लूका 13
13
छु़ल न-गोलाम मिम्सिक्साका माम्चु़नीडा ख्लोम्सिमु
1मेकोतिलोङा कोले नले मु़चु़ येशूकाडा रोम्डिमा गालीलडाम मु़चु़मिमका सो़रनेमडा सासेत्तोङा लेट्मिडिलो पिलातसका सेड्डु़मिम ल्वा सो़म्डी। 2येशूका मेर्मिमलाई र्वाम्डी, “मेम्साका सेन्ला सो़सिक्पामिम हाम गालीलडाम वाङमिम मु़चु़डाम वो हापा छु़लचो़ बाम्डी र्वाक्पा गानी मिम्निमिम? 3गो गानीलाई र्वाङु, मेम ने मेएँ सो़, इनी छु़लमिम इनी न-गोलामका मिम्सिसाका माम्चु़नीडा मेख्लोन्सिट्निवा माला गानी वो खोत्ले मेम्साकाङा पुयु़लुनी। 4मे को-लेतले (१८) मु़चु़मिमलाई सिलोआमडाम धरहरा झार्स्तामा चिप्डु़मिमा सिम्डिम बाइडा। यरूशलेमडा बाट्पा मु़चु़मिमगोडाम हाम हापा छु़लचो़ मेर्मिम बाम्डी र्वाक्पा गानी मिम्निमिम? 5मेम ने मेएँ सो़, गो गानीलाई आथावो र्वाङु, इनी छु़लमिम न-गोलामका मिम्सिसाका माम्चु़नीडा मेख्लोन्सिट्निवा माला गानी वो मेम्साका ङा पुयु़लुनी सो़।”
6मेकोतिमा येशूका ओराम सीसि-सो़म्दी र्वाम्डी: “कोङ मु़चु़का उ येडा बैससी ख्लियु़डु़म बाइडा। मेम्मा मेरामकु मा सिड्डु़ डे र्वाक्साका रेप्डा लस्थाल्ला, लावो हाम वो मेडारु़वा। 7मेम्मिमका गुका उ ये रेप्साक्पा मु़चु़लाई र्वाक्ता, ‘ओ बैससीकु मा सिडु़ डे र्वाक्साका लथाक्पुमिम सु थ दु़स्ता, लावो कोले वो मा मेसिडु़वा! ओरामलाई रु़प्डा। ओरामका ये कोङङा राड्डु़म बु।’
8“लावो मे ये रेपा मु़चु़का र्वाक्ता, ‘ङाचो़, आथावो को थ ओरामलाई हाम वो मेबेनी। गो ओरामकु होनोलाम-आथो़लाम धाउमा मल फिक्पु, 9मा पालीका ओराम बैससीकु मा सिड्डु़ माला जो़पा दु़म, मेसिडु़वा माला रु़प्नी’।”
ङेम्सिमुनेम येशूका उ चङ नो़र्सिक्पा मेसेमलाई सबेट्मिडिम
10कोङ ङेम्सिमुनेम येशूका कोले घ्रो़म्दीनेमडा सिजेम सीत्तोङा बेम्डी। 11मेसिन्डा कोले मेसेम बाइडा। मेराम मेसेमलाई मुनाङ पेलका हुप्डु़म को-लेत (१८) थ दु़स्ताम बाइडा, मा उ सो मान्थिम बाइडा। मेराम मेसेमकु उ चङ नो़र्स्ताम बाइडा। मेम्मा उ त्वापङा थो़न्थो़न्या दु़म्मु मेचापा बाइडा। 12येशूका मेराम मेसेमलाई ल्वाम्डी, मा येट्मिडिमा र्वाम्डी, “तोङमा, गाना इ सोमोरीलामका सेल्सिट्नाम बु।” 13मेकोतिमा गुमीका मेराम मेसेमडला उनी ल्वा जु़ल्मिडी, मा मेकोतिलोङा उ चङ थो़न्थो़न्या दु़स्तामा येम्स्ल्याड्डा। मेम्मा माम्चु़नीकु नङ कोमु चो़म्डु़।
14लावो मेराम मेसेमलाई येशूका ङेम्सिमुनेम सबेट्मिडिमका घ्रो़म्दी नेमडाम ङाउकु छोक्चो बक्ता। मेम्मा गुका मे मु़चु़मिमलाई र्वाक्ता, “हप्ताका खारी बेपा रुलेम बु। ओ रुलेमगोडा रोक्नीमा सनी। ङेम्सिमु नेम ने मेएँ सो़।”#प्रस २०:९-१०; व्य ५:१३-१४
15लावो ङाचो़ येशूका र्वाम्डी, “माम्चु़नीकु मिक्सीलामडा जो़पा लिसिक्पा मु़चु़नी, ङेम्सिमुनेम गानीगोडाम सु़का उ बेनो लोवो गधा लोवो गोठालामका डिरु़मा कु थो़ड्डा मेल? 16अब्राहामकु चो़-चु़सु़मिमगोडाम ओराम मेसेमलाई को-लेत (१८) थसम्म शैतानका बथाड्डु़म बाइडा। शैतानका बथाड्डु़मलाम गु ङेम्सिमुनेम फ्वासिड्डाम हाम मेजो़पा दु़स्ता?”
