Yaɓooda 24
24
Ɓer lo Abraham taa dekɨdẽ ad Isaak
1Abraham tel bɨga, ɓala i ngãi, na Bɨraɓe njang dɔa ad maj urra kam nyagt tube. 2Abraham el ɓer lon kɨbo tɔi ɓerg kɨ kam ndogt lo, ngekoogo nyag loa tube, an: I la jii girr bɨngɨmt, 3na nda yo kam tɔ Bɨraɓet, Luwah kɨ Ngedɔrã, Luwah kɨ Ngedɔning, kad a i taa dekɨdẽ ku ngan kɨdẽgt lo Kanag'n m'hɔlondɨ dandt ad ngonɨm al. 4Na a aw dɔningt lom ro noojɨmgt la, a i taa dekɨdẽt ad ngonɨm Isaak ye. 5Ɓer tura an: Maj a ne, dekɨdẽ'n non a ndig ɗe sem nat kam dɔningt'n ɗan al. Sumba kad m'aw kɨ ngoni gog kam dɔningt'n i teet yo o? 6Abraham ela an: Oo go roi maj kad aw kɨ ngonɨm nu al 7Bɨraɓe Luwah Ngedɔrã tee sem kam ɓet lo bɔwɨm kɨ dɔning koojɨm, elɨm ta, na nda yo kɨdɔnt adɨm, an: M'a mad dɔning 'nten kohi ye, ĩ kɨɓe la malaika lon nõit, nu la a i taa dekɨdẽ tit ad ngonɨm ye. 8Ĩla dekɨdẽ'n non ndɨg ɗe sei nat al a ne, a ĩ kɨ kɔrrtadɔt kɨta yon i nda. Na ot tel kaw kɨ ngonɨm gog nu. 9Kamla ɓer la jin girr bing ngeen Abrahamt, na nda yo ada kɨgo tat loa.
10Na ɓer ɔrr lukumg kɨlah ku lukumgt lo ngeen, na aw kɨ nyamajg kɨ dang dang lo ngeen jint. Ɓai so ɗobo, na aw dɔning Mesopotamit ɓebo lo Nakɔr. 11Ad lukumg ndɨn ber gid ɓet kad bulomant lokɨsɔle, dɔkàd kaw kɔd mant lo dekɨdẽg.
12El an: Bɨraɓe Luwah lo ngeem, Abraham, m'kɔi kɨ ad maj urrɨm ɓone, na ɔj kamkẽ ngeem, Abraham 13Oo m'ɗa ta mant kɨɓa, na ngan kɨdẽg lo deg kɨ kam ɓebot a teen kɨta kɔd man. 14Kɨ ngomand'n m'a m'ela m'an: M'kɔi kɨ i usɨ jo kɔd man loi kɨber kad m'ãi man, na a tur an: Ãi na m'a mad lukumg loi ãin tɔ ho a ne, kɨ ngomand'n non la i dekɨdẽ'n i kɔta kɨta ɓer loi Isaak ye. Titbe la m'a m'gerɨn kad ɔj kamkẽ ngeem ye.
15Na ũ tan al ɓaitɔ la, oo Rebeka, ngon kɨdẽ kooj Betuel i ngon Milka kɨdɨngã, Milka ĩ kɨɓe i nẽ Nakɔr, ngonkõ Abraham, Rebeka ɗe kɨ jo lon dɔ bɔgɨnt. 16Ngomand mand kɨdum, i kɨtatahɔrrɨn, dekɨdɨngã mad gera al ɓaitɔ. Ɗisɨ aw ta man kɨɓat, ɔd ɗoosɨ jo lon, na tee. 17Kamla ɓer ãi ngɔd ndɔda, na ela an: M'kɔi kɨ adɨm man kɨ kam jot loi sĩ ad m'ãi. 18Tur an: Ãi ngeem Usɨ jo lon, nda dajint kad ãi. 19Lon ada ãi oi ye, ela an: M'a m'ɔd man mad lukumg loi ho kad ãin mbã asɨd. 20Na mbel man kɨ kam jot lon kanangbe lo kãi man dãgt. Ãi ngɔd aw ta bulomant kɨta kɔd man ɓaitɔ, na ɔd kɨta lukumg tube. 21Ɓer'n non nda kumɨn ɗa ooan gon mbo kad kɨ n'ger ke Bɨraɓe a ad maj urrɨn dɔ ɗent, ke a ad maj urrɨn al a.
