यूहन्ना 12
12
मरियमका येशूलाई तेल क्लक्तु़म
(मत्ती २६:६-१३; मर्कूस १४:३-९)
1सेल्सिक्पा नेममिम चाडकु रुलेम ङादो येशू बेथानिया देलडा रोम्डी। येशूका सिमुलामका फम्डिम लाजरस मेसिन्डा बाइथाल्ला। 2मेर्मिमका येशूलाई नेम्थाका बड बेट्मिडी। मार्थाका चापे-डुपे बु़डु़, मा गुमीनुङ पेप्डा गन्पामिमगोडाम लाजरस वो बाइडा। 3मेकोतिमा मरियमका हापा थिकाम भ्रपा मुर्नेम्पा मोरोचीकु तेल मानाकोङ कोति रेड्डु़मा अयु़डु़। मेम्मा उमा सेमका येशूकु खेल बक्तु़, मा मे भ्रपा मुर्नेम्पा तेल नेमगोडा खोत्लेथो़ मुर्नेम्स्ता।#लूक ७:३७-३८
4उनी सीसिपामिमगोडाम कोले यहूदा इस्करियोत उहेमका चङ्डा गुमीलाई भ्रेड्डु़ मेरामका र्वाक्ता, 5“ओराम भ्रपा मुर्नेम्पा तेल को थचेम कोलेकाम ज्याला कोतिम थिकाम बाइडा। ओरामलाई भ्रेन्मुमा मेराम खउलुङ उनी हाम वो मेबाट्पामिमलाई ग्वामु बासावा।” 6गुका आरे र्वाक्ताम ने उनी हाम वो मेबाट्पा मु़चु़मिमलाई ख्लो़पा नका र्वाक्ताम मेएँ गु खुचु़वा बाइडामका र्वाक्ताम। खउलुङकु फाजी गुका कुर्थाल्लु़मा मेलामका खुयु़थाल्लु़।
7येशूका र्वाम्डी, “गुलाई हाम वो मेर्वाक्नी, आमा मिरो़म क्लु़म्मुकाम लागि गुका आरे बु़डु़म। 8उनी हाम वो मेबाट्पामिम ने गानीनुङ हेल्लो लोवो दु़म्मी, लावो गो ने गानीनुङ हेल्लो लोवो मेदु़म्ङु।”#व्य १५:११
9मेकोतिलोङा येशू मेसिन्डा बुमी र्वाक्पा सेर्पा यहूदीका थो़म्डिमा रोम्डी। येशू बाम्डिमका कोङङा रोम्डिम मेएँ, लावो गुमीका सिमुलाम फम्डिम लाजरसलाई वो रेप्डा रोम्डिम बाइडा। 10मेम्मा ङाउ डु़म्लाचो़मिमका लाजरसलाई वो सेन्मु मुलु़ बेम्डी। 11हेङालोने लाजरस सिमुलामका बग्गेड्डामका यहूदीमिमगोडाम हापा मु़चु़मिम फ्वाम्सिम्डिमा येशूडा थो़र बेम्डिम बाइडा।
येशू घ्ल्वापा दु़म्साका यरूशलेम गोनो हुम्डिम
(मत्ती २१:१-११; मर्कूस ११:१-११; लूका १९:२८-४०)
12उ दिकाम सेल्सिमुनेमकु चाडडा रोक्पा सेर्पा मु़चु़मिमका येशू यरूशलेमडा रोक्तोङा लेन्मी र्वाक्पा थो़म्डी। 13मेम्मा मु़चु़मिमका खजुरकु ग्रेम झेट्मिडिमा येत्तो गुमीलाई क्रो़म्डा लम्डी, “होसन्ना#१२:१३ हिब्रू ल्वाडा “सेल्किनी।” आसिन्डा ने येशूलाई हुनाखाना बेम्डिम नुङ उनीमा नङ कोम्डिम रेम्बु़।! मिप्रङमाकु नङडा योक्पा आलाकाम इस्राएलडाम हप।”#भज ११८:२५-२६
14येशूका कोले गधाकु चो़ डार्मिडिमा मेडला हुम्डी। माम्चु़नीकु सिजेमडा आरेसाका र्याक्मा होङ्ङा दु़स्ता:
15“ए सियोनकु जाउमोचो़, मेङिसा।
