Yaɓooda 20
20
Abraham kɨ Abimelek
1Abraham ɓai lot'n non aw dɔning Negebt, hɔlondɨ mbɨna Kadest kɨ Sur, nõbe ɗe ndɨ ɓebo Gerart. 2Abraham elta dɔ nẽn Sarat an: I kõnanɨm. Na Abimelekt ngar kɨ ɓebo Gerar la ad ɔrrɨn Sara. 3Na Luwah tee kɨ ro Abimelek ndɔ kam niit, ela an: Oo ĩ de kɨ koi kɨtɔ dekɨdẽ'n ɔrra nõ i nẽ de. 4Na Abimelek n'tee kadat al ɓaitɔ ye, ko an: Bɨraɓe, a i tɔl deg kɨkanj ta a? 5Abraham kɨdɔn elɨm an: I konanɨn ale? Sara kaa elɨm an: Ĩ ngonkõn kɨdɨngã ale? Kɨ kam kɨ ro kɨ jim kɨkar nyang la m'ɗan nya 'nten ye, 6Luwah ela ta kam niit an: Mĩ kaa m'ger, kɨ kam kɨ ro la i ɗan nya 'nten ye, na mĩ tɔ la m'ɔgi ɗa majal kɨ ndoorɨm ye. Kɨtɔ 'nten la m'nyain mad ɔda al ye. 7Tajigla i tel kɨ nẽ de'n non ada kɨtɔ i ngekelta kɨ ta Luwaht, a kɔ kɨtɔi, kad i ndɨ kɨ dɔi dõ. Na ĩla i tel sia ada al a ne, oo sumba kad a oi, ĩ kɨ ngékɨɓe loi tube.
8Abimelek ɓai kɨsĩ ritit, kun ɓerg lon tube kɨnat, na ɔrrd hoi nyag'n non tube, ad ɓool kɨbobe ɗa deg'n non. 9Abimelek kun Abraham, na ndɨjea an: Ɗi kɨbe i ɗa sej a? Majal ɗi m'ɗa m'ndoorɨn kad ad majal kɨbobe son dɔmt kɨ dɔ kõɓet lom ho a? I ɗa sem nyag kɨ sumba ɗa kɨ de al. 10Abimelek ndɨje Abraham tɔ an: Ɗi ɔj kamit kad i ɗan nya kɨ titbe a? 11Abraham tur an: M'el kammt m'an: Ɓool Luwah kɨ ngon sĩ be goto lot'n ɗan, a tɔlmɨm kɨtɔ nẽm. 12Rota, i kõnanɨm, i ngon bɔwɨm, i ngon kooj kõm al, na tel nẽm. 13Lon Luwah adɨm m'aw kɨ njam dõ sãi kɨ ɓe lo bɔwɨm ye, m'el Sara m'an: Ɔjɨm kamkẽ 'nten lo kɨɗen'n j'a j'awt a ne, elta lom an: Mĩ ngonkõi kɨdɨngã.
14Abimelek hɔ batg kɨ mangg kɨ ɓerg kɨdɨngã kɨ kɨdẽ ad Abraham, na tel kɨ nẽa Sara ada gog. 15Abimelek el Abraham an: Oo dɔning lom la to nõit ten, i hɔlondɨ lot kɨ kami ndig. 16Na el Sara an: Oo mad ngonkõi kɨdɨngã nar kɨnda dub kɨɗa. 'Nten la a i nyakut dɔ kumi nõ degt tube'n ĩn nat sei, na a ĩ kɨ kɔrrtadɔt nõ degt tube. 17Abraham kɔ Luwah, na Luwah yoot Abimelek kɨ nẽa kɨ ɓerg loa kɨdẽ ad oojɨn ngang. 18Kɨtɔ rota Bɨraɓe ad dekɨdẽg tube kamɓet lo Abimelek telɨn kuj kɨtɔ ta lo Sara kɨ nẽ Abraham.
Currently Selected:
Yaɓooda 20: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
