Jenesesi 27
27
Izaki ohomureliha Jako
1Mulombwana Izaki ohomala ulula, fiyeda haonaga. Siku nimohi ohomuitanaga Ezawu, wenno ali mwanaye murandji, liye ira: <<Mwanaga!>> Ezawu ohomurumelaga, liye ira: <<Miyo vano.>> 2Evale babaye ule ohomuwandela, liye ira: <<Weyo unodiona eni, miyo dihimala ulula. Siku nnafuna miyo kwa kadizi. 3Inafwanela utukule josayana jawo, utukule urwawo na mafumwiwa, udowe kokolani wasaye, udizelena nyama. 4Wamala udisakanyele yodja yapama yoziva yenno inaziveliwetcha miyo, uzena didje ira durelihe dahanakwe.>>
5Izaki amuwandelaga liye mwanaye mazu anne, muhiyanaye Rebeka ovwaga. 6Mwa enne Rebeka ohomuwandela mwanaye Jako ira: <<Miyo tchineneva dihivwa yowonga ya babawo amuwandelaga mbalawo Ezawu ira: 7<Udowe kokolani wasaye, udizelena nyama, udisakanyele yodja yapama yoziva yenno inaziveliwetcha miyo, uzena didje ira durelihe vamentoni va Yehova dahanakwe.> 8Mwanaga uvuruwane pama eto uirena yenno inafuna miyo uruma. 9Utamange tchineneva udowe nimburo nnafwanyeya anavinyama ehu, watukule mbuzi mbinli ding'onong'ono dapama. Wazana, miyo nnosakanya yodja yoziva nnga yenno inaziveliwetcha babawo. 10Damala sakanya, weyo udowena, liye adje ira aurelihe, ahanakwe.>>
11Evale Jako ohonfukaga mmaye, liye ira: <<Mbalaga Ezawu uhukana mawoya eto miyo kadinna. 12Papa adiwambaselra adihinda, aona ira gu miyo, unoiziwa ira nnafuna dimunyenge. Era eno, hiya ira adirelihe, unoditembelrelra.>> 13Evale mmaye ohomuwakulaga, liye ira: <<Nari, mwanaga. Akala liye unoutembelrelra, otembelrelreya akale miyo. Weyo uirena yenno yurumile miyo. Udowe watukule mbuzi, uzena.>>#27:13 Weyo uirena yenno yurumile miyo. Fwanyeya ira zelru da Rebeka na mwanaye Jako kadali zelru dofwanela vamentoni va Mulugu. Tchoira hiya muroromela Mulugu ira amurelihe Jako, Rebeka avenda makalelo omuxangaxanga mamunaye eto Jako orumela laba jomunyenga babaye. Eto fwanyeya ira yofuna ya Mulugu kahi yenno. Tchoira inafwanela muhiyana anvwelelege mamunaye. (Efezo 5:22) Eto inafwanela mwana anvwelelege babaye. (Efezo 6:1)
14Evale Jako ohodowaga tukula mbuzi mbinli dile, liye dowa nvaheda mmaye. Mmayele ohosakanya yodja yoziva nnga yenno yaziveliwetcha Izaki. 15Nomala eno, Rebeka ohotukulaga yowara yapama ya mwanaye Ezawu murandji baliwa, yenno yakoyile liye mmba, liye muwariha Jako, mwanaye wa ng'onong'ono ule. 16Eto mmayele ohotukulaga matembe a mbuzi dile, liye mukunelana mwanaye ule miwono na nikohi mwasiwa liye kaanna mawoya. 17Evale ohotukulaga jodja joziva jasakanyile liye jile, vamohi na pawu yasakanyile liye, nvaheda mwanaye Jako.