17गुमीका आरे र्वाम्डिम थो़म्डिमा उनी कोर्थो़लाम बक्पा मु़चु़मिमकाम क्रो़म लु़डा। लावो गुमीका हेल्लो वो मेल्वाम्मा खारीमिम बेम्डिम ल्वाम्डिमा मु़चु़मिम ने गेर्सिद्वाम्डी।
रायोकु भ्रल नुङ लङखामकाम सीसि-सो़म्दी
(मत्ती १३:३१-३३; मर्कूस ४:३०-३२)
18येशूका र्वाम्डी, “माम्चु़नीकु किब्दी हाम होप्माम बु? गो मेरामलाई हामनुङ थो़पु? 19मेराम रायो भ्रलकु कोले मा होप्माम बु सो़, मेराम कोले मु़चु़का लमा उ येडा फोड्डु़, मा मेराम बर्डामा डोक्पु धक्सा दु़स्ता। मेकोतिमा चक्पुमिमका मेरामकु ग्रेमडला पान्जी बनेबेम्डी।”
20आथावो गुमीका र्वाम्डी, “माम्चु़नीकु किब्दी हामनुङ थो़पु? 21मेराम लङखाम होप्माम बु़ सो़, कोले मेसेमका कतिकलङ लङखाम सु खचा फुलडा ङोल्लु़, मा मेकोम फुलङा लङखामका लिस्तु़।”
कतिभापा लाम्चोको
(मत्ती ७:१३-१४,२२-२३; ८:११-१२)
22येशू देल-देल नुङ शहर-शहरबाडे खिर्सिक्तो नुङ सीत्तो गुमी यरूशलेमथो़ लक्तोङा बेम्डी। 23मेकोतिलो कोले मु़चु़का गुमीलाई हिलाबु़डु़, “ङाचो़, हाम कतिकलङ मु़चु़मिम कोङङा सेल्सिट्मिमिम?”
लावो गुमीका मेर्मिमलाई र्वाम्डी,
24“माम्चु़नीकु किब्दीगोडा हुपा कतिभापा लाम्चोकोलाम मेचाप्तो हुनी, हेङालोने हापा मु़चु़मिमका मेगोनो हुमु माल्मी, लावो हुमु मेचाम्मी। 25नेमहपका लाम्चोको ख्लु़न्मु दु़म्सु़मिम चङडा, गानी पाखानो येम्सिनीमा आरे र्वाक्तो हेलाबोनी, ‘ङाचो़, लाम्चोको होल्साक्किनी का।’ मेकोतिलो गुका र्वा, ‘गानी बालामका रोक्निम? गो ने मेछेनिनी।’
26“मेम्मा गानी र्वानी, ‘गुकु गानीनुङङा पेत्तो-डुत्तोको, मा गानी आकीमा देलबाडे सीत्तिकिनी।’
27“लावो गुका र्वा, ‘गो गानीलाई र्वाङु, गानी बालामका रोक्निम गो मेचक्पु। रु़चो़नी, आमा फार्डा मेरोक्नी।’#भज ६:८
28 #
मत्ती ८:११-१२
“गानी अब्राहाम, इसहाक, याकूब मा माम्चु़नीलाम-जेपामिम खोत्लेलाई माम्चु़नीकु किब्दीगोडा ल्वानी, लावो गानी ने पाखानो पार्ला सो़न्सिनी। मेम्मिमका गानी ख्राम्नी, मा इनी लि ख्रेनी।#मत्ती २२:१३; २५:३० 29मु़चु़मिम नेप्सुङ ओपानोम, नेप्सुङ गाम्पानोम, जेजु़ नुङ रायला खोत्ले सु़म्दिसेरलामका माम्चु़नीकु किब्दीडा ग्रुला पेप्डा गन्मी। 30लावो ओम्लो सु़ याक्के बु मेराम दिफु डोक्पु दु़म, मा सु़ डोक्पु बु मेराम याक्के दु़म।”#मत्ती १९:३०; २०:१६; मर्क १०:३१
31मेकोतिलोङा कोङनिम फरिसीमिम रोम्डिमा गुमीलाई र्वाम्डी, “ओलामका वाङथो़ङा लक्नी, हेङालोने हेरोद पन्तियासका गानीलाई सेन्मु माल्लु़मिम बु।”
