Dakɔr deg Takɨdɔt
Takɨdɔt
Kam maktub dakɔr degt ye, i kɨ dakɔr ngan Israelg nja ngãi, nya 'nten la ndahn ne tɔ maktub 'nten: dakɔr deg ye.
Hoitag'n kɨ ngah kam maktub 'nten elj nya'n tee dɔ ngan Israelg lon in ne kam dɨlalot kɨ Sinai. Ɓain kam dɔningt'n non. Dkr 10:11, awɨn mbã teen dɔning kunkɔt'n Luwah un kɔn ad'd. Awɨn mbã teen dɨlalot kɨ Parã, kɨ dɨlalo kɨ ko dɔɔ lo Kana. Ta kɨdɔboit'n kɨ ngah kam maktub Dakɔrdegt ye, nyag'n ɗan nya kamt i hollot kɨ Moab kad bah Jurdẽt, kad ɓet kɨ Jeriko (Dkr 36:13).
Maktub Dakɔrdeg daj log kɨ dang dang nyag ɗan nya tit:
Israel i kam dɨlalot kɨ Sinait Dkr 1:1-10.
Lon ngan Israel ɓain Sinait awɨn mbã teen lot kɨ Moab (Dkr 10:11—21:35).
Israelg i kam hollot kɨ Moab (Dkr 22:2—36:13).
Ngan Israel ɗan go rod kɨ ɓutɓut, na girr ka deg lo Lebi ɗan kɨla janyamosɨ dan ngan Israelgt. Lon ngan Israelg ɓain mbal Sinait, nyur ngutngut kɨ ndoor i dandt. Maktub Dakɔrdeg ɔj'j kad dɨlalo i lo kɨ nya nág ngãi teen dɔ ngan Israelgt. Ad gaan kamdt kad'n telɨn gog dɔning Ejipt't, kɨta ji ndid i soot ngãi tɔi ndɨd kam dɨlalot. Nyurɨn dɔ Moijt kɨ Aarõ in hã in kɨbog lod. Ɓoolɨn nyag kɨ a ɗe nõdt. Ndigɨn kad n'an san'n ndanɨn titɨn n'sa ne kam dɔning Ejipt't non (Dkr 11:1-35), na mbetɨn kand kam dɔning Kanat (Dkr 14:1-45). Ngan Israel ɓadɨn dɔ kɔjtaɗagt kɨmaj lo Luwah kɨta nyag'n ɔj kɨtatɔa. Kɨtɔ nya 'nten Luwah ad ngan Israelg ndian kam dɨlalot ɓal 40. Na ndeg deg tube teen dɔning Ejipt't ye oin. Kɨkɨɗa kudt ke Moij kaa a and kam dɔning Kanat al.
Maktub Dakɔrdeg elj ta dɔ go ɗobt kɨ titbãi deg kɨ kij gan koot ngékɨkete kad ɗan ne kɨla (Dkr 26:1-65). Bɔwdg a andɨn kam dɔningt'n non al. Ta kɨ dɔboit maktub dakɔrdeg elta dan ɗob kɨ titbãi ngan Israelg a andɨn ne kam dɔning kunkɔt. Jojue un koot Moij, na Luwah ada mberkɨndag dɔ kãi lot kad ngan Israelg kɨ girr koojg lod.
Tit maktub Teekɨtɨga kɨ Lebitik, maktub Dakɔrdeg elta dɔ nyat joo kɨ ndaa tot kɨta girrdeg lo Luwah. Mbɨna Israelg kɨ girrdeg kɨ dang dang. Ngan Israel maj kad ndan rod nat kɨ girrdeg kɨ dang dang kam taa nat al. Ke neni Moij taan dekɨdẽ kɨ n'bah kaa ne (Dkr 12:1-16), ke Luwah la kɨ ngekelta kɨ mbah tit Balam kad kɨ njang dɔ ngan Israelg kaa ne (Dkr 22:24), nyag ngãibe'n ndɨ dan nya kam ndɔgt kɨ ɓone tit nyag'n ɗan nya kaglot lo ngan Israelg maɗi kam dɨlalot. Nya 'nten la maktub Dakɔrdeg maja tot kɨtaj ɓola kɨta deg tube'n ndɨ dan maktub 'nten.
Gaj maktub lo Dakɔrdeg Lon ngan Israelg in kam dɨlalot.
Currently Selected:
Dakɔr deg Takɨdɔt: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.