18Evale Jako ohodowagana vafwanyeya babaye, liye ira: <<Babani!>> Izaki muwakula ira: <<Gu miyo vano! Kodi weyo uli mwanaga Ezawu?>> 19Jako ohorumela, liye ira: <<Gu miyo vano Ezawu, mwaninyu murandji. Dihisakanya yenno yadirumile nyo. Venyani mugarati, mudje nyama yenno isayile miyo ira mudirelihe.>> 20Evale Izaki ohomuwakulaga eraga: <<Kodi uwandile avi saya mobaranya, mwanaga?>> Jako ohomuwakulaga, liye ira: <<Yehova, Mulugu wenyu gudikamihedile.>>#27:20 Yehova, Mulugu wenyu gudikamihedile. Owu hehi Yehova, Mulugu wenyu gurumile mwanainyama za difwanya, miyo pa.
21Noira enne, Izaki ohomuwongana Jako eraga: <<Mwanaga kadisusele uno, duwambasele, duhinde ira dikayena ibaribari akala uli mwanaga Ezawu owu hehi.>> 22Evale Jako ohomuwandamelaga, Izaki liye muwambaselra, liye ira: <<Nizu nawo nnakala nnga nizu na Jako, mbwenye eto mandawo anakala nnga a Ezawu.>> 23Mwa enne Izaki kawandile muiziwa ira ali Jako, mwasiwa mandaye kohokana mawoya nnga Ezawu. Evale afunaga mureliha, 24ohonfuka akoka eraga: <<Kodi weyo na ibaribari uli mwanaga Ezawu?>> Jako ohomuwakulaga, liye ira: <<He, gu miyene.>> 25Evale babaye ule ohomuwandelaga eraga: <<Kadisusihede jodja jisakanyile we ira didje yosaya ya mwanaga, damala durelihe.>> Evale Jako ohonvahaga jodja jile, liye dja. Eto ohonvaha vinyu, liye ng'wa. 26Nomala enne, Izaki ohomuwongana mwanaye ule eraga: <<Mwanaga kadiwandamele uno, udivahe beju.>> 27Jako ohomuwandamelaga, liye nvaha beju babaye ule. Izaki agaonne nukela wa jowara ja Ezawu jejo jawarile Jako jile, ohomurelihaga eraga: <<Mwanaga weyo unonukela pama nnga kokola yorelihiwa na Yehova. 28Mulugu auvahe muzongwe wapama okumela zulu,#27:28 muzongwe wapama okumela zulu: MaBibiliya a izugu anawonga ningame na zulu. na johanda jidjindji mmundani, vamohi na tirigu na vinyu oindjivetchetcha. 29Atu kaulabege eto malogo oindjiva kakokorege vamentoni vawo. Weyo ukale namatonga wa abalawo eto ahima a mmawo kaukokorelege. Katembelrelreyege atu anno anautembelrelrege eto atu anno anaurelihege, karelihiwege.>>
Ezawu ohopuzeya mareliho
30Izaki agamanle mureliha Jako, avenyagavo wene tchi tempu yazaga Ezawu akumaga masayelo. 31Evale Ezawu ohopiyaga yodja yoziva, liye zana wali babaye eraga: <<Babani, venyani mudje yosaya ya mwaninyu ira mudirelihe!>> 32Evale Izaki ohonfuka eraga: <<Kodi weyo uli ani?!>> Liye ohomuwakula eraga: <<Gu miyo vano Ezawu, mwaninyu murandji.>>
33Evale Izaki agavwile enne ohoroma ngurumela na makalelo ohokala a masika, liye ira: <<Nnga wenne adowile masayelo, apa mwanainyama aza adivaha bani? Ukala azilena jodja weyo wahanaze, miyo dja jatene, nomala miyo mureliha. Eni liye gunafuna kala orelihiwa.>>
