Ilu̍uku 8
8
Anyā ɛha̍ nīi ku Iji̍sɔ̄ɔsi ma̍
1La okwi̍ihi yī ɔla̍ā ɔpɔ̄ɔpɛ̄, Iji̍sɔ̄ɔsi ti̍yaha ga ipwo̍gra ba̍la wɔlɛ̍ɛchɛ yɛ̄mɛ̄mɛ̄ ge̍ yɛ ē kā Wɔ̄kā Ɔlwɔnyɛ ku̍ Ɔchwɔ̄lɛ̍ Oro̍ōre̍ yī Ɔwɔ da wa̍ i̍ngɔ̍ɔ wa̍a̍. A̍chi̍kpo̍ yī nū āchɛ igwo̍lɛpa ɛla̍ā yɛ ba̍la anu̍. 2Anyā ɛha̍ nīi ku̍ yapri̍ija ɔdwɔ̄bi̍, kwi̍īyē nīi o̍ de wa̍ nyiya wa̍a̍ ma̍ yɛ abɔ̍ɔ ba̍la anu̍. Ɔha̍ yī wā re̍ka Imeri̍. E̍ ē hī ɔ̄ ka Oyo̍olima̍gīdala. Anu̍ nīi Iji̍sɔ̄ɔsi nū yapri̍ija ɔdwɔ̄bi̍ arāapa ngmɛ̍ɛchɛ hī ɔ̄ ibi̍īyē a̍nɛ. 3Ɔha̍ re̍ka Ijoha̍na; ɔnyā yī ɔngrɔ̄ɔ ɔha̍ nīi re̍ka Iku̍sa nīi - ɔlɛhu̍ yī u̍ku̍rɔ̍ yī ipwɔ̍ɔ̄nū yī Ihɛ̍rɔ̄ɔdi ma̍ nɛ. Ɔha̍ re̍ka Isusa̍na, ba̍la anyā ɛha̍ yɛ̄mɛ̄mɛ̄. E̍ ē tū Iji̍sɔ̄ɔsi ba̍la a̍chi̍kpo̍ yī nū wɔbɔ̄ la āɛ̄jā nīi e̍ lɛ ma̍.
Wɔ̄chīije yī ɔ̄chɛ ɔnyɔjā
(Ima̍tiyu 13:1-9; Ima̍aki 4:1-9)
4Āchɛ yɛ ē pɛ̍ kpɛ̍ɛji bū la ipwo̍gra-ipwo̍gra ē wā dikpo̍ba̍ Iji̍sɔ̄ɔsi. E̍ tu̍ grēeyī ke̍ke̍ni̍ ma̍, Iji̍sɔ̄ɔsi kɛlā ɔha̍ la wɔ̄chīije de wa̍ hīka,
5“Ala̍ ma̍ gɛ ko̍ō! Ɔngrɔ̄ɔ ɔha̍ pīya gāa ge̍ē mī īkpɔ̄ɔ̄chi̍ la yɛrɔ̄. O̍ yɛ ē kɔ̄ mī ma̍ ɛha̍ ngma̍ chīyēgblāa ga ɔpɔ̄pū. Āchɛ ga de ikpo̍ ba̍ wā tū ajɛ. A̍gba̍ana ɛha̍ wā ge̍ de kpo̍ ku re̍. 6Ɛha̍ yī wā chīyēgblāa la ajɛ yī ichō yī lɛchɔ̄. E̍ bū ma̍, e̍ de ngmo̍ōngmo̍ ju̍wɛ̍ju̍wɛ̍ ɔpɔ̄ɔpɛ̄! Wu̍chē oji̍ nɛ, ajɛ yī ichō yī lɛchɔ̄ ɔla̍ā ngmo̍ōngmo̍ kprūkprū. 7Ɛha̍ yī wā chīyētū la lipu̍ yī ijē. E̍ bū jɛ̄ ba̍la ijē ɛla̍ā. Ijē ɛla̍ā mi̍ya tū wā, de wa̍ ku̍. 8Ɛha̍ ma̍ chīyēgblāa la ajɛ ɔnɛ̄ɛhɛhi. E̍ bū jɛ̄ hwɔhi hwɔhi. E̍ wa̍ īkpō ohu ɛrwɛ̄rwɔ̄.”
Iji̍sɔ̄ɔsi de ɔ̍ chlɛhu̍ bɛ̍ɛ̄nɛ̄ hīka, “Ɔ̄chɛ ɔtū arɔ̄ ɔplɛ̍ɛ̄lā ge̍ po̍ bɛ̍ɛ̄nɛ̄.”
Ohu̍ yī wɔ̄chīije ɔla̍ā
(Ima̍tiyu 13:10-17; Ima̍aki 4:10-12)
9A̍chi̍kpo̍ yī nū che ɔ̍ ikpo̍ ka oji̍ ɔ̍lɔ - ochi̍chi̍ yī wɔ̄chīije ɔla̍ā ma̍?
10Iji̍sɔ̄ɔsi ka de wa̍ bɛ̍ɛ̄nɛ̄ hīka, “Ala̍ ma̍, Ɔwɔ de lɛlā ɔtrɛ̍ba yī Ɔchwɔ̄lɛ̍ Oro̍ōre̍ yī nū chabɔ̄ nīi ala̍ ge̍ē jo̍ōkū mɛ̍. Lɛlā yī āchɛ ehēhī ma̍ ge̍ē hɔ̄ la wɔ̄chīije-wɔ̄chīije ē de wa̍. O̍ ge̍ē lɛ i̍ngɔ̍ɔ, hɛ̄ɛbɛ nīi e̍ ge̍ dōdeyīrɛ, e̍ i̍ ge̍ē ma̍ ɔ̄ ni̍; e̍ ge̍ dɔ̄darɔ̄ku, e̍ i̍ ge̍ē po̍ ɔ̄ la ochi̍chi̍ ni̍.”
Ochi̍chi̍ yī wɔ̄chīije yī ɔ̄chɛ ɔnyɔjā
11“Ochi̍chi̍ yī wɔ̄chīije oli̍gba̍a hɔ̄ ma̍ a̍nɛ: Īkpɔ̄ɔ̄chi̍ ɛla̍ā lɛ bāa lɛlā yī Ɔwɔ ma̍. 12Enīi ngma̍ chīyēgblāa la ɔpɔ̄pū ma̍ lɛ bāa lɛlā yī āchɛ ɛha̍ nīi plɛ̍ɛ̄lā yī Ɔwɔ ma̍. E̍ de po̍ ma̍, Ɔngūwɛ̄gā wā ge̍ de kpo̍ wu̍ hī wā ūkpɔ̄tū. O̍ i̍ chikpo̍ nīi e̍ ge̍ de ɔtū che Ɔwɔ hɛ̄ɛbɛ lɛ ɔhɛ̍ta̍ ni̍. 13Enīi chīyēgblāa la ajɛ yī ichō yī lɛchɔ̄ ma̍ lɛ bāa lɛlā yī āchɛ ɛha̍ nīi plɛ̍ɛ̄lā yī Ɔwɔ, nāa lɛlā ɔla̍ā la ɔwɔ̄wīyā ma̍. Lɛlā yī Ɔwɔ i̍ gwa̍chɛ̄ wā ūkpɔ̄tū ni̍ ma̍; e̍ i̍ de ɔtū che Ɔwɔ kpɛɛ mɛ ni̍. Yɛ̄grāa nīi otu̍tū wā la aa̍ ɔpɔ̄ɔpɛ̄ ma̍, e̍ gwāajɛ. 14Enīi chīyētū lipu̍ yī ijē ma̍ lɛ bāa lɛlā yī āchɛ ɛha̍ nīi plɛ̍ɛ̄lā yī Ɔwɔ ma̍. E̍ ge̍ de po̍ ma̍, yɛ̄ngura yī wɔdu ba̍la ɔwɔ̄wīyā yī ɔhɔ̄leyī nūma̍ ē pɛ̍ ge̍ē da ē ba̍ wā la ūkpɔ̄tū ē de ɔ̍ ku̍. E̍ i̍ ya̍ hwɔhi hwɔhi mɛ gɛ ni̍. 15Īkpɔ̄ɔ̄chi̍ nīi gblāa la ajɛ ɔnɛ̄ɛhɛhi ma̍ lɛ bāa lɛlā yī āchɛ ɛha̍ nīi plɛ̍ɛ̄lā yī Ɔwɔ ma̍. Aa̍ ma̍ nāa tū la ūkpɔ̄tū ɔhwɔhi hwɔhi yī wā. E̍ mlɔtū la anu̍ i̍ngɔ̍ɔ kpɛɛ de ya̍ hwɔhi hwɔhi.
