LUKAS 13
13
Teketed Ratnan Sala' Muyuh Pad Na Maté
1Kareb ineh teh inan tuda'-tuda' lemulun luk nemaré kali' kuan Yésus ratnan lun Galilia luk pinaté Pilatus kareb ideh uned maré baré kuan Allah. 2Idi kebala Yésus nedeh, “Inanké muyuh ngerawé idi lun Galilia ini meluun rayeh sala'deh ratnan sala' amung lun Galilia luk baken ineh, ngaceku ideh pinaté kudeng ineh? 3Ui pebala nemuyuh, ‘Baken kudeng ini! Iamo' kudeng muyuh na uren kali' rungen amung muyuh pana' miak maté kudeng ineh teh.’ 4Kudeng apehké pulu' ualuh burur lemulun luk naté neritep ku ruma' luk medita' déi' Siloam ineh? Inanké muyuh ngerawé sala'deh meluun rayeh ratnan sala' amung lemulun luk tudo déi' Yerusalim? 5Ui pebala nemuyuh, ‘Baken kudeng ineh! Iamo' kudeng na muyuh uren, kali' rungen amung muyuh pana' miak maté kudeng ineh teh.’ ”
Pinginud Aceh Lawa Gita' Luk Na Kebua'
6Yésus nemada' kuandeh luk pinginud ini, “Inan selemulun luk inan aceh lawa gita' luk tinibu bang kabun anggurneh. Idi ieh nacing sikal nakap bua' ratnan lawa ineh, iamo' sebuleng pana' nateh luk ilapneh. 7Idi keburi'neh kuan lun matar kabun ineh, ‘Siruh, pangeh teluh lak kinioneh ui nacing nakap bua' ratnan lawa gita' ini, nateh luk ilapku; do' nebpang neneh, anunké ulekneh ieh ngeperi' tana' ineh?’ 8Iamo' kebala lun matar kabun ineh, ‘O tuan, nima' neneh selak ini teh, pad ui miak ngaka iringneh idi ngerimuk lawaneh. 9Kudeng ieh kebua' muci aco, do'; kudeng na, miak iko nebpang neneh.’ ”
Yésus Ngedo' Seburur Decur Luk Tebukut Bang Aco Luk Inan Mudeng
10Kareb Yésus uned mada' bang aceh ruma' sembayang bang Aco luk inan Mudeng, 11idi inan seburur decur luk sinuet ada' luk ngelaya' burur pangeh pulu' ualuh lak kinioneh, macing ketedneh pangeh tebukut, pad ieh na miak ngesiri bururneh. 12Kareb Yésus nenier neneh, idi Ieh nenawar decur ineh, kebalaNeh, “O decur, mepuit iko ratnan étmu ineh.” 13Idi Ieh nengerareng ticu'Neh luun decur ineh; idi petacu ketedneh ineh mesiri, idi ieh nengerayeh Allah.
14 #
Pur 20.9–10; Bad 5.13–14 Idi lun rayeh ruma' sembayang ineh museh ngaceku Yésus nengedo' lemulun kareb Aco luk inan Mudeng, idi kebalaneh nelun mula',“Inan anem aco luk inan lemulun miak ngakem; ngaceku ineh do' lemulun macing bang aco ineh pad ideh miak uen ngedo', iamo' aleg kareb Aco luk inan Mudeng.”
15Iamo' Tuhan nengor balaneh, keburi'Neh, “O lun luk siayu, bakenké bang Aco luk inan Mudeng anid-anid burur muyuh muit sapi' idi keladaineh rat bang libungneh, sikal nguit neneh amé' ngirup? 16Iamo' decur ini, seburur anak Ibrahim luk inabet Sétan, pangeh pulu ualuh lak kinioneh, naké ieh do' puatin ratnan abet ini bang Aco luk inan Mudeng?” 17Kareb Yésus nepebala kudeng ineh, amung-amung bunu'Neh migu' peh, iamo' amung-amung lun mula' ineh mawang niat ngaceku amung-amung kekamen luk rayeh luk pangeh inau'Neh.
