Ima̍tiyu 24
24
Ogbōgbo yī U̍nu̍ yī Ɔwɔ
(Ima̍aki 13:1-2; Ilu̍uku 21:5-6)
1Iji̍sɔ̄ɔsi wā ge̍ pīya bɛ̍ɛ̄nɛ̄. O̍ yɛ ē pīya ē hī u̍nu̍ yī Ɔwɔ ma̍ a̍chi̍kpo̍ yī nū gāa dikpo̍ba̍ ɔ̄ ge̍ yɛ ē chabɔ̄ lɔkɔ nīi e̍ gwo̍ ipu̍nu̍ ɛla̍ā wa̍a̍ ma̍ ē hu̍ ɔ̄. 2Iji̍sɔ̄ɔsi koko̍o de wa̍ hīka, “U̍nu̍ nūma̍ wa̍a̍ nīi ala̍ yɛ ma̍ ē ma̍ ma̍, n ā koko̍o de ala̍! Lɛchɔ̄ ūkpūkpo̍he i̍ yɛ abɔ̍ɔ ge̍ē hōhī che la ɛbɛ nīi o̍ che ma̍ ni̍. E̍ ge̍ē de wa̍ ē gbo ē tāajɛ cha̍cha̍.”
Akanya ba̍la ichi̍ nīi ge̍ē hɔ̄ ma̍
(Ima̍aki 13:3-13; Ilu̍uku 21:7-19)
3Iji̍sɔ̄ɔsi hyāhɔ̄ abɔ̍ɔ la ichō yī Yɛwu yī O̍līifu ma̍, a̍chi̍kpo̍ yī nū wā dikpo̍ba̍ ɔ̄ ge̍ che ɔ̍ ikpo̍ fi̍yɛ̍; ɔ̍lɔ ge̍ koko̍o de aa̍ gɛ! Yɛ̄grāa ɔna nīi lɛlā nūma̍ ɔ̍lɔ ge̍ē ya̍ ma̍? Lɛlā iyi̍ ɔ̍lɔ chī ge̍ē ya̍ ē chabɔ̄ yɛ̄grāa yī ɔwɔ̄wā yī ɔ̍lɔ ba̍la yɛ̄grāa yī yɛchɛ ode kwɛ̍ɛjī ma̍?
4Iji̍sɔ̄ɔsi hīya aa̍ ɔkɔ hīka, “Ala̍ ā deyīrɛ grigri! Ala̍ e̍e chɛ̄ nīi ɔ̄chɔ̄chɛ ge̍ gla̍ ala̍ ni̍. 5Wu̍chē oji̍ nɛ, āchɛ yɛ̄mɛ̄mɛ̄ ge̍ē wā la riyī yī u. Ɔnyɔnyɛ ge̍ē ka hīka, ‘Ami - Ɔhɔ̍ɔnyɛta̍ Nīi Ɔwɔ Hu’ a̍nɛ, hɛ̄ɛbɛ ge̍ē gla̍ āchɛ yɛ̄mɛ̄mɛ̄. 6Ala̍ ge̍ē po̍ ojiya yī lɛwu̍ ɔyɛ kurɛkurɛ ba̍la wɔ̄kā yī lɛwu̍ ɔyɛ hwɛɛ ma̍, ala̍ e̍e hi̍yɛ̄ngura ni̍. Lɛlā oli̍ngɔ̍ɔ ma̍ ge̍ē hɔ̄. Ɔla̍ā i̍ chī re̍ka yɛchɛ ɔkwɛ̍ɛjī gbajɛ mɛ̍ ni̍. 7Ɔcha ɔha̍ ge̍ē kplɛ̍wu̍ tāa ɔcha ɔha̍. Āchɛ yī ɔchwɔ̄lɛ̍ ɔha̍ ge̍ē wā la āchɛ yī ɔchwɔ̄lɛ̍ ɔha̍. Lɛmiyɛ ɔdwɔ̄bi̍ ba̍la ajɛ ohe̍ejē wɔhɔ̍hu̍ ge̍ē ya̍ la ɛbɛ yɛ̄mɛ̄mɛ̄. 8Lɛlā nūma̍ wa̍a̍ lɛ bāa wɔma yī ɔyi̍ ɔlɔ̄lā ɔrāarāa ma̍ we̍.
9“Yɛ̄grāa ɔla̍ā, āchɛ ge̍ē ku̍ ala̍ ē wa̍ābɔ̄ la ala̍ ē de āchɛ ɛha̍ nīi e̍ ē ya̍ ala̍ ichi̍. E̍ ge̍ē ku̍ ala̍ ē ngmo̍. Ala̍ ge̍ē de ē ta̍ āchɛ̄ɛchɛ anyī wa̍a̍ wu̍chē yī u. 10Āchɛ yɛ̄mɛ̄mɛ̄ ge̍ē tu̍labɔ̄ hī lɛlā nīi e̍ de ɔtū che o̍bū ma̍. E̍ ge̍ē chɔ̄ɔwɛ ē tū ɔ̍nyīnū; e̍ ge̍ē de ē ta̍ ɔ̍nyīnū anyī. 11Yɛ̄grāa ɔla̍ā, alarīmɛ̄ nīi ka aɛ̍lɛ - āchɛ ɔkɛrɔ̄ yī Ɔwɔ nɛ ma̍ ge̍ē dɔ̄da. E̍ ge̍ē wā ge̍ē gla̍ āchɛ yɛ̄mɛ̄mɛ̄. 12Lɛlā ɔdwɔ̄bi̍ ge̍ē mīyanya kpɛ̍ɛ nīi ɔhɔtū yī āchɛ yɛ̄mɛ̄mɛ̄ ge̍ē hīyohū. 13Ɔ̄chɛ nīi ge̍ chī rɛ brii gbo̍ ɔ̄chī ɔkwɛ̍ɛjī, ɔlɔjā ge̍ē lɛ ɔhɛ̍ta̍. 14E̍ ge̍ē bī Wɔ̄kā Ɔlwɔnyɛ yī Ɔchwɔ̄lɛ̍ Oro̍ōre̍ yī Ɔwɔ nūma̍ ge̍ē ka ē ta̍ ɛbɛmɛbɛ ē ta̍ wa̍a̍ lipu̍ yī yɛchɛ, e̍ ya̍ nīi āchɛ wa̍a̍ jo̍ōkū. O̍bū ma̍, ɔkwɛ̍ɛjī yī ɔjā wa̍a̍ ge̍ē wā bɛ̍ɛ̄nɛ̄.