Otīnīkā ode trɛ̍ba
(Ima̍aki 4:21-25)
16“Ɔ̄chɛ ɔha̍ ē mwɔla̍ tū otīnīkā chōo̍chē de u̍kpu̍ūhā kla̍ anu̍, kɛ̄ɛ ē de ē nāa ē rɛ la ihi̍yajɛ yī ibɛ̍ɛdi? Je̍ka o̍ ē de ē che la okpōkōlō, hɛ̄ɛbɛ nīi āchɛ nīi ge̍ē chɛ̄ gāa ma̍ ge̍ē ma̍ ɛbɛ ɔlɛgēdēgēdē. 17Ɔjāha̍-ɔjāha̍ nīi ge̍ trɛ̍ba chī ge̍ē hi̍yɛchɛ we̍. Ɔjāha̍-ɔjāha̍ nīi ge̍ chī kla̍ ya̍kla̍ ge̍ē lwāa ē ta̍āpāapɛ̄ nīi āchɛ ē ma̍ we̍.
18“O̍ lɛ i̍ngɔ̍ɔ ma̍, ala̍ ā du̍mɔ̍-du̍mɔ̍, jɔ̍ɔkɔ nīi ala̍ ge̍ē darɔ̄ku lɛlā ma̍! Wu̍chē oji̍ nɛ, ɔ̄chɛ nīi lɛ ɔjā o̍bū ma̍, e̍ ge̍ē gba̍a ē de ē ba̍ ɔ̄ de ɔ̍. Ɔ̄chɛ nīi i̍ lɛ ni̍ ma̍, onīi o̍ gbɛri̍ya̍ ka anɔ̍lɔ lɛ ma̍, e̍ ge̍ē de ē nāa hī ɔ̄ abɔ̄.”
Aɛ̍nɛ̍ yī Iji̍sɔ̄ɔsi ba̍la ɛ̍nɛ̍ yī nū
(Ima̍tiyu 12:46-50; Ima̍aki 3:31-35)
19Aɛ̍nɛ̍ yī Iji̍sɔ̄ɔsi ba̍la ɛ̍nɛ̍ yī nū wā abɔ̍ɔ dikpo̍ba̍ ɔ̄. E̍ i̍ chī ma̍ ɛbɛ ga gāa dikpo̍ba̍ ɔ̄ ni̍, wu̍chē yī āchɛ nīi de yɛ̄mɛ̄mɛ̄ ma̍. 20Ɔ̄chɛ ɔha̍ koko̍o de Iji̍sɔ̄ɔsi bɛ̍ɛ̄nɛ̄ hīka, “Aɛ̍nɛ̍ yī wɔ ba̍la ɛ̍nɛ̍ yī wɔ wā gblāa abɔ̍ɔ la yɛchɛ ē chikpo̍ ge̍ē ma̍ wɔ.”
21Iji̍sɔ̄ɔsi koko̍o de alɔgbādu ɔla̍ā hīka, “Ala̍ ma̍ ko̍ō! Āchɛ nīi ē plɛ̍ɛ̄lā yī Ɔwɔ ē ya̍ otūlichō yī nū ma̍, aa̍ re̍ka ɛ̍nɛ̍ yī u ba̍la aɛ̍nɛ̍ yī u a̍nɛ.”
Iji̍sɔ̄ɔsi ya̍ nīi ahuhu ɔnɔ̄kɔ̄kū gboba̍
(Ima̍tiyu 8:23-27; Ima̍aki 4:35-41)
22I̍chi̍chɛ ɔha̍, Iji̍sɔ̄ɔsi gatū la wɔwu̍ ɔha̍ ba̍la a̍chi̍kpo̍ yī nū. O̍ ka de wa̍ hīka, “Alɔ ā ga ga oe̍ ɔla̍nū yī li̍hu we̍ e̍ē.” E̍ wā ge̍ hu wɔwu̍ pīya bɛ̍ɛ̄nɛ̄. 23E̍ yɛ ē pɛ̍ wɔwu̍ i̍ngi̍ngɔ̍ɔ yɛ gāa ma̍, Iji̍sɔ̄ɔsi pīya gbwɔlā. Ahuhu ɔnɔ̄kɔ̄kū wā ge̍ gwō la li̍hu ɔla̍ā ɛbɛ̍bɛ̍-ɛbɛ̍bɛ̍, kpɛ̍ɛ nīi yenyi yɛ ē kɔ̄tū ga wɔwu̍. Aa̍ wa̍a̍ tū la obrīihu yī rikū ɔlamu-ɔlamu. 24A̍chi̍kpo̍ yī Iji̍sɔ̄ɔsi gāa dikpo̍ba̍ ɔ̄ ge̍ hɛ̍ ɔ̄ eyī ka hīka, “Ādā! Alɔ de jī mɛ̍ ko̍ō!”
Iji̍sɔ̄ɔsi nīichō gbru ɔpɔ̄ɔpɛ̄ ka tāa ahuhu ba̍la a̍kpa̍yēenyi ka ɛ̍lɛ ge̍ gboba̍! E̍ gboba̍ i̍ngɔ̍ɔ du̍mɔ̍ ɔpɔ̄ɔpɛ̄. Ɛbɛ hīya brɛɛ ɔpɔ̄ɔpɛ̄. 25O̍ da a̍chi̍kpo̍ yī nū bɛ̍ɛ̄nɛ̄ hīka, “Ɔtū ode chōche yī ala̍ kɔ̍ɔ̄ nɛ ma̍/.”
A̍chi̍kpo̍ yī nū de kpo̍ kwi̍ibū, de kpo̍ tūuhwi gblāa abɔ̍ɔ. E̍ chōo̍chē yɛ ē da ɔ̍nyīnū bɛ̍ɛ̄nɛ̄ hīka, “Ita yī ɔ̄chɛ ɔna̍ u̍tu hɔ̄ ma̍ ma̍/? O̍ ē kɛlā tāa ahuhu ba̍la a̍kpa̍yēenyi, e̍ ē chī pɔ̍ɔkɔ yī nū i̍ngɔ̍ɔ ke̍e̍! Fi̍yɛ!”