32येशूका मेर्मिमलाई र्वाम्डी, “लक्निमा लु-फेले बेपा मे सेरूली होप्माम मु़चु़लाई र्वाक्नी, ‘कोलेम-नलेम गो मुनाङ पेल कोलु, मा मु़चु़मिमलाई सबेट्पुमी। मेकोतिमा सुलेमनेम ने आमा खोत्ले खारी बोमु दु़म्सोक्पु।’ 33मेम्ङालोवो आनेप दिका, मा नाहाद्दा वो गो खारी बोमुम बुमु बासी, हेङालोने माम्चु़नीकु शहर यरूशलेमडा कोङङा माम्चु़नीलाम-जेपा आच्छाङा सिमी।
येशूका यरूशलेमकु दुथाम र्वाम्डिम दु़खा सो़म्दी
(मत्ती २३:३७-३९)
34“यरूशलेमडाम मु़चु़नी, गानी माम्चु़नीलाम-जेपामिमलाई सेनी, मा माम्चु़नीका इनीमाडा थु़र्मीडिम सेलाचो़मिमलाई लुङका ओम्निमी। घ्लोमीका बुब्लोमिमलाई उ लाप्तेरगोयु़ बोडु़-थारु़मिमिम होङङा गो गानीलाई कोदेप खोम्मु छो़म माल्निनी, लावो गानी मेम बोमु मेग्वाङनिवा। 35रेप्नी, माम्चु़नीका गानीलाई डिट्निमिम बु। गो गानीलाई र्वाङु, हाम्सिसम्म गानी ‘मिप्रङमाकु नङडा रोक्पा आलाकाम सो़’ मेर्वानी मेम्लोसम्म गानी गोलाई मेल्वाङिनी।”#भज ११८:२६; यर २२:५
Currently Selected:
लूका 13: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
लूका 13
13
छु़ल न-गोलाम मिम्सिक्साका माम्चु़नीडा ख्लोम्सिमु
1मेकोतिलोङा कोले नले मु़चु़ येशूकाडा रोम्डिमा गालीलडाम मु़चु़मिमका सो़रनेमडा सासेत्तोङा लेट्मिडिलो पिलातसका सेड्डु़मिम ल्वा सो़म्डी। 2येशूका मेर्मिमलाई र्वाम्डी, “मेम्साका सेन्ला सो़सिक्पामिम हाम गालीलडाम वाङमिम मु़चु़डाम वो हापा छु़लचो़ बाम्डी र्वाक्पा गानी मिम्निमिम? 3गो गानीलाई र्वाङु, मेम ने मेएँ सो़, इनी छु़लमिम इनी न-गोलामका मिम्सिसाका माम्चु़नीडा मेख्लोन्सिट्निवा माला गानी वो खोत्ले मेम्साकाङा पुयु़लुनी। 4मे को-लेतले (१८) मु़चु़मिमलाई सिलोआमडाम धरहरा झार्स्तामा चिप्डु़मिमा सिम्डिम बाइडा। यरूशलेमडा बाट्पा मु़चु़मिमगोडाम हाम हापा छु़लचो़ मेर्मिम बाम्डी र्वाक्पा गानी मिम्निमिम? 5मेम ने मेएँ सो़, गो गानीलाई आथावो र्वाङु, इनी छु़लमिम न-गोलामका मिम्सिसाका माम्चु़नीडा मेख्लोन्सिट्निवा माला गानी वो मेम्साका ङा पुयु़लुनी सो़।”
6मेकोतिमा येशूका ओराम सीसि-सो़म्दी र्वाम्डी: “कोङ मु़चु़का उ येडा बैससी ख्लियु़डु़म बाइडा। मेम्मा मेरामकु मा सिड्डु़ डे र्वाक्साका रेप्डा लस्थाल्ला, लावो हाम वो मेडारु़वा। 7मेम्मिमका गुका उ ये रेप्साक्पा मु़चु़लाई र्वाक्ता, ‘ओ बैससीकु मा सिडु़ डे र्वाक्साका लथाक्पुमिम सु थ दु़स्ता, लावो कोले वो मा मेसिडु़वा! ओरामलाई रु़प्डा। ओरामका ये कोङङा राड्डु़म बु।’
8“लावो मे ये रेपा मु़चु़का र्वाक्ता, ‘ङाचो़, आथावो को थ ओरामलाई हाम वो मेबेनी। गो ओरामकु होनोलाम-आथो़लाम धाउमा मल फिक्पु, 9मा पालीका ओराम बैससीकु मा सिड्डु़ माला जो़पा दु़म, मेसिडु़वा माला रु़प्नी’।”
