Matiyə̈ 12

Pö pâ lö sabäa

(Luk 6.1-5)

1La tchêngbâ nə̈ Jezü sə̂ lakə̂ ro kulə̂ angâ akɨ̈ndɨ̈ lə̂ lö sabäa. Gʉ nyû adjisîpili ndə̂ yê ânyë andjë jêtə̂ kə̂ krʉa andjî rəgʉ nə̈, kə̈ sə̂ lakə̂ zɨ rə̂. 2Ndə̂ afarizïɛ̈n wûn rə̂ käko, andjë tô rə̂ sə̈ Jezü päkëdə̂: «Adjisîpili ndə̂ zə̈ mbö rə ndə̂ ndïɛ̈ kôsə̂ nə̈ ndə̂kə̂ pa a mbo rə̂ lə̂ lö sabäa#12.2 Nyë dɨ̈ Eki 34.21..» 3Jezü tô rə̂ ndə̂nə̈ sə̈ andjê päkëdə̂: «Nyë dɨ̂âbo mbëtï pâ rə ndə̂ Davîdi mbô rə̂ tə̂ngâlo ndə̂ gʉ rôpâ yê alême la azü ndə̂ yê lâme? 4Köbo ndə̂ tche lî bhâlə̂ nda Ndjapä, ânyë andjë zɨ̂ amâpa ndə̂ a wâ rə̂ la ngela sə̈ Ndjapä. Ndïɛ̈ zâbo köbo sə̈ andjê ndə̂kə̂ zɨ mâpa nə̈-a, praâbalë kütû earə̂ kə̂ wa ngela sə̈ Ndjapä kä ndə̂ âwâ ndə̂kə̂ zɨ rə̂#12.4 Nyë dɨ̈ 1 Sam 21.2-7; Lev 24.9.. 5Âdəndjë rə̂, nyë dɨ̂âbo rə̂ lə̂ ndïɛ̈ ndə̂ Möyîze päkëdə̂, a-earə̂ kə̂ wa ngela sə̈ Ndjapä ndə̂ andjë âsə̈ mbo kua lə̂ gbölö nda Ndjapä, andjë mbôâbo rə gundə̂sə̂ lö sabäa nə̈-a. Lə̂ arə lâme gbɛ̂, a wâbo ngbanga lə̂ küma andjê-a#12.5 Nyë dɨ̈ Nomb 28.9-10.. 6Më tö rə̂ sə̈ nyê, ngâ rə kä tchâtə ndə̂ âwâ gbölö kə̈ rô gbölö nda Ndjapä. 7Âdə nyë âwunsə̂ pö ndə̂ Mbëtï Ndjapä tô rə̂ päkëdə̂: ‹Më nyïndə̂ nə̈ pä nyë wun nyonyo azü, praâbalë më kôsə̂ ngela ndə̂ agia#12.7 Nyë dɨ̈ Oze 6.6.›, dëkë azü ndə̂ andjë mbôâbô ngâ ngbongbo rə mbô-ê, nyë wâbo alême ndə̂kə̂ wa ngbanga lə̂ küma azü ndə̂ andjê-a. 8Bëte Modô ndə̂ Akrə wätə̂ gbölö akrə pâ lö sabäa.»

Köchë ndə̂ könô yê ndɨ̂

(Mar 3.1-6; Luk 6.6-11)

9Jezü âlafô tchâme kə̈ ê kə̈ lî bhâlə̂ nda kə̂ voga Ndjapä ndə̂ ajuîfu. 10Dëkë ngâ köchë kä bhâye ndə̂ könô yê ngêwele. Azü nyîndə̂ kə̂ za pö lə̂ küma Jezü, ânyë andjë yû tchë päkëdə̂: «Ndïɛ̈ zä köbo sə̈ akrə ndə̂kə̂ pa tche tcha akrə lə̂ lö sabäa?» 11Jezü tô rə̂ ndə̂nə̈ sə̈ andjê päkëdə̂: «Âdə ngâ akrə lə̂ gûtə̂ nyê âwâ la ngâ ɛ̈bro-ngbaga balë ânyë tche tê lə̂ gbölö kudû lə̂ lö sabäa, tchê gbɨtɨabô tchë tee ësûwu? 12Akrə rö ɛ̈bro-ngbaga tə̂ gbölösə̂nə̈! Käko, ndïɛ̈ zä köbo sə̈ akrə ndə̂kə̂ mbo tchôtchô rə tə̂ ngâ yê lə̂ lö sabäa.» 13Pânə̈ Jezü tô rə̂ sə̈ köchë lâme päkëdə̂: «Yorʉa tchə̂lə̂ könô zə̈.» Tche yôrʉa tchə̂lə̂ nə̈, ânyë könô yê dâka ëngbânə̈ batə̂ anə̈ dəkalâ. 14Afarizïɛ̈n wûtu kə̈ pâlatə̂ andjê, kə̈ djêtə̂ andjê lə̂ gbâtə̂ andjê tə̂ akänyï ndə̂kə̂ won Jezü.

