Luka 17
17
1Pwu akavavula avakongi va mwene akata: Ińambuhitso tsa kuvagela avanu tsu tsiki tsu tsivakwo natsijaga. Mańa uli viki vi munu vi vukutsigega vi vwita ndivambutse avanu. 2Nukumwambutsa ujyunge uva vadebe ava nukukungivwa ulwala kunsingo ulwa kutwivilitsa muńanza–pwu kwavetsaga kunnonu vuvule kukukungivwa ulwala kunsingo ulwa kuntwivilitsa muńanza. 3Mbandikage! Ungave uvwene unnino atulile inongwa kwave, pwu utame nave, lino ungave uvwene ita ndipelile lino, pwu unsyikilage. 4Napene nupwu angave itula inongwa kwave lekelakupamato palitsuva lipamato lyene, lola avuje itse lekelakupamato kwave ilitsuva ili atetsage ndipelile lino, uve pwu unsyikilage.
5Pwu avapositili vakatsova nave untwa vakata: Utwongeletsage ulwidiko luvalage. 6Umwene unkuludeva akavavula akata: Ngave mwavetsaga nalwo ulwidiko, lungave lwavetsaga ndakaseke ka nkisina uvudebe, pwu ndili mwitsova kunkuju ugu ndili mwita: Kupukaga vwivyale pańanza pagati, pwu ndili mwivona gwidike baho. 7Uńe umwu mbelye angave ujyunge ali nunkivaga uva kundimila ikilimila, pange uva kundimila isenga, angave agodwike kumihe nda pwu ambule atetsage: Vwitsage apa ṅani-ṅani ulitsage tango? 8Bako ndita itetsaga: Ukwa unelekelage uńe isya kwigoneka lino, uswale vunnonu unsabwa ungahilage syoni nuvugimbe vwu ndili pakulya, pwu vwitse ulitsage uńwetsage nuve. 9Lino umwene nda asane kunkivaga va mwene atetsage: Mwalimi vwu avombile itsu andagye? Uńe ndibela ndita nisana kumwene. 10Vwu ngahile vuvule-vule nuńe, Napene ngave muvombile vuvule tsoni itsu mwalagililwe, pwu ntetsage: Tuli vakivaga tulivambwa vuvule, mańa tuvombile tsene itsu twalagililwe.
11Pwu akabiha ku Jelusalemu pwu akahumiṅanya pagati nikya mu-Samalija nikya mu-Galilai. 12Avwene vwu ita ndingile mbutsenge uvunge pwu akaganila navagosi kitsigo avańabuba. Vwu vakima pavutale 13vakilanga ilimeńu vakata: Vi Jesu, vi nkuludeva uve nikisa. 14Umwene vwu avavwene pwu akavavula akata: Bihagi nkavoneke kuvateketsi. Vwu viva pakuvuka, pwu vakapona ibuba jya vene. 15Mpamato vwu ivwene ukupona, pwu akakilivuka akabiha upwu ale UJesu, akanginya Unguluve nilimeńu ilivaha. 16Akabiluka pasi kumalunde ga Jesu akata: Mwalimi. Vi ale n-Samalija umwene. 17Umwene UJesu akanda akata: Nda navakave kitsigo palya upwu ndikavaponitse? Valindaku avanine vuju budikakupamato? 18Nda navavoniki avange ukwitsa kukunginya Unguluve, nda avonike ju mmenza uva kivumbuko ikinge jyuju mwene? 19Pwu akambula jyujwa akata: Ima bihaga, lukuponitse lu lwidiko lwako.
20Pwu vakambutsa avapalisai vakata: Uludeva lwa Nguluve lukwitsa ndali? Pwu umwene akavavula akata: Uludeva lwa Nguluve upwulukwitsa naluvoneka kumiho. 21Mańa navalatsove ukuta: Lola ulu kunu! Bako lulya uku! Lola uludeva lwa Nguluve ndi nalwo mwańe umu. 22Akavavula avakongi va mwene akata: Gukwitsa umwaka pwu ndanogwa ndata: Tungave twalivonaga ilitsuva lya NŃamunu nda lyale live lipamato vuvule. 23Pwu valavavula valata: Lola uju kunu! Bako ulya uku! Pwu ndabihaga, pwu ndavakongaga. 24Mańa nduvwu ulumuli lwa nzasi lumulika lwihuma kuluvasu ulunge ulwa kukyańa lwisika kuluvasu ulunge ukumulika, vwu alagahaga vuvule-vule namwene Unńamunu palitsuva lya mwene. 25Mańa tango upita vankinilage sitso, vangililage avanu va lino ava. 26Itsa pamwaka ugwakwitsila Unńamunu natsene ndatsilya itsa pamwaka gwa Nwaka. 27Mańa pwu avene sikutsoni vakata nukulya, vakata nukuńwa vakata nukutola avadala vakata nukubiha kuvagosi va vene, vakatsisika palitsuva lilya UNwaka upwu akingila mungalava, upwu lukavoneka ulwongometso lukavajatsa voni. 28Navene ava pamwaka gulya ugwa Loti navene vakagaha vuvule-vule. Navene vakata nukulya, vakata nukuńwa, vakata nukugula isyakugula, vakata nukutanilanila isyakugula, vakata nukulima, vakata nukutsenga ińumba. 29Apene palitsuva lilya ULoti upwu akahuma mu-Sotomu, pwu umwoto gukahuma kukyańa uta sula ijitima gukahanga nikibiliti, pwu gukavajatsa voni. 30Mańa vwu tsilava vuvule-vule natsene itsa pamwaka ugwa kuvonekela Unńamunu. 31Palitsuva lilyo uvi ali pakyańa pańumba, vi alikaga nkutola isyuma sya mwene isili nńumba, Namwene uvi ali pakulima nkilimila kya mwene, vi alakilivukaga kumbele. 32Mukumbuhitsage undala va Loti. 33Uvi ikijumilitsa ita aponye uvwumi vwa mwene, vi ajatsihitse ṅani, mańa uvi avujatsitse vi avupone-hitse ṅani. 34Ukwa ndivavule uńe: Ikilo ilya pwu avalume vangave vali vavili pakitala kipamato kyene pwu ujyunge alupililwa, ujyunge unine alalekwa baho. 35Avadala vavili valahevetaga paninye, ujyunge alatolwa, unnine alalekivwa baho. 36Avanu vangave vilima vavili nkilimila kipamato kyene, pwu ujyunge alupililwa, ujyunge unine alalekwa. 37Pwu avene vakamwanda vakata: Ndaku nkuludeva? Umwene akata: Upwu gungave pwuguli unsimba pwu tsilundamana ingasimula.
Currently Selected:
Luka 17: Kinga
Highlight
Share
Copy
Want to have your highlights saved across all your devices? Sign up or sign in
New Testament in Kikinga © British and Foreign Bible Society, 1961.