Lɛbi̍ okwi̍bi̍īyē grigri
(Ima̍aki 13:14-23; Ilu̍uku 21:20-24)
15“Ala̍ ge̍ē ma̍ ‘lɛbi̍ Okwi̍bi̍īyē Grigri Ɔ̍lɔma̍’ nīi Ida̍nīyɛli ɔ̄chɛ ɔkɛrɔ̄ yī Ɔwɔ ka ma̍ nīi o̍ ge̍ē rɛ abɔ̍ɔ la ɛbɛ ɔnɛ̄ɛhɛhi.” Awɔ ɔ̄chɛ nīi yɛ ē ma̍ īpū ma̍ ge̍ po̍ ochi̍chi̍ yī nū bɛ̍ɛ̄nɛ̄. 16“Yɛ̄grāa ɔla̍ā, āchɛ nīi gblāa la Ijudi̍ya ma̍ ge̍ē gwɛ̍ɛnya ē pīya ē ga yɛwu. 17Ɔ̄chɛ nīi hɔ̄ abɔ̍ɔ la ɔda ma̍ ge̍ e̍e ya̍akanya chɛ̄ ga ipu̍nu̍ ge̍ kpo̍ āɛ̄jā yī nū ni̍. 18Ɔ̄chɛ nīi kū abɔ̍ɔ la yɛrɔ̄ ma̍ ge̍ e̍e ku̍chē wā ge̍ nāa ɔ̄pa̍ ɔta̍kla̍ yī nū ni̍. 19I̍chi̍chɛ ɔla̍ā ge̍ē dwɔ̄bi̍ kpa̍a ē de anyā ehlīpu̍ ba̍la enīi bī ayi̍ la abɔ̄ ma̍! 20Ala̍ ā jɔhā de Ɔwɔ hɛ̄ɛbɛ nīi ɛnya ɔgwɔ̍ɔ̄gwa̍ nūma̍ ge̍ e̍e lā de ala̍ yɛ̄grāa yī ohū ɔdwɔ̄bi̍ kɛ̄ɛ Ɔ̄chī Ɔmyɛ̍nyɛ̍ ni̍. 21Wu̍chē oji̍ nɛ, akanya yī olo̍ ɔla̍ā ge̍ē dwɔ̄bi̍ gba̍a̍ gla ɛbɛ ē ta̍. O̍ ge̍ē dwɔ̄bi̍ hi̍ ɔha̍lɔha̍ wa̍a̍ nīi hɔ̄ je̍ bū la owu̍tu yī yɛchɛ kpɛɛ ge̍ ku i̍chɛ nūma̍ ma̍. Ita yī akanya oli̍ngɔ̍ɔ i̍ u̍tu ge̍ē hɔ̄ ge̍ē gbo̍ ē gɛ ni̍. 22Ɔwɔ chī de ɔ̄chī ɛla̍ā kɔ̄ hwō mɛ̍. O̍ i̍ ge̍ ya̍ i̍ngɔ̍ɔ ni̍ nɛ, ɔ̄chɔ̄chɛ i̍ ge̍ē wōwi ni̍. Wu̍chē yī āchɛ yī nū nīi o̍ hōhu ma̍, o̍ kɔ̄ ɔ̄chī ɛla̍ā hwō.
23“Yɛ̄grāa ɔla̍ā, ɔ̄chɛ ge̍ ka de ala̍ hīka, ‘Ma̍ Ɔhɔ̍ɔnyɛta̍ Nīi Ɔwɔ Hu Ma̍ nīi yɛ Ma̍,’ kɛ̄ɛ ‘Ma̍ ɔ̄ aa̍nū!’ Ala̍ e̍e chɛ̄ku ɔ̍ ni̍. 24Wu̍chē oji̍ nɛ, āchɛ nīi ge̍ē warīmɛ̄ ka aɛ̍lɛ - Ɔhɔ̍ɔnyɛta̍ Nīi Ɔwɔ Ɔ̍lɔ Hu Nɛ ma̍, ba̍la alarīmɛ̄ nīi ka aɛ̍lɛ - āchɛ ɔkɛrɔ̄ yī Ɔwɔ nɛ ma̍ ge̍ē dɔ̄da. E̍ ge̍ē ya̍ i̍mamachi̍ ba̍la lɛlā ɔlɛbɛ̍bi̍ yɛ̄mɛ̄mɛ̄ chabɔ̄, hɛ̄ɛbɛ ge̍ē gla̍ āchɛ nīi Ɔwɔ hōhu ma̍ nīi o̍ ge̍ yɛ ge̍ē ngmɛ̍rɛ̍ i̍ngɔ̍ɔ ē de wa̍ mɛ. 25Ala̍ ā darɔ̄ku! Ma̍a n de koko̍o de ala̍ lɔ̄lā mɛ̍!
