Teekɨtɨga 5
5
Moij kɨ Aarõ elɨn ta kɨ Paraõ
1Goot gog Moij kɨ Aarõ aw elɨn Paraõ anan: Bɨraɓe Luwah lo Israelg el an: I nya deg lon ad aw ɗan nah kɨtɔm kam dɨlalot 2Paraõ tur an: Nõ i Bɨraɓe kad m'oo dɔ ndɨ ta loa kad m'nyan Israelg mad awɨn a? M'ger Bɨraɓe al, na m'a m'nya Israelg mad awɨn al tɔ. 3Elɨn anan: Luwah lo Hebreg ndɔdj. Kɨ kɔi kɨ i nyàj ad j'aw, kɨ ndia ndɔ mɨta kam dɨlalot kad kɨ ja mosɨ kadkari jad Bɨraɓe Luwah loj, na ɓeta so dɔjt kɨ yokoosɨ ke kɨ kiyaɗɔɔ. 4Ngar kɨ Ejipt't turd an: Moij kɨ Aarõ, kɨtɔɗi i nyan ne deg dõ dɔ kɨlagit lod a? Awɨn ta kɨlagt losɨ.
5Paraõ el an: Oo tajigla deg'n non kɔrd i ngãi kɨ tɔi kam dɔningt 'nten, na adɨnd taan kò dɔ kɨlagt lod.
Ngar Paraõ ad kõ ngan Israel
6Ndɔt'n non Paraõ ndamber bɨradɔg lo deg kɨ pajag lod, an: 7Nẽbe kɨnõt a adɨn deg mũ kad ɗan ne brik tit kɨmaɗi al. Ad ĩn kɨɓeg aw ɔin mũ. 8A i gangɨn kɔr brik dɔdt tit'n a ɗan ne maɗi, a ɔrrɨn kamt kɔ al, kɨta ĩn ngéngẽ. Kɨtɔ 'nten la kon ne anan: I nyàj ad j'aw kad kɨ ja mosɨ kadkari jad Luwah loj 9Ad ndan kɨla kɨkɔi kɨ tɔi dɔ degt'n non, kad ɔrɨn rɔkɨ girrt, na kad kɨ turɨn go tag kɨbal al.
10Bɨradɔg lo deg kɨ pajag lod teen, aw elɨn deg anan: Paraõ an: a adsɨn mũ al. 11Awɨn, ĩn kɨɓeg, i jan mũ lot'n a i ngahnt, kɨta a ɔrrɨn nya mad kɔ kam kɨlat losɨ al 12Deg tĩn na kɨ log tube kam dɔning Ejipt't kɨta kɔi bulmug gan ne got mũ. 13Bɨradɔg ɔsɨnd anan: I tɔlɨn kɔn kɨlag losɨ, ndɔ kɨɗen tit kɨkete lon ĩn ne kɨ mũ. 14Ndan pajag lo Israelag'n bɨradɔg lo Paraõ ndan dɔdt kɨ ndeh. Ndɨjend anan: Kɨtɔɗi i tɔlɨn ne kon kɨlaɓer losɨ kɨtaagbe ɓone al, na ɔrrɨn brik asɨ tit kɨ maɗi al tɔ a? 15Na kɨbo dɔ kɨlat lo ngan Israelg ɗen ro Paraõt anan: Kɨtɔɗi i ɗan titbe kɨ ɓerg loi a? 16Adɨn mũ ɓerg loi al, na eljɨn anan: Ɔrrɨn brik oo ndan ɓer Israelag, na ɗagootal i lo deg loi Ejiptiag ĩn kɨbeg. 17Paraõ el an: Ĩn ngéngẽ, ĩn ngéngẽ Kɨtɔ 'nten la i ndɨ elɨn ne anan: I nyàj ad j'aw kɨ ja mosɨ kadkari jad Bɨraɓe. 18Tajigla aw i ɗan kɨla kɨta a adsɨn mũ al, na a i adɨn kɔr brik tit kɨkete.
19Pajag lo Israelag oon ad ĩn kam danggt lon elɨnd anan: Kɔr brik'n i ndɨ ɔrrɨn kɨndɔgndɔg a ɔrrɨn kamt kɔ al. 20Lon teen ro Paraõ kɨtɨga ye, ndɔdɨn Moij kɨ Aarõ, ɗa ngoond ɗobo. 21Elɨnd anan: Kɨ Bɨraɓe nda kumɨn dɔsɨt, kɨ gangta, kɨta ĩla i teljɨn nya kɨyerr takum Paraõt kɨ takum ɓergt loa, i lan kiyaɗɔɔ jidt kad tɔljɨn ne kɔ ye.
Moij elta kɨ Luwah
22Moij tel kɨ ro Bɨraɓet gog, el an: Bɨraɓe, kɨtɔɗi i ɗan majal kɨ deg'n non a? Kɨtɔɗi i lamɨn a? 23Go kawɨm kɨ ro Paraõt kɨtakad m'elta kam tɔit ye, Paraõ ɗa majal kɨ deg'n non, na ĩ, ɔrr deg loi kɔ al bat.
Currently Selected:
Teekɨtɨga 5: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
