Qneepah 1
1
Sndhegan Bgihur Utux
1Teopilos, wada mu spatis plaale patis we kika quri kana pnrdingan qneepah ma tnugesa Yesu, 2betaq pnooda na beyax Bgihur Utux de hmiti rmengo gneegan na skgulan, bobo na de dehuk ali wada ngalan baro. 3Bobo mnoda mqraqil ka Yesu, spooda na egu bale pnugkela ma mtqita snkgulan na gaga muudus ka heya. Wada 40 ali qnbsiyaq mtqita dheya ma rmengo quri qnlhangan Utux Baro. 4Kiya de msuupu dheya msseli ka Yesu, dmurun bale dheya: “Iya latac Yerusalem. Tara ka sntangan tama, kiya ka wada namu bhangan rnengo mu, 5Yohane we qsiya ka sptgaya na smino. Kiya ka uxe mppiya ali de, mooda namu ptgaya psino Bgihur Utux ka yamu.”
Desun baro ka Yesu
6Msseli ka snkgulan na ciida, smiling Yesu: “Bukung, pdaun su pstutuy saya ka qnlhangan Israel ho?” 7Rmengo dheya ka Yesu: “Mnoda pusu beyax Tama nanak sneengan na ka ali ma, ciida we uka namu klaan mkela. 8Kiya ka meyah heyi namu ka Bgihur Utux de maangal namu beyax, mpgkela namu yaku meniq Yerusalem, kana Yudaya, Samareia ma betaq puting dxeral.” 9Rmnengo kari nii ka Yesu, ida gaga mita ka dheya ciida, wada desun baro ka heya. Niqan 1 ka plabu wada madis heya peeyah berah daha. 10Mosa baro ka Yesu, tgleus qmita baro ka dheya ciida. Asi lux mheyu ssiyo daha ka 2 seediq mlukus lukus bhege, 11rmengo: “Seediq Galil, ma namu mheyu qmita baro ha? Smwaye yamu wada ngalun baro ka Yesu nii ge, huwa mesa ntaan namu wada baro ka heya we mpntena nii meyah dungal.”
Seediq Lmutuc Qpahun Yehudah
12Niqan 1 dgiyaq, ngayan na we dgiyaq Curung. Smdaling Yerusalem. Niqan kingal ali sngayan kksaan ka knthyaan na. Peeyah hiya mbrinah mosa Yerusalem ka tnugsaan na. 13Mremux alang ka dheya, kiya de mosa nniqan daha truma mtgbaro. Gaga meniq hiya we Petros, Yohane, Yakobu, Andreas, Pilipos, Tomas, Bartolomay, Matay, Yakobu laqi na Alhuay, Simon pnspuwan mpgaalu alang ma Yehudah laqi Yakobu. 14Kana dheya nii we msuupu mmqedil, Maria bubu Yesu ma mtswai Yesu, mskingal ba lnglungan daha dmurun.
15Ciida, ya ba so 1'20 seediq knhbaro ka seediq msseli. Mheyu peeyah ckceka kana mtswai ka Petros ma rmengo: 16“Mtswai, asi ka ptuura ka Kari Utux Baro. Ga spatis ckceka Kari Utux Baro hiya, Bgihur Utux we spooda na quwaq Dawid pgeela kari mesa dmnudul seediq meyah qmerac Yesu ge Yehudah. 17Ado heya we nkingal snpegan dyami ma, qpahun so nii we pniqan 1 nheya. 18Seediq nii we snadu nangal na qnnaqah qneepah ka sbaruy na 1 dxeral. Bobo na de mtakur ka seediq nii, mperuq nbuyas na ma asi criyu kana iraq na mhuqil. 19Mkela noda nii ka kana seediq mneniq Yerusalem. Kiya ka saangal daha kari daha hiya Adeldamax kesun daha tmngayan ka dxeral nii. Kiya de ‘Dxeral dara’ mesa.” 20Ado mnatis ka patis uyas:
“Pryuxi tadus ka ga na niqan.
Kuuka seediq ka meniq ckceka na.”
Kiya uri ma:
“Pngali taxa seediq ka qpahun na.”
21-22Maanu so kiya de mnsuupu meniq ckceka ta ciida ka Yesu Bukung, kiya ka peeyah pnrdingan ptgaya smino ka Yohane ma, betaq mswaye ita wada desun baro ali ciida ka Yesu ge, so ka seediq tnqene menan klaali we, asi ka pheyu ta 1 msuupu menan pgkela quri kndesan Yesu muudus peeyah hnqilan. 23Kiya de gmao 2 seediq ka dheya. Kiya ka Barsabbas, ngayan na dungal we Yosehu Yostos kesun. Taxa de Mattias. 24Kiya de dmurun ka dheya: “Bukung! Mkela su lnglungan kana seediq ka isu. Braho su bale tgsai nami hiya, ima ka gneegan su ckceka 2 seediq nii, 25kiya ka maha mangal qpahun ngayan snkgulan. Ngayan nii we wada sqada Yehudah duma mquri oosa nniqun na nanak ka heya da.” 26Kiya de spooda daha blebil qreti ma mnetun Mattias. Heya we suumal daha 11 snkgulan.
Currently Selected:
Qneepah 1: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