Iji̍sɔ̄ɔsi nyiya ɔngrɔ̄ɔ ɔha̍ nīi ku̍ yapri̍ija ɔlyɛ̄mɛ̄mɛ̄ ma̍
(Ima̍tiyu 8:28-34; Ima̍aki 5:1-20)
26E̍ ga hɛ̍ta̍ ga oe̍ abɔ̍ɔ la ɔcha yī Aligɛ̍rāsa nīi hɔ̄ la oe̍ ɔla̍nū yī Li̍hu yī Iga̍līli ma̍. 27Iji̍sɔ̄ɔsi bīyɛchɛ hī wɔwu̍ wā la o̍chi ɔpɔ̄ɔpɛ̄ ma̍, ɔngrɔ̄ɔ ɔha̍ bū la ipwo̍gra ɔla̍ā wā ge̍ grāa anu̍. Ɔngrɔ̄ɔ ɔla̍ā ē ku̍ yapri̍ija ɔdwɔ̄bi̍ yɛ̄mɛ̄mɛ̄. Yɛ̄grāa ligbo̍ gba̍a̍ mɛ̍ nīi o̍ i̍ tū ɔjā la ibi̍īyē gɛ ni̍ ma̍. O̍ i̍ ē chā la wɔlɛ̍ ni̍. Wɔ̄gɔ̄ yī u̍nwɔ̍wu̍ yī okū nīi o̍ ē tū a̍nɛ. 28O̍ ma̍ Iji̍sɔ̄ɔsi ma̍, o̍ ti̍ira̍gba̍ ku̍ya̍a̍, ngma̍ ta̍gbo la ajɛ de Iji̍sɔ̄ɔsi. O̍ tɔ̍ɔna ka gbōō hīka, “Iji̍sɔ̄ɔsi, Ɔyi̍ yī Ɔwɔ Ɔgɔnyɛ Ɔnɔ̄kɔ̄kū! Oji̍ nīi a chikpo̍ lɛhu̍ yī u ma̍/? Chu̍chu̍u, n ra̍ābɔ̄ de wɔ! A ā ya̍ um ichi̍ ni̍.” 29Wu̍chē lɔkɔ nīi Iji̍sɔ̄ɔsi yɛ ē ka hīka yapri̍ija ɔdwɔ̄bi̍ ɔ̍lɔ ge̍ bīyɛchɛ hī ɔ̍lɔ ma̍ - ohu̍ nīi o̍ ka i̍ngɔ̍ɔ a̍nɛ. Yɛ̄grāa yɛ̄mɛ̄mɛ̄, yapri̍ija ɔdwɔ̄bi̍ ɛla̍ā ē wā la anu̍ kpɛ̍ɛ ɛbɛ̍bɛ̍-ɛbɛ̍bɛ̍. E̍ ge̍ ku̍ ɔ̄ tōrī, de agba̍ ba̍la okri ē tū ɔ̄ la ikpo̍ ba̍la abɔ̄, o̍ kpo̍ wā krāa cha̍cha̍. Yapri̍ija ɔdwɔ̄bi̍ ɛla̍ā ē bī ɔ̄ ge̍ē ta̍tū la a̍chi̍ chukuru ji.
30Iji̍sɔ̄ɔsi wā ge̍ che ɔ̍ ikpo̍ bɛ̍ɛ̄nɛ̄ ka riyī yī ɔ̍lɔ re̍ kana̍?
O̍ ka anɔ̍lɔ re̍ka “Yɛ̄mɛ̄.” Wu̍chē oji̍ nɛ, yapri̍ija ɔdwɔ̄bi̍ yɛ̄mɛ̄mɛ̄ gāa ge̍ twɔ̄lɛ̍ abɔ̍ɔ la ibi̍īyē yī nū a̍nɛ. 31Yapri̍ija ɔdwɔ̄bi̍ ɛla̍ā ra̍ābɔ̄ de Iji̍sɔ̄ɔsi ka ɔ̍lɔ ge̍ e̍e ku̍ aa̍ ta̍tū ga ɔngɔ̄nɔ̄ngɔ̄nɔ̄ yī ayekū ni̍.
32Yɛ̄grāa ɔla̍ā, ribi yī eko̍oba ɛha̍ lyɛ̄mɛ̄ kpɛ̍ɛ gblāa abɔ̍ɔ kurɛkurɛ ē ri̍re̍ la ɛkū yī yɛwu. Yapri̍ija ɛla̍ā ra̍ābɔ̄ ka Iji̍sɔ̄ɔsi ɔ̍lɔ ge̍ pi̍ye̍mā nīi aɛ̍lɛ ge̍ gāa ge̍ tū la eko̍oba ɛla̍ā gɛ! Iji̍sɔ̄ɔsi pi̍ye̍mā hī wā bɛ̍ɛ̄nɛ̄. 33Yapri̍ija ɛla̍ā bīyɛchɛ hī ɔngrɔ̄ɔ ɔla̍ā ibi̍īyē ɔpɔ̄ɔpɛ̄ pīya ga lipu̍ yī eko̍oba ɛla̍ā. Ribi yī eko̍oba ɔla̍ā ya̍ wuru la ɛnya bū abɔ̍ɔ la ɔhlāatū ɔla̍ā ɔpɔ̄ɔpɔ̄ɔpɛ̄ ge̍ chīyētū la li̍hu. E̍ bī yenyi i̍ngɔ̍ɔ cha̍cha̍.
34Āchɛ nīi yɛ ē deyīrɛ eko̍oba ɛla̍ā ma̍ wā ge̍ ma̍ lɛlā nūma̍ wa̍a̍ nīi ya̍ ma̍, e̍ pīya kpa̍ta̍ la ɛnya gāa ge̍ de wɔ̄kā yī lɛlā nūma̍ chiya kpuu abɔ̍ɔ la ipwɔ̍ɔ̄lɛ̍ ba̍la wɔlɛ̍ɛchɛ yī wā wa̍a̍. 35Āchɛ pɛ̍ pīya gāa ge̍ē ma̍ lɛlā nīi ya̍ ma̍ bɛ̍ɛ̄nɛ̄. E̍ wā la ɛbɛ yī Iji̍sɔ̄ɔsi ma̍, e̍ ma̍ ɔngrɔ̄ɔ ɔla̍ā nīi yapri̍ija ɛla̍ā ngmɛ̍ɛchɛ hī ɔ̄ ma̍ hyāhɔ̄ abɔ̍ɔ la apli̍kpo̍ yī Iji̍sɔ̄ɔsi. O̍ chī tū ɔjā hwɔhi hwɔhi la ibi̍īyē, gba̍a lɛ bāa otri̍di̍di̍ ma̍; o̍ de ya̍ wā uhuhwi ɔlamu-ɔlamu. 36Āchɛ nīi ma̍ lɛlā ɔla̍ā la eyī ma̍ de koko̍o de āchɛ ɛla̍ā wa̍a̍ lɔkɔ nīi Iji̍sɔ̄ɔsi de ɔngrɔ̄ɔ ɔla̍ā nyiya ma̍. 37Bū la ɛbɛ ɔla̍ā, alɔcha yī ajɛ yī Igɛ̍rāsa ɔla̍ā wa̍a̍ nīi grēeyī ma̍ ra̍ābɔ̄ de Iji̍sɔ̄ɔsi ka ɔ̍lɔ ge̍ pīya hī ajɛ yī aa̍. Wu̍chē oji̍ nɛ, e̍ yɛ ē tūuhwi kpɛ̍ɛji. Iji̍sɔ̄ɔsi gāa ge̍ gatū la wɔwu̍ pīya bɛ̍ɛ̄nɛ̄. 38Ɔngrɔ̄ɔ nīi yapri̍ija ɔdwɔ̄bi̍ ɛla̍ā ngmɛ̍ɛchɛ hī ɔ̄ ibi̍īyē ma̍ ra̍ābɔ̄ ka anɔ̍lɔ ge̍ē pīya ē tāa ɔ̍lɔ.
Iji̍sɔ̄ɔsi hi̍hi̍yo̍ de ɔ̍, de ɔ̍ tɛ̄rɔ̄ pīya, 39ɔ̍lɔ ge̍ ku̍chē pīya ga wɔlɛ̍. Ɔ̍lɔ ge̍ gāa ge̍ koko̍o yī lɛlā nīi Ɔwɔ ɔ̍lɔ ya̍ de ɔ̍lɔ ma̍ de āchɛ.
Ɔngrɔ̄ɔ ɔla̍ā pīya bū abɔ̍ɔ gāa ge̍ ta̍ ipwo̍gra ɔla̍ā ta̍, koko̍o yī lɛlā nīi Iji̍sɔ̄ɔsi ya̍ de ɔ̍ wa̍a̍ ma̍ de āchɛ.