26“Kɛ̄ɛ i̍ngɔ̍ɔ ni̍, āchɛ ge̍ ka de ala̍ hīka, ‘Ala̍ ma̍ ko̍ō! O̍ hɔ̄ abɔ̍ɔ la a̍chi̍ chukuru,’ ala̍ e̍e gāa ni̍. Kɛ̄ɛ, e̍ ge̍ ka hīka, ‘Ala̍ mɔ̍ɔkɔ nīi o̍ trɛ̍ba a̍mā’ ala̍ e̍e chɛ̄ku ɔ̍ ni̍. 27Wu̍chē oji̍ nɛ, Ɔyi̍ yī Ɔngrɔ̄ɔ ge̍ē wā ma̍, o̍ ge̍ē lɛ bɔ̄ɔkɔ nīi yakpla̍ ge̍ gbo nīi ɔla̍ yī nū hɛ̍ ārɛ̄ bū la yɛnɔ ɔ̄chī ge̍ē chɛ̄ la yɛnɔ ɔ̄nɛ̄ ma̍.
28“Ɛbɛha̍-ɛbɛha̍ nīi okū ge̍ gbo ma̍, abɔ̍ɔ nīi upu ē grēeyī a̍nɛ.
Ɔwɔ̄wā yī Ɔyi̍ yī Ɔngrɔ̄ɔ
(Ima̍aki 13:24-27; Ilu̍uku 21:25-28)
29“Ɔpɔ̄ɔpɛ̄ nīi akanya yī ɔ̄chī ɛla̍ā ge̍ē ga ma̍, yɛnɔ ge̍ē de ē dobū; ɔwīyā i̍ ge̍ē fi̍yajɛ ē gɛ ni̍; i̍nyi̍nyɔ̍ɔwīyā ge̍ē ha̍ābɔ̄ bū la ichō wā la ajɛ; wɔhu̍ yī akpɔ̍ɔwɔ wa̍a̍ ge̍ē he̍ejē mɔri̍mɔri̍. 30Yɛ̄grāa ɔla̍ā, lɛlā nīi ge̍ē ya̍ chabɔ̄ yī Ɔyi̍ yī Ɔngrɔ̄ɔ ma̍ ge̍ē hu ē che abɔ̍ɔ la ichō yī akpɔ̍ɔwɔ. Ɛchamɛcha wa̍a̍ ge̍ē kū la lɛgba la ɔdɔ̄dɛ̄ bɛ̍ɛ̄nɛ̄. E̍ ge̍ē ma̍ Ɔyi̍ yī Ɔngrɔ̄ɔ abɔ̍ɔ la akpɔ̍ɔwɔ nīi o̍ yɛ ē wā la wɔhu̍ ba̍la rīgā ɔnɔ̄kɔ̄kū yī nū ma̍. 31Lɛjī ɔnɔ̄kɔ̄kū ɔha̍ ge̍ē kɛlā. O̍ ge̍ē de ayɛ̍ɛ̄chɛ̄rɔ̄ yī nū tɛ̄rɔ̄ gāa oe̍ ɔha̍lɔha̍ yī yɛchɛ wa̍a̍ gāa ge̍ē tu̍ āchɛ yī nū nīi o̍ hōhu ma̍ ē grēeyī bū la ɛjī yī oe̍ ɔha̍ ge̍ chɛ̄ la oe̍ ɔha̍ krīī.
Ngū lɛlā bū lɛlā nīi ejū ya̍ ma̍
(Ima̍aki 13:28-31; Ilu̍uku 21:29-33)
32“Ala̍ ā ngū lɛlā bū lɛlā nīi ejū ē ya̍ ma̍ gɛ. Ejū ge̍ yɛ ē chiya a̍bɔ̄ onīpīpɛ̄, ē rū īpū onīpīpɛ̄ mɛ̍, ala̍ jo̍ōkū gɛ hīka ɔgwā gbo mɛ̍. 33I̍ngi̍ngɔ̍ɔ nīi lɛlā nūma̍ lɛ a̍nɛ. Ala̍ ge̍ ma̍ lɛlā nūma̍ i̍ngɔ̍ɔ wa̍a̍ mɛ̍, ala̍ ā jo̍ōkū gɛ hīka yɛ̄grāa ɔ̍lɔma̍ hōhī kurɛkurɛ mɛ̍; o̍ gbajɛ wā la oko̍prīinu mɛ̍. 34Lēchi̍-lēchi̍, n ā koko̍o de ala̍! Lɛlā nūma̍ ge̍ē ya̍ wa̍a̍ o̍bū nīi āchɛ nīi hɔ̄leyī u̍ma̍ama ma̍ ē pīyaku̍ wa̍a̍. 35Ichō ba̍la ajɛ nūma̍ ma̍ ge̍ē chāajɛ ē mɛ. Lɛlā yī oko̍o yī u i̍ ge̍ē chāajɛ ge̍ē gbo̍ ē mɛ ni̍.”
