Ilu̍uku 22

Āchɛ yī Iju̍u miya ge̍ē ngmo̍ Iji̍sɔ̄ɔsi

(Ima̍tiyu 26:1-5; Ima̍aki 14:1-2; Ijɔ̍ɔn 11:45-53)

1Yɛ̄grāa yī ɔwɔ̄wīyā Nīi Ɔjā Obī Ibrɛ̍ɛdi Nōnū I̍ Tū La Ojōre̍ yī Nū Ni̍ Ma̍ wā ge̍ de hōhī kurɛkurɛ bɛ̍ɛ̄nɛ̄. Ɔwɔ̄wīyā ɔla̍ā re̍ka Ɔwɔ̄wīyā yī Owu̍lā a̍nɛ. 2Yɛ̄grāa ɔla̍ā bɛ̍ɛ̄nɛ̄, alɛhu̍ aligbe ba̍la āchɛ ongū Lihɔ yī Iju̍u kū la ɔgāla̍ ɔpɔ̄pū ɔha̍ nīi e̍ ge̍ē de Iji̍sɔ̄ɔsi ē ngmo̍ ma̍. Wu̍chē oji̍ nɛ, e̍ de tūuhwi yī āchɛ ji wa̍a̍.

Iju̍dasi chɛ̄ ge̍ē chɔ̄ɔwɛ ē tū Iji̍sɔ̄ɔsi

(Ima̍tiyu 26:14-16; Ima̍aki 14:10-11)

3Bɛ̍ɛ̄nɛ̄, Isa̍tan, a̍dā yapri̍ija ɔdwɔ̄bi̍ wā la īkplɛ̄hu̍ yī Iju̍dasi nīi re̍ka Isikɛ̍rīyɔti ma̍. Iju̍dasi nūma̍ - ɔ̄chɛ ɔha̍ lipu̍ yī a̍chi̍kpo̍ igwo̍lɛpa yī Iji̍sɔ̄ɔsi nɛ. 4O̍ pīya dikpo̍ba̍ alɛhu̍ aligbe ba̍la alɛhu̍ yī āchɛ nīi ē gbō u̍nu̍ yī Ɔwɔ ma̍ ge̍ ka ba̍la aa̍ wa̍a̍ lɔkɔ nīi o̍ ge̍ē ku̍ Iji̍sɔ̄ɔsi ē de wa̍ ma̍. 5Lɛlā ɔla̍ā lɛ wa̍ wɔnyɛ kpɛ̍ɛji; e̍ chrōoko̍o yī okpo ɔha̍ la odōde de ɔ̍. 6Iju̍dasi de chɛ̄ i̍ngɔ̍ɔ bɛ̍ɛ̄nɛ̄. Bū la yɛ̄grāa ɔla̍ā, o̍ kū la ɔgāla̍ ɔpɔ̄pū lɔkɔ nīi o̍ ge̍ē ku̍ Iji̍sɔ̄ɔsi ē de wa̍ nīi āchɛ ji wa̍a̍ i̍ ge̍ē jo̍ōkū ni̍ ma̍.

Iji̍sɔ̄ɔsi ti̍bi̍īyēchɛ̄ ge̍ē re̍ Ɔwɔ̄wīyā yī Owu̍lā

(Ima̍tiyu 26:17-25; Ima̍aki 14:12-21; Ijɔ̍ɔn 13:21-30)

7Ɔ̄chī yī Ɔwɔ̄wīyā Ɔla̍ā Nīi Ɔjā Obī Ibrɛ̍ɛdi Nōnū I̍ Tū La Ojōre̍ yī Nū Ni̍ Ma̍ wa̍ ge̍ de gbajɛ bɛ̍ɛ̄nɛ̄. Yɛ̄grāa ɔla̍ā, nīi e̍ ē ngmo̍ ɔyɔ̍ɔ̄nyīyɛrɔ̄ yī Ɔbɔ̄bla yī Owu̍lā a̍nɛ. 8Bɛ̍ɛ̄nɛ̄, Iji̍sɔ̄ɔsi wā ge̍ de Ipi̍ta ba̍la Ijɔ̍ɔn tɛ̄rɔ̄. O̍ koko̍o de wa̍ hīka, ɛ̍lɛ ge̍ gāa ge̍ ya̍ ojōre̍ yī Ɔwɔ̄wīyā yī Owu̍lā yī aa̍ lɔ̄lā abɔ̍ɔ nīi aɛ̍lɛ ge̍ wa̍ ge̍ re̍.

