थु़र्मा 4
4
पत्रुस नुङ यूहन्ना डोक्पु घ्रो़म्दीकु ङादोडा
1पत्रुस नुङ यूहन्ना सेर्पा मु़चु़मिमनुङ जेत्तोङा बेच्चिलो डु़म्लाचो़मिम, सो़रनेमडाम कप्तान नुङ सदुकीमिम मेसिन्डा रोम्डी। 2येशू सिमुलाम बम्गेम्डिम ल्वा र्वाक्ची, मा सिपामिम वो येशूडा बम्गेट्मी र्वाक्साका पत्रुस नुङ यूहन्नाका सीट्चिमिमका मेर्मिमकाम छो़म उनी छोक्चो बक्ताम बाइडा। 3मेकोतिमा मेर्मिमका पत्रुस नुङ यूहन्ना चु़म्मिडिमा उ दिकामसम्म चम्डीची, हेङालोने मेकोतिलो दुङमा र्याक्ल्याड्डाम बाइडा। 4लावो मेर्चिपकु सिजेम थो़पामिमगोडा हापाका ङा थो़र लु़म्डी, मा मे थो़रलु़पा मु़चु़मिम ङो धु़मसङ (५,०००) कोति दु़म्मिडी।
5उ दिकाम नेम यहूदीमिमकु साखामचो़मिम, ङाउमिम नुङ उनी डु़म्ला सीपा पातु़म्रीमिम यरूशलेमडा खोम्सिम्डिम बाइडा। 6डोक्पु ङाउ डु़म्लाचो़ हन्नास, कैयाफा, यूहन्ना अलेक्जेन्डर नुङ डोक्पु ङाउ डु़म्लाचो़कु नेमडाममिम खोत्लेङा मेसिन्डा खोम्सिम्डिम बाइडा। 7मेकोतिमा मेर्मिमका पत्रुस नुङ यूहन्ना उनी ङादोडा येम्सिबेट्मिडिमा हिलाबेम्डी, “उहेम यु़मका डे सु़कु नङडा डे गाची ओ खेल ब्लेट्पा मु़चु़लाई सबेच्चिम?”
8पत्रुस माम्चु़नी-पेलका लु़न्स्तामा मेर्मिमनुङ र्वाक्ता, “ए मु़चु़मिमकु साखामचो़ नुङ ङाउनी, 9उ खेल ब्लेट्पा कोङ मु़चु़डला न-थो़म रेम्बेसाका जो़पा खारी बेच्चोकोम बु। मेराम हेसाका सस्ताम र्वाक्पा दुथाम आनेप गानी हिला बोचिकिनी माला, 10इस्राएलडाम खोत्ले मु़चु़का नुङ गानी खोत्लेका चनी, गानी येशूलाई क्रूसडा चेट्नी, लावो माम्चु़नीका गुमीलाई सिमुलाम फम्डी, ओराम मु़चु़ मेराम नासरतडाम येशू ख्रीष्टकु नङडा ङा सस्ता, मा इनी ङादोडा येम्तासिमिम बु।
11गुमी ‘मेराम लुङ ङा सो़,
उहेमलाई गानी नेम बनेपामिमका पार्निम बाइडा,
मेराम ओम्लो नेमकु फारगोयु़म डोक्पु सुरलुङ दु़स्ताम बु।’#भज ११८:२२
12येशू ख्रीष्टका कोङङा सेल्मु चाप्सामी, वाङमिम सु़का वो सेल्मु मेचाप्सा, हेङालोने सुबुडाम मु़चु़मिमगोडा गुइ सेल्सिमुलाई उहेम वो नङ ग्वाक्मा मिबु।”
13मेर्मिमका पत्रुस नुङ यूहन्ना थेट्पा-चक्पा मु़चु़ ने मेएँ र्वाक्पा चम्डी, लावो मेर्चिप मेङिसाका जेच्चिम ल्वाम्डिमा मेर्मिम ङाङाया दु़म्मिडी। मेकोतिमा मेर्चिप येशूनुङ बाथाल्ची र्वाक्पा वो मेर्मिमका चम्डी।