Jezü wätə̂ earə̂ kua ndə̂ Ndjapä

15Ndə̂ Jezü djê pö ndə̂ rə ndə̂ andjë nyîndə̂ kə̂ mbo rə̂ tə̂ yê lâme, tche âlafô tchâme kə̈ rô ëtə̂. Agbölö kpûlû azü zâ tchêngbâ yê, ânyë tche tchâ tə̂kömbô ndə̂ andjê gbɛ̂. 16Tche gbɨ̂tɨ tü andjê tə̂ gbölösə̂nə̈ ndə̂kə̂ pa andjë toabô sə̂ yê tô ndə̂kə̂ pa azü wunsə̂ yê-ê. 17Käko ânyë pö ndə̂ Ezayï earə̂ ndə̂ma Ndjapä tô rə̂ mbô gundə̂sə̂ nə̈. Tche tö rə̂ päkëdə̂:

18«Nyë wünsa earə̂ kua ndə̂ mê, ndə̂ më dɨ̂ tchë,

tchanə̈ ndə̂ më nyîndə̂ yê tə̂ gbölösə̂nə̈,

ndə̂ su mê fû la tchë gbɛ̂.

Mê gboadje tə̂ Yingö ndə̂ mê pâ yê,

ndə̂kə̂ pa tche nyisə̂ djîrə̂ kə̂ wa ngbanga sə̈ azü gö ndə̂ andjë wâbô wâtə̂ ajuîfu.

19Tchê gabô ma yê la ngâ akrə tee-a,

âdəndjë ndə̂kə̂ ta wârə̂ lə̂ küma ngâ akrə-a.

A âdjeabô tchə̂lə̂ gɨ̈ yê lakə̂ mu apö pâ agbölö köbo tee-a.

20Tchê koakoabô ndjë tchə̂lə̂ wärə̈ ndə̂ âmômö tee-a,

tchê wrʉabô ndjë lâmba ndə̂ gbô ngʉ̂wo nə̈ sə̂ lakə̂ da tee-a,

zoo ndə̂kə̂ pa tche mbo rə̂ pä djîrə̂ kə̂ wa ngbanga ro masə̂nə̈.

21Azü ndə̂ andjë wâbô wâtə̂ ajuîfu zadje su andjê ndə̂kə̂ sə bëte tchë#12.21 Nyë dɨ̈ Eza 42.1-4, ndə̂ âwâ lə̂ bəndɨ Mbëtï Ndjapä la ma gerêke..»

Jezü grö angbongbo atchozö

(Mar 3.22-30; Luk 11.14-23)

22Käko a nə̂ la ngâ earə̂ föla ndə̂ tü yê bê, ndə̂ tche wâ la ngbongbo tchozö lə̂ yê ânyë Jezü tchâ tchë, âmbô rə̂ pä köchë lâme jêtə̂ kə̂ po lakə̂ wun tchô. 23Tchə̂lə̂ küma kpûlû azü nə̈ gbɛ̂ djîngɨli ânyë andjë tô rə̂ päkëdə̂: «Âdə̂âbo Modô ndə̂ Davîdi kä âtə?» 24Ndə̂ afarizïɛ̈n djê pö lâme, andjë tô rə̂ päkëdə̂: «Köchë âtə grö angbongbo atchozö kütû la gbôgbô ndə̂ Bëlëzëbûlu, makündji ndə̂ angbongbo atchozö!» 25Jezü wûnsə̂ pö bhâlə̂ su andjê ânyë kə̈ tô rə̂ sə̈ andjê päkëdə̂: «Gö-gbïɛ̈ gbɛ̂ ndə̂ azü tchə̂lə̂ nə̈ mbo kʉ̈ʉ̈ lə̂ gbâtə̂ andjê, gbölö gö-gbïɛ̈ nə̈ lâme ândɨ. Ngâ gö balë âdəndjë ngâ bûngrɨ̂ balë ndə̂ azü gö nə̈ âdəndjë azü lə̂ bûngrɨ̂ nə̈ âmbo kʉ̈ʉ̈ lə̂ gbâtə̂ andjê, andjê chichiabô tə̂ andjê tee-a. 26Âdə Satäa âgro Satäa, dëkë tche krʉ̂ tchə̂lə̂ tə̂ yê la tə̂ yê nə̂. Käko, gbölö gö-gbïɛ̈ ndə̂ yê nə̈ âkrʉ lafô tchïtchïnə̈ atöko? 27Âdə më âgro angbongbo atchozö la gbôgbô ndə̂ Bëlëzëbûlu, käko azü ndə̂ nyê nə̈ grö andə̂ andjë nə̈ angbongbo atchozö nə̈ la gbôgbô ndə̂ tchabâ? Azü ndə̂ nyê nə̈ la tə̂ andjê nyïsə̂ nə̈ päkëdə̂ pö ndə̂ nyê nə̈ wâbo lə̂ köbo nə̈-a! 28Praâbalë âdə lə̂ köbosə̂ Kpɨ̂ki Yingö kä ndə̂ mê gro angbongbo atchozö la rə̂, dëkë Gbölö gö-gbïɛ̈ ndə̂ Ndjapä wûtu nə̂ ëtə̂ nyê.

