3Earə̂ kə̂ bata rə lâme tô rə̂ bhâtə̂ su yê päkëdə̂: ‹Ndə̂ gbölö akrə ndə̂ mê nyîndə̂ kə̂ ji mê tə̂ ma kua âtə, më âmbo atöko? Më wâbo la gbôgbô ndə̂kə̂ djo kɨ̈ndɨ̈-a, ganô ndə̂kə̂ mbo jêndê pâ köbo mbö mê mbö. 4Më wûnsə̂ rə ndə̂ mê mbo rə̂ nə̂! Âdə a âji mê tə̂ ma kua nə̂, azü zadje mê bhândə̂ andjê!› 5Earə̂ kə̂ bata rə lâme ê azü ndə̂ geda ndə̂ gbölö akrə ndə̂ yê wâ lə̂ küma andjê balë balë gbɛ̂. Tche yû dokʉ̈ earə̂ geda nə̈ päkëdə̂: ‹Geda ndə̂ gbölö akrə ndə̂ mê wä lə̂ küma zə̈ atöko?› 6Earə̂ geda nə̈ tô rə̂ päkëdə̂: ‹Tûku ndə̂ kâdâ ngbangbo balë.› Earə̂ kə̂ bata rə nə̈ tô rə̂ päkëdə̂: ‹Mbëtï geda ndə̂ zə̈ kä âtə. Amö sə bêche gasa-ê, kə̂ mbo rə̂ la mbëtï nə̈ pä äwä ngbâ tə̂ azü bïchuû la lə̂ könô gbɛ̂.› 7Pânə̈ tche yû ngânə̈ päkëdə̂: ‹Ânyë momö, andə̂ zə nə̈ wä atöko?› Earə̂ geda nə̈ tô rə̂ päkëdə̂: ‹Sâke ndə̂ ndjî kändä ngbangbo balë.› Earə̂ kə̂ bata rə nə̈ tô rə̂ sə̈ tchë päkëdə̂: ‹Mbëtï geda ndə̂ zə̈ kä âtə. Amö mbo rə̂ la mbëtï nə̈ päkëdə̂: Äwä sâke ndə̂ ndjî kändä tə̂ azü vöanə̈.› 8Gbölö akrə#16.8 Gbölö akrə nə̈: Änyïndə̂ kə̂ to rə̂ pä gbölö ndə̂ earə̂ kə̂ wün tchô pâ arə, ndə̂ âtô pö ndə̂ Jezü la tə̂ yê. ndə̂ ngbongbo earə̂ kə̂ bata rə lâme gâmba tchë bëte tche mbö rə lâme la känyï. Bëte azü tchêbêche âtə wä la känyï lakə̂ mbo rə sə̈ angâ andjê lə̂ gbâtə̂ andjê, ârô azü ndə̂ Ndjapä ndə̂ andjë wâtə̂ azü ndə̂ ngbänga.»
9Jezü kä tô rə̂ sə̈ andjê päkëdə̂: «Andə̂ me nə̈, më tô rə̂ sə̈ nyë päkëdə̂: Arə tchêbêche âtə ndə̂ âbolo azü lâme, nyë kʉ̈ rə̂ kə̂ za könô sə̈ araagü nyê la rə̂, ânyë lo nə̈ ndə̂ arə nə̈ lâme âwabô wâ tchânə̂ nyê, andjê kʉadje nyê lə̂ anda ndə̂ logbɛ̂ logbɛ̂. 10Akrə ndə̂ tche mbô rə djîrə̂ la akpîɛ̂kpîɛ̂ arə, tchê mboadje ndjë rə djîrə̂ la agbölö arə. Akrə ndə̂ tche mbô mbə̈lï la akpîɛ̂kpîɛ̂ arə, tchê mboadje ndjë mbə̈lï la agbölö arə. 11Âdə nyê âmboabô rə mbô djîrə̂ la arə tchêbêche âtə ndə̂ âbolo azü, tchabâ kä ndə̂ âkʉadje alëge arə sə̈ nyê ndə̂kə̂ pa nyë wun tchô pânə̈? 12Âdə nyë âmboabô rə mbô djîrə̂ la arə ndə̂ âwâtə̂ andə̂ ngâ akrə, tchabâ kä ndə̂ âzadje rə sə̈ nyê ndə̂ âwâtə̂ andə̂ nye nə̈?
