Smnlean 21
21
Pnttingan Yijxaq
1Utux Tmninun we muyu kari rnengo na qmlahang Sarah. Utux Tmninun we wada na daun ka sntangan na Sarah. 2Rudan ka Abraham, dehuk ka ali sndhegan rnengo Utux Baro ciida, mchedil ka Sarah ma tmlaqi 1 laqi rseno ka heya. 3Abraham we Yijxaq kesun na tmngayan ka laqi pntingan Sarah. 4Bobo 8 ali pntingan na de, Abraham we muyu tnugesa Utux Baro, daan na psalak ka Yijxaq. 5Mtuting ka Yijxaq ciida we 1'00 knkawas na ka Abraham. 6Rmengo ka Sarah: “Wada psqaras phulis kenan ka Utux Baro. Kana mnbahang we mpsuupu kenan mqaras mhulis.” 7Rmengo dungal: “Ima ka mptduwa mplaale rmengo Abraham, Sarah we mpnunuh laqi ho? Ado knrudan ba heya ciida we, tmlaqi ku kingal laqi na rseno.”
8Kmdudul mdakil ka laqi de, malix mnunuh da. Malix mnunuh ali ciida ka Yijxaq, Abraham we pure uqan malu ba ka heya.
Lwaqun Smkagul ka Hagar ma Yismael
9Ciida, Sarah we taan na laqi Hagar seediq Micrayim daha Abraham we mpreno Yijxaq. 10Kiya de rmengo Abraham: “Isu we posa nganguc ka tnqliyan mqedil nii ma laqi na! Ado laqi tnqliyan mqedil nii we uxe mpsuupu Yijxaq laqi mu mangal pusu dnoi tnsapah.” 11Abraham we mslhebun bale quri oda nii. Ado mquri laqi na ka kiya. 12Rmengo Abraham ka Utux Baro: “Iya pslhebun quri laqi nii ma mqedil tnqliyan su. Kari rnengo su na Sarah we puyuy kana. Ado pnttingan pneyah Yijxaq we, kiya ka mplaqi ltlutuc su. 13Quri so laqi na tnqliyan su mqedil we, pdngusun mu 1 paru qnlhangan ka heya. Ado heya we laqi ltlutuc su ka heya.”
14Mtutuy mgrebu ka Abraham ge, mangal pang ma 1 lubuy qraqil qsiya, sbege na Hagar, sdngiun na ahing na ma wada na hadun ka heya ma laqi. Wada ka Hagar da. Kiya de, mtnooda meniq Beerseba tadus brenux ka heya. 15Wada daha qhdean ka qsiya ga lubuy qraqil. Hagar we htiyan na peeniq toma pusu qhuni ka laqi. 16Heya de mosa tleung ye ba 1 pnsaan budi kntheya mbbege berah tleung, rmengo: “Uxe ku ba mpdehuk qmita mhuqil ka laqi mu.” Kiya de tleung sipo ka heya, tmngedux lmingis. 17Mbahang lingis laqi ka Utux Baro de, snkgulan baro we peeyah karac baro mlawa Hagar, rmengo: “Hagar, ma su so kiya ho? Iya kiicu, wada mbahang hrenang lingis laqi ka Utux Baro da. 18Tutui! Sai pstutuy pkheyu ka laqi, doi ka baga na. Ado ngalun mu qlhangan paru ka knxalan na hiti.” 19Utux Baro de rwahan na doriq ka Hagar. Heya we mita 1 bubul hghugan qsiya. Mosa hiya ka heya de, stngayan na qsiya ka lubuy qraqil, saan na piimah laqi.
20Msuupu meniq laqi nii ka Utux Baro, heya we kndudul mdakil ka heya. Meniq tadus brenux ma, mkela ba pstalang budi ka heya. 21Meniq Paran tadus brenux ka heya. Bubu na we saangal na 1 weewa Micrayim mpmuqedil na.
Msdehu ka Abraham ma Abimeleq
22Ciida, Abimeleq ma Pikol qbsuran supi we rmengo Abraham: “Kana noda su we, Utux Baro we ga mtheyaq isu ka heya. 23Maanu so kiya de psdehu rmengo berah Utux Baro hini ka isu, iya qqberiq kenan, laqi mu ma, lqlaqi laqi mu hiti. Wada ku mdrumuc bale quri sunan ma, isu uri we naka su mdrumuc bale quri kenan uri ma qlhangan nii su niqan nii.” 24Rmengo ka Abraham: “Mpsruwa ku psdehu.”
25Tgberah na, tnqliyan Abimeleq we wada gmeeluk 1 bubul hghugan qsiya, mseang Abimeleq quri noda nii ka Abraham. 26Rmengo ka Abimeleq: “Ini ku kela ima ka mnoda nii. Ini su rengo yaku ka isu uri. Wada saya ka hani ku mbahang.” 27Abraham we sbege na Abimeleq ka miric ma dapa. Daha heyi nii de ppsdehu ka dheya. 28Abraham ge, pniqun na icil ka 7 giyas wawa miric. 29Abimeleq we rmengo Abraham: “Ma su pniqun icil ka 7 giyas wawa miric ho?” 30Rmengo ka heya: “Mpeeyah su baga mu mangal 7 giyas wawa miric nii. Kiya ka pgkela snhii su yaku ka kmnari kgbbulan hghugan qsiya nii.” 31So kiya de, dxeral hiya we Beerseba kesun na tmngayan. Ado wada smdehu hiya ka 2 heyi nii. 32Bobo mnsdehu Beerseba hiya ka dheya de, wada Peliset ka Abimeleq ma Pikol da. 33Abraham de phuma 1 qhuni lebi Beerseba hiya ka heya. Meniq hiya dmurun mlawa Utux Tmninun, ngayan Utux Baro Tmninun muudus ani betaq knuwan. 34Abraham ge, bsiyaq nniqan na Peliset hiya.
Currently Selected:
Smnlean 21: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