22Lon lukumg ãin man asɨd oi ye, dekɨdɨngã'n non un ngon ninga lɔr kɨ kɔia asɨ nusɨ nar, kɨ ninga lɔr joo kɨ kɔid asɨ nar kɨlah kɨta jia. 23Kamla el an: Ĩ ngon nõ a? M'kɔi kɨ elɨm Lo mad i ɓe lo bɔwi nõ kad kɨ tot e? 24Tur an: Mĩ ngon Betuel, ngon Milka kɨdɨngã kɨ Milka ooja ad Nakɔr. 25El tɔ an: Mũ kɨ muro ĩn nõ ngãi rojt kɨ loto ho. 26De'n non ndɨ kɨdɔgojɨn ɔsɨ dɔn kɨber nõ Bɨraɓet, 27el an: Kɔsɨgon kɨ dɔ Bɨraɓet, Luwah lo ngeem Abraham'n nya ta kɔj kamkẽ kɨ nyaɗa kɨ ro ngeem al. Na mĩ, lon mĩ dɔ ɗobt, Bɨraɓe ɔrrɨm kɨ ɓe lo ngankõ ngeem. 28Ngomand ãi ngɔd ɔrr hoi nyag 'nten ngékɨɓe lo kõn. 29Rebeka i kɨ ngonkõn kɨdɨngã, tɔa i Laban, na Laban ãi ngɔd kɨ ro det'n non, kɨ tɨga ta mant kɨɓa. 30Lon oo ngon ninga kɨ ningag ji kõnanɨnt, na oo dɔ tag lo kõnanɨn Rebeka ĩn hã an: De'n non elɨm titbe ye, Laban aw ro det'n non, ndɔda kad lukumgt ta mant kɨɓa, 31na ela an: And, ĩ ngemajkurr lo Bɨraɓe. Kɨtɔɗi i ɗan tɨga a? M'ɗa loto loi kɨ lo kɨta lukumg woi. 32De'n non and kam kujt, na tut nya gid lukumgt, adɨn mũ kɨ muro lukumg, na adɨn man, de'n non kɨ deg'n ĩn nat sia kad tugon nẽ jad. 33Kamla ndan nyasa nõat kad sa, na ɓer lo Abraham el an: M'a m'sanya al mbã kad m'elta lom kamtã. Laban tur an: Elta loi.
34Kamla el an: Mĩ ɓer lo Abraham. 35Bɨraɓe njang dɔ ngeem ad maj urra ngãi, ad tel de kɨbo. Ada batg kɨ mangg kɨ larjã kɨ lɔr kɨ ɓerg kɨdɨngã kɨ kɨdẽ kɨ lukumg kɨ korrog. 36Sara nẽ ngeem, ooj ngon kɨdɨngã dɔ bɨgant ad ngeem, na Abraham ad ngonɨn nyag lon tube. 37Ngeem adɨm m'nda yo, an: A i taa dekɨdẽ ku ngan kɨdẽgt lo Kananag'n m'ndɨ dɔningt lod, ad ngonɨm al. 38I nda yo kad aw ɓe lo bɔwɨm ro noojɨmgt i taa dekɨdẽ ad ngonɨm 39M'el ngeem m'an: Maj a ne, dekɨdẽ'n non a ndig ɗe sem nat al. 40Na elɨm an: Bɨraɓe'n m'ndia nõat ye, a la malaika lon nat sei, a ad maj urri go kawit, na a i taa dekɨdẽ ad ngonɨm ro noojɨmgt kam ɓet lo bɔwɨm. 41A ĩ kɨ kɔrrtadɔt lo yotɨn m'adi i nda, ĩla i tee ro noojɨmgt. Na ĩla adi'n dekɨdẽ al a ne, a ĩ kɨ kɔrrtadɔt lo yotɨn i nda adɨm nõ ho. 42Ɓone lon m'tee ta man kɨɓat 'nten ye, m'el m'an: Bɨraɓe Luwah lo ngeem Abraham, ĩla ad maj urrɨm dɔ ɗemt a ne. 43Oo m'ɗa ta mant kɨɓa. Ngomand'n a tee kɨta kɔd man, na m'a m'ela m'an, m'kɔi kɨ ad m'ãi man kɨ kam jot loi sĩ, 44na a turɨm an: Ãi na m'a m'ɔd kɨta lukumg loi ho a ne, kɨ ngomand'n non la i dekɨdẽ kɨ Bɨraɓe kɔta kɨta ngon ngeem ye. 45Lon m'ndɨ m'elta kammt ɓaitɔ ye, oo, Rebeka tee kɨ jo bɔgɨnt, ɗisɨ kɨ ta mant kɨɓa, na ɔd man. M'ela m'an m'kɔi, adɨm mant m'ãi 46Ɗà kɨdõt, usɨ jo dɔ bɔgɨnt, na elɨm an: Ãi na m'a mad lukumg loi ãin ho. M'ãi, na ad lukumg lom ãin ho. 47M'ndɨjea m'an: Ĩ ngon nõ a? Turɨm an: Mĩ ngon Betuel, ngon kɨdɨngãn Milka ooja ad. Nakɔr m'la ngon ninga kõnat, kɨ ningag jiat. 48Na m'ndɨ kɨ dɔgojm m'ɔsɨ dɔm ningt nõ Bɨraɓet. M'ɔsɨgon Bɨraɓe Luwah lo ngeem Abraham, ĩn ɔrrɨm ta ɗob kɨgoɗobat kad m'taa ngon ngonkõ ngeem mad ngona kɨdɨngã. 49Tajigla, ĩla i ndigɨn hɔ nam kɨ nyaɗakɨro kɨ ngeem a ne, elmɨn. Na ĩla i ndigɨn al a ne, elmɨn ho kad m'tel rom ko kõt ke ko gelt.
