Ilu̍uku 16
16
A̍chālā ɔdwɔ̄bi̍ yī ɔ̄chɛ odeyīrɛ u̍ku̍rɔ̍ ɔha̍
1Iji̍sɔ̄ɔsi ka de a̍chi̍kpo̍ yī nū bɛ̍ɛ̄nɛ̄ hīka, “Ala̍ ma̍ gɛ ko̍ō! Ɔngrɔ̄ɔ ɔha̍ nīi - ɔlwɔdu ma̍ lɛ ɔ̄chɛ ɔha̍ nīi ē deyīrɛ u̍ku̍rɔ̍ yī nū ma̍. Āchɛ ē koko̍o ē de ɔngrɔ̄ɔ ɔla̍ā hīka, ɔ̄chɛ odeyīrɛ u̍ku̍rɔ̍ yī ɔ̍lɔ ɔla̍ā ɔ̍lɔ yɛ abɔ̍ɔ ē bī okpo yī ɔ̍lɔ ē ya̍ pu̍pupu̍. 2Wu̍chē yī ɔla̍ā, o̍ hī ɔ̍chɛ̍ yī nū ɔla̍ā ɛra̍ ge̍ da ɔ̍ hīka, lɛlā iyī ɔ̍lɔ hɔ̄ ma̍ nīi anɔ̍lɔ po̍ ku̍ ɔ̍lɔ i̍ngɔ̍ɔ ma̍? Ɔ̍lɔ ge̍ bī īpū nīi - ɔ̍lɔ ē chabɔ̄ lɔkɔ nīi ɔ̍lɔ ya̍ la āɛ̄jā yī anu̍ wa̍a̍ ma̍ bī wā we̍ e̍ē! Wu̍chē oji̍ nɛ, ɔ̍lɔ i̍ ge̍ē re̍ka ɔ̄chɛ odeyīrɛ lɛlā yī u̍ku̍rɔ̍ yī anu̍ gɛ ni̍. 3Ɔngrɔ̄ɔ ɔla̍ā ka de iyī nū bɛ̍ɛ̄nɛ̄ hīka, abā yī anu̍ ɔ̍lɔ yɛ ma̍ ge̍ē de anu̍ ē nū hī u̍ku̍rɔ̍ yī anu̍ ma̍, kana̍ kpa̍a nīi anɔ̍lɔ ge̍ē ya̍ ma̍? Anɔ̍lɔ i̍ ē chī lwɔhu̍ ge̍ē bī inyɛ̄rɔ̄ ku ajɛ ē de āchɛ ē mɛ ni̍. Ɔjā ɔbɔ̄ba ɔ̍lɔ chī lɛ anu̍ liwēyī-liwēyī. 4O̍ wā ge̍ ka bɛ̍ɛ̄nɛ̄ hīka, anɔ̍lɔ je̍ ɔjā nīi anɔ̍lɔ ge̍ē ya̍ ma̍ mɛ̍. Abā yī anu̍ ɔ̍lɔ ge̍ de anu̍ nū mɛ̍ hɛ̄ɛbɛ nīi anɔ̍lɔ ge̍ lɛ aɛ̍ɛya ɛha̍ nīi ɛ̍lɛ ge̍ē bī anu̍ gāa wɔlɛ̍ yī ɛ̍lɛ ma̍. 5Wu̍chē yī ɔla̍ā, o̍ hī āchɛ nīi dɛ̄ abā yī nū ure̍ ma̍ ɛra̍ wa̍a̍ dikpo̍ba̍ iyī nū. O̍ che ɔ̄chɛ ɔrāarāa ikpo̍ ka ɔ̍lɔ dɛ̄ abā yī anu̍ ure̍ kana̍? 6Ɔ̄chɛ ɔla̍ā ka de ɔ̍ ka ɔ̍lɔ - ɔgbāgbā yī yanɔ̄ ohu ɛrwɔ̄ nɛ. O̍ de olure̍ yī abā yī nū ɔla̍ā ka ɔ̍lɔ ge̍ nāa īpū ɔchabɔ̄ yī ure̍ yī ɔ̍lɔ gɛ, nīi ɔ̍lɔ ge̍ hyāhɔ̄ ta̍ tū la īpū ɔla̍ā u̍ma̍ama hīka, ‘ɔgbāgbā yī yanɔ̄ ohu ɛpa che igwo̍.’ 7Ɔ̄chɛ ɔha̍, o̍ gba̍a che ɔ̍ ikpo̍ ka ɔ̍lɔ dūre̍ ɛmla̍a? Olure̍ ɔla̍ā ka de ɔ̍ hīka anɔ̍lɔ dūre̍ yī igu yī iwi̍iti la obuhū ohu ɛrwɔ̄. O̍ ka de ɔngrɔ̄ɔ ɔla̍ā ka īpū ɔchabɔ̄ yī ure̍ yī ɔ̍lɔ hɔ̄ ma̍! Ɔ̍lɔ ge̍ hyāhɔ̄ nīi ɔ̍lɔ ge̍ ta̍ tū la ɔ̍lɔ hīka, ‘obuhū ohu ɛnɛ.’ 8Lɛlā a̍chālā ɔdwɔ̄bi̍ nūma̍ nīi ɔ̄chɛ odeyīrɛ āɛ̄jā yī abābā nūma̍ ya̍ ma̍, abā yī nū kā ɔ̄ ɔkɔ̄kā. Wu̍chē oji̍ nɛ, āchɛ yī yɛchɛ nūma̍ je̍ a̍chālā lɛlā ɔyɔ̍ɔ̄ya̍ yī wā hi̍ āchɛ yī ɛbɛ ɔlɛgēdēgēdē.”
