Smnlean 34
34
Tsyaxan ka Dinah
1Dinah weewa na Leah skgulan Yakobu mosa nganguc, maha qmqita mqedil dxeral hiya. 2Qmita heya ka Sekem laqi Xamor pnswayan pusu rudan Xiwiy de, meyah qmeraq heya ma thiqan na mtaqi, tmsiiyax heya. 3Wada Dinah weewa Yakobu ka lhebun Sekem, smkuxul riyung weewa nii, kiya de sqrasan na cheya bale kari. 4Rmengo Xamor tama na ka Sekem: “Braho su sani ku smrai mqedil nii ka mpqedil mu.”
5Yakobu we mnbahang wada tmsiiyax Dinah weewa na ka Sekem da. Lqlaqi na we ga msuupu tnbugan na neepah ka dheya. Ini squwaq ka Yakobu, tmara dheya meyah. 6Meyah qmita Yakobu hiya ka Xamor tama Sekem kmpprengo heya. 7Mnbahang noda so nii ka lqlaqi Yakobu de, asi peeyah qnpahan daha meyah sapah. Ani ba kana seang daha, ado wada moda mmhemuc ooda ckceka Israel. Msuupu mtaqi weewa Yakobu nii we ini tduwa daun ka noda nii.
8Mpprengo dheya ka Xamor: “Lhebun Sekem laqi mu we gaga smkuxul weewa sapah su. Braho su pstrengi laqi mu ka weewa su. 9Ppsdadal ta ka isu ma dyami. Pstrengi dyami ka weewa sapah namu. Yamu we tduwa namu psterung mangal weewa sapah nami uri. 10Suupu meniq yami ka yamu da! Ga berah namu ka dxeral nii. Asi eeniq hini, mbbaruy ma smmalu ddoi namu nanak.” 11Rmengo tama weewa ma dmtswai Dinah ka Sekem: “Tai so smparu namu mita kenan. Maanu ka psaun namu we, ida ku mbege ka yaku. 12Ani namu pgsaun namu ppaadis ma bbege we, ida ku mpkeso rnengo namu mege, wano srwai ku ba heya psterung kenan ka weewa nii.”
13Dlqlaqi Yakobu ge, ado wada tmsiiyax Dinah mtswai daha ka Sekem de, asi daha trkii cmiyuk kari ka Sekem ma Xamor tama na. 14Rmengo dheya: “Ini miyan tduwa psterung mpqedil dseediq ini ooda ptgaya psalak ka mtswai nami. Ado so nii we qsqaun nami ka kiya. 15Wano 1 bale ka ngalun namu, kiya de maha nami smruwa ka yami da. Kiya ka kana mbbeyax rseno we asi ka moda ptgaya psalak kana, mntena so dyami. 16Kiya de mpsruwa nami psterung yamu ka weewa tnsapah nami, kiya uri we mtduwa nami mangal weewa tnsapah namu uri. So kiya de yami we mptheyaq nami yamu, mpskingal ta 1 pusu rudan da. 17Nasi namu ini qbahang mangal pnugaya psalak nii de, desun nami ka weewa sapah nami da.”
18Kari nii we meniq doriq Xamor ma Sekem laqi na we malu ba ka nii. 19Riso kiya de ini tggila moda ooda nii, ado heya we smkuxul weewa Yakobu. Spruun bale seediq meniq sapah tama na ka heya uri. 20Xamor ma Sekem laqi na we mosa psliyan rhengun alang daha, mquri seediq hiya rmengo: 21“Dseediq nii we malu bale, hmuwa ka srwai ta peeniq dxeral ta hini, ani moda mbbaruy. Tai, knuglahang ka dxeral, mttuku daha niqan. Ita we tduwa ta psterung weewa daha, weewa ta uri we tduwa ta pstrengun dheya uri. 22Wano 1 bale ka pnugaya daha, kiya ka mpsruwa meniq ita hini ma mpskingal ta seediq ka dheya. Kiya de so kana drseno ta we asi ka moda ptgaya psalak mntena dheya. 23Uxe maha mpnita kana ka tnbugan daha, dnoi daha ma kana tnbugan na peni? Wano smruwa ta de, mptheyaq meniq ita hini ka dheya da.” 24Kana seediq mnoda rhengun alang hiya we mbahang kari Xamor ma Sekem laqi na. Kiya de, kana mnoda rhengun hiya ka drseno we wada moda ptgaya psalak kana.
25Betaq mk3 ali, ga mnarux nina ka dheya ciida, 2 laqi Yakobu, kiya ka Simeon ma Lewiy dqbsuran Dinah. Dheya we mangal hlmadac, ini ssquwaq mosa ckceka alang hiya. Wada na phqilun ka kana drseno hiya da. 26Kiya uri we phqilun na ka Xamor ma Sekem laqi na. Desun daha ka Dinah pneyah sapah Sekem de mlatac da. 27Lqlaqi Yakobu, ririh tnsyaxan daha mtswai daha de, meyah gmeeluk mangal qyqeya sapah dseediq wada phqilun hiya. 28Wada daha glekun ka rahul miric, dapa ma dapa roba, kana ga meniq ckceka alang ma qnpahan daha. 29Gmeeluk maangal kana qyqeya, lqlaqi, mqedil ma, kana meniq ckceka sapah. 30Rmengo Simeon ma Lewiy ka Yakobu: “Gisu namu pqraqil kenan. Yaku we maha ku niqan naqah ngayan meniq dseediq dxeral hini, kiya ka seediq Kenaan ma Perijiy. Dseediq ta we ini ta kpiya. Maha msseli phuqil ita ka dheya. So kiya de yaku ma kana tnsapah ta we maha mpkuuka kana da.” 31Rmengo ka dheya: “Ma daha ngalun mqedil kbrexan ka mtswai nami da peni?”
Currently Selected:
Smnlean 34: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