Pinginud Aceh Ngilung Sesawi'
(Mat 13.31–32; Mrk 4.30–32)
18Kebala Yésus, “Anunké luk mepad kudeng Imet Allah, idi dengan anunké miak Ui maad neneh? 19Ieh ineh mepad kudeng aceh ngilung sesawi', luk inuit idi inisak selemulun bang kebunneh sebuleng. Idi ilung ineh mulun, idi mangun ku aceh lawa, pad suit-suit pana' ngarar luun angat-angatneh.”
Pinginud Lamud
(Mat 13.33)
20Idi teh kebala Yésus, “Dengan anunké Ui miak maad Imet Allah? 21Ieh ineh mepad kudeng lamud, luk ilap seburur decur, idi rirengneh bang teluh uad banak, pad amung-amungneh mepuar peh.”
Tanga' Luk Meperi'
(Mat 7.13–14, 21–23)
22Yésus nenalan lemaba tuda'-tuda' bawang idi ruma;, idi nemada' lemulun idi ngetacu lawéNeh amé' Yerusalim. 23Idi seburur lemulun nepebala Neneh, “O Tuhan, pawa'ké lemulun luk ngalap ulun?”
Idi kebala Yésus nedeh, 24“Do' ngekél burur muyuh semuet maya' tanga' luk meperi', ngaceku mula' lemulun luk sikal semuet iamo' na miak. 25Tuan ruma' ineh miak tumui idi ngitek tanga', idi muci kareb muyuh tuped bal alad idi ngimun nateg tanga', kebala muyuh, ‘O Tuan, ngukab tanga' kuan kai!’ idi Ieh pana' miak ngor bala muyuh keburi'Neh, ‘Ui na kali' rat iapeh muyuh nacing!’ 26Idi muyuh miak ngor balaNeh, ‘Kai pangeh nekuman idi nengirup pa kiungMu, idi Iko nemada' bang bawang kai.’ 27#Nani 6.8 Idi Ieh miak pebala nemuyuh, ‘Ui na kali' rat iapeh muyuh nacing; buro muyuh rat Negku, amung muyuh luk nganau' luk dat!’ 28#Mat 22.13; 25.30 #Mat 8.11–12 Idi su ineh muyuh tangi'-tangi' idi pekatep lipen, kareb muyuh nier Ibrahim, Isak, idi Yakub, idi amung-amung nabi bang Imet Allah, iamo' muyuh sebuleng duken remuat. 29Idi inan teh lemulun luk macing rat pa busat aco, idi rat pa acep aco teh, idi rat pa tinueh busat aco, idi rat pa kabing busat aco, miak tudo bang Imet Allah. 30#Mat 19.30; 20.16; Mrk 10.31 Idi lemulun luk pa muci miak amé' pa atun; idi lemulun luk pa atun miak amé' pa muci.”
Awa Yésus Nan Yerusalim
(Mat 23.37–39)
31Kareb ineh teh tuda'-tuda' lun Parisi iné' matun Yésus, idi kebaladeh, “Do' Iko buro rat ieni idi amé' bawang baken, ngaceku Herodés sikal ngaté Namu.”
32Idi kebala Yésus nedeh, “Amé' muyuh mala kuan bungalé ineh, ‘Ui nala' ada', idi ngedo' lemulun bang aco sini idi nebpa, idi aco luk keteluh Ui miak mangeh kekamenKu.’ 33Iamo' na miak na Ui ngetacu lawéKu bang aco sini, nebpa idi soriak; ngaceku na miak seburur nabi pitayen mado rat Yerusalim.
