Yaɓooda 31
31
Jakob ãi Laban kɨta kaw dɔning Kanat
1Jakob oo tag lo ngan Laban kɨdɨngã, ĩn elɨn anan: Jakob ɔi nyag lo bɔwj tube, na kɨtakul nyag lo bɔwjd la ngahn nyamajg'n non tube ye. 2Jakob nɔl takum Laban, na oo i tit'n hã a ooan maɗi al. 3Bɨraɓe el Jakob an: I tel kɨgog dɔningt lo bɔwig kɨ ro noojigt, na m'a mĩ sei nat 4Kamla Jakob la go Raselt kɨ Lea kad ɗen gont kam mut ta ɓut nyakult lon. 5Eld an: M'oo kad takum bɔwsɨ i tit'n hã a oomɨn maɗi al, na Luwah lo bɔwɨm i nat sem. 6Ĩn kɨ dɔsɨ, i gerɨn kad m'ɗa kɨla lo bɔwsɨ kɨ tɔgɨm tube, 7na bɔwsɨ goolɨm, mbel gid nyabajim nja kɨlah, na Luwah nyàa ad ɗa sem nya kɨ to al. 8Lon el an: Batg kɨndangg tube a ĩn nyabajii a ne, batg tube a oojɨn ngan kɨndang, na lon el an: Kɨndɔr ɓalg tube a ĩn nyabajii a ne, batg tube a oojɨn ngan kɨndɔr ɓal. 9Luwah ta nyakulg lo bɔwsɨ jiat, na adɨm.
10Kaglot kɨ nyakulg a talɨn na, m'un kumm kɨ dõ, na m'oo kam niit kad bal batg'n ɗa talɨn kõg ye, ĩn kɨndɔr ɓal kɨ kɨndang kɨ kɨndà potpot. 11Malaika lo Luwah elɨm ta kam niit an: Jakob M'tur m'an: Mĩ nẽ. 12El an: Un kumi kɨ dõ, na oo bal bĩãg tube'n ɗa talɨn kõg ĩn kɨndɔr ɓal kɨ kɨndang kɨ kɨndà potpot kɨta m'oo nyag tube'n Laban ndɨ ɗa sei. 13Mĩ Luwah kɨ Betel, lon i mbel yib dɔ dɨngɨr mbalt, na un kɔi kɨ yokɨnda tit adɨm. Tajigla i ɓai, i tee kɔ dɔningt 'nten, na i tel kɨ dɔning koojit gog.
14Rasel kɨ Lea turɨna anan: J'a kɨ gajnya mad ke nyanduba kam kujt lo bɔwj ɓaitɔ ɔ? 15Ooj tit mbahg be ale? Kɨtɔ ndugoj kɔ, na sa nar girrj. 16Nyamajg tube'n Luwah ta ji bɔwjt ĩn loj kɨ nganjg. Tajigla i ɗa nya tube'n Luwah eli.
17Kamla Jakob ɓai nda nganɨn kɨ nẽng dɔ lukumgt. 18Aw kɨ nyakulg lon tube kɨ nyangahg lon tube, ad i nyakulg loa'n ngah Padan Aramt, na so ɗobo kɨ n'aw ro bɔwɨn Isaakt kam dɔning Kanat. 19Lon Laban aw kɨ nja bĩ batg lon ye, Rasel ɓoog yo teerapimg lo bɔwn. 20Jakob gool Laban kɨ Aramia, na ela ta kãin al. 21Ãi kɨ nyag lon tube. Ɓai gang bah, na ɓa tan kɨ dɔning mbalgt kɨ Galaad.
Laban tuɓa go Jakob
22Ndɔt kɨkõmɨta elɨn Laban ta kãi Jakob. 23Laban ɔi ngankõn nat sen, na tuɓa goa asɨ ndɔ tanãimɨta, na ngaha dɔning mbalgt kɨ Galaad. 24Luwah tee kɨ ro Labant kɨ Aramia ndɔ kam niit, ela an: Oo go roi maj kad el Jakob ta mad kɨmaj ke kɨmajal al.
25Laban ndɔd Jakob. Jakob ndah kujkub lon dɔ mbalbot, na Laban kɨ ngankõn ndan lod dɔ mbalbogt kɨ Galaad. 26Kamla Laban el Jakob an: Ɗi kɨɓe i ɗa a? I goolɨm, na ɔi nganɨm kɨdẽ tit i hɔd ta ɗɔɔt be. 27Kɨtɔɗi ãin gid tilt, i goolɨm, na elɨm rota al a? Ni m'a m'dani kɨ ronel kɨ pag, kɨ kɔdg, kɨ kɨndehg. 28I nya adɨm m'ɗa lapia na m'kui nganɨm kɨdɨngã kɨ kɨdẽ kɨ romt al. I ɗa nya 'nten kɨ lo ɓoodt. 29Tɔgɨm asɨ kad m'ɗa sei nya kɨ to, na Luwah lo bɔwi elɨm tagbe ndɔ an: Kɨ m'oo go rom maj kad m'el Jakob ta mad kɨmaj ke kɨmajal al. 30Tajigla i ɓai i so ɗobo woi kɨta ndo koo ɓe lo bɔwi toi ngãi. Na kɨtɔɗi i ɓoogɨn luwahg lom a?
31Jakob tur Laban an: Kɨtɔ ɓool ɗam ad m'oo m'an ɓet a i taam ngani kɨdẽ kɨ lo ngetɔgt. 32De'n a i ngah luwahg loi jiat a ne, de'n non a ndɨ kɨ dɔn dõ al ĩ kɨdɔi i dam nya loi kɨ to romt nõ ngankõjgt na una. Jakob ger ta kad Rasel hã ɓoogd al.
