Dakɔr deg 3
3
Dan kɔr ngan Lebig
1Tɔ deg 'nten la in ngaka Aarõ kɨ Moij kaglot'n Bɨraɓe elɨn ta kɨ Moij dɔ mbalbo Sinait.
2Ngan Aarõ la tɔd ten: Nadab ngon der, Abihu, Eleajar kɨ Itamar. 3Tɔ deg 'nten la in tɔ ngan Aarõ, ngéjanyamosɨ ye. 4Nadab kɨ Abihu oin nõ Bɨraɓet lon unɨn horr kɨɗang ɗen ne nõ Bɨraɓet kam dɨlalot kɨ Sinai, na oojɨn ngang al, Na Eleajar kɨ Itamar ɗan kɨla janyamosɨ nõ bɔwd Aarõt lon ndɨn kɨ dɔn dõ ɓaitɔ.
Ta lo girrkooj Lebi
5Bɨraɓe elta kɨ Moij an: 6Ad girr Lebi ndɔt nderbe na i ndaa nõ Aarõt ngejanyamosɨ kɨtakad ɗan kɨlaɓer adɨna. 7A ɗan kɨlaɓer adɨna kɨ kɨlo ngékawna titbe tɔ nõ kujkub ndɔdnat kɨ nyag tube kɨ lan ji Israelagt kɨ oon go. A ɗan kɨlaɓer kam kujkub londɨt. 8A ɗan kɨla koogo nyaɗakɨlag kɨ kujkub ndɔdnat tube kɨ nyag tube kɨ ji Israelagt. A ɗan kɨlaɓer kam kujkub londɨt. 9A ad Lebiag ji Aarõt kɨ nganɨn kɨta ɔrrɨnd ku Israelagt adɨna kɨnõt. 10A i nda Aarõ kɨ nganɨn kad oon go kɨla janyamosɨ lod na mbah mad'n a ndɔt kɨ lot'n non a ne, i tɔlɨna kɔ.
11Bɨraɓe elta kɨ Moij an: 12Oo, m'ɔi Lebiag ku Israelagt got ngandergt tube ku Israelagt'n teen kamkõt dasa na Lebiag a in lom 13kɨta nganderg tube in lom. Ndɔ'n m'tɔlɨn nganderg tube kam dɔning Ejipt't, m'ɔrr nganderg tube kam Israelt m'ndad tadang kɨta kɨlaɓer lom, la girra dɔ ngander degt mbã ngander dãg. A ĩn lom, mĩ la mĩ Bɨraɓe ye.
Ngan Lebi kɨ kɨla lod
14Bɨraɓe elta kɨ Moij kam dɨlalot kɨ Sinai an: 15I tɨda kɔr Lebiag kɨgo girrdt kɨ kɨgo girrkooj lo bɔwdg. A i tɨda kɔr dekɨdɨngãg tube, la girra dɔ ngangt kɨ nah kɨɗa. 16Moij tɨda kɔrd kɨgo mberkɨndat lo Bɨraɓe, na ɗa kɨgo tat'n Bɨraɓe ela.
17Tɔ ngan Lebi kɨdɨngã laten: Gerson, Kehat kɨ Merari. 18Oo, tɔ ngan Gerson kɨgo girrkoojdt laten: Libni kɨ Simei. 19Oo, ngan Kehat kɨgo girrkoojdt laten: Amram, Jisar, Hebrõ kɨ Ujiel, 20na ngan Merari kɨgo girrkoojdt: Makli kɨ Musi. Ĩgɨn non la in ngaka Lebi kɨgo girrkoojdt.
21Ko ro Gersont la girrkooj Libniag kɨ girrkooj Simeiag teent. Ĩgɨn non la in girrkooj Gersoniag ye. 22Ĩgɨn tɨdand, lan girra dɔ ngangt kɨ nah kɨɗa mbã kɨ dekɨdɨngãg tube, kɔrd i 7 500. 23Girrkooj Gersoniag hɔn londɨ gid kujkub londɨt ko lokudkàdt. 24Bɨrabɔw lo girrkooj Gersoniag i Eliajap ngon Lael. 25Gersoniag ĩn ngékoogo kujkub londɨ, kujkub, nyakutdɔ kɨ kub kut tabit kujkub ndɔdna. 26Kub ganglo kɨ natlot kɨ kub kut tabit natlo'n gug dɔ kujkub londɨ kɨ dɨngɨr kɨ kɨlag loa, kɨlaɓer lo nyag'n non tube.