29«Âdə ngâ akrə ânyində̂ kə̂ li bhâ tchâalê ndə̂ ngâ gbôgbô köchë ndə̂kə̂ zɨ ngbä arə ndə̂ yê, äwäpä tche i tchë dokʉ̈tchê ânyë kə̂ zɨadje ngbä arə tchâalê nə̈. 30Akrə ndə̂ tche wâbô wâtə̂ tchandə̂ me nə̈, dëkë tche də̈ akrə ndə̂ tche kôsə̂ mê, ânyë akrə ndə̂ tche wâbô wâ ndə̂kə̂ pala rə la mê, dëkë tche wätə̂ akrə ndə̂ tchê ndjondjo tchə̂lə̂ rə katchôgbɛ̂. 31Bëte rə̂ kä ndə̂ më tô rə̂ sə̈ nyê päkëdə̂: Angbongbo rə gbɛ̂ lakə̂ dro tchô gbɛ̂ ndə̂ azü mbô rə̂ tə̂ Ndjapä, a âkoadje pö nə̈ lə̂ küma andjê, praâbalë akrə ndə̂ tche drô Kpɨ̂ki Yingö, a âkoabô pö nə̈ lə̂ küma yê tee-a. 32Âdə ngâ akrə âto ngbongbo pö tə̂ Modô ndə̂ Akrə, Ndjapä âkoadje pö nə̈ lə̂ küma yê. Praâbalë âdə akrə âto ngbongbo pö tə̂ Kpɨ̂ki Yingö, Ndjapä âkoabô pö nə̈ lə̂ küma yê tee-a, ndə̂ tchô angêta, âdəndjë lə̂ tchîsûwu ndə̂ ânə.»

Yö la lêlê nə̈

(Luk 6.43-45)

33«Âdə ngâ yö âwatə̂ tchôtchô nə̈, lêlê nə̈ âwadje ndjë tə̂ tchôtchô nə̈. Âdə yö âwatə̂ ngbongbo nə̈, lêlê nə̈ wadje ndjë tə̂ ngbongbo nə̈. Bëte a wünsə̂ yö tə̂ lêlê nə̈. 34Nyënyê ndə̂ akângê âtə! Nyë âto atchôtchô pö me atöko ndə̂ nyë wâtə̂ angbongbo azü âtə? Bëte rə ndə̂ ârôpâ nə̈ bhâlə̂ su ngâ akrə kä ndə̂ âwutu lə̂ ma yê. 35Tchôtchô akrə wütu la tchôtchô rə ndə̂ âwâ bhâlə̂ su yê. Ngbongbo akrə wütu la ngbongbo rə ndə̂ âwâ bhâlə̂ su yê. 36Më tö rə̂ sə̈ nyê: Tə̂ lo kə̂ wa ngbanga, azü âtoadje apö pâ awünwün apö ndə̂ andjë tô rə̂ alême. 37Kütû lə̂ köbosə̂ pö ma zə̈ kä ndə̂ mô wadje tə̂ djîrə̂ akrə, âdəndjë lə̂ köbosə̂ pö ma zə̈ kä ndə̂ a wa ngbanga lə̂ küma zə̈.»

Azü yükû nə̈ ndə̂kə̂ wun ngâ kpɨ̈ngbɨ̈ rə

(Mar 8.11-12; Luk 11.29-32)

