Smnlean 46
46
Madis Tnsapah Na Mosa Micrayim ka Yakobu
1Madis kana ani maanu mosa Beerseba ka Israel. Kiya de smapuh Utux Baro Yijxaq tama na. 2Keeman ciida, mtqita ckceka tuutux ka Utux Baro, rmengo Israel: “Yakobu! Yakobu!” Rmengo ka heya: “Gisu ku hini.” 3Rmengo ka Utux Baro: “Yaku we Utux Baro. Utux Baro ntama su. Iya kiicu ka mosa su Micrayim. Ado maha su paru qnhlangan meniq su hiya. 4Mptheyaq ku isu mosa Micrayim, desun misu baro dungal. Yosehu we mbubung doriq su.”
5Kiya de Yakobu we kndalax peeyah Beerseba. Lqlaqi Israel we spaapa daha rulu pnaadis Paroh ka tama daha Yakobu, kana lqlaqi daha ma mmqedil daha. 6Desun daha Micrayim ka kana ka tnbugan daha ma qyqeya daha peeyah dxeral Kenaan. Yakobu ma kana lqlaqi laqi na we ida msuupu meyah kana. 7Heya we desun na msuupu Micrayim ka kana laqi na, lqlaqi laqi, weewa na, lqlaqi weewa laqi ma, kana lqlaqi laqi na.
8Nii we kiya ka dseediq Israel mneyah Micrayim. Yakobu ma ngayan lqlaqi laqi na: Reuben we tgqbsuran laqi Yakobu. 9Lqlaqi Reuben we, Xanok, Palu, Xecron ma Karmiy. 10Lqlaqi Simeon we, Yemuel, Yamin, Ohad, Yaking, Coxar ma Saul laqi daha mqedil seediq Kenaan. 11Lqlaqi Lewiy we Gerson, Qahat ma Merariy. 12Lqlaqi Yehudah we Er, Onan, Selah, Perec ma Jerax. Er ma Unang we wada mhuqil Kenaan hiya kiya. Lqlaqi Perec we Iskariot Xecron ma Xamul. 13Lqlaqi Yisaskar we Tola, Puwah, Yobu ma Simron. 14Lqlaqi Jebulun we Sered, Eylon ma Yaxleel. 15Dnii we lqlaqi Yakobu mntuting peeyah Leah meniq Padan Aram hiya. Kiya uri we weewa na Dinah. Kana lqlaqi laqi na we 33 heyi. 16Lqlaqi Gad we Cipyon, Xagiy, Suniy, Ecbon, Eriy, Arodi ma Areli. 17Lqlaqi Aser we Yimnah, Yiswah, Yiswiy, Biriyah ma mtswai daha mqedil we Serax. Lqlaqi Biriyah we Xeber ma Malkiel. 18Dnii we lqlaqi pneyah Jilpah tnqliyan, kiya ka Rapan bnege na Leah laqi mqedil na. Pntingan na lqlaqi Yakobu we 16 heyi. 19Lqlaqi Rajie mqedil Yakobu we Yosehu ma Binyamin. 20Meniq Micrayim ka Yosehu we mntuting Menaseh ma Eprayim, mntuting peeyah Asnat weewa Potipera msapuh alang On. 21Lqlaqi Binyamin we Bela, Beker, Asbel, Gera, Naaman, Exi, Ros, Muping, Xupim ma Arde. 22Dnii we lqlaqi Yakobu mntuting peeyah Rajie, kana daha we 14 heyi. 23Lqlaqi Dan we Xusim. 24Lqlaqi Naptaliy we Yaxceel, Guniy, Yecer ma Silem. 25Dnii we lqlaqi pneyah Bilhah tnqliyan, kiya ka Rapan bnege na Rajie laqi mqedil na. Pntingan na lqlaqi Yakobu we 7 heyi. 26Kana mnsuupu Yakobu mosa Micrayim we, ini spegi ka ina na de, kana pneyah heya we 66 heyi. 27Kiya uri we Yosehu mntuting 2 laqi rseno meniq Micrayim. Kana tnsapah Yakobu dehuk Micrayim hiya we 70 heyi.
Meniq Gusing ka Tnsapah Yakobu
28Yakobu ge, knama smkagul Yehudah mosa Yosehu hiya. Meyah tmiyu elu ssaun daha elu osa daha Gosen. Kiya de dehuk Gusing ka dheya. 29Yosehu we mhedu psramal rulu de, mosa Gosen smterung Israel tama na. Qmita tama na ka heya de, asi ptmaku nduyung tama na, bsiyaq bale lmingis nduyung tama na. 30Rmengo Yosehu ka Israel: “Qmnita ku dqeras su da. Klaun mu gisu su muudus na. Saya de ani ku mhuqil ka yaku da.” 31Rmengo dmtswai na ma kana tnsapah tama na ka Yosehu: “Maha ku rmengo Paroh, mprengo ku heya: ‘Gisu hini kana ka dmtswai mu ma kana tnsapah tama mu mneniq dxeral Kenaan. 32Dheya we dseediq mtabu miric, kiya ka tmabu tnbugan ka dheya. Gisu daha desun hini kana ka miric ma dapa ma kana dnoi daha da.’ 33Qmita yamu ka Paroh ciida de, mprengo: ‘Mqeepah namu maanu?’ 34Rengo ka yamu: ‘Tnqliyan su we, pneyah nami lqlaqi betaq saya we, ida nami dseediq tmabu tnbugan ka yami. Yami ma ddrudan nami we ida to so kiya kana.’ So kiya de, tduwa namu meniq Gosen ka yamu da. Ado dseediq tmabu miric we trqilun dseediq Micrayim.”
Currently Selected:
Smnlean 46: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