9E̍ che ɔ̍ ikpo̍ ka abā nīi ɔ̍lɔ chikpo̍ nīi aɛ̍lɛ ge̍ē ya̍ ojōre̍ ɔ̍lɔma̍ ma̍?

10O̍ ka de wa̍ bɛ̍ɛ̄nɛ̄ hīka, “Ala̍ ma̍ gɛ ko̍ō! Ala̍ ge̍ē chɛ̄ gāa ipwɔ̍ɔ̄lɛ̍ ɔpɔ̄ɔpɛ̄ ma̍, ɔngrɔ̄ɔ ɔha̍ nīi bī agbɔtū yī yenyi ma̍ ge̍ē grāa ala̍. Ala̍ ā de ku̍ ɔ̍ la u̍tu ga u̍nu̍ nīi o̍ ge̍ē chɛ̄ gāa ma̍. 11Bɛ̍ɛ̄nɛ̄ ma̍, ala̍ ka de a̍dāwɔ̄lɛ̍ ɔla̍ā hīka Ādā Iji̍sɔ̄ɔsi ka hīka ipu̍nu̍ nīi anu̍ ba̍la a̍chi̍kpo̍ yī anu̍ ɔ̍lɔ ge̍ē gblāa ē re̍ Ɔwɔ̄wīyā yī Owu̍lā ma̍ ɔ̍lɔ kɔ̍ɔ̄? 12Bū la ɛbɛ ɔla̍ā, ɔlɔjā ge̍ē chabɔ̄ yī ipu̍nu̍ ichō ɔha̍ nīi lɛ kpu̍u̍ ma̍ ē hu̍ ala̍. E̍ de ipu̍nu̍ ɔla̍ā gbɔ̍ɔ̄gbla̍a lɔ̄lā mɛ̍. Abɔ̍ɔ nīi ala̍ ge̍ē tu̍ ɛjā wa̍a̍ ikpo̍ ē tu̍chɛ̄ a̍nɛ.”

13A̍chi̍kpo̍ yī Iji̍sɔ̄ɔsi wā ge̍ pīya gānyɔ̄ bɛ̍ɛ̄nɛ̄. E̍ ma̍ ɔjāha̍-ɔjāha̍ i̍ngɔ̍ɔ ke̍e̍ lɔkɔ nīi Iji̍sɔ̄ɔsi ka de wa̍ ma̍. E̍ de ojōre̍ yī Ɔwɔ̄wīyā yī Owu̍lā ya̍ lā abɔ̍ɔ bɛ̍ɛ̄nɛ̄.

Ojōre̍ ɔ̄nɛ̄ nīi Ādā Iji̍sɔ̄ɔsi de ma̍

(Ima̍tiyu 26:26-30; Ima̍aki 14:22-26; 1 Alikɔ̍rīnti 11:23-25)

14Yɛ̄grāa de gbajɛ ma̍, Iji̍sɔ̄ɔsi pīya hyāhɔ̄ la ɛbɛ ɔhyāhɔ̄ yī nū abɔ̍ɔ la ɛbɛ yī ojōre̍ ba̍la a̍chi̍kpo̍ yī nū. 15O̍ koko̍o de a̍chi̍kpo̍ yī nū bɛ̍ɛ̄nɛ̄ hīka, “Ala̍ ma̍ ko̍ō! O̍ hla̍ ami i̍ngɔ̍ɔ kpɛ̍ɛji la ɔhɔ̄ i̍ngɛ̍ɛ̄nɛ̄ ba̍la ala̍ re̍ Ɔwɔ̄wīyā yī Owu̍lā nūma̍ o̍bū nīi n mi̍chi̍. 16Lēchi̍, n ā koko̍o de ala̍! N i̍ ge̍ē re̍ ojōre̍ yī Ɔwɔ̄wīyā nūma̍ gɛ ni̍, kpɛɛ nīi o̍ ē de ē lɛ ochi̍chi̍ la ɔgɔ̄grāa abɔ̍ɔ la ɛbɛ yī Ɔchwɔ̄lɛ̍ Oro̍ōre̍ yī Ɔwɔ.”