Ɔyi̍ yī Ija̍yi̍rɔ̄ɔsi ba̍la ɔnyā ɔha̍ nīi yɛ ē fiyeyī ma̍
(Ima̍tiyu 9:18-26; Ima̍aki 5:21-43)
40Iji̍sɔ̄ɔsi cha wā la oe̍ nūma̍ yī li̍hu ma̍, āchɛ nīi grēeyī gblāa abɔ̍ɔ ma̍ lɛ ɔwɔ̄wīyā nīi e̍ ma̍ ɔ̄ ma̍. Wu̍chē oji̍ nɛ, aa̍ wa̍a̍ gblāa ē gbēyī yī nū. 41Ɔngrɔ̄ɔ ɔha̍ nīi re̍ka Ija̍yi̍rɔ̄ɔsi, ɔlɛhu̍ yī u̍nu̍ ogrēeyī yī ɛbɛ ɔla̍ā ma̍ wā bɛ̍ɛ̄nɛ̄. O̍ ngma̍ ta̍gbo la ajɛ de Iji̍sɔ̄ɔsi, ra̍ābɔ̄ de ɔ̍ ka ɔ̍lɔ ge̍ yewā la wɔlɛ̍ yī anu̍. 42Ɔngrɔ̄ɔ ɔla̍ā lɛ ɔyi̍ ɔnɔ̄nyā ūkpo̍he kpo̍kpo̍. Ɔyi̍ chī gbo abɔ̍ɔ ē ko̍ōku̍. Ɔyi̍ ɔnɔ̄nyā ɔla̍ā re̍ lɛ̍yi̍ igwo̍lɛpa mɛ̍.
Iji̍sɔ̄ɔsi wā ge̍ pīya yɛ gāa ma̍, āchɛ daba̍ ɔ̄ kpɛ̍ɛ la oe̍ ɔha̍lɔha̍ wa̍a̍. 43Ɔnyā ɔha̍ nīi yɛ abɔ̍ɔ lipu̍ yī wā ma̍ kwi̍īyē yī yeyī ohōhu ke̍e̍ la lɛ̍yi̍ igwo̍lɛpa mɛ̍. Ɔjā nīi o̍ lɛ wa̍a̍ ma̍, o̍ de kpo̍ ba̍ iyī nū wa̍a̍ la ɛbɛ yī alobo̍chi̍ mɛ̍. Alobo̍chi̍ ɔha̍lɔha̍ i̍ chī nyiya anu̍ mɛ̍ ni̍. 44Ɔnyā ɔla̍ā wā ge̍ yɛ abɔ̍ɔ lipu̍ yī āchɛ nīi daba̍ Iji̍sɔ̄ɔsi la wāā yī okwi̍ihi ma̍. O̍ de abɔ̄ ku ahu̍ yī aru̍ ɔkwajɛ yī Iji̍sɔ̄ɔsi. Ɔpɔ̄ɔpɛ̄, yeyī nīi o̍ yɛ ē hu ma̍ hɛ̍ kra̍. 45Iji̍sɔ̄ɔsi chikpo̍ ɔpɔ̄ɔpɛ̄ ka ɔ̄nyɛ ɔ̍lɔ de abɔ̄ ku anu̍ ma̍?
Āchɛ wa̍a̍ ta̍ ka ɔ̍lɔ i̍ aa̍ ni̍. Ipi̍ta ka bɛ̍ɛ̄nɛ̄ hīka, “Ādā, āchɛ yɛ ē da ē ba̍ wɔ ē ta̍ wɔ tuu a̍nɛ.”
46Iji̍sɔ̄ɔsi ka hīka, “Ami ɔlɔjā n jo̍ōkū hīka ɔ̄chɛ ɔha̍ de abɔ̄ ku u. Wu̍chē oji̍ nɛ, wɔhu̍ yī obo̍chi̍ ɔnyɔ̄nyiya ɔha̍ ngmɛ̍ɛchɛ hī um ibi̍īyē mɛ̍” 47Ɔnyā ɔla̍ā ma̍ hīka Iji̍sɔ̄ɔsi ɔ̍lɔ de jo̍ōkū tū anu̍ ma̍, o̍ ngmɛ̍ɛchɛ gāa dikpo̍ba̍ Iji̍sɔ̄ɔsi hɛ̍ ibi̍īyē ejē bāa ɔkpa̍kpa̍ ma̍. O̍ ngma̍ ta̍gbo la ajɛ la iyɔ̄bū yī Iji̍sɔ̄ɔsi ka de Iji̍sɔ̄ɔsi abɔ̍ɔ la īkprī yī āchɛ wa̍a̍ ɔjā nīi hu̍ nīi o̍ de abɔ̄ ku ɔ̍ ma̍. O̍ ka de ɔ̍ ka anɔ̍lɔ chī de lɛ cha̍cha̍ bū la yɛ̄grāa ɔla̍ā ɔpɔ̄ɔpɛ̄. 48Iji̍sɔ̄ɔsi koko̍o de ɔ̍ bɛ̍ɛ̄nɛ̄ hīka, “Ɔyi̍ yī u! Ɔtū ode chōche yī wɔ ya̍ nīi a de lɛ cha̍cha̍ mɛ̍! Pīya la ibi̍īyē ogbodɔ̍dɔ̍ gɛ!”
49Yɛ̄grāa nīi Iji̍sɔ̄ɔsi rɛ ma̍ ē kɛlā ma̍, ɔlɛrɔ̄ ɔha̍ bū la wɔlɛ̍ yī ɔlɛhu̍ ɔla̍ā wā abɔ̍ɔ. O̍ koko̍o de Ija̍yi̍rɔ̄ɔsi ka ɔyi̍ yī ɔ̍lɔ hīyɔtū mɛ̍; ɔ̍lɔ ge̍ e̍e ya̍ Ɔngūlɛ̄lā ichi̍ wā abɔ̍ɔ gɛ ni̍.
50Iji̍sɔ̄ɔsi de po̍. O̍ da Ija̍yi̍rɔ̄ɔsi hīka, “A ā tūuhwi ni̍! De ɔtū che kpɔ̍, ma̍a ɔyi̍ yī wɔ ge̍ē de ē lɛ cha̍cha̍!”
51Iji̍sɔ̄ɔsi gbajɛ ga wɔlɛ̍ ɔla̍ā ma̍, o̍ i̍ chɛ̄ nīi ɔ̄chɔ̄chɛ chɛ̄ ga u̍nu̍ ɔla̍ā ba̍la anu̍ ni̍. Ɔ̍chi̍kpa̍kpa̍, Ipi̍ta, Ijɔ̍ɔn ba̍la Ije̍mēehi, ba̍la a̍dā yī ɔyi̍ ba̍la ɛ̍nɛ̍ yī ɔyi̍; aa̍ chɛ̄ gāa ba̍la anu̍ a̍nɛ. 52Āchɛ nīi gblāa abɔ̍ɔ wa̍a̍ ma̍ yɛ ē drɛ̄ɛgba, ē gwe̍ejrīkā yī ɔpīyaku̍ yī ɔyi̍ ɔla̍ā. Iji̍sɔ̄ɔsi ka de wa̍ hīka, “Ala̍ e̍e drɛ̄ɛgba ni̍; ma̍a ɔyi̍ ɔla̍ā i̍ ko̍ōku̍ ni̍! Wɔlā nīi o̍ yɛ ē gbo ji a̍nɛ!”
53Āchɛ ɛla̍ā wa̍a̍ ta̍ kpu̍u la ɛhɛ tū Iji̍sɔ̄ɔsi; wu̍chē oji̍ nɛ, e̍ jo̍ōkū lēchi̍ lēchi̍ ka ɔyi̍ ɔ̍lɔ ko̍ōku̍ mɛ̍. 54Iji̍sɔ̄ɔsi gāa ge̍ de abɔ̄ ku̍ ɔ̄ la abɔ̄, ka de ɔ̍ hīka, “Ɔyi̍, nīichō!” 55Ɔpɔ̄ɔpɛ̄, ɔhɔ̄leyī ku̍chē wā dikpo̍ba̍ ɔ̄; o̍ nīichō ke̍e̍. Iji̍sɔ̄ɔsi ka de wa̍ ka ɛ̍lɛ ge̍ gāla̍ ojōre̍ de ɔ̍lɔ nīi ɔ̍lɔ ge̍ re̍. 56Ɛ̍nɛ̍ yī nū ba̍la a̍dā yī nū de kpo̍ kwi̍ibū ɔlamu-ɔlamu. Iji̍sɔ̄ɔsi ta̍ wā ɔna ka ɛ̍lɛ ge̍ e̍e koko̍o yī lɛlā nīi - ɔ̍lɔ ya̍ hɔ̄ ma̍ ma̍ de ɔ̄chɔ̄chɛ ni̍.
