Smnlean 25
25
Duma Lqlaqi Laqi Abraham
(1 No 1:32-33)
1Mangal 1 mqedil dungal ka Abraham, Qeturah kesun ka ngayan na. 2Heya we tmlaqi laqi Abraham we Jimran, Yoqsan, Medan, Midyan, Yisbaq ma Suax. 3Yoqsan we tmlaqi Seba ma Dedan. Lqlaqi Dedan we kiya ka seediq Asurim, Letusim ma, Liumim. 4Laqi Midyan we Eypah, Eper, Xanok, Abida ma, Eldaah. Lqlaqi laqi Qeturah kana ka nii. 5Abraham ge, sbege na Yijxaq kana ka dnoi na. 6Quri so lqlaqi Abraham so uxe pusu mqedil we, muudus ciida ka heya han we, wada na saasu dheya kana ka dnoi na de, skgulan na ka dheya mlatac Yijxaq laqi na mquri nklaan hido, betaq dxeral nklaan hido hiya.
Hnqilan Abraham ma Pbqerus
7Nii we kiya ka kndesan Abraham. Heya we 1'75 knkawas ka knuudus na. 8Bbaro knrudan knkawas na muudus ka Abraham de, msange mgeedang mosa mquri rudan na hiya da. 9Daha laqi na Yijxaq ma Yismael we pbqerus daha meniq rhengo Makpelah hiya. Rhengo nii we ga sipo Mamre, ndxeral Epron laqi Coxar seediq Xet. 10Dxeral nii we bnaruy Abraham peeyah seediq Xet. Abraham ma mqedil na Sarah we gaga skuun hiya kana. 11Bobo wada mhuqil ka Abraham de, pgbleqan Utux Baro ka Yijxaq laqi na. Yijxaq we meniq smdaling Beer Laxay Roiy.
Lqlaqi Laqi Yismael
(1 No 1:28-31)
12Nii we lqlaqi laqi Yismael tnlaqi na pneyah Abraham ka Hagar seediq Micrayim tnqliyan Sarah. 13Ngayan lqlaqi Yismael, spooda ta patis ngayan lqlaqi laqi na we so nii: Laqi qbsuran rseno Yismael we Nebayot, kiya uri we Qedar, Adbeel, Mibsam, 14Misma, Dumah, Masa, 15Xadar, Teyma, Yetur, Napis ma, Qedmah. 16Dheya nii kiya ka lqlaqi Yismael kana. Tnalang daha ma pnkobu daha we spooda daha ngayan daha tmngayan. Dqbsuran 12 pnswayan pusu rudan ka dheya. 17Kana kndesan Yismael we 1'37 knkawas. 18Lqlaqi laqi na we meniq peeyah Xawilah betaq Sur mqquri Asur nklaan hido Micrayim. Meniq sipo mtswai na ma tnpusu hiya.
Pnttingan Esaw ma Yakobu
19Nii we lqlaqi laqi Yijxaq laqi Abraham ka nii. Tmnlaqi Yijxaq ka Abraham. 20Yijxaq we 40 knkawas na ciida, msterung daha Ribqah. Ribqah we weewa Betuel seediq Aram dxeral Padan Aram. Kiya ka mtswai Rapan. 21Yijxaq we ini tnlaqi ka mqedil na de, heya ka sdurun na Utux Tmninun. Cmiyuk dnurun na ka Utux Tmninun de mchedil ka Ribqah da. 22Mtgdiyal ckceka truma nbuyas ka lqlaqi nii, rmengo ka heya: “Netun so kiya de, maku so kiya ka yaku da ho?” Kiya de mosa smiling Utux Tmninun ka heya. 23Rmengo heya ka Utux Tmninun:
“Ga meniq truma nbuyas su we 2 qlhangan.
Maha peeyah heyi su mpheyu 2 klegan seediq.
Nii we maha mgkala kiya.
Nexal we mpqeepah quri mtswai ka tgqbsuran.”
24Dehuk ka pttingan. Tai, ckceka nbuyas na we mtrurul rseno. 25Tgplaale mtuting we mtanah hari ka heyi na ma tbalan mntena so gaga mlukus lukus ubal ka heyi na. Kiya de Esaw kesun na tmngayan. 26Smnegul mtuting bobo we baga na ga qmerac pungo papak Esaw. Kiya de Yakobu kesun na tmngayan ka heya. Mtuting ka 2 laqi nii ciida we 60 knkawas na ka Yijxaq.
Maruy Ngayan Qbsuran ka Esaw
27Dmudul mdakil ka 2 laqi. Esaw we mkela ba tmsdamac ma smkuxul ba tmbbuyu. Yakobu we mgseesu seediq, meniq sapah klaali. 28Smkuxul Esaw ka Yijxaq, ado meekan camac na klaali. Ribqah we smkuxul Yakobu.
29Niqan 1 ali, pmbegu pure begu ka Yakobu. Hani pneyah bbuyu ka Esaw, muuwic bale. 30Rmengo Yakobu ka Esaw: “Muuwic ku riyung, braho su pqdali ku mtanah nii, begu mtanah nii ho!” Kiya de Edom kesun ngayan na uri ka Esaw. 31Rmengo ka Yakobu: “Ali saya de baruy yaku ka ngayan qbsuran su da.” 32Rmengo ka Esaw: “Tai, gisu ku mphuqil da. Maanu ririh na yaku ka ngayan qbsuran nii ho?” 33Rmengo ka Yakobu: “Ali saya psquri yaku smdehu han.” Esaw de mquri heya smdehu, wada na brigun Yakobu ka ngayan na qbsuran. 34Kiya de Yakobu we sbege na Esaw ka pang ma begu layan mtanah. Bobo mnekan ma mnimah ka Esaw de wada asi osa da. So kiya smbiciq bale qmita ngayan qbsuran ka Esaw.
Currently Selected:
Smnlean 25: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