17Bɛ̍ɛ̄nɛ̄, Iji̍sɔ̄ɔsi nāa ɔgba̍galā yī ɛ̍mwɔ̄ bī la abɔ̄, da Ɔwɔ o̍be. O̍ ka de wa̍ hīka, “Ala̍ ā nāa ɛ̍mwɔ̄ nūma̍ gwa̍ hōhī de iyī ala̍! 18Wu̍chē oji̍ nɛ, n koko̍o de ala̍ mɛ̍! N i̍ ge̍ē gwa̍ ɛ̍mwɔ̄ la o̍bū la u̍ma̍ama ga iyɔ̄bū gɛ ni̍, kpɛɛ nīi Ɔchwɔ̄lɛ̍ Oro̍ōre̍ yī Ɔwɔ ē gbajɛ.”

19Bɛ̍ɛ̄nɛ̄ ma̍, Iji̍sɔ̄ɔsi nāa ibrɛ̍ɛdi ɔla̍ā bī la abɔ̄. O̍ da Ɔwɔ o̍be, de ɔ̍ hɛ̍ wa̍a̍ o̍bū de nāa de a̍chi̍kpo̍ yī nū. O̍ koko̍o de wa̍ hīka, “Ibi̍īyē yī u hɔ̄ ma̍ a̍nɛ. [Ibi̍īyē yī u nīi n de de ala̍ a̍nɛ, Ala̍ ya̍ i̍ngi̍ngɔ̍ɔ lɛ ɔbɔ̄bla yī u.” 20Ga la ɔgɔgu yī lɛlā nūma̍, ojōre̍ yī ɔ̄nɛ̄ ɔla̍ā de kwɛ̍ɛjī bɛ̍ɛ̄nɛ̄ ma̍, o̍ nāa ɔgba̍galā yī ɛ̍mwɔ̄ grāa aa̍. O̍ koko̍o de wa̍ hīka, “Ɔgba̍galā yī ɛ̍mwɔ̄ nūma̍, anu̍ - yɛka onīpīpɛ̄ yī Ɔwɔ nīi lwɔhu̍ bū la yeyī yī u nīi hu hunū de ala̍ ma̍ a̍nɛ.]

21“Ala̍ ma̍ gɛ ko̍ō! Ɔ̄chɛ nīi ge̍ē chɔ̄ɔwɛ ē tū u ma̍ hɔ̄ amu u̍ma̍ama ē kū ojōre̍ tāa ami. 22Ɔyi̍ yī Ɔngrɔ̄ɔ ma̍ chī ge̍ē pīyaku̍ lɔkɔ nīi Ɔwɔ ka hīka ɔ̍lɔ ge̍ē lɛ ma̍. I̍īyo̍ de ɔ̄chɛ ɔla̍ā nīi chī ge̍ē chɔ̄ɔwɛ ē tū ɔ̄ ma̍!”

23Bū la ɛbɛ ɔla̍ā, aa̍ wa̍a̍ gblāa abɔ̍ɔ ē ka ba̍la ɔ̍nyīnū hīka ɔ̄nyɛ kpa̍a ɔ̍lɔ yɛ ma̍ ge̍ē yɛ̍ɛ̄lā nūma̍ ma̍?