34“O Yerusalim, Yerusalim! Iko nengaté nabi-nabi, idi nemitung lemulun luk icuk amé' namu ku batu! Tuda' kua' Ui sikal ngamung anak-anakmu mepad kudeng aceh tineh lal luk ngerukub anak-anakneh liang iladneh, iamo' na muyuh sikal! 35#Nani 118.26 Nekini ruma' muyuh pangeh tican ali-ali. Ui pebala nemuyuh, idi na muyuh miak nier Negku teh, pad macing kareb luk muyuh pebala, ‘Samal kuanNeh luk macing bang ngadan Tuhan!’ ”
Currently Selected:
LUKAS 13: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
LUKAS 13
13
Teketed Ratnan Sala' Muyuh Pad Na Maté
1Kareb ineh teh inan tuda'-tuda' lemulun luk nemaré kali' kuan Yésus ratnan lun Galilia luk pinaté Pilatus kareb ideh uned maré baré kuan Allah. 2Idi kebala Yésus nedeh, “Inanké muyuh ngerawé idi lun Galilia ini meluun rayeh sala'deh ratnan sala' amung lun Galilia luk baken ineh, ngaceku ideh pinaté kudeng ineh? 3Ui pebala nemuyuh, ‘Baken kudeng ini! Iamo' kudeng muyuh na uren kali' rungen amung muyuh pana' miak maté kudeng ineh teh.’ 4Kudeng apehké pulu' ualuh burur lemulun luk naté neritep ku ruma' luk medita' déi' Siloam ineh? Inanké muyuh ngerawé sala'deh meluun rayeh ratnan sala' amung lemulun luk tudo déi' Yerusalim? 5Ui pebala nemuyuh, ‘Baken kudeng ineh! Iamo' kudeng na muyuh uren, kali' rungen amung muyuh pana' miak maté kudeng ineh teh.’ ”
Pinginud Aceh Lawa Gita' Luk Na Kebua'
6Yésus nemada' kuandeh luk pinginud ini, “Inan selemulun luk inan aceh lawa gita' luk tinibu bang kabun anggurneh. Idi ieh nacing sikal nakap bua' ratnan lawa ineh, iamo' sebuleng pana' nateh luk ilapneh. 7Idi keburi'neh kuan lun matar kabun ineh, ‘Siruh, pangeh teluh lak kinioneh ui nacing nakap bua' ratnan lawa gita' ini, nateh luk ilapku; do' nebpang neneh, anunké ulekneh ieh ngeperi' tana' ineh?’ 8Iamo' kebala lun matar kabun ineh, ‘O tuan, nima' neneh selak ini teh, pad ui miak ngaka iringneh idi ngerimuk lawaneh. 9Kudeng ieh kebua' muci aco, do'; kudeng na, miak iko nebpang neneh.’ ”
Yésus Ngedo' Seburur Decur Luk Tebukut Bang Aco Luk Inan Mudeng
10Kareb Yésus uned mada' bang aceh ruma' sembayang bang Aco luk inan Mudeng, 11idi inan seburur decur luk sinuet ada' luk ngelaya' burur pangeh pulu' ualuh lak kinioneh, macing ketedneh pangeh tebukut, pad ieh na miak ngesiri bururneh. 12Kareb Yésus nenier neneh, idi Ieh nenawar decur ineh, kebalaNeh, “O decur, mepuit iko ratnan étmu ineh.” 13Idi Ieh nengerareng ticu'Neh luun decur ineh; idi petacu ketedneh ineh mesiri, idi ieh nengerayeh Allah.
14 #
Pur 20.9–10; Bad 5.13–14 Idi lun rayeh ruma' sembayang ineh museh ngaceku Yésus nengedo' lemulun kareb Aco luk inan Mudeng, idi kebalaneh nelun mula',“Inan anem aco luk inan lemulun miak ngakem; ngaceku ineh do' lemulun macing bang aco ineh pad ideh miak uen ngedo', iamo' aleg kareb Aco luk inan Mudeng.”
15Iamo' Tuhan nengor balaneh, keburi'Neh, “O lun luk siayu, bakenké bang Aco luk inan Mudeng anid-anid burur muyuh muit sapi' idi keladaineh rat bang libungneh, sikal nguit neneh amé' ngirup? 16Iamo' decur ini, seburur anak Ibrahim luk inabet Sétan, pangeh pulu ualuh lak kinioneh, naké ieh do' puatin ratnan abet ini bang Aco luk inan Mudeng?” 17Kareb Yésus nepebala kudeng ineh, amung-amung bunu'Neh migu' peh, iamo' amung-amung lun mula' ineh mawang niat ngaceku amung-amung kekamen luk rayeh luk pangeh inau'Neh.
