NAANAA 11

Babɛli kpɛ́didikɔ̃anaa

1Andunia gũn yã pínki buri mɛ̀n domɛ, yã dokɔ̃nɔn òdi o. 2Lákũ gbɛ̃nɔ tɛn sɔ̃sɔ̃ ifãboki kpa nà, kũ ò kà Babilɔnia bùsu gusaran, akũ ò vùtɛ gwe. 3Ò pìkɔ̃nɛ: Ò gɛ́ ò kúnku bo ò kpáta manamana. Kúnkumɛ ń gbɛ̀ ũ, ɔ̀daamɛ ń simiti ũ. 4Akũ ò pì: Ò wɛ́ra kátɛ ò kpɛ́didikɔ̃ana bo a mìsɔ̃ntɛ zɔ̃ ludambɛa. Ò ó zĩda tɔ́ bo de òsungɔ̃ fãkɔ̃ana dodo andunia gũnlo yãi.

5Akũ Dikiri kìpa à wɛ́ra pìi gwà kũ kpɛ́ lei kũ bisãsirinɔ bòoo. 6Akũ à pì: Ń pínki ń buri dokɔ̃nɔmɛ, yã dokɔ̃nɔn òdi o, akũ yã kũ òtɛn boon dí yá? Yã kũ ò a laasun lɛ̀ tera sà oni kɛmɛ, pɔ́ke ni kpáńnɛ a kɛnaa gũn doro. 7Ò kipa ò gɛ́ gwe ò ń yã yãkatɛńnɛ de òsun kɔ̃ yã ma doro. 8Akũ Dikiri ń fãkɔ̃a gwe dodo andunia gũn pínki, akũ ò ń wɛ́ra katɛnaa tò. 9A yã mɛ́ à tò, ò tɔ́ kpà wɛ̃tɛ pìinɛ Babɛli, zaakũ gwen Dikiri tò andunia buri sĩnda pínki yã bòn. Zaa gwen à ń fãkɔ̃a andunia gũn pínki.

Sɛmu kũ Terao burinɔ

10Sɛmu burinɔ yãn dí. Sɛmu wɛ̃̀ basɔɔrode gũn à Apasada ì ídana anduniala gbɛra wɛ̃̀ pla. 11A gbɛra à kɛ̀ wɛ̃̀ wàa pla kpɛ́ basɔɔro à nɛ́ pãndenɔ ì dɔ gɔ̃gbɛ̃nɔ kũ nɔgbɛ̃nɔo.

12Apasada wɛ̃̀ baraakuri awɛɛsɔɔrode gũn à Sela ì. 13A gbɛra à kɛ̀ wɛ̃̀ wàa pla kũ aakɔ̃o à nɛ́ pãndenɔ ì dɔ gɔ̃gbɛ̃nɔ kũ nɔgbɛ̃nɔo.

14Sela wɛ̃̀ baraakuride gũn à Eberu ì. 15A gbɛra à kɛ̀ wɛ̃̀ wàa pla kũ aakɔ̃o à nɛ́ pãndenɔ ì dɔ gɔ̃gbɛ̃nɔ kũ nɔgbɛ̃nɔo.

16Eberu wɛ̃̀ baraakuri awɛɛsiikɔ̃de gũn à Pɛlɛgi ì. 17A gbɛra à kɛ̀ wɛ̃̀ wàa pla kũ baraakurio à nɛ́ pãndenɔ ì dɔ gɔ̃gbɛ̃nɔ kũ nɔgbɛ̃nɔo.

18Pɛlɛgi wɛ̃̀ baraakuride gũn à Rɛu ì. 19A gbɛra à kɛ̀ wɛ̃̀ wàa do awɛɛkɛ̃ndo à nɛ́ pãndenɔ ì dɔ gɔ̃gbɛ̃nɔ kũ nɔgbɛ̃nɔo.

20Rɛu wɛ̃̀ baraakuri awɛɛplade gũn à Serugu ì. 21A gbɛra à kɛ̀ wɛ̃̀ wàa do awɛɛsuppla à nɛ́ pãndenɔ ì dɔ gɔ̃gbɛ̃nɔ kũ nɔgbɛ̃nɔo.

22Serugu wɛ̃̀ baraakuride gũn à Nao ì. 23A gbɛra à kɛ̀ wɛ̃̀ wàa do à nɛ́ pãndenɔ ì dɔ gɔ̃gbɛ̃nɔ kũ nɔgbɛ̃nɔo.

24Nao wɛ̃̀ baraakuri donsaride gũn à Tera ì. 25A gbɛra à kɛ̀ wɛ̃̀ basuddo donsari à nɛ́ pãndenɔ ì dɔ gɔ̃gbɛ̃nɔ kũ nɔgbɛ̃nɔo.

26Tera kɛ̀ wɛ̃̀ baaakɔ̃ akuri, akũ à Abramu kũ Nao kũ Aranao ì. 27Tera burinɔ yãn dí. Tera Abramu kũ Nao kũ Aranao ì, akũ Arana Lutu ì. 28Arana gà a de Tera wára zaa Urumɛ Kaladia bùsun, gu kũ ò a ìn. 29Abramu kũ Nao nɔ sɛ̀. Abramu nanɔ tɔ́n Sarai, Nao nanɔ sɔ̃ tɔ́n Milika, Arana nɛ́. Arana pì mɛ́ à Isika ì dɔ. 30Sarai sɔ̃ paramɛ, adi nɛ́ iro.

31Akũ Tera a nɛ́ Abramu kũ a daikore Lutuo kũ Abramu nanɔ Saraio sɛ̀ bona Uru, Kaladia bùsun, òtɛn gɛ́ Kanaanɔ bùsun. Kũ ò kà Arana, ò vùtɛ gwe. 32Tera wɛ̃̀ wàa do awɛɛsɔɔrode gũnn à gà zaa Arana.

Currently Selected:

NAANAA 11: BB2005

Highlight

Copy

Want to have your highlights saved across all your devices? Sign up or sign in

Bisã Bible © SIM International, 2005.

Learn More About Bisã Bible 2005