27Ko ro Kehat't la girrkooj Amramiag, girrkooj Jisariag, girrkooj Hebrõiag kɨ girrkooj Ujielag teent. Ĩgɨn non la in girrkooj Kehatiag ye. 28Ĩgɨn tɨdand, lan girra dɔ ngangt kɨ nah kɨɗa mbã kɨ dekɨdɨngãg tube, kɔrd i 8 600. Ĩgɨn non la in ngékoogo nyag kɨ kam lot kɨjaɓat. 29Girrkooj Kehatiag hɔn londɨ kad kujkub londɨt dɔɔ. 30Bɨrabɔw lo girrkooj Kehatiag i Elisapan ngon Ujiel. 31I ngekoogo sund, kɨ tabɨl, kɨ lamba, kɨ dɨngɨrg, kɨ nyaɗakɨlag lot kɨjaɓat'n ngéjanyamosɨ ɗan ne kɨla. Titbe tɔ kub ganglo kɨ nyaɗakɨlag tube. 32Eleajar ngon Aarõ, ngejanyamosɨ i kɨbo dɔ bɨradɔgt lo Lebiag. I ngekoogo ngeɗakɨla kam lot kɨjaɓat.
33Ko ro Merarit la girrkooj lo Makli kɨ Musi teent. Ĩgɨn non la in girrkooj lo Merariag ye. 34Ĩgɨn tɨdand, lan girra dɔ ngangt kɨ nah kɨɗa mbã kɨ dekɨdɨngãg tube, kɔrd i 6 200. 35Bɨrabɔw lo girrkooj Merariag i Suriel ngon Abihail. Hɔn londɨ kad kujkub londɨt ko dɔɔ. 36Nyag'n lan ji Merariagt kad ngomɨn na kɨ oon go laten: Barkagg lo kujkub londɨ, kagg kɨ ngal kɨ pilieg loa kɨ nyahɔdg kɨ nyaɗakɨlaag tube. 37Pilieg tube kɨ gug dɔ natlo kɨ nyahɔdg kɨ kagg kɨ tɔ dɔ kɨla tit kɨ kɨllag lod.
38Moij kɨ Aarõ kɨ nganɨn hɔn londɨt nõ kujkub londɨ kɔ loɓakàdt nõ kujkub ndɔdnat ko loɓakàd. In ngékoogo kɨla kam lot kɨjaɓat ɓakumta Israelag, na ĩla de mad kɨɗang ndɔt nderbe a ne, a tɔlɨna kɔ.
39Lebiag tube'n Moij kɨ Aarõ tɨdand kɨgo mberkɨndat lo Bɨraɓe kɨgo girrkoojdt, lan girra dɔ ngangt kɨ nah kɨɗa mbã kɨ dekɨdɨngãg tube, kɔrd i 22 000.
Ɔrrɨn Lebiag adɨn Bɨraɓe
40Bɨraɓe el Moij an: I tɨda kɔr nganderg kɨdɨngã ku Israelagt tube i la girra dɔ ngangt kɨ nah kɨɗa mbã dekɨdɨngãg tube na i tɨdad kɨ tɔd. 41Ɔrr Lebiag kɨtɔm, mĩ Bɨraɓe, gan goot nganderg lo Israelag tube, na nyakulg lo Lebiag gan goot ngander nyakulg lo Israelag ho. 42Moij tɨda kɔr nganderg tube ku Israelagt tit'n Bɨraɓe ndan mbera, 43Nganderg kɨdɨngã'n tɨdad tube kɨ tɔd, la girra dɔ ngangt kɨ nah kɨɗa mbã dekɨdɨngãg tube, kɔrd i 22 273.
44Bɨraɓe elta kɨ Moij an: 45Ɔrr Lebiag tadang gan goot nganderg lo Israelag, kɨ nyakulg lo Lebiag gan goot nyakulg lod, na Lebiag a ĩn lom, mĩ Bɨraɓe, 46kɨta ban dɔ ngander Israelag'n kɔrd i 273 tɔi Lebiag. 47A ɔi nar mi sumba dɔ dekɨɗen, A ɔi kɨgo nart kɨ kam lot kɨjaɓat, nar kɨɗa asɨ gera dɔjoo. 48A ad nar'n non Aarõ kɨ nganag, nar badɔ kɨta ĩgɨn kɔrd tɔi kɔr Lebiag. 49Titbe Moij ta nar hɔdɔ kɨta deg 273, nganderg kɨdɨngã lo Israelag'n kɔrd tɔi Lebiag, 50Moij ta nar lo nganderg lo Israelag nar 1 365 kɨgo nart kɨ kam lot kɨjaɓat, 51kamla Moij ad nar badɔn non Aarõ kɨ ngana kɨgo mberkɨndat lo Bɨraɓe tit'n Bɨraɓe ndan mbera Moij ye.
Currently Selected:
Dakɔr deg 3: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.