रेप्डा, इमा हप गधाकु चो़डला हुसाका बिक्तोङा बोमी।”#जक ९:९
16येशूकु सीसिपामिमका ओर्मिम ल्वा ङादो थेसिमेथेट्मिवा। लावो येशूकु यु़म-झ्वाक्सीडाम चङ्डा मेर्मिमका ओर्मिम खोत्ले ल्वामिम उनीमा दुथाम र्याक्मा बाइडा। मेम्मा मे मु़चु़मिमका उनीमा लागि ओर्मिम खोत्ले बेम्डिम रेछा र्वाक्साका थेसिथेट्मिडी।
17गुमीका लाजरसलाई सु़लु़मलामका येट्मिडिमा सिमुलाम फक्मिडिलो गुमीनुङ बाट्पा मु़चु़मिमका ओराम ल्वाकु दुथाम सो़म्डिम बाम्डी। 18गुमीका ओराम यु़मखारीमिम बेम्डिम र्वाक्साका थो़म्डिमका वो गुमीलाई क्रो़म्डा सेर्पा मु़चु़ लम्डिम बाइडा। 19मेकोतिमा फरिसीमिमका उनी त्वाप-त्वापगोडा आरे र्वाबोमु चो़म्मिडी, “गुइ हाम वो बोमु मेचाप्सी। रेप्नी, खोत्ले मु़चु़मिम मेरामकु चङचङ लाम्दिम्ल्याम्डी।”
येशूका उनी सिमुकु दुथाम सो़म्डिम
20मेराम चङडा सो़रलोले बेप्डा लक्पामिमगोडाम कोङनिम ग्रीकमिम वो बाम्डी। 21गालीलडाम बेथसेदाडा बाट्पा फिलिपकाडा मेर्मिम रोम्डिमा आरे र्वाम्डिम-र्वाम्डिमङा बेम्डी, “ङाचो़, येशूलाई क्रो़म्मु आकीमा न बु।” 22फिलिपका लस्तामा अन्द्रियास नुङ सो़यु़डु़, मा अन्द्रियास नुङ फिलिप येशूलाई र्वाप्डा लक्ची।
23येशूका र्वाम्डी, “मिनीचो़कु यु़म-झ्वासिक्पा थारी रोक्फाड्डाम बु। 24आच्छाङा गो गानीलाई र्वाङु, जेप्सेरकु मा क्वाडला हुम्साका मेसियावा माला मेराम उ त्वापङा दु़म। लावो मेराम सिडा माला मेरामका हापा मा सिन्बेडु़। 25उ त्वाकाम लागि नु़पा मु़चु़का त्वारो़म मेल्वासु़। ओराम सु़म्दिसेरडा उ त्वाकाम लागि नु़मु मेद्वाक्पाका त्वारो़म ल्वासु़।#मत्ती १०:३९; १६:२५; मर्क ८:३५; लूक ९:२४; १७:३३ 26उहेमका आमा चापेडुपे बु़, मेराम आमा चङचङ लाम्दिमु बासी, मा गो बान्ते बुङु, आमा डु़ल्चो़ वो मेसिङा दु़म। आमा चापेडुपे बेपा मु़चु़लाई आमा पापका डोक्पु बोमी।
27“आमा न-गो छो़म मेभ्रसिक्पा बु, मा गो हाम र्वामु? ‘ए पाआ, ओराम थारीका गोलाई सेल्ङिनी’ र्वामु? मेएँ, दु़खा ल्वामुकाम लागिङा ओराम थारीडा गो रोङ्डोम। 28ए पाआ, गानी हाङकोम यु़म-झ्वासिक्पा बुनी र्वाक्पा रेम्बेनी।”
मेकोतिमा पाह्रीलामका कोले लो़लामका र्वाक्ता, “गो ओराम यु़म-झ्वाक्तोम बु, मा आथावो ओराम यु़म-झ्वाक्पु।” 29मेसिन्डा येम्सिक्पा सेर्पा मु़चु़का ओराम लो़लाम थो़म्डिमा र्वाम्डी, “ओराम ने बुलु़लु़ बु़डु़म सो़!” वाङमिमका र्वाम्डी, “पाह्रीचो़ गुमीनुङ जेस्ताम!”