38Pânə̈ angâ a-earə̂ kə̂ nyisə̂ ndïɛ̈ la angâ afarizïɛ̈n tô rə̂ sə̈ Jezü päkëdə̂: «Earə̂ kə̂ nyisə̂ rə, ârâ nyïndə̂ nə̈ pä mo mbo ngâ kpɨ̈ngbɨ̈ rə ârâ wûn rə̂.» 39Jezü tô rə̂ ndə̂nə̈ sə̈ andjê päkëdə̂: «Azü ndə̂ tchô angêta də̈ angbongbo azü, andjë nyîâbo ndə̂kə̂ dje pö ma Ndjapä-a. Andjë yükû nə̈ pä më mbo ngâ kpɨ̈ngbɨ̈ rə. Andjê wun-abô rə̂ tee-a, kütû kpɨ̈ngbɨ̈ rə ndə̂ Ndjapä mbô rə̂ balë lə̂ köbosə̂ earə̂ ndə̂ma Ndjapä Jönâse lâme. 40Käko batə̂ rə̂ ndə̂ Jönâse mbô lö vötaâ la tchə̂lə̂ bütchî vötaâ bhâlə̂ gbölö giangû lâme. Modô ndə̂ Akrə âmboadje ndjë lö vötaâ la tchə̂lə̂ bütchî vötaâ lə̂ cho. 41Tə̂ lo kə̂ wa ngbanga, azü gö ndə̂ Nïnîve adjelafô la azü ndə̂ tchô angêta ndə̂kə̂ wa ngbanga pâ andjê, bëte andjë gbôtə̂ bəndɨ kə̂ mbo rə ndə̂ andjê lə̂ köbosə̂ pö Ndjapä ndə̂ Jönâse mû rə̂ nə̂. Tchâtə, ngâ akrə ndə̂ tche wâ gbölö kə̈ rô Jönâse kä tâ! 42Tə̂ lo kə̂ wa ngbanga, ɛ̈chë ndə̂ tche wâtə̂ ɛ̈chë-gbïɛ̈ lə̂ gö ndə̂ âwâ də ginikî adjelafô ndə̂kə̂ krʉ tchâtchu azü ndə̂ tchô angêta ndə̂kə̂ wa ngbanga lə̂ küma andjê, bëte tche tö lə̂ ngrɨ̈ngrɨ̈ tchô ânyë kə̈ nə̂ ndə̂kə̂ dje pö ndə̂ gbïɛ̈ Salomön ndə̂ küma yê wâ lanə̈ tə̂ gbölösə̂nə̈. Tchâtə, ngâ akrə ndə̂ tche wâ gbölö kə̈ rô Salomön kä tâ!»

Ngbongbo tchozö ndə̂ tche dôtə̂ yê atə̂lə̂ akrə

(Luk 11.24-26)

43«Âdə ngâ ngbongbo tchozö âwutu lə̂ ngâ akrə nə̂, ngbongbo tchozö lâme âsə me lakə̂ wrʉ lə̂ kpaɛ̈gâ lakə̂ pu sə̂ tchô ndə̂ tche yatə̂ yê tâ. Âdə tche âgboabô tchô nə̈ gbô-ê, 44tche âto rə̂ päkëdə̂: ‹Më âdotə̂ mê atə̂lə̂ nda ndə̂ mê, ndə̂ më wûtu lə̂nə̈ lâme.› Ndə̂ tche kâ âtə̂lə̂ nda nə̈, tche gbôâbo ngâ rə tchâalê nə̈-a, dëkë a grô rə̂ kə̈ nyîkrə tchə̂lə̂ nə̈ nə̂ gbɛ̂. 45Tchâme, tche âkä e, kə̂ kʉ angâ angbongbo atchozö mïndûu manə̈ bïchuû ndə̂ andjë rô tchë la gbôgbô, andjë kangbâ andjê, kə̂ sə gbɛ̂ ë tchâalê nə̈. Pânə̈ rə nə̈ âkä watə̂ köchë lâme ngbo kə̂ ro anə̈ dokʉ̈tchê. Rə ndə̂ âwutuadje tə̂ angbongbo azü ndə̂ tchô angêta kä lâme.»

Anyï Jezü la ayîngâ yê

(Mar 3.31-35; Luk 8.19-21)

46Ndə̂ gbô Jezü ndə̂po lakə̂ to pö sə̈ kpûlû azü nə̈, anyï nə̈ la ayîngâ yê wûtu. Andjë sə̈ bhâ sûwu lakə̂ pu köbo ndə̂kə̂ to pö sə̈ tchë. 47Ngâ akrə tô rə̂ sə̈ Jezü päkëdə̂: «Anyï zə̈ la ayîngâ zə̈ kä sûwu, andjë nyïndə̂ kə̂ to pö sə̈ mö.» 48Jezü tô rə̂ ndə̂nə̈ sə̈ akrə nə̈ lâme päkëdə̂: «Anyï mê də̈ tchabâ? Ayîngâ mê də̈ andjanə̈bâ?» 49Pânə̈ tche nyîsə̂ adjisîpili ndə̂ yê la könô yê kə̈ tô rə̂ päkëdə̂: «Nyë wünsa anyï mê la ayîngâ mê kä âtə! 50Âdə akrə âmbo rə ndə̂ su Bha mê ndə̂ tche sə̂ bhâ lafô nyîndə̂ nə̈, akrə nə̈ lâme də̈ yîngâ mê, nyînə̂ mê la anyï mê.»

Currently Selected:

Matiyə̈ 12: lnl

Highlight

Copy