14लावो मे सस्ताम मु़चु़ मेर्चिपनुङ येम्तासिट्पा ल्वाम्डी, मा मेर्मिमका हाम वो र्वामु मेचाप्मिवा। 15मेम्मिमका पत्रुस नुङ यूहन्ना मे डोक्पु घ्रो़म्दीलामका पाखाथो़ थु़र्बेट्मिडी, मा मेर्मिमका आरे र्वाक्पा मुलु़ बोमु चो़म्मिडी, 16“ओर्चिपलाई गुइ हे बिइ? हेङालोने यरूशलेमडाम खोत्ले मु़चु़का ओर्चिपका बेच्चिम हेल्लो वो मेल्वाम्मा खारी ल्वाम्डिम बु, मा मेराम गुइ मेएँ र्वामु मेचाप्सी। 17लावो ओराम ल्वा वाङथो़ मेफोन्सिनु़ र्वाक्साका ‘आनेपडाम्मा ओराम नङडा गाची सु़नुङ हाम वो मेर्वाक्ची वो’ र्वाक्साका ङिमसान्मुचि बासी।”
18मेकोतिमा मेर्मिमका पत्रुस नुङ यूहन्ना येट्मिडिची मा “मामासो़! आनेपडाम्मा येशूकु नङडा को सि वो मेजेची, मा हाम वो मेसीचिमी वो” बेम्डिची।
19लावो पत्रुस नुङ यूहन्नाका मेर्मिमनुङ र्वाक्ची, “माम्चु़नीका र्वामिमिम थो़मु डिसाका गानी र्वानिमिम थो़मु माम्चु़नीकु मिक्सीलामडा हाङकोम जो़पा दु़म गानी इनी त्वाका ङा मिम्नी। 20हेङालोने गुचुकु ल्वाच्चोकोम नुङ थो़च्चोकोम ल्वा मेसो़साका बुमु ङा मेचाम्चुकु।” 21मेर्मिमका मेर्चिपलाई देन्दे ग्वामु मेजो़पा ल्वा हाम वो मेल्वामिवामका ङिम साट्मिडिचिमा थु़र्सोम्डिची। हेङालोने हाम खारी दु़स्ताम बाइडा मेरामकु दुथाम खोत्ले मु़चु़मिमका माम्चु़नीकु नङ कोम्डिम बाम्डी। 22उहेम मु़चु़ यु़मखारीलामका सबेच्चिम बाइडा, मेरामका ब्ल धु़म (४०) थ हेम्डु़म बाइडा।
उनी सो हन्मु थो़रलु़पामिमका बेम्डिम सो़म्दी
23पत्रुस नुङ यूहन्ना यहूदीमिमकु डोक्पु घ्रो़म्दीलामका लुक्चि मेडे उची त्वाकु ङोप्सो़मिमकाडा रोक्ची। मेकोतिमा ङाउ डु़म्लाचो़मिम नुङ ङाउमिमका र्वाम्डिम खोत्ले ल्वा मेर्मिमनुङ सो़च्ची। 24मेराम ल्वा थो़म्डिमा मेर्मिम खोत्ले कोले न-थो़मकाम दु़म्साका डोक्पु लो़लामका सो़म्दी बेम्डी, “सुबु, पाह्री, दिरिदिन नुङ मेसिन्डा बाट्पामिम खोत्ले प्रङपा माम्चु़नी#प्रस २०:११; नहे ९:६; भज १४६:६, 25आकीमा ङाउ-खुउ इनीमा डु़ल्चो़ दाऊदकु सिलामका गानी इनी पेलका आरेसाका जेन्नी,
‘वाङसामामिम हेङा उनी छोक्चो बक्ता,
मा हेङा मु़चु़मिमका हाम ना हामकाम मुलु़ बेम्डी?