Ɔ̄chɔ̄chɛ i̍ je̍ ɔ̄chī ɔ̍lɔma̍ ni̍
(Ima̍aki 13:32-37; Ilu̍uku 17:34-36)
36“Ɔ̄chɔ̄chɛ i̍ je̍ ɔ̄chī ɔla̍ā kɛ̄ɛ yɛ̄grāa ɔla̍ā pi̍i̍ ni̍. Ayɛ̍ɛ̄chɛ̄rɔ̄ yī Ɔwɔ i̍ jo̍ōkū ni̍. Ɔyi̍ yī Ɔwɔ i̍ jo̍ōkū ni̍ i̍ngi̍ngɔ̍ɔ. Ɔwɔ A̍dā lōri̍īnū jo̍ōkū a̍nɛ. 37Ɔwɔ̄wā yī Ɔyi̍ yī Ɔngrɔ̄ɔ ge̍ē lɛ bāa lɛlā nīi ya̍ la yɛ̄grāa yī Ino̍a ma̍. 38Yɛ̄grāa ɔla̍ā, o̍bū nīi Yenyi Ɔhɛ̍rɛ̍ wā ma̍, āchɛ ɛha̍ gblāa abɔ̍ɔ ē re̍ ojōre̍ ē gwa̍ ɛ̍mwɔ̄; angrɔ̄ɔ ɛha̍ yɛ ē wu̍ anyā; anyā ɛha̍ yɛ ē blɛ̍ba̍. I̍ngɔ̍ɔ nīi e̍ yɛ ē ya̍ kpɛɛ nīi Ino̍a ga tū ga wɔwu̍ ɔnɔ̄kɔ̄kū a̍nɛ. 39Āchɛ wa̍a̍ i̍ je̍ ɔjā nīi yɛ ē ya̍ ma̍ ni̍, kpɛɛ nīi Yenyi Ɔhɛ̍rɛ̍ ɔla̍ā wā ge̍ de wa̍ gu pīya cha̍cha̍. I̍ngɔ̍ɔ nīi o̍ ge̍ē lɛ la yɛ̄grāa nīi Ɔyi̍ yī Ɔngrɔ̄ɔ ge̍ē wā ma̍ a̍nɛ. 40Yɛ̄grāa ɔla̍ā, angrɔ̄ɔ āchɛ ɛpa ge̍ē gblāa yɛ ē ya̍ u̍ku̍rɔ̍ la yɛrɔ̄, e̍ ge̍ē de ɔha̍ ē nāa pīya ē hī ɔ̄chɛ ɔ̍mɛpa ē kū abɔ̍ɔ. 41Anyā āchɛ ɛpa ge̍ē kū yɛ ē gbɔ̄jā la lɛchɔ̄, e̍ ge̍ē de ɔha̍ ē nāa pīya ē hī ɔ̍mɛpa ē kū abɔ̍ɔ. 42Ala̍ ā de eyī kōkū! Wu̍chē oji̍ nɛ, ala̍ i̍ je̍ ɔ̄chī nīi Abā yī ala̍ ge̍ē wā ma̍ ni̍. 43Ala̍ ma̍ gɛ ko̍ō! Ɔlɔjā yī wɔlɛ̍ ge̍ē je̍ yɛ̄grāa nīi uwī ge̍ē wā ma̍ nɛ, o̍ i̍ ge̍ē chɛ̄ gbwɔlā nīi uwī wā ge̍ē kpo̍ āɛ̄jā ni̍. 44Wu̍chē yī ɔla̍ā, ala̍ titi ala̍ ā ti̍bi̍īyēchɛ̄ myɛ̄grāa-myɛ̄grāa! Wu̍chē oji̍ nɛ, Ɔyi̍ yī Ɔngrɔ̄ɔ ge̍ē wā yɛ̄grāa nīi ala̍ i̍ ge̍ē kwɛ̍ri̍ya̍tū ɔ̄ ni̍ ma̍.
Ɔ̍chɛ̍ ɔnɛ̄ɛhɛhi kɛ̄ɛ ɔdwɔ̄bi̍
(Ilu̍uku 12:41-48)
45“Ɔ̄nyɛ re̍ka ɔ̍chɛ̍ ɔnɛ̄ɛhɛhi nīi je̍ lɛlā ma̍ dɛdɛ? Ɔ̄chɛ nīi abā yī nū de a̍chɛ̍ yī nū ɛha̍ tū ɔ̄ la abɔ̄ ka ɔ̍lɔ ge̍ de ojōre̍ de ɛ̍lɛ yɛ̄grāa ma̍ nɛ. 46A̍hōhi ge̍ - iyī ɔ̍chɛ̍ ɔla̍ā nīi o̍ ge̍ re̍ka abā yī nū cha wā la wɔlɛ̍ ge̍ ma̍ ɔ̄ nīi o̍ yɛ ē ya̍ i̍ngɔ̍ɔ! 47Lēchi̍-lēchi̍, n ā koko̍o de ala̍! Abā yī nū ge̍ē de ɔjāha̍-ɔjāha̍ yī nū wa̍a̍ ē kpo̍ tū ɔ̄ la abɔ̄ bɛ̍ɛ̄nɛ̄. 48O̍ ge̍ē chī re̍ka ɔ̍chɛ̍ ɔdwɔ̄bi̍, o̍ ge̍ē ka ɔ̍lɔ ge̍ chāa! Abā yī anu̍ ma̍ ɔ̍lɔ yɛ amu ge̍ē chɔ̄cha ɛnyɛnya kɛ̄ɛ! 49O̍ ge̍ē kū la ogwō a̍chɛ̍ yī abā yī nū ɛla̍ā lijē. O̍ ge̍ē pīya ge̍ē tū ribi yī ojōre̍ ba̍la ɔjā ɔgwɔ̍ɔ̄gwa̍ tāa ali̍gbi̍re̍ ɛha̍. 50Bɛ̍ɛ̄nɛ̄ ma̍, abā yī nū ɔla̍ā ge̍ē ku̍ ē ta̍ bū gbɛgbɛlɛ i̍chi̍chɛ ɔha̍ nīi o̍ kwɛ̍ri̍ya̍tū ɔ̄ ni̍ ma̍, ba̍la yɛ̄grāa nīi o̍ jo̍ōkū ni̍ ma̍. 51Abā yī nū ge̍ē ya̍ ē tāa anu̍ dwɔ̄bi̍-dwɔ̄bi̍. O̍ ge̍ē ya̍ ɔ̄ nīi o̍ ē mi̍chi̍ bāa āchɛ ɔkɛlā ɔha̍ chōo̍chē ya̍ ɔha̍ ma̍. Ɔ̍chɛ̍ ɔla̍ā ge̍ē drɛ̄ɛgba ē rāngūu abɔ̍ɔ.