ङेम्सिमुनेम येशूका उ चङ नो़र्सिक्पा मेसेमलाई सबेट्मिडिम
10कोङ ङेम्सिमुनेम येशूका कोले घ्रो़म्दीनेमडा सिजेम सीत्तोङा बेम्डी। 11मेसिन्डा कोले मेसेम बाइडा। मेराम मेसेमलाई मुनाङ पेलका हुप्डु़म को-लेत (१८) थ दु़स्ताम बाइडा, मा उ सो मान्थिम बाइडा। मेराम मेसेमकु उ चङ नो़र्स्ताम बाइडा। मेम्मा उ त्वापङा थो़न्थो़न्या दु़म्मु मेचापा बाइडा। 12येशूका मेराम मेसेमलाई ल्वाम्डी, मा येट्मिडिमा र्वाम्डी, “तोङमा, गाना इ सोमोरीलामका सेल्सिट्नाम बु।” 13मेकोतिमा गुमीका मेराम मेसेमडला उनी ल्वा जु़ल्मिडी, मा मेकोतिलोङा उ चङ थो़न्थो़न्या दु़स्तामा येम्स्ल्याड्डा। मेम्मा माम्चु़नीकु नङ कोमु चो़म्डु़।
14लावो मेराम मेसेमलाई येशूका ङेम्सिमुनेम सबेट्मिडिमका घ्रो़म्दी नेमडाम ङाउकु छोक्चो बक्ता। मेम्मा गुका मे मु़चु़मिमलाई र्वाक्ता, “हप्ताका खारी बेपा रुलेम बु। ओ रुलेमगोडा रोक्नीमा सनी। ङेम्सिमु नेम ने मेएँ सो़।”#प्रस २०:९-१०; व्य ५:१३-१४
15लावो ङाचो़ येशूका र्वाम्डी, “माम्चु़नीकु मिक्सीलामडा जो़पा लिसिक्पा मु़चु़नी, ङेम्सिमुनेम गानीगोडाम सु़का उ बेनो लोवो गधा लोवो गोठालामका डिरु़मा कु थो़ड्डा मेल? 16अब्राहामकु चो़-चु़सु़मिमगोडाम ओराम मेसेमलाई को-लेत (१८) थसम्म शैतानका बथाड्डु़म बाइडा। शैतानका बथाड्डु़मलाम गु ङेम्सिमुनेम फ्वासिड्डाम हाम मेजो़पा दु़स्ता?”
17गुमीका आरे र्वाम्डिम थो़म्डिमा उनी कोर्थो़लाम बक्पा मु़चु़मिमकाम क्रो़म लु़डा। लावो गुमीका हेल्लो वो मेल्वाम्मा खारीमिम बेम्डिम ल्वाम्डिमा मु़चु़मिम ने गेर्सिद्वाम्डी।
रायोकु भ्रल नुङ लङखामकाम सीसि-सो़म्दी
(मत्ती १३:३१-३३; मर्कूस ४:३०-३२)
18येशूका र्वाम्डी, “माम्चु़नीकु किब्दी हाम होप्माम बु? गो मेरामलाई हामनुङ थो़पु? 19मेराम रायो भ्रलकु कोले मा होप्माम बु सो़, मेराम कोले मु़चु़का लमा उ येडा फोड्डु़, मा मेराम बर्डामा डोक्पु धक्सा दु़स्ता। मेकोतिमा चक्पुमिमका मेरामकु ग्रेमडला पान्जी बनेबेम्डी।”
20आथावो गुमीका र्वाम्डी, “माम्चु़नीकु किब्दी हामनुङ थो़पु? 21मेराम लङखाम होप्माम बु़ सो़, कोले मेसेमका कतिकलङ लङखाम सु खचा फुलडा ङोल्लु़, मा मेकोम फुलङा लङखामका लिस्तु़।”
कतिभापा लाम्चोको
(मत्ती ७:१३-१४,२२-२३; ८:११-१२)
22येशू देल-देल नुङ शहर-शहरबाडे खिर्सिक्तो नुङ सीत्तो गुमी यरूशलेमथो़ लक्तोङा बेम्डी। 23मेकोतिलो कोले मु़चु़का गुमीलाई हिलाबु़डु़, “ङाचो़, हाम कतिकलङ मु़चु़मिम कोङङा सेल्सिट्मिमिम?”