Currently Selected:
Ilu̍uku 8: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
Ilu̍uku 8
8
Anyā ɛha̍ nīi ku Iji̍sɔ̄ɔsi ma̍
1La okwi̍ihi yī ɔla̍ā ɔpɔ̄ɔpɛ̄, Iji̍sɔ̄ɔsi ti̍yaha ga ipwo̍gra ba̍la wɔlɛ̍ɛchɛ yɛ̄mɛ̄mɛ̄ ge̍ yɛ ē kā Wɔ̄kā Ɔlwɔnyɛ ku̍ Ɔchwɔ̄lɛ̍ Oro̍ōre̍ yī Ɔwɔ da wa̍ i̍ngɔ̍ɔ wa̍a̍. A̍chi̍kpo̍ yī nū āchɛ igwo̍lɛpa ɛla̍ā yɛ ba̍la anu̍. 2Anyā ɛha̍ nīi ku̍ yapri̍ija ɔdwɔ̄bi̍, kwi̍īyē nīi o̍ de wa̍ nyiya wa̍a̍ ma̍ yɛ abɔ̍ɔ ba̍la anu̍. Ɔha̍ yī wā re̍ka Imeri̍. E̍ ē hī ɔ̄ ka Oyo̍olima̍gīdala. Anu̍ nīi Iji̍sɔ̄ɔsi nū yapri̍ija ɔdwɔ̄bi̍ arāapa ngmɛ̍ɛchɛ hī ɔ̄ ibi̍īyē a̍nɛ. 3Ɔha̍ re̍ka Ijoha̍na; ɔnyā yī ɔngrɔ̄ɔ ɔha̍ nīi re̍ka Iku̍sa nīi - ɔlɛhu̍ yī u̍ku̍rɔ̍ yī ipwɔ̍ɔ̄nū yī Ihɛ̍rɔ̄ɔdi ma̍ nɛ. Ɔha̍ re̍ka Isusa̍na, ba̍la anyā ɛha̍ yɛ̄mɛ̄mɛ̄. E̍ ē tū Iji̍sɔ̄ɔsi ba̍la a̍chi̍kpo̍ yī nū wɔbɔ̄ la āɛ̄jā nīi e̍ lɛ ma̍.
Wɔ̄chīije yī ɔ̄chɛ ɔnyɔjā
(Ima̍tiyu 13:1-9; Ima̍aki 4:1-9)
4Āchɛ yɛ ē pɛ̍ kpɛ̍ɛji bū la ipwo̍gra-ipwo̍gra ē wā dikpo̍ba̍ Iji̍sɔ̄ɔsi. E̍ tu̍ grēeyī ke̍ke̍ni̍ ma̍, Iji̍sɔ̄ɔsi kɛlā ɔha̍ la wɔ̄chīije de wa̍ hīka,
5“Ala̍ ma̍ gɛ ko̍ō! Ɔngrɔ̄ɔ ɔha̍ pīya gāa ge̍ē mī īkpɔ̄ɔ̄chi̍ la yɛrɔ̄. O̍ yɛ ē kɔ̄ mī ma̍ ɛha̍ ngma̍ chīyēgblāa ga ɔpɔ̄pū. Āchɛ ga de ikpo̍ ba̍ wā tū ajɛ. A̍gba̍ana ɛha̍ wā ge̍ de kpo̍ ku re̍. 6Ɛha̍ yī wā chīyēgblāa la ajɛ yī ichō yī lɛchɔ̄. E̍ bū ma̍, e̍ de ngmo̍ōngmo̍ ju̍wɛ̍ju̍wɛ̍ ɔpɔ̄ɔpɛ̄! Wu̍chē oji̍ nɛ, ajɛ yī ichō yī lɛchɔ̄ ɔla̍ā ngmo̍ōngmo̍ kprūkprū. 7Ɛha̍ yī wā chīyētū la lipu̍ yī ijē. E̍ bū jɛ̄ ba̍la ijē ɛla̍ā. Ijē ɛla̍ā mi̍ya tū wā, de wa̍ ku̍. 8Ɛha̍ ma̍ chīyēgblāa la ajɛ ɔnɛ̄ɛhɛhi. E̍ bū jɛ̄ hwɔhi hwɔhi. E̍ wa̍ īkpō ohu ɛrwɛ̄rwɔ̄.”
Iji̍sɔ̄ɔsi de ɔ̍ chlɛhu̍ bɛ̍ɛ̄nɛ̄ hīka, “Ɔ̄chɛ ɔtū arɔ̄ ɔplɛ̍ɛ̄lā ge̍ po̍ bɛ̍ɛ̄nɛ̄.”
Ohu̍ yī wɔ̄chīije ɔla̍ā
(Ima̍tiyu 13:10-17; Ima̍aki 4:10-12)
9A̍chi̍kpo̍ yī nū che ɔ̍ ikpo̍ ka oji̍ ɔ̍lɔ - ochi̍chi̍ yī wɔ̄chīije ɔla̍ā ma̍?
10Iji̍sɔ̄ɔsi ka de wa̍ bɛ̍ɛ̄nɛ̄ hīka, “Ala̍ ma̍, Ɔwɔ de lɛlā ɔtrɛ̍ba yī Ɔchwɔ̄lɛ̍ Oro̍ōre̍ yī nū chabɔ̄ nīi ala̍ ge̍ē jo̍ōkū mɛ̍. Lɛlā yī āchɛ ehēhī ma̍ ge̍ē hɔ̄ la wɔ̄chīije-wɔ̄chīije ē de wa̍. O̍ ge̍ē lɛ i̍ngɔ̍ɔ, hɛ̄ɛbɛ nīi e̍ ge̍ dōdeyīrɛ, e̍ i̍ ge̍ē ma̍ ɔ̄ ni̍; e̍ ge̍ dɔ̄darɔ̄ku, e̍ i̍ ge̍ē po̍ ɔ̄ la ochi̍chi̍ ni̍.”
Ochi̍chi̍ yī wɔ̄chīije yī ɔ̄chɛ ɔnyɔjā
11“Ochi̍chi̍ yī wɔ̄chīije oli̍gba̍a hɔ̄ ma̍ a̍nɛ: Īkpɔ̄ɔ̄chi̍ ɛla̍ā lɛ bāa lɛlā yī Ɔwɔ ma̍. 12Enīi ngma̍ chīyēgblāa la ɔpɔ̄pū ma̍ lɛ bāa lɛlā yī āchɛ ɛha̍ nīi plɛ̍ɛ̄lā yī Ɔwɔ ma̍. E̍ de po̍ ma̍, Ɔngūwɛ̄gā wā ge̍ de kpo̍ wu̍ hī wā ūkpɔ̄tū. O̍ i̍ chikpo̍ nīi e̍ ge̍ de ɔtū che Ɔwɔ hɛ̄ɛbɛ lɛ ɔhɛ̍ta̍ ni̍. 13Enīi chīyēgblāa la ajɛ yī ichō yī lɛchɔ̄ ma̍ lɛ bāa lɛlā yī āchɛ ɛha̍ nīi plɛ̍ɛ̄lā yī Ɔwɔ, nāa lɛlā ɔla̍ā la ɔwɔ̄wīyā ma̍. Lɛlā yī Ɔwɔ i̍ gwa̍chɛ̄ wā ūkpɔ̄tū ni̍ ma̍; e̍ i̍ de ɔtū che Ɔwɔ kpɛɛ mɛ ni̍. Yɛ̄grāa nīi otu̍tū wā la aa̍ ɔpɔ̄ɔpɛ̄ ma̍, e̍ gwāajɛ. 14Enīi chīyētū lipu̍ yī ijē ma̍ lɛ bāa lɛlā yī āchɛ ɛha̍ nīi plɛ̍ɛ̄lā yī Ɔwɔ ma̍. E̍ ge̍ de po̍ ma̍, yɛ̄ngura yī wɔdu ba̍la ɔwɔ̄wīyā yī ɔhɔ̄leyī nūma̍ ē pɛ̍ ge̍ē da ē ba̍ wā la ūkpɔ̄tū ē de ɔ̍ ku̍. E̍ i̍ ya̍ hwɔhi hwɔhi mɛ gɛ ni̍. 15Īkpɔ̄ɔ̄chi̍ nīi gblāa la ajɛ ɔnɛ̄ɛhɛhi ma̍ lɛ bāa lɛlā yī āchɛ ɛha̍ nīi plɛ̍ɛ̄lā yī Ɔwɔ ma̍. Aa̍ ma̍ nāa tū la ūkpɔ̄tū ɔhwɔhi hwɔhi yī wā. E̍ mlɔtū la anu̍ i̍ngɔ̍ɔ kpɛɛ de ya̍ hwɔhi hwɔhi.
