ലൂക്കോശ് 14
14
ഏശു ഒര ചീക്ക്കാറന്ക്ക് ശൊകം കൊടക്കന്റാൻ
1ഒര ശവത്ത് നാളക്കി ഏശു പരീശൻമാര തലവൻമാരീല് ഒരത്തന്റ വീട്ട്ക്ക് ശാപ്പാട് തിന്‌വാനിക്കി പിയ്യപ്പൻ അവടയൊണ്ടാഞ്ഞ ആള്കളൊക്ക ഏശുവ്ന ഒറ്റിപാത്തിരന്നാര്. 2തേകം പൂര വീക്കം പിടിച്ച ഒര മന്ശൻ അവടയൊണ്ടാഞ്ഞ്ത്. 3ഏശു മതത്ത്നപ്പെറ്റി പടിപ്പിക്കിന്റ കൂട്ടറോടയും പരീശൻമാരോടയം, “ശവത്ത് നാളക്കി ചീക്ക്കാറ ശൊകപ്പെട്ത്ത്‌വാനൊള്ള നേമം ഒണ്ടാ അതെ ഇല്ലയാ?” ഇന്റ് കേട്ടാൻ.
4അത്ക്ക് തിരിച്ച് അവങ്ങ ഒന്റും പേശീല; അത്കൊണ്ട് ഏശു അവന പിടിച്ച് ശൊകമാക്കി പേശിവിട്ടാൻ. 5പിന്നയം ഏശു അവങ്ങളോട, “നിങ്ങള കൂട്ടത്തൊള്ള ഒരത്തന്റ ഒര കയ്യനോ കാളയോ ശവത്ത് നാളക്കി ഒര കുയ്യീല് വീന്നെ നിങ്ങ പിടിയിന്റ് ഇള്ത്തേറ്റ്ത്ത്‌ലിയാ?”
6അത്ക്ക് എത്റാഞ്ഞ് അവ്ങ്ങ്ക്ക് ഒന്റും പേശ്‌വാനിക്കി ഇല്ലാഞ്ഞ്ത്.
ഏശു ഒത്ക്ക്ത്ത്നപെറ്റി പടിപ്പിക്കിന്റാൻ
7വിര്ന്ത്ക്ക് വന്ത ആള്കള് ഇരപ്പാനിക്കി നെല്ലതാവ് തേടന്റത് കണ്ടപ്പൻ, ഏശു അവങ്ങളോട ഈ കത പേശിയാൻ, 8“നിങ്ങള ഒര കെനിയാള വീട്ട്ക്ക് ഏവനിങ്കിലും വിളിച്ചെ അവട പിയ്യ് ഏറ്റം മൊകത്ത് നെല്ലതാവ് പാത്ത് ഇര്ക്കേറ്; എന്തനിന്റെ നിങ്ങളീക്കായും താനമൊള്ളവന അക്കൂട്ടറ് വിളിച്ചാരാകും. 9പിന്ന നിന്നയം അവനയം വിളിച്ചവൻ വന്ത് നിയ്യ് ഇര്ക്ക്ന്റ താവ് ഇവന്ക്ക് കൊട്‌വ് ഇന്റ് നിന്നോട പേശ്വ്നിക്കി നിയ്യ് നാണംകെട്ട് ഏറ്റം പിറ്റീക്കാട്ടീല് പിയ്യ് ഇരപ്പാനിക്കി എടവെരും. 10അത്ക്ക് പകരം നിയ്യ് ഏറ്റം പിറ്റീക്കാട്ടീല് പിയ്യ് ഇര്ക്കണം; ആണയിന്റെ നിന്ന വിളിച്ചവൻ വന്ത് നിന്ന കാണ്വ്നിക്കി, കൂട്ടേ, മൊകത്ത് വന്ത് ഇര്‌വ് ഇന്റ് പേശും; അപ്പിനിക്കി വിര്ന്ത് വീട്ടീല് ഇര്ക്ക്ന്റ ആള്കള മൊകത്ത് നിക്ക് വെക്‌മാനം കിട്ടും. 11അവാവനത്തിന്ന പൊക്കിപ്പേശന്റവൻ ഒന്റുമില്ലാണ്ടിയാഞ്ഞ് പോകും അവാവനത്തിന്ന താത്തിപ്പേശന്റവൻ ഒക്ക കാരിയത്തിലും വെലീവനാകും.”