9“O̍ lɛ i̍ngɔ̍ɔ ma̍, n ā koko̍o de ala̍ gɛ! Ala̍ bī wɔdu yī yɛchɛ nūma̍ ku̍ āchɛ lɛya, hɛ̄ɛbɛ nīi o̍ ge̍ de kwɛ̍ɛjī mɛ̍ nīi e̍ ge̍ ta̍ ala̍ ogo̍go̍o yɛ̄grāa nīi ala̍ ge̍ē chɛ̄ gāa ɛbɛ nīi āchɛ ē hɔ̄ ku yɛ̄grāa ɔha̍lɔha̍ ma̍. 10Ɔ̄chaha̍-ɔ̄chaha̍ nīi ge̍ ya̍ yɛ̍yɛ̍ la ɔjā onīchi̍chɛ̍ mɛ nīi e̍ de ɔtū che ɔ̍, o̍ ge̍ē ya̍ yɛ̍yɛ̍ la ɔnɔ̄kɔ̄kū i̍ngi̍ngɔ̍ɔ ē mɛ. Ɔ̄chaha̍-ɔ̄chaha̍ nīi i̍ ge̍ chī ya̍ yɛ̍yɛ̍ la ɔjā onīchi̍chɛ̍ nīi e̍ de ɔtū che ɔ̍ ni̍, i̍ngi̍ngɔ̍ɔ nīi o̍ i̍ ge̍ē ya̍ yɛ̍yɛ̍ la ɔnɔ̄kɔ̄kū mɛ ni̍ a̍nɛ. 11A i̍ ge̍ chī bī wɔdu yī yɛchɛ nūma̍ ya̍ yɛ̍yɛ̍ mɛ ni̍ ma̍, ɔ̄nyɛ chī ge̍ē de ɔtū che wɔ ē de wɔdu olēchi̍-olēchi̍ de wɔ ma̍? 12A i̍ ge̍ bī ɔjā nīi - iyī ɔ̄chɛ ma̍ ya̍ yɛ̍yɛ̍ ni̍ ma̍, ɔ̄nyɛ ge̍ē de iyī awɔ ɔlɔjā de wɔ ma̍.
13“Ɔ̄chɛ ūkpo̍he i̍ ge̍ē hɔ̍chɛ̍ yī abābā ɛpa ē mɛ ni̍. Nɛ̄ni̍, ɔha̍ ge̍ē re̍ka ɔhɔtū; ɔha̍ ge̍ē re̍ka ɔta̍anyī. O̍ ge̍ē de otūlichō de ɔha̍; o̍ ge̍ē nāa ɔha̍ tɛ̍bɛ̍lɛ̍. Ala̍ i̍ ge̍ē yɛ̍ɛ̄lā yī Ɔwɔ ba̍la okpo ē ngmo̍tu̍chɛ̄ ni̍.”
Lɛlā yɛ̄mɛ̄mɛ̄ nīi Iji̍sɔ̄ɔsi ka ma̍
(Ima̍tiyu 11:12-13; 5:31-32; Ima̍aki 10:11-12)
14Āchɛ yī Ifa̍rasīi plɛ̍ɛ̄lā nūma̍ wa̍a̍ ma̍ e̍ hɛhɛ tū Iji̍sɔ̄ɔsi, wu̍chē lɔkɔ nīi okpo lɛ wā wɔnyɛ gba̍a̍ ma̍. 15Iji̍sɔ̄ɔsi da wa̍ bɛ̍ɛ̄nɛ̄ hīka, “Ala̍ pi̍i̍ ē ya̍ hɛ̄ɛbɛ nīi āchɛ ge̍ē ma̍ ala̍ ka ala̍ ɔ̍lɔ lɛ kpakpa a̍nɛ. Ɔwɔ chī je̍ ūkpɔ̄tū yī ala̍ hwɔhi hwɔhi. Wu̍chē oji̍ nɛ, ɔjā nīi āchɛ̄ɛchɛ ē gbɛri̍ya̍ ka ɔ̍lɔ - ɔka̍ka̍ a̍nɛ ma̍, i̍ ɔjɔ̄jā la eyī yī Ɔwɔ ni̍.
