Lntadan 2

Pnttingan Moseh

1Niqan 1 ka tnsapah seediq Lewiy, msterung 1 weewa Lewiy. 2Mchedil ka weewa kiya ma, mtuting 1 laqi rseno. Taan na malu ba taan de, liingun na betaq 3 idas. 3Bobo na de betaq uka na lliingan de, mosa mangal rawa tninun bsiyo, gleqan na abura krutang ma geluq qhuni de, psaun na ckceka rawa hiya ka laqi. Psaun na ssiyo yayung Yeor ckceka brhibuh. 4Qbsuran na mqedil we smtheya mheyu, kklaun na teta gaga hmuwa.

5Weewa Paroh we meyah trima ssiyo yayung Yeor. Ga mkkesa ssiyo yayung ka dmqedil tnqliyan na. Taan daha ka rawa gaga ckceka brhibuh de, smkagul kingal tnqliyan na mosa mangal rawa kiya. 6Rwahan na ka rawa de, taan na ka laqi kiya. Tai, gisu lmingis ka laqi, kiya de sgaalu na ka heya de, rmengo: “Laqi seediq Hiburu ka nii.” 7Rmengo weewa Paroh nii ka qbsuran laqi: “Saane mu mlawa 1 mqedil Hiburu mpnunuh laqi nii ho?” 8Rmengo laqi mqedil nii ka weewa Paroh: “Un, Osa!” Laqi mqedil nii we asi osa mlawa bubu laqi nii. 9Rmengo laqi mqedil nii ka weewa Paroh: “Adis heya ka laqi nii, tqlii ku hiya, biqun su mu pila ka tnqliyan su.” Kika mqedil kiya de desun na ka laqi ma dngaun na. 10Bobo wada paru ka laqi nii de, desun na weewa Paroh hiya ma, mplaqi na. Moseh kesun na tmngayan ka laqi nii. Rmengo: “Ado bnlebil mu peeyah ckceka qsiya ka heya.”

Mosa Qduriq Midyan ka Moseh

11Wada ka so duma ali, paru ka Moseh di. Mosa dseediq na hiya ka heya ma, taan na gisu daha pqrqilan pqeepah ka dheya. Taan na 1 seediq Micrayim gisu beebu seediq Hiburu. 12Qmita ssiyo ka Moseh, taan na uka seediq de, phqilun na ka seediq Micrayim nii di ma, reesun na ckceka bnaquy ka bqerus na. 13So kusun, mosa nganguc ka heya. Tai, gisu mtgdiyal ka 2 dseediq Hiburu. Rngagan na ka 1 seediq naqah bale: “Hmuwa su, ma su tmraqil duita nanak ha?” 14Rmengo ka seediq kiya: “Ima ka pnheyu isu mpqbsuran nami ma so mpsgao ho? Ya su mphuqil yaku, mntena so phuqil su seediq Micrayim kiya ho?” Miicu ka Moseh de, rmengo: “Noda mu nii we gaga klaun seediq di.” 15Mbahang so nii ka Paroh de migin pphuqil Moseh. Moseh de asi qduriq peeyah Paroh ka heya mosa dxeral Midyan ma, tleung ssiyo hghugan bubul qsiya.

16Niqan 7 weewa ka msapuh Midyan. Dweewa nii we meyah bubul qsiya. Stenge ka asu na qsiya de ppiimah miric tama daha. 17Meyah ka duma mtabu miric, meyah lmiwaq dheya. Moseh de meyah dmayo dheya ma, mosa bubul qsiya piimah qsiya miric daha. 18Mbrinah meyah Reuel tama daha hiya ka dheya. Mesa ka heya: “Ma namu ini beyo meyah ka ali saya ho?” 19Rmengo ka dheya: “Niqan 1 seediq Micrayim wada dmayo menan pqduriq dseediq tmabu miric. Kiya uri ma mnosa bubul qsiya piimah qsiya miric nami.” 20Rmengo weewa na ka heya: “Gaga inu ka heya? Ma namu lixan ka heya da ho? Sai mlawa ma qdali ido han!” 21Smruwa msuupu meniq hiya ka Moseh. Seediq kiya de pstrengun na Moseh ka Ciporah weewa na. 22Mtuting 1 laqi rseno ka Ciporah. Gersom kesun na tmngayan, ado rmengo ka heya: “Gisu ku tnooda alang icil ka yaku.”

23Wada ka egu hari knkawas, wada mhuqil ka qbsuran paru Micrayim di. Dseediq Israel we ado mqraqil bnqerus daha meepah de, smdaring pshengak pnqraqil daha ka dheya. Rengac daha we pneyah mbqerus pnqraqil we betaq Utux Baro. 24Mbahang rengac daha ka Utux Baro de lnglungun na ka pnsdhegan daha Abraham, Yijxaq ma, Yakobu. 25Qmlahang seediq Israel ka Utux Baro, mkela ka Utux Baro.

Currently Selected:

Lntadan 2: Stgdaya

Highlight

Copy