Ahu̍ yī lɛlā yī ɔ̄chɛ nīi gɔ̄ga ma̍

24A̍chi̍kpo̍ yī Iji̍sɔ̄ɔsi kū la ahu̍lɛ̄lā ɔha̍ la ɔtɔ̍ɔ̄ta̍ bɛ̍ɛ̄nɛ̄. E̍ yɛ ē ta̍ahu̍ yī ɔ̄chɛ nīi ɔmaga lipu̍ yī wā ma̍. 25Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “Ala̍ ma̍ ko̍ō! Ɔchwɔ̄lɛ̍ yī yɛchɛ nūma̍ ē ya̍ nīi āchɛ ē de otūlichō de wa̍. Āchɛ nīi ē deyīrɛ wa̍ ma̍, e̍ ē chī hī wā hīka, ‘Aɛ̍ɛya Āchɛ.’ 26I̍ i̍ngɔ̍ɔ nīi iyī ala̍ ma̍ ge̍ē lɛ a̍ni̍. Ɔ̄chɛ nīi ge̍ - ɔmaga lipu̍ yī ala̍ ge̍ē lɛ bāa ohu̍yɔma yī ala̍ ma̍. Ɔ̄chɛ nīi ge̍ - ɔlɛhu̍ yī ala̍ ge̍ē lɛ bāa ɔ̍chɛ̍ ma̍. 27Ɔ̄chɛ nīi hyāhɔ̄ yɛ ē re̍ ojōre̍ ma̍ ba̍la ɔ̄chɛ nīi yɛ ē chrāa anu̍ ɛrɔ̄ ma̍, ɔ̄nyɛ gɔ̄ga ma̍? Je̍ka ɔ̄chɛ nīi hyāhāhɔ̄ ma̍ gɔ̄ga a̍nɛ? Ami ma̍, n tū la olo̍ōlo̍ yī ala̍ bāa ɔ̄chɛ ɔchrɛ̄ɛrɔ̄ ma̍.

28“Ala̍ hɔ̄ tāa ami brii la yɛ̄grāa yī akanya yī u mɛ̍. 29Lɔkɔ nīi A̍dā yī u de wɔhu̍ yī ɛbɛ obōbī de u ma̍, ami titi ge̍ē ya̍ ɔmɔ̄miya yī ɔla̍ā ba̍la ala̍. 30Ala̍ ge̍ē hyāhɔ̄ re̍ ojōre̍, ē gwa̍ ɔjā la okpōkōlō yī ɛbɛ yī Ɔchwɔ̄lɛ̍ Oro̍ōre̍ yī u. Ala̍ ge̍ē hyāhɔ̄ la ɔchi̍īkpā yī ɔchwɔ̄lɛ̍, ē ka lɛpɔ̄ tāa ipwɔ̍ɔma igwo̍lɛpa yī Ali̍sɛ̄rɛli.”

Iji̍sɔ̄ɔsi ka Ipi̍ta ɔ̍lɔ ge̍ē ta̍ahu̍ yī anu̍

(Ima̍tiyu 26:31-35; Ima̍aki 14:27-31; Ijɔ̍ɔn 13:36-38)

31“Isa̍yi̍mɔ̄ɔn be̍e! Isa̍yi̍mɔ̄ɔn! Ma̍ gɛ ko̍ō! Isa̍tan nāa wɔhu̍ yɛ ē chikpo̍ ge̍ē ma ala̍ wa̍a̍ ē ma̍. O̍ chikpo̍ ge̍ē ya̍ ala̍ lɔkɔ nīi ɔhi̍yɛ̄rɔ̄ ē de igu ē gla ke̍e̍ ē hī a̍ngra̍ yī nū ma̍. 32N chī jɔhā de awɔ pi̍i̍ mɛ̍, Ipi̍ta, hɛ̄ɛbɛ nīi ɔtū ode chōche yī wɔ ge̍ e̍e hīyohū ni̍. A ge̍ ku̍chē pīya ūkpɔ̄tū ta̍ um mɛ̍, a tū aɛ̍nɛ̍ yī wɔ ehēhī wɔbɔ̄ nīi e̍ ge̍ lɛ brii bɛ̍ɛ̄nɛ̄,”

33Bū la ɛbɛ ɔla̍ā, Ipi̍ta da Iji̍sɔ̄ɔsi hīka, “Ādā, o̍ ge̍ - igbakɔbɔ, n ti̍bi̍īyē ge̍ē yɛ ba̍la awɔ! O̍ ge̍ chī - ɔpīyaku̍, n chɛ̄ ge̍ē ku̍ ba̍la awɔ!”

