Luka 13
13
1Mmatsuva aga pwuvale avange baha vwu vakambula itsa va mu-Galilai, uvwu UPilate aguhanzitse unkisa gwa vene ninekelo jya vene ijyu vitekelaga. 2Pwu UJesu akavanda akata: Uńe pange mukuvasagila ava mu-Galilai ava mwita pange vavalutile voni ava mu-Galilai avajyavo uvutulanongwa ulwakuva vabudilwe vuvule-vule. 3Une ndibela ndita: Bako. Lweli uńe ngave namukilivuka pwu nuńe ndaswa vuvule-vule ńivoni. 4Avakitsigo nannana uvwu iliboma lya mu-Siloha livagwilage uvwu livabudage uńe pange mwita vwu valutilye ukutula inongwa kuvoni avajyavo avatsengile mu-Jelusalemu. 5Une ndibela ndita: Bako. Lweli uńe ngave namukilivuka pwu nuńe ndaswa vuvule-vule ńivoni.
6Pwu akavavula ikihwanihitso akata: Ujyunge umunu ale nunkuju gwa mwene, ugwu avyalile mungunda gwa mwene gwa masilu. Pwu akata ndilole vwu guhupile iseke, pwu akavona naguhupili itsinge. 7Pwu akatsova nundoleli va ngunda gwa masilu akata: Lola lino nditsile sikutsoni imyaka gidatu ndita ndilole vwu guhupile iseke unkuju ugu, mańa sikutsoni ndivona bako naguhupili itsinge. Lino ugudumulage. Guvejanga kiki ungunda? 8Pwu umwene akanda akata: Nkuludeva uguleke umwaka ugu gwene, ndigujavilage tango ndivoleletse nindakambe, 9pwu pange guhupaga iseke. Mańa pwu ungave uvwene guṅatile lweli, pwu vwitse ugudumulage lweli.
10Pwu ulunge vwu ikuvavula inongwa nńumba ijyinge jya kwisajilamwo pasabati, 11pwu akava mumwa undala, uvi imepo imbivi jimpelye uvutamu ulwakuva jamwuvatye imyaka kitsigo nannana. Umwene adudumbalye nukududumbala untsilakugoloka lusiku. 12Umwene UJesu vwu ambwene, pwu akamwilanga akata: Vi ndala ndikuvopwe uvutamu vwako uvu. 13Akambika namavoko. Pwu undala akagoloka ṅani ṅani. Pwu akanginya Unguluve. 14Umwene undolelańumba jya kwisajilamwo gukavipa vwu avwene UJesu ikumponya pasabati undala. Pwu akavavula avanu akata: Amatsuva ga mbombo gali ntanato, pwu mwitse ngave mulonda ukuponetsivwa, mańa pasabati pwu nditsaga. 15Umwene unkuludeva akamwanda akata: Ńi vanwasi uńe ńivoni nda namukutsivopola isenga tsińo namagodovwe gińo nsititsi pasabati, namwibiha natso kumagasi? 16Mańa umwene umwana va Abulahamu uju, uvi USetano ankungile imyaka kitsigo nannana, vi ndeti ntetsage nanogili ukumbopola ululegehe ulu palitsuva lya sabati? 17Vwu atsovile tsitsitsi pwu tsikavavona isoni voni avabadeṅine nave. Avene avanu ikipuga kyoni vwu vakahekela vwu vatsivwene tsoni imbaha itsu apelaga.
18Pwu umwene akavutsa akata: Uludeva lwa Nguluve tutetsage luli ndikiki? Tukivone ndaku ikihwanihitso kya kuhwanihitsa? 19Tutetsage luli ndakaseke ka nkisina ukwu umunu akatola akalaha mungunda gwa mwene umwu avyalile imibiki, pwu kakamela gukipela mbiki umbaha, nasyene isidege sya kukyańa sikahona uvuswa mmapagika ga gwene.
20Akavuja akata: Uludeva lwa Nguluve luli ndikiki? 21Tutetsage luli ndunsabe ugwu akatola undala akahanza nuvuhevete isidili sidatu, pwu vukalula vwoni vuvule.
22Pwu umwene akapolanika uvutsenge vwoni nuvuvaha nuvudebe akalotsa mu-Jelusalemu, akavavula inongwa avanu vwu igenda. 23Pwu ujyunge umunu akambutsa akata: Nkuludeva humbe vadebe avipokivwa? Umwene akavavula akata: 24Mwijumilitsage pakwingila pandyango unsińe, Mańa ndikuvavula ndita: Vongosu avalalemwa vwu vijumilitse vatye twingilage. 25Angave umweneńumba asisimwike pakudinda pandyango ngave mwimile panzi mukoṅona kulwitsi mwita: Nkuludeva ungatudindulila kundyango, pwu umwene alanda alata: Nandivamańili ukwu muhumile. 26Pwu ndatengula pakuta: Nupwu twalitsaga twivoni nuve isinu, nupwu twańwetsaga twivoni nuve isya kuńwa, pwu nda nutuvweni? Nupwu vwatuvulaga inongwa nduvanza mwavwe, pwu nda nutuvweni? 27Pwu umwene alata: Ndikuvavula ndita nandivamańili ukwu muhumile, muhumage pane apa ńivoni ńi muvomba imbivi sikutsoni. 28Pwu jilava ingolo jyene, lulava nulugadutso lwa mino lwene vwu muvwene avene va-Abulahamu nu-Isikaka nu-Jakobu navańamalago voni vali ndudeva lwa Nguluve vwu uńe mutagilwe panzi. 29Valahumaga napavuhumo ilitsuva nakuvusemo nakukasikasini nakusini ukutsitama pakulya isinu ndudeva lwa Nguluve. 30Lola pwuvale navamumbele avalava valongotsi, pwuvale navalongotsi avalava vamumbele.
31Pwu ilitsuva ili pwu vakatsikumbula avange avapalisai vakata: Kimbilaga ubihage kuvunge mańa UHeloti ita akubude. 32Pwu umwene akata: Mbihage nkaguvule ugunu ugu nkatetsage: Atye lola nukuhumya imepo imbivi nukuponya avatamu ndimalisa ilelo iji nakilavo, pavusiku vwu ndisike vuvule pakupela. 33Mańa ilelo iji nakilavo napavusiku pwu upita ndigendage inzila jyango. Mańa naviswila avańamalago pavunge, vuvule mu-Jelusalemu mwu viswila.
34Vi Jelusalemu, vi Jelusalemu vi vukuvabuda avańamalago, vi vukuvatova namaganga avasuṅilwe kwave, napongosu lino upwu nditye ndivalundamanye avańa vako nduvwu inemba jilundamanya ivana mmapapatilo ga jyene, mańa uńe mukabela. 35Lola ińumba jińo mulekwagwa vuvule. Lweli ndikuvavula ndita: Nandambone lusiku ndatsisika lulwa ndatsovelaga ndatetsaga: Mwalimi vi vukwitsila mwitavwa lya nkuludeva,–pwu lweli.
Currently Selected:
Luka 13: Kinga
Highlight
Share
Copy
Want to have your highlights saved across all your devices? Sign up or sign in
New Testament in Kikinga © British and Foreign Bible Society, 1961.
