توریت شریف: پَیدایش 29
29
1فِر حضرت یعقُوب اگے نکلی کے مشرقی لوکاں نے مُلخے وِچ پُہچی گئے. 2اتھے اُنہاں تکیا کہ میدانے وِچ اِک کھُوہ اَے، تے کھُوئے نے نیڑے پہیڈاں بکریاں نے ترَے اَجڑ بیٹھے وے سݨ، کِیئانکہ بکریاں چراݨے آلے اُس کھُوئے وِچوں اپݨے اجڑاں کی پاݨی پلاݨے سݨ. اُس کھُوئے نے مُونہے پر اِک بڑا بٹہ رخیا وا سی۔ 3جس ویلے سارے اجڑ اُتھے جمع ہوئی جاݨے سݨ، تے او بٹے کی کھُوئے تُوں پَریں کری کے پہیڈاں بکریاں کی پاݨی پلاݨے سݨ، تے فِر بٹے کی اُس کھُوئے نے مونہے پر رخی شوڑنے سݨ۔
4تاں حضرت یعقُوب چرواہیاں کی پُچھیا، ”اے مہاڑے پہراؤ، تُساں کُتھے نے او؟“
اُنہاں آخیا، ”اَساں حاران شہر نے آں۔“
5فِر اُنہاں پُچھیا، ”تُساں نحور نے پوترے لابن نے واقف او؟“
اُنہاں جواب دِتا، ”ہاں، اساں اُس کی سیاݨنے آں۔“
6حضرت یعقُوب اُنہاں کولوں پُچھیا، ”او ٹھیک ٹھاک اے؟“
اُنہاں جواب دِتا، ”ہاں، او ٹھِیک اے. اُدھر تکو! اُس نی تِہی راخِل پہڈاں بکریاں نال اچھݨی پئی اے۔“
7فِر حضرت یعقُوب آخیا، ”تکو! اِچرے دیہاڑ بہُوں اے، تے اجڑاں نے جمع ہوݨے نا ویلا نی ہویا. تُساں پہڈاں بکریاں کی پاݨی پلاؤ، تے اِنہاں کی چراݨے واسطے کھڑو۔“
8اُنہاں لوکاں آخیا، ”اَساں اِس طرح ناں کری سکݨے، جدوں تک سارے اجڑ جمع ناں ہوئی جاݨ. تے فِر اساں اُس بٹے کی کھُوئے نے مونہے پروں ہٹاساں تے پِہڈاں بکریاں کی پاݨی پلاساں۔“
9حضرت یعقُوب اے گلاں کرنا ہی سݨ کہ راخِل اپݨے پیؤ نیاں پہڈاں بکریاں نال آئی، کِیئانکہ او بکریاں چراݨ آلی سی۔ 10جیہڑے ویلے حضرت یعقُوب اپݨے مامے لابن نی تیہؤ راخِل کی تے لابن نے ڈنگراں کی تکیا، تے کھُوئے نے نیڑے گئے تے بٹہ کھُوئے نے مونہے پروں ہٹائی کے اپݨے مامے نے اجڑے کی پاݨی پلاݨ لغے۔ 11فِر اُنہاں بی بی راخِل کی مَتھے پر پیار دِتا تے خوشی نال روئے. 12اُنہاں بی بی راخِل کی آخیا، ”میں تہاڑے پیؤ نا رِشتے دار مطلب بی بی رِبقہ نا پُتر آں.“ فِر بی بی راخِل دوڑی کے اپݨے پیؤ کی خبر دِتی۔
13لابن اے خبر سُݨی کے دوڑنا آیا، تے اپݨے پہانجے حضرت یعقُوب کی گلے نال لائی کے پیار دِتا. فِر اُس کی اپݨے کہار آندا، تے حضرت یعقُوب لابن کی سارا حال سُݨایا۔ 14اے گلاں سُݨی کے لابن آخیا، ”واقعی تُوں مہاڑا اپݨا خُون ایں.“ فِر حضرت یعقُوب لابن نال اِک مہینے تک رہے۔
15اِک دیہاڑے لابن حضرت یعقُوب کی آخیا، ”توں مہاڑا رِشتے دار ایں. کَے اے ضروری اَے کہ تُوں مہاڑی مُفت خدمت کریں؟ مِکی دس کہ تُہاڑی مزدوری کتنی ہوݨی چاہی نی اے.“
16لابن نیاں دو تیہآں سݨ: بڑی نا ناں لیاہ تے نکی نا ناں راخِل سی۔ 17لیاہ نیاں اکھیاں سوہݨیاں سݨ، پر راخِل ہر طرح نال سوہݨی سی۔ 18حضرت یعقُوب راخِل پر عاشق ہوئی گئے، تے اُنہاں لابن کی آخیا، ”میں تُہاڑی نکی تہی راخِل واسطے ست سال تُہاڑی خدمت کرساں۔“
