YUHANA 18

Yesu kũnaa

(Mat 26:47-56; Maa 14:43-50; Luk 22:47-53)

1Yesu yã pì onaa gbɛra à bò kũ a ìbanɔ, akũ ò bikũ̀ Kidironu bara dire. Swadako kú gwe, akũ à gɛ̃̀n kũ a ìbanɔ. 2Yudasi bonkpɛde sɔ̃ à gu pì dɔ̃, zaakũ Yesu kũ a ìbanɔ dìgɔ̃ kakara gwe baala'i. 3Akũ Yudasi gɛ̀ɛ gwe kũ soza gã̀ doo kũ dogari kũ sa'orikinɔ kũ Farisinɔ ń zĩnɔ. Ò fitilanɔ kũna kũ sɛ̃̀tɛnɔ kũ gɔ̃kɛbɔnɔ. 4Yesu yã kũ ani a le dɔ̃ pínki, akũ à bò à dàńlɛ à ń lá à pì: Dín átɛn wɛtɛɛ? 5Ò wèa ò pì: Yesu Nazɛramɛ. À pìńnɛ: Makũmɛ a ũ. Yudasi bonkpɛde pì kú kũńwo. 6Kũ Yesu pìńnɛ, makũmɛ a ũ, akũ ò ɛ̀ra kpɛkpɛ, ò bò ò lɛ̀tɛ. 7Yesu ń lá dɔ: Dín átɛn wɛtɛɛ? Akũ ò pì: Yesu Nazɛramɛ. 8Yesu wèḿma dɔ à pì: Ma òárɛ kũ makũmɛ a ũ. Tó makũ átɛn wɛtɛ, à tó gbɛ̃ díkĩnanɔ tá. 9À ò lɛ de yã kũ à ò yã le à papa yãimɛ, kũ à pì: Gbɛ̃ kũ n ń kpámanɔ, ń gbɛ̃ke dí sãtɛro. 10Simɔ Pita fɛ̃nɛda lokona, akũ à wòto à sa'oriki zɔ̃kɔ̃ɔ zĩ̀rii lɛ̀o à a ɔpla sã zɔ̃̀ flɛ̃m. Zĩ̀rii pì tɔ́n Malaku. 11Akũ Yesu pì Pitanɛ: Ǹ n fɛ̃nɛda sɔtɔ a sɔ̀n. Mani wɛ́tãmma toko kũ ma De dìtɛmɛnɛ í miroo?

12Akũ sozanɔ kũ ń gbɛ̃ zɔ̃kɔ̃ɔo kũ Yuda dogarinɔ Yesu kũ̀ ò a yĩ̀. 13Akũ ò gɛ̀ɛ kãao Anasa kĩnaa gĩa. Anasa bi Kayafa kũ à de sa'oriki zɔ̃kɔ̃ ũ wɛ̃̀ birea anzureemɛ. 14Kayafa mɛ́ à lɛ́ dà Yuda gbãnadenɔnɛ yã à pì: À mana gbɛ̃ mɛ̀n do ga baadi gɛ̃nɛ ũmɛ.

Pita ledikpana Yesui

(Mat 26:69-70; Maa 14:66-68; Luk 22:55-57)

15Simɔ Pita kũ ìba pãndeo tɛ́ Yesu kpɛ. Sa'oriki zɔ̃kɔ̃ɔ ìba pãnde pì dɔ̃, akũ ìbaa pì tɛ́ Yesui à gɛ̃̀ sa'oriki zɔ̃kɔ̃ɔ pì bɛ ɔnn, 16ama Pita gɔ̃̀ zɛna gãnulɛa. Akũ ìba kũ sa'oriki zɔ̃kɔ̃ dɔ̃ pìi gɛ̀ɛ à yã ò nɔgbɛ̃ kũ àtɛn zɛ́ pì dãkpãnɛ, akũ à tò Pita gɛ̃̀. 17Akũ nɔgbɛ̃ zɛ́dãkpãrii pì Pita là à pì: Gɔ̃gbɛ̃ pìi ìbanɔ dokemɛ n ũroo? Pita wèa à pì: Makũro. 18Zĩ̀rinɔ kũ dogarinɔ tɛn tɛ́ kũ ò lè kpákpa kũ ĩa kun yãi. Pita kú kũńwo gwe, àtɛn tɛ́ kpákpa se.