50Laban kɨ Betuel turɨn anan: Nya 'nten tee ko ro Bɨraɓet. J'asɨ keli ta mad dɔt al, ke ta kɨmaj ke kɨ majal. 51Oo, Rebeka ndɨ nõit ndɨn una aw sia kad tel nẽ ngon ngei tit'n Bɨraɓe elɨn.
52Lon ɓer lo Abraham oo dɔ tag lod ye, ɔsɨ dɔn ningt nõ Bɨraɓet. 53Na ɓer tee kɨ nya larjãg kɨ nya lɔrg kɨ kubg ad Rebeka, na ad ngonkõa kɨ kõa nyamajg kɨ gatd i ngãi. 54Kamla san na ãin, ĩ kɨ deg'n ĩn nat sia, na ɓin. Loti kɨsĩ, lon ɓain dɔ ɓit ye, ɓer el an: I nyàmɨn ad m'tel kɨ ro ngeemt gog. 55Na kõ ngonkɨdẽ kɨ ngonkõa elɨn anan: Ad ngomand ndɨ sej kaglo sĩ ɓaitɔ, asɨ ndɔ kɨlah, kamla ka aw ye. 56Turd an: Ot kɔgmɨn dɔ kaw kɨta Bɨraɓe ad mbah hɔm maj woi. I nyàmɨn ad m'tel kɨ ro ngeemt gog. 57Turɨn anan: Ad kɨ kun ngomand kad kɨ j'oo ta kɨ taat 58Kamla kunɨn Rebeka, ndɨjena anan: I ndig kaw kɨ de'n ndɨn e? Tur an: M'a m'aw.
59Nyan konand Rebeka kɨ kõa kɨ ngetoa ad awɨn nat kɨ ɓer lo Abraham kɨ deg loa. 60Njangɨn dɔ Rebeka, anan: Kõnanj. Kɨ i bɨla ĩ dubg nja dub kɨlah, na kɨ kohi taa ta ɓe lo ngéndoring. 61Kamla Rebeka kɨ ngamandg lon ɓain, alɨn dɔ lukumgt awɨn, na ndulon go dekɨdɨngã. Ber lo Abraham un Rebeka na aw.
62Ji kàd kudt, Isaak tel ko ta bulomant kɨ Lahairroi, ad i Buloman lo Ngekumkajɨr kɨ Ngekoom, na Isaak ndɨ dɔningt kɨ Negeb. 63Na Isaak tee lokɨsɔle, aw kam ndɔɔt kad kɨ ngah ta. Un kumɨn kɨ dõ, na oo lukumg ndɨ ɗen. 64Rebeka un kumɨn kɨ dõ ho, oo Isaak na ud dɔ lukumt ber. 65El ɓer an: De'n a ndia kam ndɔɔt, a ɗe kɨdɔjt ye, i nõ a? Ber tur an: I ngeem. Kamla Rebeka un kub kutdɔ lon utɨn dɔn. 66Ber ɔrr Isaak hoi nyag tube'n ɗa. 67Kamla Isaak aw kɨ Rebeka kam kujkubt lo kõn Sara, taa Rebeka nẽnt, na tara. Titbe la kam Isaak sɔlɨn go koi kõat ye.
Currently Selected:
Yaɓooda 24: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