12പിന്ന ഏശു തില്‌മ്പി വിര്ന്ത്കാറനോട, “നിയ്യ് ഉച്ച ശാപ്പാടോ അന്തി ശാപ്പാടോ തിന്‌വിനിക്കി കൂട്ട്കാറനയോ കൂടപ്പൊറപ്പ്കളയോ ശൊന്തക്കാറയോ ഉറവായ്‌ക്കാറാഞ്ഞ കിട്ടവീട്ട്കാറയോ വിളിക്കേറ്; എന്തനിന്റെ അവങ്ങ നിന്ന അവങ്ങളാട്ടക്കി വിളിച്ച് നിക്കും തില്‌പ്പി തെര്വ്റ്; അത് നിങ്ങ്ക്കൊള്ള കൂലിയാകും. 13അത്കൊണ്ട് നിയ്യ് ഒര വിര്ന്ത് വിട്വ്നിക്കി പാവമാഞ്ഞ ആള്കളയം പൊറതിപ്പാശക്കാറയും മൊണ്ടിപിടിച്ചാള്കളയും കണ്ണ് കാണാത്ത ആള്കളയം വിളിക്കണം. 14അപ്പിനിക്കി നിക്ക് വരം കിട്ടും; എന്തനിന്റെ നിക്ക് തിരിച്ച് ഓകാരം ചെയ്‌വാനിക്കി അവ്ങ്ങ്ക്ക് നോക്കണ്ട; ഇന്റെ നീതിയൊള്ള ആള്കള് ഉശ്റ്‌വന്ത് എള്മ്പ്‌വ്നിക്കി കർത്താവ് നിങ്ങ്ക്ക് അത്ക്കൊള്ള കൂലി തെര്വ്റ്.”
വെലീ വിര്ന്ത്ന്റ കത
മത്തായ് 22:1–10
15ഏശുവ്ന്റ കൂട്ടത്ത് ശാപ്പാട് തിന്‌വാൻ ഇര്ന്ന ആള്കളീല് ഒരത്തൻ ഇതൊക്ക കേട്ട് അവനോട പേശിയാൻ, “തെയ്‌വം വായന്റ ഒലകത്തീല് ശാപ്പാട് തിനന്റ ആള്കള് പാക്കിയം ഒള്ളാള്കള്.”
16ഏശു അവങ്ങളോട പേശിയാൻ, “ഒരത്തൻ ഒര വെലീ വിര്ന്ത് വിട്ടാൻ; അവൻ കൊള്ള ആള്കളയം വിളിച്ചാൻ.” 17ശാപ്പാട് ഒണ്ടാക്കി കെയിഞ്ഞപ്പൻ ഏമാൻ അവന്റ വേലക്കാറ വിട്ട്, “വേൻ ശാപ്പാട് ഒര്ങ്ങിയിര്ക്ക്ന്റ്” ഇന്റ് വിളിച്ച ആള്കളോട പേശിയാൻ. 18ഇന്റെ വിളിച്ചാള്കള് ഓരോര കാരിയങ്ങള് പേശി മാറിയാര്; ആത്തീത്തീവൻ പേശിയാൻ, “നാന് കൊറച്ച് താവ് വാങ്ങിയിൻ; എക്ക് അത് പിയ്യ് പാക്കണം; അത്കൊണ്ട് എന്നോട പൊറ്ക്കണം ഇന്റ് നാന് കെഞ്ചിക്കേക്കന്റൻ” ഇന്റ് പേശിയാൻ. 19പിന്ന ഒരത്തൻ, “നാന് അഞ്ച്പട്ടി കാളകള വാങ്ങിയിൻ; അത്‌ന കണ്ടത്തീല് കൊണ്ട കണ്ടം പൂട്ടി പാക്കണം; അത്കൊണ്ട് എന്നോട പൊറ്ക്കണം ഇന്റ് നാന് കെഞ്ചിക്കേക്കന്റൻ” ഇന്റ് പേശിയാൻ. 20പിന്നൊരത്തൻ, “നാന് ഇപ്പൻ കെനിയാളം കെട്ടിയിര്ക്കന്റൻ; അത്കൊണ്ട് എക്ക് വെര്‌വാൻ നോക്കണ്ട” ഇന്റ് പേശിയാൻ.
21വേലക്കാറൻ തില്‌മ്പി വന്ത് ഈ കാരിയങ്ങളൊക്ക ഏമാനോട പേശിയാൻ. അപ്പിനിക്കി ആ വീട്ട്കാറൻ മൂച്ച് എട്ത്ത് അവന്റ വേലക്കാറനോട, “നിയ്യ് പിടിയിന്റ് പട്ടണത്തീല തെര്‌വീതിയിലും എടവെയ്യീലും പിയ്യ്, ഉറവായ് ഇല്ലാത്ത ആള്കള്, കണ്ണ് കാണാത്താള്കള്, പൊറതിപ്പാശക്കാറ്, മൊണ്ടി പിടിച്ച ആള്കള്, ഇക്കൂട്ടറ ഒക്ക കൂട്ടി എട്ത്ത് വാ” ഇന്റ് പേശിയാൻ. 22ആ വേലക്കാറൻ പേശിയാൻ, “ഏമാനേ, നിയ്യ് പേശീതൊക്ക ചെയ്ഞ്ഞൻ; ഇന്നിയം താവ് ഒണ്ട്” ഇന്റ് പേശിയാൻ. 23ഏമാൻ വേലക്കാറനോട, “നിയ്യ് പട്ടണത്ത്ന്റ പൊറത്തൊള്ള വെയ്യീലും എടവെയ്യീലും പിയ്യ് കാണന്റ ആള്കളയൊക്ക എന്റ വീട് നെറപ്പാനിക്കി വെര്‌വാനിക്കി അവങ്ങള തണ്ടണം” ഇന്റ് പേശിയാൻ. 24“നാന് മുന്തി വിളിച്ച ആള്കള് ഒരത്തനം എന്റ ശാപ്പാട് തിന്‌ത്ത്‌ല ഇന്റ് നാന് നിങ്ങളോട പേശന്റൻ” ഇന്റ് പേശിയാൻ.