16“Lihɔ yī Imo̍sīisi ba̍la lɛlā nīi āchɛ ɔkɛrɔ̄ yī Ɔwɔ ta̍tū la īpū wa̍a̍ ma̍ yɛ ē ya̍ u̍ku̍rɔ̍ i̍ngɔ̍ɔ kpɛɛ ge̍ ku yɛ̄grāa yī Ijɔ̍ɔn Ohuyenyi. Bū la yɛ̄grāa ɔla̍ā, ɛrɔ̄ yī Ɔchwɔ̄lɛ̍ Oro̍ōre̍ yī Ɔwɔ nīi e̍ bī ma̍ ē ka ē de āchɛ bɛ̍ɛ̄nɛ̄ a̍nɛ. Ɔ̄chɛmɔ̄chɛ yɛ amu ē nyiya ge̍ē chɛ̄ gāa. 17O̍ hɛ̍ kpɛ̍ɛ de ichō ba̍la ajɛ la ode chāajɛ hi̍ ɔkɔkɔ nīi irwi yī lɛlā yī Lihɔ yī Imo̍sīisi ɔla̍ā ɔha̍ pi̍nyɛ̍ ge̍ē chāajɛ.
18“Ɔ̄chɛ nīi ge̍ ta̍ ɔnyā yī nū gāa ge̍ wu̍ ɔha̍, ɔlɔjā la̍ ɔ̍bɔ̍ɔ̄nyā. Ɔ̄chɛ nīi chī wu̍ ɔnyā ɔla̍ā nīi tlɛ̍ba̍ ma̍ la̍ ɔ̍bɔ̍ɔ̄nyā i̍ngi̍ngɔ̍ɔ.
Lɛlā yī Ila̍jārɔsi ba̍la ɔlwɔdu ɔha̍
19“Ɔngrɔ̄ɔ ɔha̍ gbwɔdu kpɛ̍ɛji. Ɔjā otūlibi̍īyē nīi lwɔ̍la̍ ka̍ka̍ka̍ ma̍ nīi o̍ tū a̍nɛ. Ɔhɔ̄leyī yī nū lɛ bāa ɔchwɔ̄lɛ̍ ma̍ mɔ̄chīmɔ̄chī. 20Ɔngrɔ̄ɔ ɔha̍ chī gbyeklo̍ hɔ̄ abɔ̍ɔ i̍ngi̍ngɔ̍ɔ re̍ka Ila̍jārɔsi. O̍ hɛ̍ ripi̍ yɛ̄mɛ̄ kpɛ̍ɛji. E̍ ē bī ɔ̄ ge̍ē gbo abɔ̍ɔ la oko̍prīinu yī ɔlwɔdu ɔla̍ā. 21Irwi yī ojōre̍ nīi ē chīyenū bū la ɛbɛ oro̍ōjōre̍ yī ɔlwɔdu ɔla̍ā ma̍ ē hla̍ anu̍ la ode kpo̍ re̍. Yoō wā ge̍ē gblāa abɔ̍ɔ ē pla anu̍ ripi̍ ɛla̍ā nyɛ̄. 22Olyeklo̍ ɔla̍ā wā ge̍ pīyaku̍ bɛ̍ɛ̄nɛ̄, ayɛ̍ɛ̄chɛ̄rɔ̄ yī Ɔwɔ bī ɔ̄ pīya ge̍ hɔ̄ ba̍la A̍brahāam la ɔwɔ̄wīyā abɔ̍ɔ la ichō. Ɔlwɔdu ɔla̍ā titi wā ge̍ pīyaku̍ nīi e̍ de nyi. 23O̍ hɔ̄ abɔ̍ɔ la wɔnɔ ɔnɔ̄kɔ̄kū la ayekū oli̍gba̍o̍, hu eyī hwa̍a̍ ma̍ A̍brahāam ga ichō; o̍ ma̍ Ila̍jārɔsi nīi hɔ̄ abɔ̍ɔ la yɛgɔ̄ yī A̍brahāam. 24O̍ hī ɔ̄ ɛra̍ bɛ̍ɛ̄nɛ̄ hīka, ‘Ādā A̍brahāam be̍e! Chu̍chu̍u, mlɛ̍ha̍ yī u oo! De Ila̍jārɔsi tɛ̄rɔ̄, hɛ̄ɛbɛ nīi o̍ ge̍ de oyi̍kɔ̄bɔ̄ ūkpo̍he ku yenyi wā ge̍ hīya ami odīyenyi nūma̍. Ma̍a ɔhɛ̍puu yī ɔla̍ nīi n tū amu la anu̍ ma̍ de gla ami ibi̍īyē ta̍ mɛ̍.’ 