13«Earə̂ kua balë wâbo ndə̂kə̂ mbo kua sə̈ agbölö azü bïchuû-a. Bëte tchê koadje sə̂ ngânə̈ balë ânyë kə̂ nyiadje ndə̂ ngânə̈ balë. Âdəndjë rə̂ tchê zadje tə̂ yê gbɛ̂ sə̈ dokʉ̈ nə̈ ânyë kə̂ koadje sə̂ bïchuû nə̈. Âwâbo pä nyë mbo kua sə̈ Ndjapä, kə̂ ngbo rə̂ la kua makətche-a.»
Jezü tö angâ apö ngbî ngbî
(Mat 11.12-13; 5.31-32; Mar 10.11-12)
14 Afarizïɛ̈n djê pö lâme gbɛ̂, kə̈ sə̂ lakə̂ mo Jezü bëte andjë nyïndə̂ makətche tə̂ gbölösə̂nə̈. 15Jezü tô rə̂ sə̈ andjê päkëdə̂: «Nyë nyïsə̂ nə̈ lə̂ la azü pä nyë wätə̂ adjîrə̂ azü, praâbalë Ndjapä wûnsə̂ arə bhâlə̂ su nyê nə̂ gbɛ̂. Bëte rə ndə̂ azü wûn rə̂ batə̂ gbölö rə, Ndjapä wün andə̂ yê nə̈ batə̂ ngâ rə ndə̂ tche kôsə̂ nə̈.
16«Ndïɛ̈ ndə̂ Möyîze la a-Mbëtï ndə̂ a-earə̂ ndə̂ma Ndjapä nyïsə̂ köbo sə̈ azü zoo ëtə̂ lo nə̈ ndə̂ Jâan-Batîse wûtu. Ätö tə̂ lö nə̈ lâme, a nyïsə̂ Tchôtchô Pö ndə̂ Gbölö gö-gbïɛ̈ ndə̂ Ndjapä sə̈ azü, ânyë azü kä lakə̂ mbo gbôgbô gbɛ̂ ndə̂kə̂ li atə̂lə̂ nə̈. 17Sə̂nə̈ kâbo tə̂ tchêlafô la tchêbêche ndə̂kə̂ ro-a, praâbalë sə̂nə̈ kä tə̂ gbölösə̂nə̈ ndə̂kə̂ pa ngâ kpîɛ̂kpîɛ̂ rə kʉ̂tê Mbëtï-ndïɛ̈ balë yu.
18«Köchë balë balë gbɛ̂ ndə̂ tche grô ɛ̈chë ndə̂ yê ânyë kə̈ tô ngânə̈ ngbî, tche pû ɛ̈chë ndə̂ akrə nə̂. Ânyë akrə ndə̂ tche tô ɛ̈chë ngbâ ngâ köchë ndə̂ tche grô tchë, dëkë tche pû ɛ̈chë ndə̂ akrə nə̂.»