26मिप्रङमा नुङ गुमीका थुट्मिडिम
मेराम उनी चो़ मसीहकु#४:२६ ख्रीष्ट कोर्थो़लाम सुबुडाम हपमिम बम्डी,
मा साखामचो़मिम कोदेप खोम्सिम्डी।’#भज २:१-२
27“हेङालोने गानी थुट्निमा इनी नङका साट्निम इनी डु़ल्चो़ येशूकु कोर्थो़लाम हेरोद नुङ पन्तियस पिलातस, वाङसामामिम नुङ इस्राएलीमिम ओराम शहरडा ङा खोम्सिम्डिम बाइडा।#मत्ती २७:१-२; मर्क १५:१; लूक २३:१; ७:११; यूह १८:२८-२९ 28इनी न नुङ यु़मका ङादो ङा हाम दु़म्नु़ र्वाक्साका गानी बेन्निम बाइडा, मेर्मिमका मेमङा बेम्डी। 29मेम्मिमका माम्चु़नी, मेर्मिमकु ङिमसासी मिम्नी, मा इनी डु़ल्चो़मिमलाई मेङिसाका इनी सिजेम दो़पा बनेनिमी। 30नो़पामिम सबेन्मुलाई इनी ल्वा हम्नी, मा इनी नङका साट्मा नुङ इनी डु़ल्चो़ येशूकु नङडा छेखोपमिम नुङ यु़मखारीमिम रेम्बेनी।”
31आरेसाका मेर्मिमका सो़म्दी बोमु डु़म्मिडी, मा मेर्मिम खोम्सिडिम बाय रुड्डु़। मेकोतिमा मेर्मिम खोत्लेङा माम्चु़नी-पेलका लु़न्सिम्डी, मा मेर्मिमका माम्चु़नीकु सिजेम मेङिसाका ङा दो़म्डी।
थो़रलु़पामिमकु बोम्थाम खाप्ची
32थो़रलु़पामिम खोत्ले कोले न-गोकाम दु़म्मिडिम बाइडा, मा मेर्मिमगोडा सु़का वो उनी त्वाकु खाप्चीमिम ओराम आमा मेर्वाम्थाल्मिवा, लावो मेर्मिमनुङ हा-हाम बाट्पा खोत्लेङा खोत्लेका दो़साका मोम्थाल्मिडी।#थु़र्मा २:४४-४५ 33थु़र्मामिम छो़म सोनुङमा दु़म्तो येशू सिमुलाम आच्छाङा बम्गेम्डिम ङा र्वाक्साका हेल्लो लोवो सो़मु चो़म्मिडी, मा मेर्मिमडला माम्चु़नीकु दिदाम#४:३३ नेपाली ल्वाडा अनुग्रह छो़म डोक्पु बाइडा। 34मेर्मिमगोडा सु़लाई हामकाम वो खेरेला मेदु़स्थालावा, हेङालोने सु़-सु़नुङ ये-द, नेम-किम बाइडा, मेर्मिमका भ्रेट्मिडिमा मेर्मिमकु थि थु़र्मामिमकाडा रेन्थाल्मिडी। 35मेकोतिमा थु़र्मामिमलाई ग्वाम्थाल्मिडी, मा सु़-सु़लाई हा-हामकाम खेरेला दु़स्थाल्ला मेराम होम्साका मेर्मिमलाई ग्वाम्थाल्मिडी।
36साइप्रस नेब्दीडाम लेवी दोचो़डाम कोङ योसेफ नङकाम मु़चु़ बाइडा। मेरामलाई थु़र्मामिमका बारनाबास र्वाक्साका डान्थाल्मिडी (बारनाबास र्वाक्मा सो हन्बेट्पा तारापाचो़ सो़)। 37मेरामका उ ये-द भ्रेसाका मेरामकु थि रेड्डु़मा थु़र्मामिमकु ल्वाड्डा ग्वाक्तु़मी।
Currently Selected:
थु़र्मा 4: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
थु़र्मा 4
4
पत्रुस नुङ यूहन्ना डोक्पु घ्रो़म्दीकु ङादोडा
1पत्रुस नुङ यूहन्ना सेर्पा मु़चु़मिमनुङ जेत्तोङा बेच्चिलो डु़म्लाचो़मिम, सो़रनेमडाम कप्तान नुङ सदुकीमिम मेसिन्डा रोम्डी। 2येशू सिमुलाम बम्गेम्डिम ल्वा र्वाक्ची, मा सिपामिम वो येशूडा बम्गेट्मी र्वाक्साका पत्रुस नुङ यूहन्नाका सीट्चिमिमका मेर्मिमकाम छो़म उनी छोक्चो बक्ताम बाइडा। 3मेकोतिमा मेर्मिमका पत्रुस नुङ यूहन्ना चु़म्मिडिमा उ दिकामसम्म चम्डीची, हेङालोने मेकोतिलो दुङमा र्याक्ल्याड्डाम बाइडा। 4लावो मेर्चिपकु सिजेम थो़पामिमगोडा हापाका ङा थो़र लु़म्डी, मा मे थो़रलु़पा मु़चु़मिम ङो धु़मसङ (५,०००) कोति दु़म्मिडी।
5उ दिकाम नेम यहूदीमिमकु साखामचो़मिम, ङाउमिम नुङ उनी डु़म्ला सीपा पातु़म्रीमिम यरूशलेमडा खोम्सिम्डिम बाइडा। 6डोक्पु ङाउ डु़म्लाचो़ हन्नास, कैयाफा, यूहन्ना अलेक्जेन्डर नुङ डोक्पु ङाउ डु़म्लाचो़कु नेमडाममिम खोत्लेङा मेसिन्डा खोम्सिम्डिम बाइडा। 7मेकोतिमा मेर्मिमका पत्रुस नुङ यूहन्ना उनी ङादोडा येम्सिबेट्मिडिमा हिलाबेम्डी, “उहेम यु़मका डे सु़कु नङडा डे गाची ओ खेल ब्लेट्पा मु़चु़लाई सबेच्चिम?”
8पत्रुस माम्चु़नी-पेलका लु़न्स्तामा मेर्मिमनुङ र्वाक्ता, “ए मु़चु़मिमकु साखामचो़ नुङ ङाउनी, 9उ खेल ब्लेट्पा कोङ मु़चु़डला न-थो़म रेम्बेसाका जो़पा खारी बेच्चोकोम बु। मेराम हेसाका सस्ताम र्वाक्पा दुथाम आनेप गानी हिला बोचिकिनी माला, 10इस्राएलडाम खोत्ले मु़चु़का नुङ गानी खोत्लेका चनी, गानी येशूलाई क्रूसडा चेट्नी, लावो माम्चु़नीका गुमीलाई सिमुलाम फम्डी, ओराम मु़चु़ मेराम नासरतडाम येशू ख्रीष्टकु नङडा ङा सस्ता, मा इनी ङादोडा येम्तासिमिम बु।
11गुमी ‘मेराम लुङ ङा सो़,
उहेमलाई गानी नेम बनेपामिमका पार्निम बाइडा,
मेराम ओम्लो नेमकु फारगोयु़म डोक्पु सुरलुङ दु़स्ताम बु।’#भज ११८:२२
12येशू ख्रीष्टका कोङङा सेल्मु चाप्सामी, वाङमिम सु़का वो सेल्मु मेचाप्सा, हेङालोने सुबुडाम मु़चु़मिमगोडा गुइ सेल्सिमुलाई उहेम वो नङ ग्वाक्मा मिबु।”
13मेर्मिमका पत्रुस नुङ यूहन्ना थेट्पा-चक्पा मु़चु़ ने मेएँ र्वाक्पा चम्डी, लावो मेर्चिप मेङिसाका जेच्चिम ल्वाम्डिमा मेर्मिम ङाङाया दु़म्मिडी। मेकोतिमा मेर्चिप येशूनुङ बाथाल्ची र्वाक्पा वो मेर्मिमका चम्डी।