34Iji̍sɔ̄ɔsi hīya anu̍ ɔkɔ, koko̍o de ɔ̍ hīka, “Ma̍ gɛ ko̍ō, Ipi̍ta! O̍bū nīi obu̍ūgū ge̍ē tɛ̄ra̍ la otu̍ oli̍chɛ nūma̍, a ge̍ē ta̍ahu̍ igbɛta̍ hīka aɔ̍lɔ i̍ je̍ amɔ̍lɔ ni̍.”

Lɛlā yī ɔjā obī la abɔ̄

35Iji̍sɔ̄ɔsi da wa̍ bɛ̍ɛ̄nɛ̄ hīka, “I̍krɔ̍ɔ nīi n de ala̍ tɛ̄rɔ̄ ga ɛyɛ nīi ala̍ i̍ bī liba, kɛ̄ɛ yakpa, kɛ̄ɛ wɔkpa̍ ochelikpo̍ ni̍ ma̍ bɛ̍ɛ? Ɔjā ɔha̍ ku ala̍ lɛha̍ yɛ̄grāa ɔla̍ā?”

Aa̍ wa̍a̍ ka ɔ̍lɔ ge̍ ehe̍.

36O̍ ka de wa̍ bɛ̍ɛ̄nɛ̄ hīka, “Ala̍ ma̍ ko̍ō! U̍ma̍ama, ɔ̄chɛ nīi ge̍ lɛ liba kɛ̄ɛ yakpa ge̍ nāa bī. Ɔ̄chɛ nīi i̍ ge̍ lɛ oge ni̍, o̍ ge̍ de aru̍ yī nū nāa ra̍ nīi o̍ ge̍ ra̍ ɔha̍. 37Wu̍chē oji̍ nɛ, n koko̍o de ala̍! Lɛlā nīi Īpū yī Ɔwɔ ka hīka, ‘E̍ ka ɔ̍ tū la āchɛ ɔyɛ̍ɛ̄lā ɔdwɔ̄bi̍,’ ma̍ ge̍ē ya̍ i̍ngɔ̍ɔ lɛhu̍ yī u. Lɛlā nīi Īpū yī Ɔwɔ ka ku̍ u ma̍ yɛ amu ge̍ē de lɛ i̍ngɔ̍ɔ lēchi̍ mɛ̍.”

38A̍chi̍kpo̍ yī nū ka de ɔ̍ ka oge ɛpa ɔ̍lɔ hɔ̄ ma̍, Ādā!

O̍ da wa̍ ka ɔ̍lɔ ge̍ ba̍ i̍ngɔ̍ɔ bɛ̍ɛ̄nɛ̄!

Iji̍sɔ̄ɔsi jɔhā la Yɛwu yī O̍līifu

(Ima̍tiyu 26:36-46; Ima̍aki 14:32-42)

39Bɛ̍ɛ̄nɛ̄, Iji̍sɔ̄ɔsi wā ge̍ ku̍ pīya hī ipwɔ̍ɔ̄lɛ̍ lɔkɔ nīi o̍ ē ya̍ ogbo̍gbe̍ ma̍ ga Yɛwu yī O̍līifu. A̍chi̍kpo̍ yī nū yɛ ba̍la anu̍. 40E̍ gbajɛ gāa ma̍, o̍ koko̍o de a̍chi̍kpo̍ yī nū hīka, “Ala̍ ā jɔhā de Ɔwɔ i̍ngi̍ngɔ̍ɔ, hɛ̄ɛbɛ nīi ala̍ ge̍ e̍e gwāajɛ de otu̍tū ni̍.”