34Evale Ezawu agavwile mazu awongilege babaye ale, ohokuwaga valukulu motakaleliwa, liye nvepaga babaye eraga: <<Babani, direliheni na miyene!>> 35Izaki mbwenye ohomuwakulaga, liye ira: <<Mbalawo guzile muwari monyenga, liye ubela mareliho anno dafuna miyo uvaha.>> 36Evale Ezawu ohowongaga, liye ira: <<Na ibaribari nzina na Jako kanaitaniwelana vasayi vene nari,#27:36 nzina na Jako kanaitaniwelana vasayi vene nari: Ezawu aza awongaga eno tchoira na iwongelo yewa iEberewu, nzina na Jako nnavweya nnga Namanyenga. nihinfwanela pama. Mwasiwa fendo ila eni tchi fendo yanembinli adinyengaga. Fendo yoroma ohodiwaka undimuwa waga ozela kala murandji baliwa eto peno uhudiwaka mareliho aga!>>#27:36 Fendo yoroma ohodiwaka undimuwa waga ozela kala murandji baliwa: Ezawu awonga zela tempu yamugulihedile liye undimuwa waye ozela kala murandji baliwa na parato imohi ya sopa. Nione Jenesesi 25:29-34. Noira eno, Ezawu ohowongagave ira: <<Nnga babani nne kamuhanlena nreliho nimohi ira mudivahe?>>
37Izaki ohomuwakula Ezawu eraga: <<Miyo eni dihinvaha ira autongege weyo eto dihinvaha ira nyo abalaye atene mukale anamalabaye. Eto dihimureliha zela tirigu na vinyu, jatene dihimala nvaha. Nnga miyo nnauirela nni mwanaga?!>> 38Evale Ezawu ohokalelagave nvepa babaye ule eraga: <<Babani kodi mareliho mwanna nyo banno bahi? Babani, direliheni na miyene!>> Evale Ezawu ohotomolaga kuto anlaga. 39Mwa enne Izaki ohomuwandelaga Ezawu eraga: <<Weyo unakalege olapela wene na wewo unafwanyeya minda dapama eto unakalege olapela wene na muzongwe orumbwa zulu. 40Weyo kalawo wawo unakumelege mowana eto unerege mulaba mbalawo. Mbwenye wawaheyana jotongiwa na mbalawo, unorula tongiwa waukapatchihile liye.>>#27:40 wawaheyana jotongiwa na mbalawo, unorula tongiwa waukapatchihile liye: Zela kwakwaneliheda wa mazwala, nione 2 Amwene 8:20-22.
Jako ohomutawa mbalaye Ezawu
41Noira enne, mulombwana Ezawu ali mwidani wa mbalaye Jako na mwasa wa mareliho anno Jako arelihiwe liye na babaye. Evale mulombwana Ezawu ohoumbuwela mmirimani mwaye eraga: <<Eni babaga uhanle vang'ono ira akwe. Akwa, malambo onla kamala, miyo nnompa Jako.>>
42Mwa enne Rebeka agawandeliwe jaumbuwela Ezawu mwanaye murandji ule, ohomuitanaga Jako mwanaye wa ng'onong'ono, liye muwandela ira: <<Mbalawo Ezawu unaumbuwela joupa ira murimaye amudidile. 43Mwa eno, mwanaga uvuruwane yowonga yaga. Uvenye utawele vande va murongolaga Labawu, ilambo ya Arani. 44Wakalege wewo fiyeda uwali unna liye ummalele. 45Era eno, mbalawo takaleliwa waye wamala, adiwala yenno imuirele we, miyo nnouwandela ira uwelewo. Tchoira miyo kannafuna upuzeyani nyo ahimaga ambinlene siku nimohive.>>
46Evale Rebeka ohodowaga wonga na mamunaye Izaki, liye ira: <<Miyo dahagomana ahiyana aEti anna Ezawu waatenle liye ala. Jako amutela muEti, namurala wa mwilamboni muno, nnga jiirile mbalaye Ezawu ji, era eno, tchapama miyo dikwe wene.>>#27:46 Jako amutela muEti… era eno, tchapama miyo dikwe wene. Rebeka mazwala awongela muwari momutawiheda Jako ilambo imohiwa ira ahapiwe na mbalaye Ezawu. Ali makalelo omuwandela mamunaye Izaki ira amurumelihe Jako kumavo vande vale adowe ilambo imohiwa kalaga nnga Izaki amutawiha ira unaze amutele muhiyana wa ilambo yenne, agali Rebeka mbwenye ilukuluwa amutawiha ira mbalaye Ezawu unampe.
Currently Selected:
Jenesesi 27: iLolo
Highlight
Share
Copy
Want to have your highlights saved across all your devices? Sign up or sign in
© 2018 Visão Integral
