Lukaji 19

Zakeyo namasokiha misoko

1Yesu ohofiyaga Jeriko, liye roma vira musidadi mule. 2Musidadi mule mohokala mutu mmohi eriwa Zakeyo. Liye ali mundimuwa mmohi muwari mwa andimuwa a anamasokiha misoko eto ali mutu orayela. 3Liye agavwile ira: <<Yesu unaavira>>, ohofuna nnga amuone. Mbwenye na mwasa oindjiva wa atu, kawanda muona, mwasiwa liye ali mutu okwiva. 4Na mwasa oiziwa ira: <<Yesu unafuna avire rampa neni>>, ohotamangaga, liye dowa sogolro wa Yesu, liye gwela mmutengoni mwa Nantambu ira awande muona. 5Mwa enne Yesu agafiyile vamutengoni vale, ohoing'anaga muzulu, liye muitana ira: <<Zakeyo, katita mobaranya. Tchoira peno nnafuna dakale mulendo vande vawo.>> 6Evale Zakeyo agavwile jawongile Yesu, ohotitaga mobaranya, liye muwatchela Yesu mohagalala.

7Atu atene kaonilege ejile, kohoromaga nong'ona keraga: <<Mulombwanola udowile fiyeda vande va mutu otega!>> 8Eto Zakeyo ohovenyaga, liye wonga na Nabwiya eraga: <<Nabwiya, kavuruwanani. Miyo nnafuna digwade jorayela jaga vari, daavahe atu osimela pandi imohi. Teto akala dihimbela mutu, nnomuweliheda fendo nnayi kwaranya jejo dambenle miyo.>> 9Yesu ohomuwandelaga eraga: <<Peno vulusa uhufiya vande vano.>> Noira enne ohowongaga na atene, liye ira: <<Tchoira na liyene gu mwana Abarahamu.#19:9 na liyene gu mwana Abarahamu: Zakeyo ali mwana Abarahamu mozela nroromelo nokala ha nroromelo nanna Abarahamu. Tchoira kohokalawo ana Abarahamu zela maningo kahali ana Abarahamu zela munemba. Nione Roma 9:7-8; Galasiya 3:7. 10Mwasiwa Mwana wa Mutu uzele asaka no avulusa ale kadimenle.>>

Yofwalrafwaniha ya mulombwana mmohi aahiyedile anamalabaye kobiri

Matewuji 25:14-30

11Atwale kavuruwanagave jawongaga liye jile, Yesu ohowongaga yofwalrafwaniha imohi na mwasa oira liye ohowandamela Jeruzalemu eto atwale kaumbuwela ira: <<Umwene wa Mulugu unoroma tchineneva.>> 12Mwa enne ohowongaga eraga: <<Ohokalawo mulombwana mmohi abaliwe munlogoni mwa amwene. Evale liye ohoitaniwa ira adowe ilambo imohiwa olapela wene, avahiwe umwene, amala awelele waniwa akoka. 13Mwa enne liye ahanavenyihane ulrendo waye, ohaitana anamalabaye kumi, liye roma avaha kada namalaba kobiri imohi yagali yapameneve,#19:13 kobiri imohi yagali yapameneve: Kobiri inawongiwa ku wonga kada mutu ohovahiwa kobiri yokwakwana nnga mutu avahiwa liye agalabile medi miraru mmindani mwa nfwaye. liye awandela eraga: <Kobirila muwendihegena malronda fiyeda za waga!>