33Laban and kam kujkubt lo Jakob kɨ kɨlo Lea kɨ kɨlo ɓerg kɨdẽ kɨjoo, na ngah nya mad al. Kamla tee kam kujkubt lo Lea, na and kam kujkubt lo Rasel. 34Na Rasel un yo teerapimg, lad girr sird lukumt, ndɨdɔt. Laban mom lo kɨ kam kujkubt tube na ngahd al. 35Rasel el bɔwɨn an: Ot kad ngeem ɗa wong kɨta ɓai'n m'ɓai dõ nõit al, kɨta nya'n a ɗa dekɨdẽg nõ ɗam. Sah ɓaitɔ na ngah yo teerapimg al.
36Kamla Jakob ɓawong, na kɔl kɨ Laban. Jakob tur Laban an: Ndɔ lom i ɗi a? Majal lom kɨ m'ɗa kɨ nõit i ɗi kad i tuɓan gom kɨ rotĩi titbe a? 37Lon i nɔl kam nyag lom kɨ kam kujkubt tube ye, i ngah ɗi loi a? Nya'n i ngah ye, i da kɨ tɨga takum ngankomgt kɨ ngankõig kad gangɨn ta mbɨnajt sei. 38El an: Asɨ ɓal dɔjoo la m'ɗa roit. Kõ batg loi kɨ kõ bĩãg loi tɔrrɨn ngang al, na m'sa bal batg kɨ ɓut't loi al ho. 39M'ɗe kɨ nin nyakulg kɨ dã kɨmut hɔd roit al bat, ĩla i titbe a ne, m'a m'adi kɨ lom goot't. Nya'n deg ɓoogɨn kada ke ndɔ a ne, a i sah romt ad m'bai. 40Kàd ɔsɨm ngãi dan kada, kul õm ngãi ndɔ, na ɓi hɔ kumm al. 41Ɓal dɔjoo la m'ɗa kɨla kam kujt loi ye. M'ɗa kɨla ɓal kɨlah gidaisɔɔ kɨta ngani kɨdẽ kɨjoo, kɨ ɓal kɨbojidet kɨta nyakul loi tɔ, na i mbel gid nyabaji lon nja kɨlah. 42Ni Luwah lo bɔwɨm, Luwah lo Abraham, Kɨkootɓool'n Isaak ɓoola, i nat sem al a ne, ni a i tuɓam ad m'aw jim kari. Luwah oo kõg lom kɨ kɨlaɗa jim, na gangta mbɨnamt sei ndɔ tagbe.
Jakob kɨ Laban unɨn kɔd adɨn na
43Kamla Laban tur Jakob an: Ngan kɨdẽg'n ɗan ĩn nganɨm, ngang kɨdɨngãg'n ɗan kaa ne, ĩn nganɨmg ho, ɓut nyakulg'n ɗan ɗan ĩn ɓutg lom. Na nyag tube'n i ɗa oo ye, ĩn lom. Na ɗi m'ɗa ɓone kɨta nganɨmg, ke kɨta ngang'n oojɨnd a? 44Kɨtɔ 'nten, i ɗe ad kɨ j'un kɔj jadɨna, kad i nyamanaj mbɨnajt. 45Jakob un mbal mad uda ad ɗa dõ kad i pilie.
46Na Jakob el ngankõn an: I kawɨn mbalg kɨnat Ngankõa ɔin mbalg kɨ dɔnat urrɨn duwa, na san nya dɔt. 47Laban ndah tɔa kɨ ta Aramia Jegar Sahudata ad i: Duw Najkɨma, na Jakob ndah tɔa kɨ ta hebre an i Galed. 48Kamla Laban el an: Duw mbal'n ɗan i nyamanaj mbɨnamt sei ɓone. Kɨtɔ 'nten la ndahn ne tɔa Duw Najkɨma ye. 49Na ndahn tɔa Mispa i lo ngomlo tɔ kɨta Laban el an: Kɨ Bɨraɓe nda kumɨn goit ho, kɨ nda kumɨn gomt ho, lon j'a kɨ nyan na. 50Ĩla i da kum nganɨm kɨdẽ ndo, ĩla i taa dekɨdẽ madg kɨɗang go nganɨmt, kaa ne, oo maj de mad hã a i nat sej al, Luwah i ngemanaj mbɨnamt sei. 51Laban el Jakob tɔ an: Oo duw mbal'n ɗan, na oo pilie'n m'ndaa mbɨnajt sei ɗan. 52Duw mbal'n ɗan i nyamanaj, pilie'n ɗan i nyamanaj tɔ kad m'a m'tɔi duw mbal'n ɗan m'aw m'ɗa sei nya kɨ to al. Ĩ tɔ, a i tɔi duw mbal'n ɗan kɨ pilie'n ɗan kad i ɗe romt i ɗa sem nya kɨ to al ho 53Kad Luwah lo Abraham, kɨ Luwah lo Nakɔr, Luwah lo bɔwd gangta mbɨnajt. Jakob nda yo kam tɔ ĩ kɨkootɓool'n bɔwa Isaak ɓoola.
54Jakob la kadkari kɨjakɔ dɔ mbalbot, na kun ngankõn kad san nya. San nya, na ton dɔ mbalbot ndɔ nõ.
Currently Selected:
Yaɓooda 31: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