Pinginud Aceh Ngilung Sesawi'
(Mat 13.31–32; Mrk 4.30–32)
18Kebala Yésus, “Anunké luk mepad kudeng Imet Allah, idi dengan anunké miak Ui maad neneh? 19Ieh ineh mepad kudeng aceh ngilung sesawi', luk inuit idi inisak selemulun bang kebunneh sebuleng. Idi ilung ineh mulun, idi mangun ku aceh lawa, pad suit-suit pana' ngarar luun angat-angatneh.”
Pinginud Lamud
(Mat 13.33)
20Idi teh kebala Yésus, “Dengan anunké Ui miak maad Imet Allah? 21Ieh ineh mepad kudeng lamud, luk ilap seburur decur, idi rirengneh bang teluh uad banak, pad amung-amungneh mepuar peh.”
Tanga' Luk Meperi'
(Mat 7.13–14, 21–23)
22Yésus nenalan lemaba tuda'-tuda' bawang idi ruma;, idi nemada' lemulun idi ngetacu lawéNeh amé' Yerusalim. 23Idi seburur lemulun nepebala Neneh, “O Tuhan, pawa'ké lemulun luk ngalap ulun?”
Idi kebala Yésus nedeh, 24“Do' ngekél burur muyuh semuet maya' tanga' luk meperi', ngaceku mula' lemulun luk sikal semuet iamo' na miak. 25Tuan ruma' ineh miak tumui idi ngitek tanga', idi muci kareb muyuh tuped bal alad idi ngimun nateg tanga', kebala muyuh, ‘O Tuan, ngukab tanga' kuan kai!’ idi Ieh pana' miak ngor bala muyuh keburi'Neh, ‘Ui na kali' rat iapeh muyuh nacing!’ 26Idi muyuh miak ngor balaNeh, ‘Kai pangeh nekuman idi nengirup pa kiungMu, idi Iko nemada' bang bawang kai.’ 27#Nani 6.8 Idi Ieh miak pebala nemuyuh, ‘Ui na kali' rat iapeh muyuh nacing; buro muyuh rat Negku, amung muyuh luk nganau' luk dat!’ 28#Mat 22.13; 25.30 #Mat 8.11–12 Idi su ineh muyuh tangi'-tangi' idi pekatep lipen, kareb muyuh nier Ibrahim, Isak, idi Yakub, idi amung-amung nabi bang Imet Allah, iamo' muyuh sebuleng duken remuat. 29Idi inan teh lemulun luk macing rat pa busat aco, idi rat pa acep aco teh, idi rat pa tinueh busat aco, idi rat pa kabing busat aco, miak tudo bang Imet Allah. 30#Mat 19.30; 20.16; Mrk 10.31 Idi lemulun luk pa muci miak amé' pa atun; idi lemulun luk pa atun miak amé' pa muci.”
Awa Yésus Nan Yerusalim
(Mat 23.37–39)
31Kareb ineh teh tuda'-tuda' lun Parisi iné' matun Yésus, idi kebaladeh, “Do' Iko buro rat ieni idi amé' bawang baken, ngaceku Herodés sikal ngaté Namu.”
32Idi kebala Yésus nedeh, “Amé' muyuh mala kuan bungalé ineh, ‘Ui nala' ada', idi ngedo' lemulun bang aco sini idi nebpa, idi aco luk keteluh Ui miak mangeh kekamenKu.’ 33Iamo' na miak na Ui ngetacu lawéKu bang aco sini, nebpa idi soriak; ngaceku na miak seburur nabi pitayen mado rat Yerusalim.
34“O Yerusalim, Yerusalim! Iko nengaté nabi-nabi, idi nemitung lemulun luk icuk amé' namu ku batu! Tuda' kua' Ui sikal ngamung anak-anakmu mepad kudeng aceh tineh lal luk ngerukub anak-anakneh liang iladneh, iamo' na muyuh sikal! 35#Nani 118.26 Nekini ruma' muyuh pangeh tican ali-ali. Ui pebala nemuyuh, idi na muyuh miak nier Negku teh, pad macing kareb luk muyuh pebala, ‘Samal kuanNeh luk macing bang ngadan Tuhan!’ ”
Currently Selected:
:
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.