Otīnīkā ode trɛ̍ba
(Ima̍aki 4:21-25)
16“Ɔ̄chɛ ɔha̍ ē mwɔla̍ tū otīnīkā chōo̍chē de u̍kpu̍ūhā kla̍ anu̍, kɛ̄ɛ ē de ē nāa ē rɛ la ihi̍yajɛ yī ibɛ̍ɛdi? Je̍ka o̍ ē de ē che la okpōkōlō, hɛ̄ɛbɛ nīi āchɛ nīi ge̍ē chɛ̄ gāa ma̍ ge̍ē ma̍ ɛbɛ ɔlɛgēdēgēdē. 17Ɔjāha̍-ɔjāha̍ nīi ge̍ trɛ̍ba chī ge̍ē hi̍yɛchɛ we̍. Ɔjāha̍-ɔjāha̍ nīi ge̍ chī kla̍ ya̍kla̍ ge̍ē lwāa ē ta̍āpāapɛ̄ nīi āchɛ ē ma̍ we̍.
18“O̍ lɛ i̍ngɔ̍ɔ ma̍, ala̍ ā du̍mɔ̍-du̍mɔ̍, jɔ̍ɔkɔ nīi ala̍ ge̍ē darɔ̄ku lɛlā ma̍! Wu̍chē oji̍ nɛ, ɔ̄chɛ nīi lɛ ɔjā o̍bū ma̍, e̍ ge̍ē gba̍a ē de ē ba̍ ɔ̄ de ɔ̍. Ɔ̄chɛ nīi i̍ lɛ ni̍ ma̍, onīi o̍ gbɛri̍ya̍ ka anɔ̍lɔ lɛ ma̍, e̍ ge̍ē de ē nāa hī ɔ̄ abɔ̄.”
Aɛ̍nɛ̍ yī Iji̍sɔ̄ɔsi ba̍la ɛ̍nɛ̍ yī nū
(Ima̍tiyu 12:46-50; Ima̍aki 3:31-35)
19Aɛ̍nɛ̍ yī Iji̍sɔ̄ɔsi ba̍la ɛ̍nɛ̍ yī nū wā abɔ̍ɔ dikpo̍ba̍ ɔ̄. E̍ i̍ chī ma̍ ɛbɛ ga gāa dikpo̍ba̍ ɔ̄ ni̍, wu̍chē yī āchɛ nīi de yɛ̄mɛ̄mɛ̄ ma̍. 20Ɔ̄chɛ ɔha̍ koko̍o de Iji̍sɔ̄ɔsi bɛ̍ɛ̄nɛ̄ hīka, “Aɛ̍nɛ̍ yī wɔ ba̍la ɛ̍nɛ̍ yī wɔ wā gblāa abɔ̍ɔ la yɛchɛ ē chikpo̍ ge̍ē ma̍ wɔ.”
21Iji̍sɔ̄ɔsi koko̍o de alɔgbādu ɔla̍ā hīka, “Ala̍ ma̍ ko̍ō! Āchɛ nīi ē plɛ̍ɛ̄lā yī Ɔwɔ ē ya̍ otūlichō yī nū ma̍, aa̍ re̍ka ɛ̍nɛ̍ yī u ba̍la aɛ̍nɛ̍ yī u a̍nɛ.”
Iji̍sɔ̄ɔsi ya̍ nīi ahuhu ɔnɔ̄kɔ̄kū gboba̍
(Ima̍tiyu 8:23-27; Ima̍aki 4:35-41)
22I̍chi̍chɛ ɔha̍, Iji̍sɔ̄ɔsi gatū la wɔwu̍ ɔha̍ ba̍la a̍chi̍kpo̍ yī nū. O̍ ka de wa̍ hīka, “Alɔ ā ga ga oe̍ ɔla̍nū yī li̍hu we̍ e̍ē.” E̍ wā ge̍ hu wɔwu̍ pīya bɛ̍ɛ̄nɛ̄. 23E̍ yɛ ē pɛ̍ wɔwu̍ i̍ngi̍ngɔ̍ɔ yɛ gāa ma̍, Iji̍sɔ̄ɔsi pīya gbwɔlā. Ahuhu ɔnɔ̄kɔ̄kū wā ge̍ gwō la li̍hu ɔla̍ā ɛbɛ̍bɛ̍-ɛbɛ̍bɛ̍, kpɛ̍ɛ nīi yenyi yɛ ē kɔ̄tū ga wɔwu̍. Aa̍ wa̍a̍ tū la obrīihu yī rikū ɔlamu-ɔlamu. 24A̍chi̍kpo̍ yī Iji̍sɔ̄ɔsi gāa dikpo̍ba̍ ɔ̄ ge̍ hɛ̍ ɔ̄ eyī ka hīka, “Ādā! Alɔ de jī mɛ̍ ko̍ō!”
Iji̍sɔ̄ɔsi nīichō gbru ɔpɔ̄ɔpɛ̄ ka tāa ahuhu ba̍la a̍kpa̍yēenyi ka ɛ̍lɛ ge̍ gboba̍! E̍ gboba̍ i̍ngɔ̍ɔ du̍mɔ̍ ɔpɔ̄ɔpɛ̄. Ɛbɛ hīya brɛɛ ɔpɔ̄ɔpɛ̄. 25O̍ da a̍chi̍kpo̍ yī nū bɛ̍ɛ̄nɛ̄ hīka, “Ɔtū ode chōche yī ala̍ kɔ̍ɔ̄ nɛ ma̍/.”
A̍chi̍kpo̍ yī nū de kpo̍ kwi̍ibū, de kpo̍ tūuhwi gblāa abɔ̍ɔ. E̍ chōo̍chē yɛ ē da ɔ̍nyīnū bɛ̍ɛ̄nɛ̄ hīka, “Ita yī ɔ̄chɛ ɔna̍ u̍tu hɔ̄ ma̍ ma̍/? O̍ ē kɛlā tāa ahuhu ba̍la a̍kpa̍yēenyi, e̍ ē chī pɔ̍ɔkɔ yī nū i̍ngɔ̍ɔ ke̍e̍! Fi̍yɛ!”