14<<Mbwenye agadowile, anamurala a umwene wafuna liye tonga kagahanle, kohomwida eto koharuma atu ira kadowe, kamuhare, kamuwandele ira: <Hiyo kannafuna ira weyo ukale mwene wehu.>#19:14 Hiyo kannafuna ira weyo ukale mwene wehu: Iireyile va tchoira mulombwanole avenyile, liye dowa ilambo imohiwene ira adowe ahambihiwe umwene, amala awelewo aze atongege ilambo yenne yakuma liye. Kahi ira liye afuna adowe ahambihiwe umwene ira atongege wewule. Mwa enne liye agavenyile ira adowe ahambihiwe umwene, fwanyeya ira liye agali mundila adowaga, atu anno afuna liye za atongaga kohomaruwaga mundulri mwaye aliwa za nfwanya keraga: <<Hiyo kannafuna ira weyo ukale mwene wehu.>> 15Mwa enne ndimuwole agavahiwe umwene waye, agafiyile vande vale, ohaitaniha anamalabaye anne aavahile liye kobiri ira aiziwe kobiri daganyalrile kada mutu muwari mwa malronda aye. 16Evale mutu oroma ohozaga, liye ira: <Patarawu, miyo na kobiri imohi mwadivahile nyo ile, dihipatamo kobiri dimohi diwa kumi.> 17Evale patarawu ule ohowongaga eraga: <Uhusakanya pama! Weyo uli namalaba wapama! Na mwasa okala ororomeleya mwa jengo jing'ining'ini, weyo unokana utongi wa sidadi kumi.> 18Namalaba wanembinli ohozaga, liye wonga ira: <Patarawu, miyo na kobiri imohi mwadivahile nyo ile, dihipatamo kobiri dimohi diwa tanu.> 19Evale patarawu ule ohowongaga eraga: <Weyo unokana utongi wa sidadi tanu.>

20<<Mbwenye namalaba mmohi ohozaga, liye ira: <Patarawu, kobirinyu ila. Miyo dere ibulruwalri valensoni, miyo dowa ikoya. 21Miyo dera uovani, tchoira nyo muli mutu orutcha. Nyo munovenyihavo yenno mwahahenlevo nyo eto munohanda yenno mwahazanle nyo.> 22Evale patarawu ule ohorumelaga eraga: <Weyo uli namalaba wabure! Na mwasa wa vamulomoni vawo, miyo nnougwihana mulandu. Weyo wohoiziwa ira miyo dili mutu orutcha ira miyo nnovenyihavo yenno yahahenlevo miyo eto nnohanda yenno yahazanle miyo. 23Nnga mwasiwa gwa nni weyo uza wahahelaga banko kobiraga ira miyo dawelagawo, diwatchele mowendjededeya na juru?>#19:23 juru ku wonga akala wabolihile 50, unamuweliheda mowendjededeya, akala 70, nari 80, malringana na makalelo munafuna nyo vwanana, no indjiva wa malambwiwa.

24<<Evale ohawongagana atu kaligi evale eraga: <Kamuwakeni kobiri inna liye, munvahe wenno unna kumi.> 25Aliwa kohomuwakulaga keraga: <Mbwiyeni, liye uhumala kana kobiri daye kumi!> 26Mbwenye patarawu ule ohowonga eraga: <Miyo nnouwandelani ira mutu wenne unna, gunafuna vahiwave. Mbwenye ule ahanna, eto mwa yengo ya vang'ono yenno inna liye unoza awakiwe.> 27Evale ohowongaga eraga: <Mwaazena amwidani atene, anno kahafunile ira miyo dikale mwene wewa, mwaape tchineneva vamentoni vaga daaing'anaga!> >>

Yesu ohofiya Jeruzalemu

Matewuji 21:1-11; Markuji 11:1-11; Juwawu 12:12-19

28Yesu agamanle wonga ejile, ohovenyihanaga adowaga sidadi ya Jeruzalemu. 29Awandamelaga tatamo da Betifaji na Betaniya, agali mwango unaitaniwa Mitengo da Azeti, oharumaga anamamuharaye ambinli sogolro waye, 30liye awandela eraga: <<Mudowe tatamo nnafwanyeya sogolro. Mwavolowaga wene, munofwanya mwana buru agamangeleliwe wenno uli ahanarome gweliwa. Nyo mwanfwanya mwana buru uyo, mmutapule mmuzena uno. 31Akalavo mutu mmohi aufukani ira: <Munatapulela nni burula?>, muwonge ira: <Mwasiwa Nabwiya gunafuna ira alabena.> >>