Currently Selected:
Ima̍tiyu 24: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
Ima̍tiyu 24
24
Ogbōgbo yī U̍nu̍ yī Ɔwɔ
(Ima̍aki 13:1-2; Ilu̍uku 21:5-6)
1Iji̍sɔ̄ɔsi wā ge̍ pīya bɛ̍ɛ̄nɛ̄. O̍ yɛ ē pīya ē hī u̍nu̍ yī Ɔwɔ ma̍ a̍chi̍kpo̍ yī nū gāa dikpo̍ba̍ ɔ̄ ge̍ yɛ ē chabɔ̄ lɔkɔ nīi e̍ gwo̍ ipu̍nu̍ ɛla̍ā wa̍a̍ ma̍ ē hu̍ ɔ̄. 2Iji̍sɔ̄ɔsi koko̍o de wa̍ hīka, “U̍nu̍ nūma̍ wa̍a̍ nīi ala̍ yɛ ma̍ ē ma̍ ma̍, n ā koko̍o de ala̍! Lɛchɔ̄ ūkpūkpo̍he i̍ yɛ abɔ̍ɔ ge̍ē hōhī che la ɛbɛ nīi o̍ che ma̍ ni̍. E̍ ge̍ē de wa̍ ē gbo ē tāajɛ cha̍cha̍.”
Akanya ba̍la ichi̍ nīi ge̍ē hɔ̄ ma̍
(Ima̍aki 13:3-13; Ilu̍uku 21:7-19)
3Iji̍sɔ̄ɔsi hyāhɔ̄ abɔ̍ɔ la ichō yī Yɛwu yī O̍līifu ma̍, a̍chi̍kpo̍ yī nū wā dikpo̍ba̍ ɔ̄ ge̍ che ɔ̍ ikpo̍ fi̍yɛ̍; ɔ̍lɔ ge̍ koko̍o de aa̍ gɛ! Yɛ̄grāa ɔna nīi lɛlā nūma̍ ɔ̍lɔ ge̍ē ya̍ ma̍? Lɛlā iyi̍ ɔ̍lɔ chī ge̍ē ya̍ ē chabɔ̄ yɛ̄grāa yī ɔwɔ̄wā yī ɔ̍lɔ ba̍la yɛ̄grāa yī yɛchɛ ode kwɛ̍ɛjī ma̍?
4Iji̍sɔ̄ɔsi hīya aa̍ ɔkɔ hīka, “Ala̍ ā deyīrɛ grigri! Ala̍ e̍e chɛ̄ nīi ɔ̄chɔ̄chɛ ge̍ gla̍ ala̍ ni̍. 5Wu̍chē oji̍ nɛ, āchɛ yɛ̄mɛ̄mɛ̄ ge̍ē wā la riyī yī u. Ɔnyɔnyɛ ge̍ē ka hīka, ‘Ami - Ɔhɔ̍ɔnyɛta̍ Nīi Ɔwɔ Hu’ a̍nɛ, hɛ̄ɛbɛ ge̍ē gla̍ āchɛ yɛ̄mɛ̄mɛ̄. 6Ala̍ ge̍ē po̍ ojiya yī lɛwu̍ ɔyɛ kurɛkurɛ ba̍la wɔ̄kā yī lɛwu̍ ɔyɛ hwɛɛ ma̍, ala̍ e̍e hi̍yɛ̄ngura ni̍. Lɛlā oli̍ngɔ̍ɔ ma̍ ge̍ē hɔ̄. Ɔla̍ā i̍ chī re̍ka yɛchɛ ɔkwɛ̍ɛjī gbajɛ mɛ̍ ni̍. 7Ɔcha ɔha̍ ge̍ē kplɛ̍wu̍ tāa ɔcha ɔha̍. Āchɛ yī ɔchwɔ̄lɛ̍ ɔha̍ ge̍ē wā la āchɛ yī ɔchwɔ̄lɛ̍ ɔha̍. Lɛmiyɛ ɔdwɔ̄bi̍ ba̍la ajɛ ohe̍ejē wɔhɔ̍hu̍ ge̍ē ya̍ la ɛbɛ yɛ̄mɛ̄mɛ̄. 8Lɛlā nūma̍ wa̍a̍ lɛ bāa wɔma yī ɔyi̍ ɔlɔ̄lā ɔrāarāa ma̍ we̍.
9“Yɛ̄grāa ɔla̍ā, āchɛ ge̍ē ku̍ ala̍ ē wa̍ābɔ̄ la ala̍ ē de āchɛ ɛha̍ nīi e̍ ē ya̍ ala̍ ichi̍. E̍ ge̍ē ku̍ ala̍ ē ngmo̍. Ala̍ ge̍ē de ē ta̍ āchɛ̄ɛchɛ anyī wa̍a̍ wu̍chē yī u. 10Āchɛ yɛ̄mɛ̄mɛ̄ ge̍ē tu̍labɔ̄ hī lɛlā nīi e̍ de ɔtū che o̍bū ma̍. E̍ ge̍ē chɔ̄ɔwɛ ē tū ɔ̍nyīnū; e̍ ge̍ē de ē ta̍ ɔ̍nyīnū anyī. 11Yɛ̄grāa ɔla̍ā, alarīmɛ̄ nīi ka aɛ̍lɛ - āchɛ ɔkɛrɔ̄ yī Ɔwɔ nɛ ma̍ ge̍ē dɔ̄da. E̍ ge̍ē wā ge̍ē gla̍ āchɛ yɛ̄mɛ̄mɛ̄. 12Lɛlā ɔdwɔ̄bi̍ ge̍ē mīyanya kpɛ̍ɛ nīi ɔhɔtū yī āchɛ yɛ̄mɛ̄mɛ̄ ge̍ē hīyohū. 13Ɔ̄chɛ nīi ge̍ chī rɛ brii gbo̍ ɔ̄chī ɔkwɛ̍ɛjī, ɔlɔjā ge̍ē lɛ ɔhɛ̍ta̍. 14E̍ ge̍ē bī Wɔ̄kā Ɔlwɔnyɛ yī Ɔchwɔ̄lɛ̍ Oro̍ōre̍ yī Ɔwɔ nūma̍ ge̍ē ka ē ta̍ ɛbɛmɛbɛ ē ta̍ wa̍a̍ lipu̍ yī yɛchɛ, e̍ ya̍ nīi āchɛ wa̍a̍ jo̍ōkū. O̍bū ma̍, ɔkwɛ̍ɛjī yī ɔjā wa̍a̍ ge̍ē wā bɛ̍ɛ̄nɛ̄.
