JÃ 17
17
Jeju elta kɨ Luwah kɨta ngéndoog lon
1Lon Jeju eltag'n non ye, un kumɨn kɨ dõ el an: Bɔw dɔkàd asɨ woi, ad tɔ ngoni ko kɨtakad ngoni ad tɔi ko tɔ. 2Kɨgo tɔgt'n ada dɔ ngékumkajɨrgt tube, kɨtakad ad kumkajir kɨ mbãkɨnõt deg tube'n ada. 3'Nten la i kumkajir kɨ mbãkɨnõt, kad deg gerɨn ĩ Luwah kɨ ngerota kɨɗabe, kɨ Jeju Krist'n i laa tɔ. 4M'ndɨ mad tɔi ko dɔningt ne, kɨ lo tɔlkon kɨlat'n adɨm kɨ m'ɗa. 5Tajigla Bɔw adɨm tɔko'n m'ndɨn sei nat lon ndahn ne dɔning al ɓaitɔ. 6Deg kɨ adɨmd ko kam degt kɨ dɔningt ye, m'ad'd gerɨn tɔi. Ĩn loi ĩla adɨmd ye, ngomɨn go ta loi tɔ. 7Tajigla gerɨn kad nyag tube'n adɨmd ye ɗen ko roit. 8Kɨtɔ m'ad'd tag kɨ adɨm, ĩn tɔ tan, gerɨn m'tee kokɨroit jeje ad gerɨn kɔikɔi ĩ la i lam ye. 9M'ndɨ m'kɔ kɨtad. M'ndɨ m'kɔ kɨta deg kɨ dɔningt al, na kɨta deg'n adɨmd ĩn loi. 10Nyag loi tube ĩn lom, kɨ loig tɔ ĩn lom, na m'ngaa kɔsɨgon kamdt tɔ. 11M'ndɨ dɔningt gog al ta, na ĩgɨn non ndɨn dɔningt, mĩ tɔ m'ndɨ m'aw roit. Bɔw kɨkunjɗang m'kɔi kɨ i ngom deg'n adɨmd kam tɔit, ad i tɔ'n adɨm, kɨtakad ĩn kɨɗa tit'n jĩn kɨɗa. 12Lon mĩ sed nat ɓaitɔ ye, ĩgɨn adɨmd, m'ngomd kam tɔg tɔit, ad i tɔ'n adɨm; m'ngomd maj ad kɨkɨɗa kudt kaa nuj kɔ al na ngon kɨ ngenujkɔ'n non kɨɗabe tã. Kɨtɔkad tɔlɨn ne ta ta kɨ ndang kam maktubt. 13Na tajigla m'ndɨ m'aw roit, nyag 'nten tɔ m'ndɨ m'el dɔningt kɨtakad deg'n adɨmd ngahn ronel lom kɨ asɨnatap kamdt. 14M'ad'd ta loi, deg kɨ dɔningt tɔ ɔsɨnd ta kɨta ĩn kɨ lo dɔning al, tit'n mĩ lo dɔningt al. 15M'ndɨ m'kɔi kɨ ɔid ku degt kɨ dɔningt kɔ al, na kad i ngom ngemajal dɔdt. 16Ĩn lo dɔning al tit'n mĩn lo dɔning al tɔ. 17I teld kɨjaɓat't kam rotat, ta loi la i rota ye, 18tit'n i lamɨn ku degt kɨ dɔningt ye, titbe tɔ la m'ladɨn ku degt kɨ dɔningt ho ye. 19M'tel rom kɨjaɓat't kɨtatɔd, ĩn kɨɓe kɨ dɔd telɨn rod kɨjaɓat't kam rotat. 20Kɨtɔ ngéndoog lom kɨɗabe hã m'ndɨ m'kɔn al, na kɨta ĩgɨn a taan ta lom kɨta ta lod. 21M'kɔ kɨtakad ĩn tube ĩn kɨɗa tit'n ĩ Bɔw ĩn kamt, mĩ tɔ, mĩ kamit, kad deg kɨ dɔningt gerɨn ne kɔikɔi ĩ la i lam ye. 22M'ad'd tɔko'n adɨm, kɨtakad ĩn kɨɗa tit'n jĩn kɨɗa. 23Mĩ kamdt, ĩ kammt tɔ ho, kɨtakad ĩn kɨkasɨnatap kam kɨɗat, kad deg kɨ dɔningt gerɨn ĩla i lam ye i tard, tit'n i tarmɨn be ho. 24Bɔw, ĩgɨn adɨmd ye m'ndig kɨ ndɨn sem nat lot'n mĩ tit kɨtakad oon tɔko lom'n adɨm kɨta i tarɨm kete lon lan ne girr dɔning al ɓaitɔ. 25Bɔw kɨdenesew, deg kɨ dɔningt gerɨn al, na mĩ m'geri, ngéndoog tɔ gerɨn kad i lam. 26M'ad'd gerɨn tɔi m'a m'ad'd gerɨna tɔ kɨtakad tarɨn i tarɨm i kamdt, mĩ tɔ, kɨ mĩ kamdt.
Currently Selected:
JÃ 17: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
