Lebitik 21
21
Mberkɨndag kɨta ngejanyamosɨ
1Bɨraɓe el Moij an: El ngan Aarõ ngéjanyamosɨ an: Ot kad ngejanyamosɨ yerr kɨ ron kɨtakul nin deg lon 2na noojag kɨ nderbe tã. Ad i kõa, ke bɔwa, ke ngona kɨdɨngã, ke kɨdẽ, ke ngonkõa, 3ke kõnana kɨ taa ngaw al, ĩn ndɨ roat kɨta taa ngaw al. 4A yerr kɨ ron kɨta de kɨɗang al kɨta i ngekɔrrnõ deg lon. A yerr kɨ ron al. 5Ngéjanyamosɨ a ngɨsen dɔd al, a jan ta mbaitad tomtom al, a jan ndɨja rodt al tɔ. 6A ĩn kɨjaɓat kɨta Luwah lod, a yerrɨn kɨ tɔ Luwah lod al, kɨta ĩla ĩn ngela kadkarig kɨ lahort kad Bɨraɓe, nyasa lo Luwah lod. A ĩn kɨjaɓat. 7A taan kaya dekɨdẽ nẽdt al, ke dekɨdẽ kɨyerrɨn sia, ke dekɨdẽ kɨ ngawa tuɓaa kɔ, kɨta ngejanyamosɨ i kɨjaɓat kɨta Luwah loa. 8A i oo ngejanyamosɨ tit de kɨjaɓat kɨta ĩla ad nyasa Luwah loi, a i kɨjaɓat kɨtatɔi kɨta mĩ kɨ kunjɗang, mĩ Bɨraɓe ngendasɨ tadang. 9Ĩla ngon ngejanyamosɨ kɨdẽ nuj ron kɨ kaya kɨ ɗa a ne, bɔwa tɔ nuj, na a lan ngon kɨdẽ horro.
Mberkɨnda kɨta bɨra ngejanyamosɨ kadkari
10Bɨra ngejanyamosɨ ku ngankõngt'n wurɨna kɨ yib kurdɔt, in ndahna kɔtkokɨɗa kad la kub kɨjaɓat a ul bisɨdɔn al, a til kub lon al tɔ. 11A aw dɔ nint mad al, ke nin bɔwa ke kõa, na ɓeta tel kɨyerr. 12Kaglo kɨla loa a tee kam lot kɨjaɓat kɨtɨga al, a yerr kɨ lo kɨjaɓat lo Luwah lon al kɨta yib kurdɔt lo Luwah loa i jɔg kɔsɨgon dɔat. Mĩ Bɨraɓe. 13A taa dekɨdẽ kɨmand kɨ ger dekɨdɨngã kete al. 14A taa dekɨdẽ kɨ ngengawkoi al, ke kɨ tuɓa kɔ, ke kɨ tuj, ke kaya dekɨdẽ, na a taa dekɨdẽ kɨmand kɨ ger ngaw kete al ku degt lon, 15kɨtakad nuj kohn ku degt lon al kɨta mĩ Bɨraɓe la m'ndaa kɔtkokɨɗa ye.
Nyag kɨ a ɔg de ɗa kɨla janyamosɨ
16Bɨraɓe el Moij an: 17El Aarõ an: Dekɨɗen ku ngakait'n nya mad ɗaa a aw la kadkari nyasa ad Luwah lon al, ngakat kɨ ngaka. 18Dekɨɗen nya mad ɗaa, a ndɔt nderbe al, ad i mundo ke de kɨ moot, ke kɨ takuma tuj, ke ngon roa mad majal. 19Ke de'n njaa ke jia teet. 20Ke de'n gida gokɨ, ke de kɨgɔj, ke kɔrkuma ɓa, ke ngɔkɨ saa ke ngorwoi, ke kɔrrndoma tɔ. 21Dekɨɗen kɨ girrkooj Aarõ ngejanyamosɨ'n nya mad ɗaa a ndɔt nderbe kɨta la kadkari kɨlahorrt kad Bɨraɓe al kɨtɔ gida gɔkɨ. A ndɔt nderbe kɨta la nyasa lo Luwah lon al. 22A asɨ sanya lo Luwah, ad i nyag kɨjaɓat kɨtɔitɔi kɨ nyag kɨjaɓat, 23na a aw nderbe kad kubganglot al, a aw kad dɨngɨrt al tɔ kɨta nya mad ɗaa. A yerr kɨ log lom kɨjaɓat al kɨta mĩ Bɨraɓe la mĩ ngendad tadang. 24Titbe la Moij elɨn Aarõ kɨ ngana kɨ Israelag tube ye.
Currently Selected:
Lebitik 21: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.