Lɛbi̍ okwi̍bi̍īyē grigri
(Ima̍aki 13:14-23; Ilu̍uku 21:20-24)
15“Ala̍ ge̍ē ma̍ ‘lɛbi̍ Okwi̍bi̍īyē Grigri Ɔ̍lɔma̍’ nīi Ida̍nīyɛli ɔ̄chɛ ɔkɛrɔ̄ yī Ɔwɔ ka ma̍ nīi o̍ ge̍ē rɛ abɔ̍ɔ la ɛbɛ ɔnɛ̄ɛhɛhi.” Awɔ ɔ̄chɛ nīi yɛ ē ma̍ īpū ma̍ ge̍ po̍ ochi̍chi̍ yī nū bɛ̍ɛ̄nɛ̄. 16“Yɛ̄grāa ɔla̍ā, āchɛ nīi gblāa la Ijudi̍ya ma̍ ge̍ē gwɛ̍ɛnya ē pīya ē ga yɛwu. 17Ɔ̄chɛ nīi hɔ̄ abɔ̍ɔ la ɔda ma̍ ge̍ e̍e ya̍akanya chɛ̄ ga ipu̍nu̍ ge̍ kpo̍ āɛ̄jā yī nū ni̍. 18Ɔ̄chɛ nīi kū abɔ̍ɔ la yɛrɔ̄ ma̍ ge̍ e̍e ku̍chē wā ge̍ nāa ɔ̄pa̍ ɔta̍kla̍ yī nū ni̍. 19I̍chi̍chɛ ɔla̍ā ge̍ē dwɔ̄bi̍ kpa̍a ē de anyā ehlīpu̍ ba̍la enīi bī ayi̍ la abɔ̄ ma̍! 20Ala̍ ā jɔhā de Ɔwɔ hɛ̄ɛbɛ nīi ɛnya ɔgwɔ̍ɔ̄gwa̍ nūma̍ ge̍ e̍e lā de ala̍ yɛ̄grāa yī ohū ɔdwɔ̄bi̍ kɛ̄ɛ Ɔ̄chī Ɔmyɛ̍nyɛ̍ ni̍. 21Wu̍chē oji̍ nɛ, akanya yī olo̍ ɔla̍ā ge̍ē dwɔ̄bi̍ gba̍a̍ gla ɛbɛ ē ta̍. O̍ ge̍ē dwɔ̄bi̍ hi̍ ɔha̍lɔha̍ wa̍a̍ nīi hɔ̄ je̍ bū la owu̍tu yī yɛchɛ kpɛɛ ge̍ ku i̍chɛ nūma̍ ma̍. Ita yī akanya oli̍ngɔ̍ɔ i̍ u̍tu ge̍ē hɔ̄ ge̍ē gbo̍ ē gɛ ni̍. 22Ɔwɔ chī de ɔ̄chī ɛla̍ā kɔ̄ hwō mɛ̍. O̍ i̍ ge̍ ya̍ i̍ngɔ̍ɔ ni̍ nɛ, ɔ̄chɔ̄chɛ i̍ ge̍ē wōwi ni̍. Wu̍chē yī āchɛ yī nū nīi o̍ hōhu ma̍, o̍ kɔ̄ ɔ̄chī ɛla̍ā hwō.
23“Yɛ̄grāa ɔla̍ā, ɔ̄chɛ ge̍ ka de ala̍ hīka, ‘Ma̍ Ɔhɔ̍ɔnyɛta̍ Nīi Ɔwɔ Hu Ma̍ nīi yɛ Ma̍,’ kɛ̄ɛ ‘Ma̍ ɔ̄ aa̍nū!’ Ala̍ e̍e chɛ̄ku ɔ̍ ni̍. 24Wu̍chē oji̍ nɛ, āchɛ nīi ge̍ē warīmɛ̄ ka aɛ̍lɛ - Ɔhɔ̍ɔnyɛta̍ Nīi Ɔwɔ Ɔ̍lɔ Hu Nɛ ma̍, ba̍la alarīmɛ̄ nīi ka aɛ̍lɛ - āchɛ ɔkɛrɔ̄ yī Ɔwɔ nɛ ma̍ ge̍ē dɔ̄da. E̍ ge̍ē ya̍ i̍mamachi̍ ba̍la lɛlā ɔlɛbɛ̍bi̍ yɛ̄mɛ̄mɛ̄ chabɔ̄, hɛ̄ɛbɛ ge̍ē gla̍ āchɛ nīi Ɔwɔ hōhu ma̍ nīi o̍ ge̍ yɛ ge̍ē ngmɛ̍rɛ̍ i̍ngɔ̍ɔ ē de wa̍ mɛ. 25Ala̍ ā darɔ̄ku! Ma̍a n de koko̍o de ala̍ lɔ̄lā mɛ̍!