ഒര ശിശിയൻ ആഞ്ഞ് ഇര്ക്കന്റത്‌ന്റ വെല
മത്തായ് 10:37–38
25ഒര വിട്ട ആള് കൂട്ടം ഏശുവ്ന്റ പിറ്റ പോക്കാഞ്ഞ്ത് അവൻ തിരിഞ്ഞ് അവങ്ങളോട പേശീത്, 26നിങ്ങ്ക്ക് എന്റ ശിശിയൻ ആകണമിന്റെ നിങ്ങള അപ്പനയും അമ്മീനയം വീട്ട്കാറീനിയം കുഞ്ച്‌ലയം അണ്ണൻ തമ്പിമാരയം അക്കതങ്കമാരയും നിങ്ങള ശൊന്തം ഉശ്റ്നക്കായും എന്ന ശ്‌നേകിക്കണം. 27എന്റ പേരില് വെന്റ കട്ടപ്പാട്കള് കെയ്യേപ്പാനം ചാവാനും#14:27 കട്ടപ്പാട്കള് കെയ്യേപ്പാനം ചാവാനും ഈ വാക്കിയം കിരീക്കീല് കുരിശ് എട്ത്ത് എന്റ പിറ്റ വെരാത്തവന്ക്ക് ഇന്റാണും എയ്‌തിയിരക്കന്റത് മനശില്ലാത്തവന്ക്ക് എന്റ ശിശിയനാവാനിക്കി നോക്കണ്ട.
28നിങ്ങള കൂട്ടത്തീല് ഏവനീങ്കിലും വെലീയ കോട്ട കെട്ട്‌വാനിക്കി തൊടങ്ങിയേ ആത്തിയം ഇര്ന്ന് അത് തീറപ്പാനിക്കി ഒള്ള ഉറവായ് ഒണ്ടാ ഇന്റ് പാക്ക്ത്ത്‌ലിയാ. 29ഇന്റെ എടിത്തറ കെട്ടിക്കെയിഞ്ഞ് വേല തീറപ്പാനിക്കി പെറ്റാണ്ടി വന്തെ ഒക്കളം അത് പാത്ത് നാണംകെട്ത്തി, 30ഇവൻ വേല എടപ്പാൻ തൊടങ്ങിയാൻ ഇന്റെ തീറപ്പാനിക്കി ഉറവായ് ഇല്ല ഇന്റ് പേശ്‌വ്റ്. 31ഇല്ലന്റെ, ഒര രാശാവ് വേറ രാശാവാട്ടക്കി പോട്ടിക്കി പോന്റത്ക്ക് മുന്തി ഇര്ന്ന് ഇര്പതിനായിരം പടയാളികളും ആഞ്ഞ് വെന്റ രാശാവോട അവന്റ പതിനായരം പടയാളികളും ആഞ്ഞ് പോട്ടി വെപ്പാൻ പെറ്റ്മാ ഇന്റ് നെനയ്‌ക്കത്ത്‌ലിയാ? 32പെറ്റ്ത്ത്‌ല ഇന്റെ മെറ്റീ രാശാവും പടയാളികളും കൊള്ള തൂര ആവിനിക്കി തിന്ന അവന്റ ശുവായിമാര വിട്ട് നിമ്മ്തിക്കിവേണ്ടി വേണ്ടി കെഞ്ചിക്കേക്കും. 33അത്പേലതിന്ന അവന്ക്കൊള്ളതൊക്ക വിട്ട് പിരിയാത്തവന്ക്ക് എന്റ ശിശിയൻ ആവാനിക്കി നോക്കണ്ട.
ഒന്റ്ക്കും ചാട്ടാത്ത ഉപ്പ്
മത്തായ് 5:13; മർക്കോശ് 9:50
34ഉപ്പ് നെല്ലതാണും; ഇന്റെ ഉപ്പ്ക്ക് അത്‌ന്റ തുശിയില്ലാണ്ടിപ്പിയ്യെ, പിന്ന ഏണ അത്ക്ക് തുശി വെര്ത്ത്‌വാനിക്കി പെറ്റും? 35പിന്ന അത് മണ്ണ്ക്കോ വളത്ത്ക്കോ ചാട്ടാത്തതാകും; പിന്ന അത്‌ന എറിഞ്ഞ് കളവ്റ്. കേട്ട് കെയ്യേപ്പിനിക്കി മനശൊള്ളവൻ കേക്കട്ടൻ.
Currently Selected:
ലൂക്കോശ് 14: മുതുവാൻ
Highlight
Share
Copy
Want to have your highlights saved across all your devices? Sign up or sign in
© New Life Literature