Iji̍sɔ̄ɔsi nyiya ɔngrɔ̄ɔ ɔha̍ nīi ku̍ yapri̍ija ɔlyɛ̄mɛ̄mɛ̄ ma̍
(Ima̍tiyu 8:28-34; Ima̍aki 5:1-20)
26E̍ ga hɛ̍ta̍ ga oe̍ abɔ̍ɔ la ɔcha yī Aligɛ̍rāsa nīi hɔ̄ la oe̍ ɔla̍nū yī Li̍hu yī Iga̍līli ma̍. 27Iji̍sɔ̄ɔsi bīyɛchɛ hī wɔwu̍ wā la o̍chi ɔpɔ̄ɔpɛ̄ ma̍, ɔngrɔ̄ɔ ɔha̍ bū la ipwo̍gra ɔla̍ā wā ge̍ grāa anu̍. Ɔngrɔ̄ɔ ɔla̍ā ē ku̍ yapri̍ija ɔdwɔ̄bi̍ yɛ̄mɛ̄mɛ̄. Yɛ̄grāa ligbo̍ gba̍a̍ mɛ̍ nīi o̍ i̍ tū ɔjā la ibi̍īyē gɛ ni̍ ma̍. O̍ i̍ ē chā la wɔlɛ̍ ni̍. Wɔ̄gɔ̄ yī u̍nwɔ̍wu̍ yī okū nīi o̍ ē tū a̍nɛ. 28O̍ ma̍ Iji̍sɔ̄ɔsi ma̍, o̍ ti̍ira̍gba̍ ku̍ya̍a̍, ngma̍ ta̍gbo la ajɛ de Iji̍sɔ̄ɔsi. O̍ tɔ̍ɔna ka gbōō hīka, “Iji̍sɔ̄ɔsi, Ɔyi̍ yī Ɔwɔ Ɔgɔnyɛ Ɔnɔ̄kɔ̄kū! Oji̍ nīi a chikpo̍ lɛhu̍ yī u ma̍/? Chu̍chu̍u, n ra̍ābɔ̄ de wɔ! A ā ya̍ um ichi̍ ni̍.” 29Wu̍chē lɔkɔ nīi Iji̍sɔ̄ɔsi yɛ ē ka hīka yapri̍ija ɔdwɔ̄bi̍ ɔ̍lɔ ge̍ bīyɛchɛ hī ɔ̍lɔ ma̍ - ohu̍ nīi o̍ ka i̍ngɔ̍ɔ a̍nɛ. Yɛ̄grāa yɛ̄mɛ̄mɛ̄, yapri̍ija ɔdwɔ̄bi̍ ɛla̍ā ē wā la anu̍ kpɛ̍ɛ ɛbɛ̍bɛ̍-ɛbɛ̍bɛ̍. E̍ ge̍ ku̍ ɔ̄ tōrī, de agba̍ ba̍la okri ē tū ɔ̄ la ikpo̍ ba̍la abɔ̄, o̍ kpo̍ wā krāa cha̍cha̍. Yapri̍ija ɔdwɔ̄bi̍ ɛla̍ā ē bī ɔ̄ ge̍ē ta̍tū la a̍chi̍ chukuru ji.
30Iji̍sɔ̄ɔsi wā ge̍ che ɔ̍ ikpo̍ bɛ̍ɛ̄nɛ̄ ka riyī yī ɔ̍lɔ re̍ kana̍?
O̍ ka anɔ̍lɔ re̍ka “Yɛ̄mɛ̄.” Wu̍chē oji̍ nɛ, yapri̍ija ɔdwɔ̄bi̍ yɛ̄mɛ̄mɛ̄ gāa ge̍ twɔ̄lɛ̍ abɔ̍ɔ la ibi̍īyē yī nū a̍nɛ. 31Yapri̍ija ɔdwɔ̄bi̍ ɛla̍ā ra̍ābɔ̄ de Iji̍sɔ̄ɔsi ka ɔ̍lɔ ge̍ e̍e ku̍ aa̍ ta̍tū ga ɔngɔ̄nɔ̄ngɔ̄nɔ̄ yī ayekū ni̍.
32Yɛ̄grāa ɔla̍ā, ribi yī eko̍oba ɛha̍ lyɛ̄mɛ̄ kpɛ̍ɛ gblāa abɔ̍ɔ kurɛkurɛ ē ri̍re̍ la ɛkū yī yɛwu. Yapri̍ija ɛla̍ā ra̍ābɔ̄ ka Iji̍sɔ̄ɔsi ɔ̍lɔ ge̍ pi̍ye̍mā nīi aɛ̍lɛ ge̍ gāa ge̍ tū la eko̍oba ɛla̍ā gɛ! Iji̍sɔ̄ɔsi pi̍ye̍mā hī wā bɛ̍ɛ̄nɛ̄. 33Yapri̍ija ɛla̍ā bīyɛchɛ hī ɔngrɔ̄ɔ ɔla̍ā ibi̍īyē ɔpɔ̄ɔpɛ̄ pīya ga lipu̍ yī eko̍oba ɛla̍ā. Ribi yī eko̍oba ɔla̍ā ya̍ wuru la ɛnya bū abɔ̍ɔ la ɔhlāatū ɔla̍ā ɔpɔ̄ɔpɔ̄ɔpɛ̄ ge̍ chīyētū la li̍hu. E̍ bī yenyi i̍ngɔ̍ɔ cha̍cha̍.
34Āchɛ nīi yɛ ē deyīrɛ eko̍oba ɛla̍ā ma̍ wā ge̍ ma̍ lɛlā nūma̍ wa̍a̍ nīi ya̍ ma̍, e̍ pīya kpa̍ta̍ la ɛnya gāa ge̍ de wɔ̄kā yī lɛlā nūma̍ chiya kpuu abɔ̍ɔ la ipwɔ̍ɔ̄lɛ̍ ba̍la wɔlɛ̍ɛchɛ yī wā wa̍a̍. 35Āchɛ pɛ̍ pīya gāa ge̍ē ma̍ lɛlā nīi ya̍ ma̍ bɛ̍ɛ̄nɛ̄. E̍ wā la ɛbɛ yī Iji̍sɔ̄ɔsi ma̍, e̍ ma̍ ɔngrɔ̄ɔ ɔla̍ā nīi yapri̍ija ɛla̍ā ngmɛ̍ɛchɛ hī ɔ̄ ma̍ hyāhɔ̄ abɔ̍ɔ la apli̍kpo̍ yī Iji̍sɔ̄ɔsi. O̍ chī tū ɔjā hwɔhi hwɔhi la ibi̍īyē, gba̍a lɛ bāa otri̍di̍di̍ ma̍; o̍ de ya̍ wā uhuhwi ɔlamu-ɔlamu. 36Āchɛ nīi ma̍ lɛlā ɔla̍ā la eyī ma̍ de koko̍o de āchɛ ɛla̍ā wa̍a̍ lɔkɔ nīi Iji̍sɔ̄ɔsi de ɔngrɔ̄ɔ ɔla̍ā nyiya ma̍. 37Bū la ɛbɛ ɔla̍ā, alɔcha yī ajɛ yī Igɛ̍rāsa ɔla̍ā wa̍a̍ nīi grēeyī ma̍ ra̍ābɔ̄ de Iji̍sɔ̄ɔsi ka ɔ̍lɔ ge̍ pīya hī ajɛ yī aa̍. Wu̍chē oji̍ nɛ, e̍ yɛ ē tūuhwi kpɛ̍ɛji. Iji̍sɔ̄ɔsi gāa ge̍ gatū la wɔwu̍ pīya bɛ̍ɛ̄nɛ̄. 38Ɔngrɔ̄ɔ nīi yapri̍ija ɔdwɔ̄bi̍ ɛla̍ā ngmɛ̍ɛchɛ hī ɔ̄ ibi̍īyē ma̍ ra̍ābɔ̄ ka anɔ̍lɔ ge̍ē pīya ē tāa ɔ̍lɔ.
Iji̍sɔ̄ɔsi hi̍hi̍yo̍ de ɔ̍, de ɔ̍ tɛ̄rɔ̄ pīya, 39ɔ̍lɔ ge̍ ku̍chē pīya ga wɔlɛ̍. Ɔ̍lɔ ge̍ gāa ge̍ koko̍o yī lɛlā nīi Ɔwɔ ɔ̍lɔ ya̍ de ɔ̍lɔ ma̍ de āchɛ.
Ɔngrɔ̄ɔ ɔla̍ā pīya bū abɔ̍ɔ gāa ge̍ ta̍ ipwo̍gra ɔla̍ā ta̍, koko̍o yī lɛlā nīi Iji̍sɔ̄ɔsi ya̍ de ɔ̍ wa̍a̍ ma̍ de āchɛ.