14लावो मे सस्ताम मु़चु़ मेर्चिपनुङ येम्तासिट्पा ल्वाम्डी, मा मेर्मिमका हाम वो र्वामु मेचाप्मिवा। 15मेम्मिमका पत्रुस नुङ यूहन्ना मे डोक्पु घ्रो़म्दीलामका पाखाथो़ थु़र्बेट्मिडी, मा मेर्मिमका आरे र्वाक्पा मुलु़ बोमु चो़म्मिडी, 16“ओर्चिपलाई गुइ हे बिइ? हेङालोने यरूशलेमडाम खोत्ले मु़चु़का ओर्चिपका बेच्चिम हेल्लो वो मेल्वाम्मा खारी ल्वाम्डिम बु, मा मेराम गुइ मेएँ र्वामु मेचाप्सी। 17लावो ओराम ल्वा वाङथो़ मेफोन्सिनु़ र्वाक्साका ‘आनेपडाम्मा ओराम नङडा गाची सु़नुङ हाम वो मेर्वाक्ची वो’ र्वाक्साका ङिमसान्मुचि बासी।”
18मेकोतिमा मेर्मिमका पत्रुस नुङ यूहन्ना येट्मिडिची मा “मामासो़! आनेपडाम्मा येशूकु नङडा को सि वो मेजेची, मा हाम वो मेसीचिमी वो” बेम्डिची।
19लावो पत्रुस नुङ यूहन्नाका मेर्मिमनुङ र्वाक्ची, “माम्चु़नीका र्वामिमिम थो़मु डिसाका गानी र्वानिमिम थो़मु माम्चु़नीकु मिक्सीलामडा हाङकोम जो़पा दु़म गानी इनी त्वाका ङा मिम्नी। 20हेङालोने गुचुकु ल्वाच्चोकोम नुङ थो़च्चोकोम ल्वा मेसो़साका बुमु ङा मेचाम्चुकु।” 21मेर्मिमका मेर्चिपलाई देन्दे ग्वामु मेजो़पा ल्वा हाम वो मेल्वामिवामका ङिम साट्मिडिचिमा थु़र्सोम्डिची। हेङालोने हाम खारी दु़स्ताम बाइडा मेरामकु दुथाम खोत्ले मु़चु़मिमका माम्चु़नीकु नङ कोम्डिम बाम्डी। 22उहेम मु़चु़ यु़मखारीलामका सबेच्चिम बाइडा, मेरामका ब्ल धु़म (४०) थ हेम्डु़म बाइडा।
उनी सो हन्मु थो़रलु़पामिमका बेम्डिम सो़म्दी
23पत्रुस नुङ यूहन्ना यहूदीमिमकु डोक्पु घ्रो़म्दीलामका लुक्चि मेडे उची त्वाकु ङोप्सो़मिमकाडा रोक्ची। मेकोतिमा ङाउ डु़म्लाचो़मिम नुङ ङाउमिमका र्वाम्डिम खोत्ले ल्वा मेर्मिमनुङ सो़च्ची। 24मेराम ल्वा थो़म्डिमा मेर्मिम खोत्ले कोले न-थो़मकाम दु़म्साका डोक्पु लो़लामका सो़म्दी बेम्डी, “सुबु, पाह्री, दिरिदिन नुङ मेसिन्डा बाट्पामिम खोत्ले प्रङपा माम्चु़नी#प्रस २०:११; नहे ९:६; भज १४६:६, 25आकीमा ङाउ-खुउ इनीमा डु़ल्चो़ दाऊदकु सिलामका गानी इनी पेलका आरेसाका जेन्नी,
‘वाङसामामिम हेङा उनी छोक्चो बक्ता,
मा हेङा मु़चु़मिमका हाम ना हामकाम मुलु़ बेम्डी?