19لابن آخیا، ”اے تے بہُوں چنگی گل اے کہ غیر آدمی نے بجائے میں تُکی اپݨی تہی دیاں. تُوں مہاڑے کول رہ.“ 20فِر حضرت یعقُوب سَتاں سالاں تک راخِل واسطے لابن نی خِدمت کرنے رہے، پر اُنہاں کی راخِل نی مُحبت واسطے اے کُج دیہاڑے ہی لغے۔
21فِر حضرت یعقُوب لابن کی آخیا، ”مُدت پوری ہوئی گئی اے. ہُݨ توں مہاڑی زناݨی مِکی چائی دے، تانکہ میں اُس نال بیاہ کراں۔“
22فِر لابن اُس جغہ نے سارے لوک بُلائے، تے جمع کری کے اُنہاں نی روٹی کیتی۔ 23پر جس ویلے رات ہوئی، تے لابن بی بی لیاہ کی حضرت یعقُوب کول کہنی آیا تے حضرت یعقُوب اُس کول گئے. 24(لابن اپݨی نوکراݨی زِلفہ اپݨی تہی بی بی لیاہ کی دِتی، تانکہ او اُس نی خِدمت کرے۔)
25پر جس ویلے سویر ہوئی، تے پتہ لغا کہ اے لیاہ اے! تے حضرت یعقُوب لابن کی آخیا، ”توں مہاڑے نال اے کَے کیتا؟ جیہڑی میں تُہاڑی خدمت کیتی کَے او راخِل واسطے نی سی؟ فِر تُوں مِکی تہوکھہ کِیئاں دِتا؟“
26لابن جواب دِتا، ”ساڑے مُلخے وِچ اے رواج نی، کہ بڑی نے ہوݨیاں نکی نا بیاہ پہلے ہوئی جائے۔ 27اِک ہفتے بعد شادی نی رسماں پُوریاں ہوئی جاسݨ، تے تُکی دوئی وی دیئی شوڑساں، جس نے واسطَے تُکی سَت سال ہور مہاڑی خدمت کرنی پیسی۔“
28فِر حضرت یعقُوب اِسے طرح کِیتا، مطلب شادی نیاں رسماں پوریاں کِیتیاں. فِر لابن اپݨی دوئی تِہی بی بی راخِل حضرت یعقُوب کی بیاہی کے دیئی شوڑی۔ 29(لابن اپݨی دوئی نوکراݨی بِلہاہ اپݨی تِہیو بی بی راخِل کی دِتی، تانکہ او اُس نی خِدمت کرے۔) 30فِر حضرت یعقُوب بی بی راخِل کول وی گئے، تے بی بی لیاہ کولوں بی بی راخِل نال زیادہ پیار کرݨ لغے. اُنہاں ہور ست سال لابن نی خِدمت کیتی۔
31جس ویلے رب تکیا کہ حضرت یعقُوب بی بی لیاہ نال کٹ محبت کرنے اݨ، فِر رب اُس کی اولاد دِتی، پر بی بی راخِل بانجھ ہی رہی. 32بی بی لیاہ نا اِک پُتر ہویا، جس نا ناں اُنہاں رُوبِن یعنی ”پُترے کی تکو“ رخیا، اِس واسطے کہ او آخݨ لغی کہ ”رب مہاڑا دُکھ تکیا تے ہُݨ مہاڑا جݨا مہاڑے نال ضرُور مُحبت کرسی۔“
33اِک واری فِر او حاملہ ہوئی، تے اُنہاں نا اِک ہور پُتر ہویا. او آخݨ لغی، ”رب سُݨیا کہ مہاڑے نال نفرت کِیتی جاݨی اے، اِس واسطے اُس مِکی اے پُتر وی دِتا.“ اُنہاں اِس نا ناں شمعُون یعنی ”رب سُݨیا“ رکھیا.
34فِر او اِک ہور واری حاملہ ہوئی، تے اُنہاں اِک ہور پُتر جمیا. او آخݨ لغی، ”ہُݨ مہاڑے جݨے نال مہاڑا بندن مضبووط ہوئی جاسی، کِیئانکہ مہاڑے کولوں اُنہاں نا تہرِیآ پُتر جمیا اے۔“ اِس واسطے ترِیئے نا ناں لاوی یعنی بندن رخیا.
35فِر او اِک ہور واری حاملہ ہوئی، تے اُنہاں نا اِک ہور پُتر جمیا. بی بی لیاہ آخیا، ”ہُݨ میں رب نی تعریف کرساں.“ اِس واسطے اُنہاں اُس پُترے نا ناں یہُوداہ یعنی ”تعریف“ رخیا. فِر اُنہاں نی اولادی وِچ وقفہ ہوئی گیا.
Currently Selected:
توریت شریف: پَیدایش 29: phr
Highlight
Share
Copy
Want to have your highlights saved across all your devices? Sign up or sign in
Text (c) 2021 Noor-e-Kashmir
Audio (p) 2021 Noor-e-Kashmir