Ɔyi̍ yī Ija̍yi̍rɔ̄ɔsi ba̍la ɔnyā ɔha̍ nīi yɛ ē fiyeyī ma̍
(Ima̍tiyu 9:18-26; Ima̍aki 5:21-43)
40Iji̍sɔ̄ɔsi cha wā la oe̍ nūma̍ yī li̍hu ma̍, āchɛ nīi grēeyī gblāa abɔ̍ɔ ma̍ lɛ ɔwɔ̄wīyā nīi e̍ ma̍ ɔ̄ ma̍. Wu̍chē oji̍ nɛ, aa̍ wa̍a̍ gblāa ē gbēyī yī nū. 41Ɔngrɔ̄ɔ ɔha̍ nīi re̍ka Ija̍yi̍rɔ̄ɔsi, ɔlɛhu̍ yī u̍nu̍ ogrēeyī yī ɛbɛ ɔla̍ā ma̍ wā bɛ̍ɛ̄nɛ̄. O̍ ngma̍ ta̍gbo la ajɛ de Iji̍sɔ̄ɔsi, ra̍ābɔ̄ de ɔ̍ ka ɔ̍lɔ ge̍ yewā la wɔlɛ̍ yī anu̍. 42Ɔngrɔ̄ɔ ɔla̍ā lɛ ɔyi̍ ɔnɔ̄nyā ūkpo̍he kpo̍kpo̍. Ɔyi̍ chī gbo abɔ̍ɔ ē ko̍ōku̍. Ɔyi̍ ɔnɔ̄nyā ɔla̍ā re̍ lɛ̍yi̍ igwo̍lɛpa mɛ̍.
Iji̍sɔ̄ɔsi wā ge̍ pīya yɛ gāa ma̍, āchɛ daba̍ ɔ̄ kpɛ̍ɛ la oe̍ ɔha̍lɔha̍ wa̍a̍. 43Ɔnyā ɔha̍ nīi yɛ abɔ̍ɔ lipu̍ yī wā ma̍ kwi̍īyē yī yeyī ohōhu ke̍e̍ la lɛ̍yi̍ igwo̍lɛpa mɛ̍. Ɔjā nīi o̍ lɛ wa̍a̍ ma̍, o̍ de kpo̍ ba̍ iyī nū wa̍a̍ la ɛbɛ yī alobo̍chi̍ mɛ̍. Alobo̍chi̍ ɔha̍lɔha̍ i̍ chī nyiya anu̍ mɛ̍ ni̍. 44Ɔnyā ɔla̍ā wā ge̍ yɛ abɔ̍ɔ lipu̍ yī āchɛ nīi daba̍ Iji̍sɔ̄ɔsi la wāā yī okwi̍ihi ma̍. O̍ de abɔ̄ ku ahu̍ yī aru̍ ɔkwajɛ yī Iji̍sɔ̄ɔsi. Ɔpɔ̄ɔpɛ̄, yeyī nīi o̍ yɛ ē hu ma̍ hɛ̍ kra̍. 45Iji̍sɔ̄ɔsi chikpo̍ ɔpɔ̄ɔpɛ̄ ka ɔ̄nyɛ ɔ̍lɔ de abɔ̄ ku anu̍ ma̍?
Āchɛ wa̍a̍ ta̍ ka ɔ̍lɔ i̍ aa̍ ni̍. Ipi̍ta ka bɛ̍ɛ̄nɛ̄ hīka, “Ādā, āchɛ yɛ ē da ē ba̍ wɔ ē ta̍ wɔ tuu a̍nɛ.”
46Iji̍sɔ̄ɔsi ka hīka, “Ami ɔlɔjā n jo̍ōkū hīka ɔ̄chɛ ɔha̍ de abɔ̄ ku u. Wu̍chē oji̍ nɛ, wɔhu̍ yī obo̍chi̍ ɔnyɔ̄nyiya ɔha̍ ngmɛ̍ɛchɛ hī um ibi̍īyē mɛ̍” 47Ɔnyā ɔla̍ā ma̍ hīka Iji̍sɔ̄ɔsi ɔ̍lɔ de jo̍ōkū tū anu̍ ma̍, o̍ ngmɛ̍ɛchɛ gāa dikpo̍ba̍ Iji̍sɔ̄ɔsi hɛ̍ ibi̍īyē ejē bāa ɔkpa̍kpa̍ ma̍. O̍ ngma̍ ta̍gbo la ajɛ la iyɔ̄bū yī Iji̍sɔ̄ɔsi ka de Iji̍sɔ̄ɔsi abɔ̍ɔ la īkprī yī āchɛ wa̍a̍ ɔjā nīi hu̍ nīi o̍ de abɔ̄ ku ɔ̍ ma̍. O̍ ka de ɔ̍ ka anɔ̍lɔ chī de lɛ cha̍cha̍ bū la yɛ̄grāa ɔla̍ā ɔpɔ̄ɔpɛ̄. 48Iji̍sɔ̄ɔsi koko̍o de ɔ̍ bɛ̍ɛ̄nɛ̄ hīka, “Ɔyi̍ yī u! Ɔtū ode chōche yī wɔ ya̍ nīi a de lɛ cha̍cha̍ mɛ̍! Pīya la ibi̍īyē ogbodɔ̍dɔ̍ gɛ!”
49Yɛ̄grāa nīi Iji̍sɔ̄ɔsi rɛ ma̍ ē kɛlā ma̍, ɔlɛrɔ̄ ɔha̍ bū la wɔlɛ̍ yī ɔlɛhu̍ ɔla̍ā wā abɔ̍ɔ. O̍ koko̍o de Ija̍yi̍rɔ̄ɔsi ka ɔyi̍ yī ɔ̍lɔ hīyɔtū mɛ̍; ɔ̍lɔ ge̍ e̍e ya̍ Ɔngūlɛ̄lā ichi̍ wā abɔ̍ɔ gɛ ni̍.
50Iji̍sɔ̄ɔsi de po̍. O̍ da Ija̍yi̍rɔ̄ɔsi hīka, “A ā tūuhwi ni̍! De ɔtū che kpɔ̍, ma̍a ɔyi̍ yī wɔ ge̍ē de ē lɛ cha̍cha̍!”
51Iji̍sɔ̄ɔsi gbajɛ ga wɔlɛ̍ ɔla̍ā ma̍, o̍ i̍ chɛ̄ nīi ɔ̄chɔ̄chɛ chɛ̄ ga u̍nu̍ ɔla̍ā ba̍la anu̍ ni̍. Ɔ̍chi̍kpa̍kpa̍, Ipi̍ta, Ijɔ̍ɔn ba̍la Ije̍mēehi, ba̍la a̍dā yī ɔyi̍ ba̍la ɛ̍nɛ̍ yī ɔyi̍; aa̍ chɛ̄ gāa ba̍la anu̍ a̍nɛ. 52Āchɛ nīi gblāa abɔ̍ɔ wa̍a̍ ma̍ yɛ ē drɛ̄ɛgba, ē gwe̍ejrīkā yī ɔpīyaku̍ yī ɔyi̍ ɔla̍ā. Iji̍sɔ̄ɔsi ka de wa̍ hīka, “Ala̍ e̍e drɛ̄ɛgba ni̍; ma̍a ɔyi̍ ɔla̍ā i̍ ko̍ōku̍ ni̍! Wɔlā nīi o̍ yɛ ē gbo ji a̍nɛ!”
53Āchɛ ɛla̍ā wa̍a̍ ta̍ kpu̍u la ɛhɛ tū Iji̍sɔ̄ɔsi; wu̍chē oji̍ nɛ, e̍ jo̍ōkū lēchi̍ lēchi̍ ka ɔyi̍ ɔ̍lɔ ko̍ōku̍ mɛ̍. 54Iji̍sɔ̄ɔsi gāa ge̍ de abɔ̄ ku̍ ɔ̄ la abɔ̄, ka de ɔ̍ hīka, “Ɔyi̍, nīichō!” 55Ɔpɔ̄ɔpɛ̄, ɔhɔ̄leyī ku̍chē wā dikpo̍ba̍ ɔ̄; o̍ nīichō ke̍e̍. Iji̍sɔ̄ɔsi ka de wa̍ ka ɛ̍lɛ ge̍ gāla̍ ojōre̍ de ɔ̍lɔ nīi ɔ̍lɔ ge̍ re̍. 56Ɛ̍nɛ̍ yī nū ba̍la a̍dā yī nū de kpo̍ kwi̍ibū ɔlamu-ɔlamu. Iji̍sɔ̄ɔsi ta̍ wā ɔna ka ɛ̍lɛ ge̍ e̍e koko̍o yī lɛlā nīi - ɔ̍lɔ ya̍ hɔ̄ ma̍ ma̍ de ɔ̄chɔ̄chɛ ni̍.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)