25A̍brahāam de ɔ̍ hīka, ‘Ɔyi̍ yī u, a i̍ bla gɛ ni̍? Yɛ̄grāa nīi a hɔ̄ la yɛchɛ ma̍, ɔhɔ̄leyī ɔnɛ̄ɛhɛhi mwɛbɛ mwɛbɛ de wɔ. Anu̍ Ila̍jārɔsi ma̍, akanya ɔdwɔ̄bi̍-ɔdwɔ̄bi̍ hɔ̄ de ɔ̍ a̍nɛ. U̍ma̍ama, anu̍ hɔ̄ amu ē lɛ ɔwɔ̄wīyā yī nū amu u̍ma̍ mɛ̍; awɔ chī tū aa̍ la ichi̍ ɔdwɔ̄bi̍ ɔla̍ā mɛ̍. 26O̍ i̍ gba̍a - iyī i̍ngɔ̍ɔ ke̍e̍ - ohu̍ a̍ni̍. A jo̍ōkū ɔngɔ̄nɔ̄ngɔ̄nɔ̄ ɔha̍ gbo amu la ɔprɛ̍ɛpa yī alɔ ba̍la awɔ. Ɔ̄chɛ ge̍ chikpo̍ ge̍ē ga ē bū amu ē wā abɔ̍ɔ, o̍ i̍ ge̍ē ngmɛ̍rɛ̍ ē de ɔ̍ ni̍. Ɔ̄chɔ̄chɛ i̍ chī ge̍ē bū abɔ̍ɔ la ɛbɛ ɔla̍ā nīi a tū aa̍ ma̍ ē wā amu la ɛbɛ yī alɔ ē mɛ ni̍.’ 27Ɔlwɔdu ɔla̍ā de A̍brahāam bɛ̍ɛ̄nɛ̄ hīka, ‘O̍ lɛ i̍ngɔ̍ɔ ma̍, chu̍chu̍u ādā! De Ila̍jārɔsi tɛ̄rɔ̄ ga wɔlɛ̍ yī a̍dā yī u gɛ! 28N lɛ aɛ̍nɛ̍ anāngrɔ̄ɔ āchɛ ɛrwɔ̄ gblāa abɔ̍ɔ. O̍ ge̍ gāa ge̍ ta̍ wā ɔna, hɛ̄ɛbɛ nīi aa̍ ge̍ e̍e gba̍a wā la ɛbɛ yī ichi̍ ɔdwɔ̄bi̍ nūma̍ gɛ ni̍.’ 29A̍brahāam da ɔlwɔdu ɔla̍ā hīka, ‘Lihɔ yī Imo̍sīisi ba̍la ɛrɔ̄ yī āchɛ ɔkɛrɔ̄ yī Ɔwɔ hɔ̄ abɔ̍ɔ de wa̍. E̍ ge̍ darɔ̄ku po̍ gɛ!’ 30Ɔlwɔdu ɔla̍ā hīya anu̍ ɔkɔ hīka, ‘Ādā A̍brahāam be̍e! Ɔla̍ā nīi a ka ma̍ i̍ lɛ ɛmla̍a ni̍. Ɔ̄chɛ ɔha̍ ge̍ hye̍ēyī la okū gāa dikpo̍ba̍ wa̍, anu̍ nīi e̍ ge̍ē chɛ̄ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī wā a̍nɛ.’ 31A̍brahāam koko̍o de ɔ̍ bɛ̍ɛ̄nɛ̄ hīka, ‘Ma̍ ko̍ō! E̍ i̍ ge̍ chɛ̄ darɔ̄ku lɛlā yī Imo̍sīisi ba̍la āchɛ ɔkɛrɔ̄ yī Ɔwɔ ni̍, ɔ̄chɛ ɔha̍ ge̍ ho̍ōhye̍ēyī la okū gāa, i̍ngi̍ngɔ̍ɔ nīi e̍ i̍ ge̍ē chɛ̄ po̍ ni̍ a̍nɛ.’ ”
Currently Selected:
Ilu̍uku 16: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