41Bū la ɛbɛ ɔla̍ā, o̍ wā ge̍ ku̍ pīya hī wā ga iyɔ̄bū hwɛɛ. O̍ ligbo̍ bāa ɛbɛ nīi lɛchɔ̄ yī abɔ̄ ngmɛ̍ɛnya ge̍ē ba̍ mɛ ma̍. O̍ pīya pīyēkū, jɔhā de Ɔwɔ bɛ̍ɛ̄nɛ̄ 42hīka, “Ɔwɔ A̍dā! Chu̍chu̍u, de ɔgba̍galā yī ichi̍ nūma̍ nāa hī u gɛ, nīi a ge̍ chikpo̍ ge̍ē ya̍ i̍ngɔ̍ɔ. A ā chī ya̍ lɔkɔ nīi n chikpo̍ ma̍ ni̍. Lɔkɔ nīi awɔ ɔlɔjā chikpo̍ ma̍ - i̍ngɔ̍ɔ ke̍e̍ nīi o̍ ge̍ē lɛ a̍nɛ.” 43[Ɔyɛ̍ɛ̄chɛ̄rɔ̄ yī Ɔwɔ bū la ichō wā dikpo̍ba̍ ɔ̄ ge̍ ya̍ nīi o̍ lwɔhu̍ bɛ̍ɛ̄nɛ̄. 44Ūkpɔ̄tū ti̍ya Iji̍sɔ̄ɔsi tū kpɛ̍ɛji ma̍, o̍ jɔhā de Ɔwɔ ga iyɔ̄bū iyɔ̄bū. Arɛ yī ibi̍īyē yī nū nīi yɛ ē lwāa ē gāa ajɛ ma̍ lɛ i̍ngɔ̍ɔ ke̍e̍ bāa yeyī ma̍.]

45Bɛ̍ɛ̄nɛ̄, o̍ wā ge̍ nīichō hī ɔhā ojōji ɔla̍ā, pīya dikpo̍ba̍ a̍chi̍kpo̍ yī nū. O̍ ma̍ wā nīi wɔlā de wa̍ ngmo̍ gblāa abɔ̍ɔ, wu̍chē yī yɛ̄jɛ̄ nīi jɛ̄ wā bū la ūkpɔ̄tū ɔngmu̍wɔnɔ nīi hɔ̄ de wa̍ ma̍. 46Iji̍sɔ̄ɔsi da wa̍ bɛ̍ɛ̄nɛ̄ hīka, “Wɔlā ma̍, ala̍ ē gbo i̍ngɔ̍ɔ kana̍ ma̍/? Ala̍ ā nīichō nīi ala̍ ge̍ jɔhā de Ɔwɔ hɛ̄ɛbɛ nīi ala̍ ge̍ e̍e gwāajɛ de otu̍tū ni̍.”

E̍ de Iji̍sɔ̄ɔsi ku̍

(Ima̍tiyu 26:47-56; Ima̍aki 14:43-50; Ijɔ̍ɔn 18:3-11)

47Iji̍sɔ̄ɔsi e̍e rɛ abɔ̍ɔ ē kɛlā. Āchɛ ɛha̍ ku̍ ta̍ bū ɔpɔ̄ɔpɛ̄. E̍ lyɛ̄mɛ̄ kpɛ̍ɛji. Iju̍dasi nīi - ɔ̄chɛ ɔha̍ lipu̍ yī a̍chi̍kpo̍ yī nū āchɛ igwo̍lɛpa ma̍ kpo̍ wā chɔbū a̍nɛ. O̍ wā dikpo̍ba̍ Iji̍sɔ̄ɔsi ge̍ de ɔ̍ o̍be de oko̍o tū ɔ̄. 48Iji̍sɔ̄ɔsi da Iju̍dasi hīka, “O̍ re̍ka a wā ge̍ē chɔ̄ɔwɛ ē tū ami Ɔyi̍ yī Ɔngrɔ̄ɔ la oko̍o ode tū um otōtū?”

49A̍chi̍kpo̍ yī nū āchɛ ehēhī ma̍ lɛlā nūma̍ nīi yɛ ge̍ē ya̍ ma̍, e̍ ka hīka, “Ādā, alɔ ā ya̍ tāa aa̍ la yāā yī alɔ gɛ/?” 50Ɔpɔ̄ɔpɛ̄, ɔha̍ yī wā pi oge hi̍ya̍a̍, de ɔfiyɛ yī A̍dā aligbe kpo̍ wɔrɔ̄ līre̍.

51Iji̍sɔ̄ɔsi ka ɔ̍lɔ ge̍ ɛgbato̍o! Ɔ̍lɔ hwɔhi mɛ̍! O̍ de abɔ̄ gwō ɔngrɔ̄ɔ ɔla̍ā la wɔrɔ̄ ɔla̍ā nīi wɔrɔ̄ de je̍ ɔpɔ̄ɔpɛ̄.