Sa'oriki yãlalana Yesua

(Mat 26:59-66; Maa 14:55-64; Luk 22:66-71)

19Akũ sa'oriki zɔ̃kɔ̃ tɛn Yesu lala a ìbanɔ yãi kũ a yãdannɛnaao. 20Yesu wèa à pì: Ma yã ò baadinɛ gupuraa. Ma yã dàdańnɛ aduakɛkpɛnɔ gũn kũ Luda ɔnnwo, gu kũ Yudanɔ dì kɔ̃ kakaran ń pínki. Mádi yãke o asiri gũnlo. 21Bɔ́yãi ntɛni ma lalaa? Ǹ ma yãmarinɔ la, ò yã kũ ma òńnɛ dɔ̃. 22Kũ Yesu yã ò lɛ, dogari kũ ò kú gwenɔ do a sãn kɛ̀ à pì: Òdi yã we sa'oriki zɔ̃kɔ̃ɔa lɛro. 23Yesu wèa à pì: Tó yã vãnin ma ò, ǹ o ò ma. Tó yã manan ma ò sɔ̃, bɔ́yãin n ma lɛɛ? 24Akũ Anasa Yesu gbàrɛ sa'oriki zɔ̃kɔ̃ Kayafa kĩnaa yĩna.

Pita ɛra à ledikpana Yesui dɔ

(Mat 26:71-75; Maa 14:69-72; Luk 22:58-62)

25Pita kpɛ́ zɛ gwe àtɛn tɛ́ kpákpa. Akũ ò a là ò pì: A ìbanɔ dokemɛ n ũroo? Pita ledi kpà à pì: Makũmɛro. 26Sa'oriki zɔ̃kɔ̃ɔ zĩ̀rinɔ do bi gbɛ̃ kũ Pita à a sã gò danɛmɛ, akũ à pì: Mádi á e lɛɛlɛ swadakoo gũnloo? 27Akũ Pita ledi kpà dɔ. Zaa gwe gɔ̃̀nɔ ko lɛ́ zù.

Pilati yãkpatɛkɛna kũ Yesuo

(Mat 27:1-2, 11-14; Maa 15:1-5; Luk 23:1-5)

28Gudɔo akũ Yuda gbãnadenɔ bò kũ Yesuo Kayafa bɛa, ò gɛ̀ɛ kãao bùsu gbɛ̃ zɔ̃kɔ̃ bɛa. Odi gɛ̃ a ɔnnlo, de òsungɔ̃ gbãsĩro yãi, zaakũ ò ye ò Vĩnla dikpɛ kɛmɛ. 29Abire yãi Pilati bò à sù ń kĩnaa à pì: Yã kpaten á vĩ kũ gbɛ̃ pìioo? 30Ò wèa ò pì: Tó yãvãnikɛriinlo, de ódi su ò a kpámmaro. 31Akũ Pilati pìńnɛ: À a sɛ́ à gɛ́ yãkpatɛ kɛ kãao á zĩda dokaa. Akũ gbãnade pìnɔ pìnɛ: Ó gbɛ̃dɛna zɛ́ vĩro. 32Abirekũ kɛ̀ de yã kũ Yesu ò le à papa yãimɛ, kũ à a ga yã taka ò. 33Akũ Pilati ɛ̀ra à gɛ̃̀ ɔnn. À Yesu sìsi, akũ à a là à pì: Mɔkɔ̃n Yudanɔ kína ũ yá? 34Yesu wèa à pì: Ntɛn o lɛ kũ n zĩdaoon yá, ke ò ma yã ònnɛmɛɛ? 35Pilati pì: Yudan ma ũ yá? N burinɔ kũ n sa'orikinɔ mɛ́ ò n kpama. Bɔ́n n kɛ̀ɛ? 36Yesu pì: Ma kpata bi andunia díkĩna pɔ́nlo. Tó ma kpata bi andunia díkĩna pɔ́mɛ, de ma ìbanɔ zĩ̀i kà de òsun ma kpá Yuda gbãnadenɔaro. Ma kpata bi andunia la pɔ́nlo. 37Akũ Pilati pìnɛ: Ase kínamɛ n ũ yá? Yesu wèa à pì: N ò a zɛ́a kũ kínan ma ũ. Ò ma i, akũ ma su andunia gũn yãpura sèedade ũ. Gbɛ̃ kũ à de yãpura pɔ́ ũ dì ma yã ma. 38Pilati pì: Bɔ́n yãpura ũu?

Yãdana Yesula

(Mat 27:15-31; Maa 15:6-20; Luk 23:13-25)

Kũ à ò lɛ, à ɛ̀ra à bò à gɛ̀ɛ Yuda gbãnadenɔ kĩnaa à pìńnɛ: Mádi taari ke le gbɛ̃ diaro. 39Á futɛokarayã vĩ kũ madì purusunanɔ doke gbarɛárɛ Vĩnla dikpɛ zĩ. Á ye mà Yudanɔ kína gbarɛárɛn yá? 40Akũ ò wiki lɛ̀ dɔ ò pì: Àkũmɛro, Barabamɛ! Baraba pì sɔ̃ bi kpãni wɛ́dewɛmɛ.

Currently Selected:

YUHANA 18: BB2005

Highlight

Copy

Want to have your highlights saved across all your devices? Sign up or sign in

Bisã Bible © SIM International, 2005.

Learn More About Bisã Bible 2005