26मिप्रङमा नुङ गुमीका थुट्मिडिम
मेराम उनी चो़ मसीहकु#४:२६ ख्रीष्ट कोर्थो़लाम सुबुडाम हपमिम बम्डी,
मा साखामचो़मिम कोदेप खोम्सिम्डी।’#भज २:१-२
27“हेङालोने गानी थुट्निमा इनी नङका साट्निम इनी डु़ल्चो़ येशूकु कोर्थो़लाम हेरोद नुङ पन्तियस पिलातस, वाङसामामिम नुङ इस्राएलीमिम ओराम शहरडा ङा खोम्सिम्डिम बाइडा।#मत्ती २७:१-२; मर्क १५:१; लूक २३:१; ७:११; यूह १८:२८-२९ 28इनी न नुङ यु़मका ङादो ङा हाम दु़म्नु़ र्वाक्साका गानी बेन्निम बाइडा, मेर्मिमका मेमङा बेम्डी। 29मेम्मिमका माम्चु़नी, मेर्मिमकु ङिमसासी मिम्नी, मा इनी डु़ल्चो़मिमलाई मेङिसाका इनी सिजेम दो़पा बनेनिमी। 30नो़पामिम सबेन्मुलाई इनी ल्वा हम्नी, मा इनी नङका साट्मा नुङ इनी डु़ल्चो़ येशूकु नङडा छेखोपमिम नुङ यु़मखारीमिम रेम्बेनी।”
31आरेसाका मेर्मिमका सो़म्दी बोमु डु़म्मिडी, मा मेर्मिम खोम्सिडिम बाय रुड्डु़। मेकोतिमा मेर्मिम खोत्लेङा माम्चु़नी-पेलका लु़न्सिम्डी, मा मेर्मिमका माम्चु़नीकु सिजेम मेङिसाका ङा दो़म्डी।
थो़रलु़पामिमकु बोम्थाम खाप्ची
32थो़रलु़पामिम खोत्ले कोले न-गोकाम दु़म्मिडिम बाइडा, मा मेर्मिमगोडा सु़का वो उनी त्वाकु खाप्चीमिम ओराम आमा मेर्वाम्थाल्मिवा, लावो मेर्मिमनुङ हा-हाम बाट्पा खोत्लेङा खोत्लेका दो़साका मोम्थाल्मिडी।#थु़र्मा २:४४-४५ 33थु़र्मामिम छो़म सोनुङमा दु़म्तो येशू सिमुलाम आच्छाङा बम्गेम्डिम ङा र्वाक्साका हेल्लो लोवो सो़मु चो़म्मिडी, मा मेर्मिमडला माम्चु़नीकु दिदाम#४:३३ नेपाली ल्वाडा अनुग्रह छो़म डोक्पु बाइडा। 34मेर्मिमगोडा सु़लाई हामकाम वो खेरेला मेदु़स्थालावा, हेङालोने सु़-सु़नुङ ये-द, नेम-किम बाइडा, मेर्मिमका भ्रेट्मिडिमा मेर्मिमकु थि थु़र्मामिमकाडा रेन्थाल्मिडी। 35मेकोतिमा थु़र्मामिमलाई ग्वाम्थाल्मिडी, मा सु़-सु़लाई हा-हामकाम खेरेला दु़स्थाल्ला मेराम होम्साका मेर्मिमलाई ग्वाम्थाल्मिडी।
36साइप्रस नेब्दीडाम लेवी दोचो़डाम कोङ योसेफ नङकाम मु़चु़ बाइडा। मेरामलाई थु़र्मामिमका बारनाबास र्वाक्साका डान्थाल्मिडी (बारनाबास र्वाक्मा सो हन्बेट्पा तारापाचो़ सो़)। 37मेरामका उ ये-द भ्रेसाका मेरामकु थि रेड्डु़मा थु़र्मामिमकु ल्वाड्डा ग्वाक्तु़मी।
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.