30येशूका मेर्मिमलाई र्वाम्डी, “ओराम लो़लाम आमा लागि मेएँ, इनीमा लागिङा जेस्ताम सो़। 31ओराम सु़म्दिसेरकु निया दु़म्पा थारी रोक्फाड्डाम बु। ओराम सु़म्दिसेरकु साखामचो़ शैतान पाखानो घ्रोला सो़सी। 32लावो गो सुबुलामका कोङसिङुमा खोत्ले मु़चु़लाई आमाडा रेट्पुमी।” 33गुमी हेसाका सिमु खाप्मिडिम मेराम रेम्बोमु आरे र्वाम्डिम बाइडा।
34मे सेर्पा मु़चु़मिमका र्वाम्डी, “ख्रीष्ट हेल्लो लोवो दु़म्मी र्वाक्साका गुकु डु़म्लालाम थो़त्तोकोम बु। मिनीचो़ कोम्सिमु बासी र्वाक्साका गानी हेसाका र्वामु चाम्नी? ओराम मिनीचो़ र्वाक्मा सु़?”#भज ११०:४; यशै ९:७; इज ३६:२५; दान ७:१४
35येशूका मेर्मिमलाई र्वाम्डी, “आथावो घरिकोङसम्म ओल गानीनुङ दु़म। ओल गानीनुङ बुलो लाम्दिनी, मा तुकुम्चिमका गानीलाई मेहुम्निनु। तुकुम्चिमडा लाम्दिपा मु़चु़का गु बान्ते लक्तोङा लेडु़, मेराम मेच। 36गानीनुङ ओल बुलोङा मेरामडला थो़रलु़नी। मेम्मा गानी ओलडा बाट्पा मु़चु़ होप्माम दु़म्नी।” येशूका ओर्मिम ल्वा र्वामु दु़म्मिडिमा मेलामका लम्डिमा मेर्मिमडाम थसिक्साका बाम्डी।
37येशूका मे मु़चु़मिमकु ङादोडा हापा यु़म-खारीमिम बेम्डी, लावो मेर्मिमका गुमीडला थो़र मेबेमिवा। 38माम्चु़नीलाम-जेपा यशैयाका आरे र्वाक्ताम ल्वा रोक्थिड्डा:
“ए मिप्रङमा, आकीमा ल्वाडा सु़का थो़र बु़डु़?
मा मिप्रङमाकु यु़म सु़डला रेम्बेसिड्डा?”#यशै ५३:१
39मेम्मिमका मेर्मिमका थो़र बोमु मेचाप्मिवा हेङालोने यशैयाका आथावो र्वाक्ताम बु,
40“गुमीका मेर्मिमकु मिक्सी ड्याम्साम्डिम बु,
मा मेर्मिमकु न-गो लुङ होप्माम बनेबेम्साम्डिम बु।
मेएँ माला ने मेर्मिमका उनी मिक्सीका ल्वामी मा न-गोका थेसिथेन्मी,
मा आमाडा ख्लोसिमिमा समी।”#यशै ६:१०
41यशैयाका येशूकु यु़म-झ्वाक्सी ल्वास्तु़मका उनीमा दुथाम ओराम सो़यु़डु़म बाइडा।
42यहूदी ङाउमिम हापाका वो मेराम थारीका येशूडा थो़रबेम्डी। लावो घ्रो़म्दीनेमलामका कोल्सामी र्वाक्साका फरिसीमिमडाम ङिमुका थो़रबेम्डिम मेसो़मिवा। 43हेङालोने माम्चु़नीका डोक्पु बोमिमिमडाम ने मु़चु़मिमका डोक्पु बोमिमिम मेर्मिमका हापा द्वाम्थाल्मिडी।
44मेकोतिमा येशूका डोक्पु लो़लामका र्वाम्डी, “गोडला थो़रलु़पा मु़चु़का गोडला कोङङा मेएँ गोलाई थु़र्पाडला वो थो़र बु़। 45मेराम मु़चु़का गोलाई रेम्ङीलो गोलाई थु़र्पा वो ल्वासु़। 46गो ओराम सु़म्दिसेरडा ओल दु़म्साका योङ्डोम बु, मा गोडला थो़रबेपा मु़चु़ सु़ वो तुकुम्चिमडा मेदु़म्नु़।
47“कोङनिमका आमा सिजेम थो़सु़ लावो मेराम होङ्ङा मेबु़ माला गो मेरामकु निया मेबेउ। हेङालोने गो सु़म्दिसेरकु निया बेप्डा योङ्डोम मेएँ, लावो सु़म्दिसेर सेल्मु लागि योङ्डोम। 48गोलाई मेद्वाक्पा, मा आमा सिजेम मेथो़पामिमकाम लागि नियाचो़ बुमी, मेराम गो ङादो जेङ्डोम ल्वाका हुक्पा थारीनेम मेराम मु़चु़लाई मुमा बेडु़। 49गो आमा त्वाकु नका जेङ्डोम मेएँ। गो हाम जेमु बासिक्पा, मा हाम र्वामु बासिक्पा मेराम गोलाई थु़र्पा आमा पापका बेबेट्ङिडिमिम बु। 50गुमीका बेबेसामिमिम ल्वाका मेसिपा त्वारो़म ग्वाक्सा र्वाक्पा गो चक्पु। मेम्मिमका गो हाम र्वाङु, मेराम पापका र्वाबेट्ङिडिमिम ल्वा सो़।”
Currently Selected:
यूहन्ना 12: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