32Aliba rumiwa ale kagadowile, kohonfwanya mwana buru ule nnga mwemo mwaawandenle Yesu. 33Evale kaganfwanyile, kohoromaga mutapula buru ule. Mbwenye kamutapulaga, annya kohoiraga: <<Munamutapulela nni?>> 34Evale aliwa kohowakulaga, aliwa ira: <<Mwasiwa Nabwiya gunanfuna ira alabena.>> 35Noira eno, kohomutukulaga buru ule, aliwa mudowagana. Kaganfiyilena wali Yesu ule, kohotandelaga kapa diwa vazulu va mwana buru ule, aliwa mugwelihavo Yesu. 36Yesu adowaga, atu kotandelaga kapa diwa mundila. 37Evale Yesu awandamelaga nipedi na Mwango wa Mitengo da Azeti, anamwindji a anamamuharaye kohagalalaga, kamutamalelaga Mulugu mokuwa na mwasa wa jotikiniha jatene ja kopolo jaonne atu, 38aliwa wongaga keraga: <<Orelihiwa gu Mwene wenno unaza na nzina na Nabwiya! Murendele akale ilambo ya zulu. Wenno uli Okwaranya Jatene atamaleliwe.>> 39Evale aFarizewu amohiwa kafwanyeya vari va anamwindji vale kohomuwongagana keraga: <<Namafundjiha, kaasumululeni anamauharaninyu ala!>> 40Yesu mbwenye ohawakulaga eraga: <<Miyo nnouwandelani ira aliwa kamiyala, mabwe anerege kuwa!>>

41Yesu awandamelaga sidadi ya Jeruzalemu, agaonile sidadile nnga ha vale, ohoinlelaga 42eraga: <<Aa! We Jeruzalemu! Yohofwanela ira siku na peno uiziwe makalelo ozana murendele! Mbwenye makalelo owenda na murendele ali okoyeya vamentoni vawo. 43Tchoira anofiya malambo oira amwidanawo kamale barela marampa otawelamo eto anoza kauwerewere no utiyelela pandi datene. 44Aliwa anoza kaubwanyule weyo na atu atene anakala mwa weyo, mukale vati. Kagaubwanyunle, kavali nibwe nnafuna za kala vazulu va nibwe nfwaye,#19:44 anoza kaubwanyule weyo na atu atene anakala mwa weyo: Jatene jene Yesu jawongile liye zela bwanyuliwa wa Jeruzalemu johoireya. Tchoira Yesu agakwile, agavennye mokwani, vagamanle wandamelana yaka 40, ohokala mundimuwa wa akuda Roma eriwa Titu atakaleliwe na joira ja aJudewu. Liye oharuma anyakondwaye ira kamange muru orungunuwa sidadi yatene ya Jeruzalemu ira atu kafunaga tawa, awande apa atene. Evale muwari moira atwale kali emule tchawandile kuma ira kalime, kohofiyeda mwezo okana ndala yohokala ya masika. Mwa enne atu atene kagamanle waheya, anyakondwale kohovolowa sidadi ya Jeruzalemu, aliwa mala gudjula sidadi vamohi na Nyumba ya Yehova wakutetcha atu mikuto diwa. Fiyeda peno, Nyumba ya Yehova kilivo. Vihanle ibuwave bahi. Jatene ejo jaireyele na mwasa oira aJudewu a sidadi ya Jeruzalemu tchawandile muroromela Yesu. Kahamuroromele Yesu, kerege kalave pama. Yesu mbwenye ohoiziwa ira: <<Atwala anodikonda miyo.>> Na mwasa wenne, ohokumbanya goyi dafuna atu kana. mwasiwa weyo kuiziwile tempu izile Mulugu ira aupande.>>

Yesu ohatamangiha aliba malronda Nyumba ya Yehova

Matewuji 21:12-17; Markuji 11:15-19; Juwawu 2:13-22

45Yesu ohovolowaga vatando va Nyumba ya Yehova, liye roma atamangihamo anamagula na anamaguliha atene. 46Ohawandelaga eraga: <<Jihilrembiwa mMazuni ira:

<Nyumba yaga inakala nyumba yolobelamo.> Mbwenye nyo muhuisandutcha kala nifukwe noakoyamo ambava!>> # Izaiya 56:7; Jeremiya 7:11

47Yesu ofundjihetcha Nyumba ya Yehova malambo matene. Mbwenye andimuwa a anamakuta, anamafundjiha malamulo na aliba asogolrelra atu, kohofuna ira kampe Yesu. 48Mbwenye aliwa tchanna yoira, tchoira atu atene kanvuruwana Yesu koziveliwa valukulu jawonga liye.

Currently Selected:

Lukaji 19: iLolo

Highlight

Copy