Teekɨtɨga 8
8
1Bɨraɓe el Moij an: El Aarõ an: I la jii kɨ kag tɔsɨ loi kɨdɔ bahgt kɨ kɨdɔ ngan bahgt kɨ kɨdɔ man kãrgt ad kãrg ɓain kɨdɔ dɔning Ejipt't 2Aarõ la jin kɨdɔ mangt kɨ Ejipt ad kãrg ɓai utɨn dɔ dɔning Ejipt. 3Mboolig ɗan titbe tɔ kɨtakul kɨla mboolig lod kɨmund ad kãrg ɓain kɨdɔ dɔning Ejipt't.
4Kamla Paraõ ad kunɨn Moij kɨ Aarõ, el an: I kɔn Bɨraɓe kad ɔrr kãrg romt kɔ kɨ kɨ ro degt lom, na m'a m'nya deg kad awɨn jan mosɨ kadkari adɨn Bɨraɓe. 5Moij el Paraõ an: I ndig loi kad ɔrr kaglo kɨtɔm, ĩn sumba kad m'kɔn kɨtatɔi kɨ ɓerg loi kɨ deg loi, kɨtakad Luwah nuj kãrg'n non kɔ roit, kɨ kujg loi, kad nãin kam baht koon. 6Paraõ el an: Loti Moij el an: Kɨ ɗa tit'n elɨn nõ, kɨtakad i gerɨn de kɨmad kɨtit Bɨraɓe Luwah loj goto. 7Kãrg a nyain kɨ kujg loi kɨ ɓerg loi kɨ deg loi, a ĩn kam baht koon.
8Moij kɨ Aarõ teen ro Paraõt kɨtɨga. Moij un ndin ko'n kɨdɔ Bɨraɓet kɨta kãrg'n ad'd ɗen dɔ Paraõt. 9Bɨraɓe ɗa tit'n Moij elɨn ad kãrg oin kam kujgt, kɨ kam natlogt, kɨ kam ndɔɔgt tɔ. 10Kawɨnd kɨdɔnat, na dɔning ot ndum.
11Lon Paraõ ngah kaglo ta ko ye, ɗa dɔngang ad oo dɔ ta lo Moij kɨ Aarõ al, ɗa tit'n Bɨraɓe elɨn non.
Ngisag san deg kɨ Ejipt
12Bɨraɓe el Moij an: El Aarõ: I la kag tɔsɨ loi, i ndan buning kad tel ngisag kam dɔning Ejipt't kɨtaagbe 13Ɗan titbe, Aarõ la jin kɨ kag tɔsɨ lon, ndan buning ad tel ngisag kɨdɔ degt kɨ kɨdɔ dãgt. Buning tube tel ngisag kam dɔning Ejipt't kɨtaagbe. 14Mboolig ɗan set kɨtakul kɨla mboolig lod kɨmund kad teen kɨ ngisag na dumd. Ngisag ĩn dɔ degt kɨ dɔ dãgt. 15Kamla mboolig elɨn Paraõ anan: 'Nten i ngon ji Luwah Kam Paraõ kongkong kɨdɔt, oo dɔ ta lo Moij al tit'n Bɨraɓe elɨn nõ.
Bahkad kõg koosɨg san deg kɨ Ejipt
16Bɨraɓe el Moij an: I ɓai kɨsĩ ritit, aw i ɗà nõ Paraõt, a tee kɨta kaw ta mant. A ela an: Bɨraɓe el an: I nya deg lom ad awɨn kɨtakad ɗan kɨlaɓer admɨn 17Ĩla i nya deg lom ad awɨn al a ne, oo maj m'a m'la bahkad kong koosɨg kɨdɔit kɨ kɨdɔ ɓergt loi kɨ kam kujgt loi. Kujg lo Ejiptiag a ɗoosɨn kɨ bahkad kong koosɨg kɨ dɔningt'n ndɨnt. 18Ndɔt'n non m'a m'nya dɔning Gosen'n deg lom ndɨnt tadang, kad bahkad kong koosɨg int al, kɨtakad i gerɨn mĩ Bɨraɓe mĩ kɨ log tube mbã kɨ dɔningt loi. 19M'a m'gang ɗobnin mbɨna degt lom kɨ deg loi. Nyakɔj'n non a ɗa nya loti.
20Bɨraɓe ɗa titbe, bahkad kõg koosɨg andɨn kam kujt lo Paraõ kɨ kam kujgt lo ɓerg loa kɨ kam dɔning Ejipt kɨtaagbe. Dɔning tuj kɨta bahkad kõg koosɨg.
21Paraõ ad kunɨn Moij kɨ Aarõ, kamla eld an: Awɨn, i jan mosɨ kadkari adɨn Luwah losɨ kam dɔningt 'nten 22Moij el an: Sumba kad kɨ ɗa titbe al, kɨta kadkari'n j'a kɨ ja jad Bɨraɓe Luwah loj ye, i nya kɨyerr kɨ ro Ejiptiagt. Oo ĩla j'a kɨ ja mosɨ kadkari kɨ i nya kɨyerr kɨ ro Ejiptiagt kɨ takumdt a ne, a tɨlajɨn kɨ mbal ale? 23J'a kɨ ndia ndɔ mɨta kam dɨlalot, j'a kɨ ja mosɨ kadkari jad Bɨraɓe Luwah loj, a ndajɨn mbera. 24Paraõ el an: M'a m'nyasɨ mad awɨn, kɨtakad i jan mosɨ kadkari adɨn Bɨraɓe Luwah losɨ kam dɨlalot, na oon maj kad awɨn sãi ngãi al. I kɔn kɨtɔm 25Moij el an: Oo m'a m'tee roit kɨtɨga, m'a m'kɔ Bɨraɓe kad loti bahkad kong koosɨg a awɨn kɔ ro Paraõt kɨ ɓerg loa kɨ deg loa. Ot kad Paraõ goolj na mbet nya deg kad awɨn jan mosɨ kadkari adɨn Bɨraɓe 26Moij tee ro Paraõt kɨtɨga na kɔ Bɨraɓe. 27Bɨraɓe ɗa tit'n Moij kɔ'n ad ɔrr bahkad kong koosɨg kɔ ro Paraõt kɨ ɓerg loa kɨ deg loa, kɨkɨɗa kaa nãi al.
28Kaglot 'nten tɔ Paraõ ɗa dɔngang, nya deg ad awɨn al.
Currently Selected:
Teekɨtɨga 8: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