26“Kɛ̄ɛ i̍ngɔ̍ɔ ni̍, āchɛ ge̍ ka de ala̍ hīka, ‘Ala̍ ma̍ ko̍ō! O̍ hɔ̄ abɔ̍ɔ la a̍chi̍ chukuru,’ ala̍ e̍e gāa ni̍. Kɛ̄ɛ, e̍ ge̍ ka hīka, ‘Ala̍ mɔ̍ɔkɔ nīi o̍ trɛ̍ba a̍mā’ ala̍ e̍e chɛ̄ku ɔ̍ ni̍. 27Wu̍chē oji̍ nɛ, Ɔyi̍ yī Ɔngrɔ̄ɔ ge̍ē wā ma̍, o̍ ge̍ē lɛ bɔ̄ɔkɔ nīi yakpla̍ ge̍ gbo nīi ɔla̍ yī nū hɛ̍ ārɛ̄ bū la yɛnɔ ɔ̄chī ge̍ē chɛ̄ la yɛnɔ ɔ̄nɛ̄ ma̍.
28“Ɛbɛha̍-ɛbɛha̍ nīi okū ge̍ gbo ma̍, abɔ̍ɔ nīi upu ē grēeyī a̍nɛ.
Ɔwɔ̄wā yī Ɔyi̍ yī Ɔngrɔ̄ɔ
(Ima̍aki 13:24-27; Ilu̍uku 21:25-28)
29“Ɔpɔ̄ɔpɛ̄ nīi akanya yī ɔ̄chī ɛla̍ā ge̍ē ga ma̍, yɛnɔ ge̍ē de ē dobū; ɔwīyā i̍ ge̍ē fi̍yajɛ ē gɛ ni̍; i̍nyi̍nyɔ̍ɔwīyā ge̍ē ha̍ābɔ̄ bū la ichō wā la ajɛ; wɔhu̍ yī akpɔ̍ɔwɔ wa̍a̍ ge̍ē he̍ejē mɔri̍mɔri̍. 30Yɛ̄grāa ɔla̍ā, lɛlā nīi ge̍ē ya̍ chabɔ̄ yī Ɔyi̍ yī Ɔngrɔ̄ɔ ma̍ ge̍ē hu ē che abɔ̍ɔ la ichō yī akpɔ̍ɔwɔ. Ɛchamɛcha wa̍a̍ ge̍ē kū la lɛgba la ɔdɔ̄dɛ̄ bɛ̍ɛ̄nɛ̄. E̍ ge̍ē ma̍ Ɔyi̍ yī Ɔngrɔ̄ɔ abɔ̍ɔ la akpɔ̍ɔwɔ nīi o̍ yɛ ē wā la wɔhu̍ ba̍la rīgā ɔnɔ̄kɔ̄kū yī nū ma̍. 31Lɛjī ɔnɔ̄kɔ̄kū ɔha̍ ge̍ē kɛlā. O̍ ge̍ē de ayɛ̍ɛ̄chɛ̄rɔ̄ yī nū tɛ̄rɔ̄ gāa oe̍ ɔha̍lɔha̍ yī yɛchɛ wa̍a̍ gāa ge̍ē tu̍ āchɛ yī nū nīi o̍ hōhu ma̍ ē grēeyī bū la ɛjī yī oe̍ ɔha̍ ge̍ chɛ̄ la oe̍ ɔha̍ krīī.
Ngū lɛlā bū lɛlā nīi ejū ya̍ ma̍
(Ima̍aki 13:28-31; Ilu̍uku 21:29-33)
32“Ala̍ ā ngū lɛlā bū lɛlā nīi ejū ē ya̍ ma̍ gɛ. Ejū ge̍ yɛ ē chiya a̍bɔ̄ onīpīpɛ̄, ē rū īpū onīpīpɛ̄ mɛ̍, ala̍ jo̍ōkū gɛ hīka ɔgwā gbo mɛ̍. 33I̍ngi̍ngɔ̍ɔ nīi lɛlā nūma̍ lɛ a̍nɛ. Ala̍ ge̍ ma̍ lɛlā nūma̍ i̍ngɔ̍ɔ wa̍a̍ mɛ̍, ala̍ ā jo̍ōkū gɛ hīka yɛ̄grāa ɔ̍lɔma̍ hōhī kurɛkurɛ mɛ̍; o̍ gbajɛ wā la oko̍prīinu mɛ̍. 34Lēchi̍-lēchi̍, n ā koko̍o de ala̍! Lɛlā nūma̍ ge̍ē ya̍ wa̍a̍ o̍bū nīi āchɛ nīi hɔ̄leyī u̍ma̍ama ma̍ ē pīyaku̍ wa̍a̍. 35Ichō ba̍la ajɛ nūma̍ ma̍ ge̍ē chāajɛ ē mɛ. Lɛlā yī oko̍o yī u i̍ ge̍ē chāajɛ ge̍ē gbo̍ ē mɛ ni̍.”