लावो गुमीका मेर्मिमलाई र्वाम्डी,
24“माम्चु़नीकु किब्दीगोडा हुपा कतिभापा लाम्चोकोलाम मेचाप्तो हुनी, हेङालोने हापा मु़चु़मिमका मेगोनो हुमु माल्मी, लावो हुमु मेचाम्मी। 25नेमहपका लाम्चोको ख्लु़न्मु दु़म्सु़मिम चङडा, गानी पाखानो येम्सिनीमा आरे र्वाक्तो हेलाबोनी, ‘ङाचो़, लाम्चोको होल्साक्किनी का।’ मेकोतिलो गुका र्वा, ‘गानी बालामका रोक्निम? गो ने मेछेनिनी।’
26“मेम्मा गानी र्वानी, ‘गुकु गानीनुङङा पेत्तो-डुत्तोको, मा गानी आकीमा देलबाडे सीत्तिकिनी।’
27“लावो गुका र्वा, ‘गो गानीलाई र्वाङु, गानी बालामका रोक्निम गो मेचक्पु। रु़चो़नी, आमा फार्डा मेरोक्नी।’#भज ६:८
28 #
मत्ती ८:११-१२
“गानी अब्राहाम, इसहाक, याकूब मा माम्चु़नीलाम-जेपामिम खोत्लेलाई माम्चु़नीकु किब्दीगोडा ल्वानी, लावो गानी ने पाखानो पार्ला सो़न्सिनी। मेम्मिमका गानी ख्राम्नी, मा इनी लि ख्रेनी।#मत्ती २२:१३; २५:३० 29मु़चु़मिम नेप्सुङ ओपानोम, नेप्सुङ गाम्पानोम, जेजु़ नुङ रायला खोत्ले सु़म्दिसेरलामका माम्चु़नीकु किब्दीडा ग्रुला पेप्डा गन्मी। 30लावो ओम्लो सु़ याक्के बु मेराम दिफु डोक्पु दु़म, मा सु़ डोक्पु बु मेराम याक्के दु़म।”#मत्ती १९:३०; २०:१६; मर्क १०:३१
31मेकोतिलोङा कोङनिम फरिसीमिम रोम्डिमा गुमीलाई र्वाम्डी, “ओलामका वाङथो़ङा लक्नी, हेङालोने हेरोद पन्तियासका गानीलाई सेन्मु माल्लु़मिम बु।”
32येशूका मेर्मिमलाई र्वाम्डी, “लक्निमा लु-फेले बेपा मे सेरूली होप्माम मु़चु़लाई र्वाक्नी, ‘कोलेम-नलेम गो मुनाङ पेल कोलु, मा मु़चु़मिमलाई सबेट्पुमी। मेकोतिमा सुलेमनेम ने आमा खोत्ले खारी बोमु दु़म्सोक्पु।’ 33मेम्ङालोवो आनेप दिका, मा नाहाद्दा वो गो खारी बोमुम बुमु बासी, हेङालोने माम्चु़नीकु शहर यरूशलेमडा कोङङा माम्चु़नीलाम-जेपा आच्छाङा सिमी।
येशूका यरूशलेमकु दुथाम र्वाम्डिम दु़खा सो़म्दी
(मत्ती २३:३७-३९)
34“यरूशलेमडाम मु़चु़नी, गानी माम्चु़नीलाम-जेपामिमलाई सेनी, मा माम्चु़नीका इनीमाडा थु़र्मीडिम सेलाचो़मिमलाई लुङका ओम्निमी। घ्लोमीका बुब्लोमिमलाई उ लाप्तेरगोयु़ बोडु़-थारु़मिमिम होङङा गो गानीलाई कोदेप खोम्मु छो़म माल्निनी, लावो गानी मेम बोमु मेग्वाङनिवा। 35रेप्नी, माम्चु़नीका गानीलाई डिट्निमिम बु। गो गानीलाई र्वाङु, हाम्सिसम्म गानी ‘मिप्रङमाकु नङडा रोक्पा आलाकाम सो़’ मेर्वानी मेम्लोसम्म गानी गोलाई मेल्वाङिनी।”#भज ११८:२६; यर २२:५
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.