Earə̂ rə la Lazäre
19«Ngâ köchë alême kä tâ ndə̂ tche wâtə̂ earə̂ rə. Tche yü kütû atchôtchô alə̂ba ndə̂ gbölö makətche. Tche sə̈ la sə̂nə̈ logbɛ̂, ndjë kütû kpülü la kpülü kä lə̂ manda ndə̂ yê. 20Ngâ earə̂ yûkü ndə̂ rə̈ yê wû pä Lazäre kä lakə̂ lo tchâtchu manda ndə̂ yê, ndə̂ ku zâ kʉ̂tê yê gbɛ̂. 21Tche kä la gʉ ndə̂kə̂ zɨ akʉzro kɨ̈zɨ̂ ndə̂ âsə lakə̂ tu bêche tchâtchâ ɛ̈ gbalâka kɨ̈zɨ̂ ndə̂ earə̂ rə lâme. Pâ arə lâme gbɛ̂, aɛ̈vrô nə̈, kə̂ la tchêla ku tə̂ yê. 22Tə̂ngâlo, earə̂ yûkü nə̈ lâme tchu-î, ânyë aânje ndə̂ Ndjapä zâ tchë, kə̈ ê la tchë bhâ ndrotə̂ Abrahâmo#16.22 Nyë dɨ̈ 13.28.. Earə̂ rə lâme tchû ndjë-ê, ânyë a chî tchë. 23Earə̂ rə lâme wün yûkü tə̂ gbölösə̂nə̈ lə̂ tchô ndə̂ akuzü. Tche kênga la yê kə̈ wûn Abrahâmo la Lazäre tʉ̂rʉ tə̂ yê. 24Käko tche ôn ngbôô kə̈ tô rə̂ päkëdə̂: ‹Bha mê Abrahâmo, amö wun nyonyo mê, kə̂ wan Lazäre, tche ndro küma ɛ̈ könô yê lə̂ ngû, kə̂ za rə̂ pâ tïmï mê, bëte më wün yûkü lə̂ wo âtə tə̂ gbölösə̂nə̈.› 25Praâbalë Abrahâmo tô rə̂ päkëdə̂: ‹Bechë ndə̂ mê, äwäpä sə̂ pö âtə te lə̂ zə̈: Ndə̂ gbô mö ndə̂po la tʉ̈rʉ̂ la zə̈ bêche, mo gbö arə alême tə̂ gbölösə̂nə̈. Praâbalë andə̂ Lazäre, tche wün yûkü tə̂ gbölösə̂nə̈. Angaâtə, su yê zɨ̂ nə̂, ânyë momö ndə̂ zə nə̈, mo kä lakə̂ wun yûkü. 26Pâ arə lâme gbɛ̂, ngâ gbölö kudû ndə̂ tchə̂lə̂ nə̈ bû biî kä lə̂ gbâtə̂ nyê la ârâ. Käko azü dəndə̂ ârâ ndə̂ andjë nyîndə̂ kə̂ ro atə̂ndə̂ nyê, andjê gboabô köbo tee-a, ânyë andjanə̈ dəndə̂ nyê gboabô ndjë köbo ndə̂kə̂ wutu ëtə̂ ârâ-a.› 27Earə̂ rə lâme tô rə̂ päkëdə̂: ‹Më zä da zə̈ bha mê, batə̂ rə nə̈ də̂ käko, amö wan Lazäre bhâlə̂ nda ndə̂ bha mê. 28Bëte më kä la ayîngâ mê mïndûu, tche e kə̂ to rə̂ sə̈ andjê dokʉ̈tchê pä andjë nəabô nə̂ ndjë lə̂ tchô ndə̂ yûkü âtə-ê.› 29Abrahâmo tô rə̂ ndə̂nə̈ sə̈ tchë päkëdə̂: ‹Ndïɛ̈ ndə̂ Möyîze la mbëtï ndə̂ a-earə̂ ndə̂ma Ndjapä kä lə̂ gbâtə̂ andjê, äwäpä andjë dje andjê.› 30Earə̂ rə lâme tô rə̂ sə̈ tchë päkëdə̂: ‹Âdə̂âbo käko-a, bha mê Abrahâmo, praâbalë âdə ngâ akrə âto bhândə̂ akuzü ânyë kə̈ nə̂ pu andjê, käko andjê gboadje tə̂ bəndɨ kə̂ mbo rə ndə̂ andjê.› 31Praâbalë Abrahâmo tô rə̂ päkëdə̂: ‹Âdə andjë ânyiabô nyîndə̂ kə̂ djë ma Möyîze la a-earə̂ ndə̂ma Ndjapä, ânyë ngâ akrə tô ndjë bhândə̂ akuzü, kə̈ nə̂ lakə̂ tö pö sə̈ andjê, andjê djêâbo ma yê balë tee-a.›»
Currently Selected:
Lûke 16: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