Ɔ̄chɔ̄chɛ i̍ je̍ ɔ̄chī ɔ̍lɔma̍ ni̍
(Ima̍aki 13:32-37; Ilu̍uku 17:34-36)
36“Ɔ̄chɔ̄chɛ i̍ je̍ ɔ̄chī ɔla̍ā kɛ̄ɛ yɛ̄grāa ɔla̍ā pi̍i̍ ni̍. Ayɛ̍ɛ̄chɛ̄rɔ̄ yī Ɔwɔ i̍ jo̍ōkū ni̍. Ɔyi̍ yī Ɔwɔ i̍ jo̍ōkū ni̍ i̍ngi̍ngɔ̍ɔ. Ɔwɔ A̍dā lōri̍īnū jo̍ōkū a̍nɛ. 37Ɔwɔ̄wā yī Ɔyi̍ yī Ɔngrɔ̄ɔ ge̍ē lɛ bāa lɛlā nīi ya̍ la yɛ̄grāa yī Ino̍a ma̍. 38Yɛ̄grāa ɔla̍ā, o̍bū nīi Yenyi Ɔhɛ̍rɛ̍ wā ma̍, āchɛ ɛha̍ gblāa abɔ̍ɔ ē re̍ ojōre̍ ē gwa̍ ɛ̍mwɔ̄; angrɔ̄ɔ ɛha̍ yɛ ē wu̍ anyā; anyā ɛha̍ yɛ ē blɛ̍ba̍. I̍ngɔ̍ɔ nīi e̍ yɛ ē ya̍ kpɛɛ nīi Ino̍a ga tū ga wɔwu̍ ɔnɔ̄kɔ̄kū a̍nɛ. 39Āchɛ wa̍a̍ i̍ je̍ ɔjā nīi yɛ ē ya̍ ma̍ ni̍, kpɛɛ nīi Yenyi Ɔhɛ̍rɛ̍ ɔla̍ā wā ge̍ de wa̍ gu pīya cha̍cha̍. I̍ngɔ̍ɔ nīi o̍ ge̍ē lɛ la yɛ̄grāa nīi Ɔyi̍ yī Ɔngrɔ̄ɔ ge̍ē wā ma̍ a̍nɛ. 40Yɛ̄grāa ɔla̍ā, angrɔ̄ɔ āchɛ ɛpa ge̍ē gblāa yɛ ē ya̍ u̍ku̍rɔ̍ la yɛrɔ̄, e̍ ge̍ē de ɔha̍ ē nāa pīya ē hī ɔ̄chɛ ɔ̍mɛpa ē kū abɔ̍ɔ. 41Anyā āchɛ ɛpa ge̍ē kū yɛ ē gbɔ̄jā la lɛchɔ̄, e̍ ge̍ē de ɔha̍ ē nāa pīya ē hī ɔ̍mɛpa ē kū abɔ̍ɔ. 42Ala̍ ā de eyī kōkū! Wu̍chē oji̍ nɛ, ala̍ i̍ je̍ ɔ̄chī nīi Abā yī ala̍ ge̍ē wā ma̍ ni̍. 43Ala̍ ma̍ gɛ ko̍ō! Ɔlɔjā yī wɔlɛ̍ ge̍ē je̍ yɛ̄grāa nīi uwī ge̍ē wā ma̍ nɛ, o̍ i̍ ge̍ē chɛ̄ gbwɔlā nīi uwī wā ge̍ē kpo̍ āɛ̄jā ni̍. 44Wu̍chē yī ɔla̍ā, ala̍ titi ala̍ ā ti̍bi̍īyēchɛ̄ myɛ̄grāa-myɛ̄grāa! Wu̍chē oji̍ nɛ, Ɔyi̍ yī Ɔngrɔ̄ɔ ge̍ē wā yɛ̄grāa nīi ala̍ i̍ ge̍ē kwɛ̍ri̍ya̍tū ɔ̄ ni̍ ma̍.
Ɔ̍chɛ̍ ɔnɛ̄ɛhɛhi kɛ̄ɛ ɔdwɔ̄bi̍
(Ilu̍uku 12:41-48)
45“Ɔ̄nyɛ re̍ka ɔ̍chɛ̍ ɔnɛ̄ɛhɛhi nīi je̍ lɛlā ma̍ dɛdɛ? Ɔ̄chɛ nīi abā yī nū de a̍chɛ̍ yī nū ɛha̍ tū ɔ̄ la abɔ̄ ka ɔ̍lɔ ge̍ de ojōre̍ de ɛ̍lɛ yɛ̄grāa ma̍ nɛ. 46A̍hōhi ge̍ - iyī ɔ̍chɛ̍ ɔla̍ā nīi o̍ ge̍ re̍ka abā yī nū cha wā la wɔlɛ̍ ge̍ ma̍ ɔ̄ nīi o̍ yɛ ē ya̍ i̍ngɔ̍ɔ! 47Lēchi̍-lēchi̍, n ā koko̍o de ala̍! Abā yī nū ge̍ē de ɔjāha̍-ɔjāha̍ yī nū wa̍a̍ ē kpo̍ tū ɔ̄ la abɔ̄ bɛ̍ɛ̄nɛ̄. 48O̍ ge̍ē chī re̍ka ɔ̍chɛ̍ ɔdwɔ̄bi̍, o̍ ge̍ē ka ɔ̍lɔ ge̍ chāa! Abā yī anu̍ ma̍ ɔ̍lɔ yɛ amu ge̍ē chɔ̄cha ɛnyɛnya kɛ̄ɛ! 49O̍ ge̍ē kū la ogwō a̍chɛ̍ yī abā yī nū ɛla̍ā lijē. O̍ ge̍ē pīya ge̍ē tū ribi yī ojōre̍ ba̍la ɔjā ɔgwɔ̍ɔ̄gwa̍ tāa ali̍gbi̍re̍ ɛha̍. 50Bɛ̍ɛ̄nɛ̄ ma̍, abā yī nū ɔla̍ā ge̍ē ku̍ ē ta̍ bū gbɛgbɛlɛ i̍chi̍chɛ ɔha̍ nīi o̍ kwɛ̍ri̍ya̍tū ɔ̄ ni̍ ma̍, ba̍la yɛ̄grāa nīi o̍ jo̍ōkū ni̍ ma̍. 51Abā yī nū ge̍ē ya̍ ē tāa anu̍ dwɔ̄bi̍-dwɔ̄bi̍. O̍ ge̍ē ya̍ ɔ̄ nīi o̍ ē mi̍chi̍ bāa āchɛ ɔkɛlā ɔha̍ chōo̍chē ya̍ ɔha̍ ma̍. Ɔ̍chɛ̍ ɔla̍ā ge̍ē drɛ̄ɛgba ē rāngūu abɔ̍ɔ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)