Yaɓooda 16
16
Agar ooj Ismael ad Abram
1Sarai, nẽ Abram, ooj ngon ada al, na Sarai aw kɨ ɓer kɨdẽ mad kɨ i Ejiptia, tɔa i Agar. 2Sarai el Abram an: Oo Bɨraɓe ad mĩ kùj dekɨdẽ. M'kɔi kad aw ro ɓert lom, ke maj a, m'a m'ngaa ngon kɨdɨngã kɨɗa kɨtakula wan. Na Abram ndig ta'n Sarai ela. 3Abram hɔlondɨ dɔning Kanat ɓal kɨlah, nõbe la, Sarai, nẽ Abram, ɔrr Agar kɨ Ejiptia, ɓer lon, ad ngawɨn Abram nẽat. 4Abram aw ro Agart, ad ndan sia ngon, na lon Agar ger kad ndan ngon ye, oo ngeen Sarai i nya kɨkid. 5Na Sarai el Abram an: Taj'n tajmɨn 'nten ta i dɔit. Mĩ kɨɓe la m'la ɓer lom jiit ye, na lon ger kad n'ndan ngon a ne, m'tel nya mad al takumat. Kɨ Bɨraɓe gangta mbɨna jit sei. 6Abram tur Sarai an: Oo ɓer loi i jiit, i ɗa sia tit'n kami ndig. Sarai da kum Agar ndo ad ãi aw dɨlalot.
7Malaika lo Bɨraɓe ngah Agar ta mant kɨɓa kam dɨlalot, nderbe kɨ man kɨɓa kɨ kad ɗobt kɨ Sur. 8Na ela an: Agar, ɓer lo Sarai, i ɓai ɗah a? I ndɨ aw ɗah a? Tura an: M'ndɨ m'ãi ngeem Sarai. 9Malaika lo Bɨraɓe ela an: I tel kɨ ro ngeit gog, na i tel roi go tat loa. 10Malaika lo Bɨraɓe ela tɔ an: M'a mad kohi bɨla kɨdɔtdɔt kɨ tɔi, kɨ dum tɨda, a ĩn koosɨg. 11Malaika lo Bɨraɓe ela an: Oo i ndan ngon, ɓet a ooj kɨdɨngã, na a i ndah tɔa Ismael kɨtɔ Bɨraɓe oo dɔ ndɨ nõ loi dan kamkɔlt loi. 12I ro korro je kɨmut de'n non,
a ndoor deg tube, deg tube a ndoorɨn na ho,
A hɔlondɨn kɨ takum ngankõngt tube.
13Agar kun tɔ Bɨraɓe kɨ ngekela ta, an: Ĩ Luwah lom kɨ Ngekoom el an: Rota, nẽbe ɗang la m'ooat kamla oom yo? 14Kɨtɔ 'nten la deg kunɨn ne tɔ buloman'n non, buloman lo Ngekumkajɨr kɨ ngekoom ye. Buloman'n non i mbɨna Kadest kɨ Bered. 15Agar ooj ngon kɨdɨngã ad Abram, na Abram ndah tɔ ngon kɨdɨngã'n Agar ooj ada: Ismael. 16Ɓal Abram i dɔjijoo gidaikɨbojidet lon Agar ooj Ismael ada.
Currently Selected:
Yaɓooda 16: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