52Alɛhu̍ aligbe ba̍la alɛhu̍ yī āchɛ odeyīrɛ u̍nu̍ yī Ɔwɔ ba̍la ɛgabɔ̄ ɛha̍ wā ge̍ē ku̍ Iji̍sɔ̄ɔsi a̍nɛ. Iji̍sɔ̄ɔsi da wa̍ hīka, “Ami - obu̍ūwī nɛ, nīi ala̍ bī yāā, bī ogblo̍ yɛ ē wā ge̍ē ku̍ u ma̍? 53Yɛ̄grāa nīi n ē hɔ̄ abɔ̍ɔ mɔ̄chīmɔ̄chī ba̍la ala̍ la u̍nu̍ yī Ɔwɔ ma̍, ala̍ ku u kɛ̄ɛ? Yɛ̄grāa nūma̍ - iyī ala̍ nɛ. Yɛ̄grāa yī wɔhu̍ yī ɛbɛ odobū hɔ̄ ma̍ a̍nɛ.”

Ipi̍ta ta̍ahu̍ yī Iji̍sɔ̄ɔsi

(Ima̍tiyu 26:57-58, 69-75; Ima̍aki 14:53-54, 66-72; Ijɔ̍ɔn 18:12-18, 25-27)

54E̍ de Iji̍sɔ̄ɔsi ku̍ bɛ̍ɛ̄nɛ̄, bī ɔ̄ pīya ga wɔlɛ̍ yī A̍dā Aligbe. Ipi̍ta de ku wa̍ la u̍tu yɛ abɔ̍ɔ hwɛɛ. 55E̍ kpla̍ ɔla̍ tū abɔ̍ɔ la iyārɛ̄ɛpa yī iyɛ̍ɛchɛ yī ipwɔ̍ɔ̄nū ɔla̍ā. Ipi̍ta gāa ge̍ hɔ̄ abɔ̍ɔ ba̍la āchɛ ɛha̍ nīi gblāa abɔ̍ɔ ē jɛ̄ ɔla̍ ma̍. 56Ɔyi̍ ɔnɔ̄nyā ɔha̍ nīi - ɔ̍chɛ̍ abɔ̍ɔ ma̍, ma̍ Ipi̍ta nīi o̍ hɔ̄ abɔ̍ɔ ma̍. O̍ ma̍ Ipi̍ta chi̍i̍, ka hīka, “Ɔngrɔ̄ɔ nūma̍ titi ē yɛ ba̍la anu̍/.”

57Ipi̍ta ta̍ahu̍ ka hīka, “Ami i̍ je̍ ɔngrɔ̄ɔ ɔla̍ā ni̍ ko̍ō, ɔnyā!”

58Yɛ̄grāa ɔha̍ pi̍nyɛ̍ ɔpɔ̄ɔpɛ̄, ɔngrɔ̄ɔ ɔha̍ ma̍ Ipi̍ta da ɔ̍ hīka, “Je̍ka aa̍ awɔ - ɔ̄chɛ ɔha̍ lipu̍ yī wā nɛ.”

Ipi̍ta ta̍ahu̍ ka ɔ̍lɔ ge̍ īchāha̍-īchāha̍! Ɔ̍lɔ - i̍ anu̍ ni̍.

59O̍ i̍ gla oje ūkpo̍he ta̍ o̍bū ni̍, ɔngrɔ̄ɔ ɔha̍ gba̍a ka. Ɔngrɔ̄ɔ ɔla̍ā ka brii lēchi̍ lēchi̍ hīka, “Lēchi̍, ɔngrɔ̄ɔ nūma̍ ē yɛ ba̍la anu̍; wu̍chē oji̍ nɛ, anu̍ titi - Oliga̍līli nɛ.”

60Ipi̍ta gba̍a ta̍ahu̍ hīka, “Ādā, ma̍ u ma̍! N i̍ je̍ ɔjā nīi a yɛ aa̍ ē ka ma̍ ni̍ ko̍ō!”

