Lntadan 24
24
Dara Pnsdehu
1Rmengo Moseh ka Utux Tmninun: “Isu ma Aharon, Nadab, Abihu ma, 70 ddrudan ckceka seediq Israel we, eyah Utux Tmninun hini kana ma, stheya thmuku kenan. 2Wano Moseh ka mtduwa meyah smdaling Utux Tmninun. Kana daha de ini tduwa meyah smdaling. Kana dseediq uri we ini tduwa theyaq heya meyah uri.”
3Hmeruc peeyah dgiyaq ka Moseh, mquri kana seediq ma, tmgesa kana kari pnosa ma gaya bneku Utux Tmninun. Msuupu rmengo ka kana seediq: “Kana tnugesa Utux Tmninun we, ida nami pyugun.” 4Kiya de Moseh we spatis na kana ka kari pnosa Utux Tmninun.
Mtutuy mgrebu ba ka heya, mosa smalu 1 spuhan ssiyo dgiyaq. Spooda na 12 pusu rudan dseediq Israel ma pheyu 12 eruc btunux. 5Heya we smkagul drriso Israel mosa smapuh. Kiya uri we phuqil dapa mbege smapuh ptbale Utux Tmninun. 6Moseh we dkaun na ka dara, dmeka na we psaun na rusuq. Dara dmeka we scuyuq na bobo spuhan. 7Bobo na de, maangal patis gaya ka heya ma, smepu ma pqbahang dseediq Israel. Rmengo ka dheya: “Kana tnugesa Utux Tmninun we, ida nami pyugun ma bhangun nami.” 8Kiya de Moseh we scuyuq na heyi dseediq ka dara. Rmengo: “Tai! Dara pnsdhegan ka nii, kiya ka pnskraya pnsdhegan namu pnuyu kari pnosa Utux Tmninun.”
9Moseh, Aharon, Nadab, Abihu ma, 70 ddrudan mpdudul Israel we, mosa dgiyaq kana. 10Qmnita Utux Baro nuIsrael ka dheya da. Truma papak na we mntena snpagan btunux qrari so karac qtaan. 11Ini karo baga na meniq heyi dmdudul seediq Israel ka heya. Dheya de mita Utux Baro, mekan ma miimah.
Meniq dgiyaq Sinay ka Moseh
12Rmengo Moseh ka Utux Tmninun: “Eyah dgiyaq yaku hini ka isu. Meniq su hiya, mbege ku btunux. Kiya ka btunux pnatis mu gaya ma gaya pndakar mu yamu. So su tduwa tmgesa dheya.” 13Mtutuy ka Moseh ma Yehosua mdayo heya. Mosa dgiyaq Utux Baro ka heya. 14Rmengo ddrudan mdudul ka Moseh: “Yamu we tara yami hini. Betaq miyan meyah yamu hini dungal. Tai, mptheyaq yamu ka Aharon ma Xur. Ima ka niqan pprngagun namu we, tduwa namu mosa migin dheya.”
15Mosa dgiyaq ka Moseh, niqan ka plabu muubung dgiyaq. 16Knledax Utux Tmninun we meniq dgiyaq Sinay. Mk6 ali muubung dgiyaq ka plabu. Mk7 ali de mlawa Moseh peeyah ckceka plabu ka heya. 17Knledax Utux Tmninun we meniq bobo dgiyaq. Hnyegan na we mntena so puniq meekan seediq meniq berah doriq dseediq Israel. 18Mosa mremux ckceka plabu ka Moseh, 40 diyan ma rabi nniqan na dgiyaq hiya.
Currently Selected:
Lntadan 24: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