Ɔpɔ̄ɔpɛ̄ nīi o̍ yɛ ē ka i̍ngɔ̍ɔ ma̍, ugū tɛ̄ra̍. 61Ādā Iji̍sɔ̄ɔsi pīyeyī kpa̍ta̍ ge̍ ma̍ Ipi̍ta chi̍i̍. Ipi̍ta bla lɛlā nīi Iji̍sɔ̄ɔsi ka ma̍ ɔpɔ̄ɔpɛ̄: “O̍bū nīi ugū ge̍ē tɛ̄ra̍ i̍chɛ nūma̍ pi̍i̍, a ge̍ē ta̍ahu̍ igbɛta̍ ka aɔ̍lɔ i̍ je̍ amɔ̍lɔ ni̍.” 62Ipi̍ta bīyɛchɛ pīya ge̍ drɛ̄ɛgba ɛbɛ̍bɛ̍-ɛbɛ̍bɛ̍.

E̍ gwō Iji̍sɔ̄ɔsi lijē

(Ima̍tiyu 26:67-68; Ima̍aki 14:65)

63Āchɛ nīi gblāa yɛ ē gbō Iji̍sɔ̄ɔsi ma̍ bī ɔ̄ ya̍, gwō ɔ̄ lijē. 64E̍ de ɔjā wā ɔ̄ la eyī, che ɔ̍ ikpo̍ hīka, “A je̍ ma̍, ɔ̄nyɛ dra̍ awɔ abɔ̄ ma̍? Ka we̍ e̍ē!” 65E̍ cha̍ ɔ̄ ɛcha̍, kɛlā oliwēyī-iwēyī yɛ̄mɛ̄mɛ̄ tāa anu̍.

Iji̍sɔ̄ɔsi rɛ la iyɔ̄bū yī alihiyo yī Iju̍u

(Ima̍tiyu 26:59-66; Ima̍aki 14:55-64; Ijɔ̍ɔn 18:19-24)

66Eyī wā ge̍ de nyā ma̍, ɛgabɔ̄ ba̍la alɛhu̍ ba̍la āchɛ ongū Lihɔ yī Iju̍u tu̍ ge̍ grēeyī. E̍ de Iji̍sɔ̄ɔsi bī wā la Ogrēeyī yī Alihiyo ɛla̍ā bɛ̍ɛ̄nɛ̄. 67E̍ che ɔ̍ ikpo̍ hīka ɔ̍lɔ ge̍ ka de aa̍ we̍ e̍ē! Ɔ̍lɔ - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ a̍nɛ?

Iji̍sɔ̄ɔsi hīya aa̍ ɔkɔ hīka, “N ge̍ koko̍o de ala̍, ala̍ i̍ chī ge̍ē chɛ̄ku u ni̍. 68N ge̍ chī che ala̍ ikpo̍ u̍uma, ala̍ i̍ chī ge̍ē chɛ̄ hīyɔkɔ ni̍. 69Bū la u̍ma̍ama ga iyɔ̄bū, Ɔyi̍ yī Ɔngrɔ̄ɔ ge̍ē hyāhɔ̄ la wāā yī abɔ̄ līre̍ yī Ɔwɔ Nīi - Ɔgɔnyɛ Ɔnɔ̄kɔ̄kū Ma̍.”

70Aa̍ wa̍a̍ gba̍a che ɔ̍ ikpo̍ hīka, “Awɔ - Ɔyi̍ yī Ɔwɔ a̍nɛ?”

Iji̍sɔ̄ɔsi hīya aa̍ ɔkɔ hīka, “I̍ngɔ̍ɔ nīi ala̍ ka a̍nɛ.”

71Aa̍ wa̍a̍ ka bɛ̍ɛ̄nɛ̄ hīka, aɛ̍lɛ gba̍a ē chikpo̍ yī olitɛ̍ɛhi̍yɛ̍ ge̍ē ya̍ iyi̍? Aɛ̍lɛ chī de po̍ bū la oko̍o yī ɔ̍lɔ ɔlɔjā mɛ̍.

Currently Selected:

Ilu̍uku 22: YBASR

Highlight

Copy