Lewiy 14
14
Gaya Bobo Mnnarux Sburo Heyi
1Rmengo Moseh ka Utux Tmninun: 2“Ali psbgurah mnnarux msburo heyi, so nii ka gaya na. Asi ka desun pqita msapuh ka heya. 3Msapuh we desun na qmita nganguc kobu. Nasi wada malu ka mnarux na msburo heyi de, 4asi ka smkagul seediq nii, madis 2 qbheni muudus uka rutiq, qulic bale, ware mtanah ma waso dapa. 5Msapuh we mpskagul madis rusuq tqriun na qsiya mrtaso, kiya de phqilun na bobo hiya ka 1 qbheni. 6Meniq ka qbheni muudus we, msapuh we pspuun na qulic bale, ware mtanah ma, waso dapa rbegun na dara qbheni mnuudus ckceka qsiya. 7Mn7 na merus dara ka heyi mnarux msburo heyi de, ngalun bgurah ka heya da. Kiya ma qbheni muudus we pbrinah na posa ckceka qnpahan dungal. 8Seediq meyah psbgurah we asi ka mahu lukus na, muluh ubal tunux, dmoi qsiya trima heyi. So kiya de bgurah ka heya da. Kiya de tduwa mremux kobu ka heya. Kiya de, asi ka meniq nanak kobu na mk7 ali. 9Tg7 ali de, asi ka muluh kana snuunux, ngudus, kawir doriq ma kana ubal heyi. Kiya uri ma asi ka mahu lukus, trima qsiya heyi. Kiya de bgurah ka heya da.
10Tg8 ali de, asi ka madis 2 wawa baus miric ma 1 knkawas giyas miric mttuku hnyegan. Kiya uri ma asi ka mege 3 tnugmxalan igipa nemu mugi pnugmaxan abura ma 1 irok ka abura ngalun snapuh pnhgalang. Uriy we psuupu madis kana. 11Msapuh mooda psbgurah we, psaun na berah Utux Tmninun, rhengun kobu mrtaso hiya ka seediq meyah psbgurah ma kana qyqeya nii. 12Msapuh ge, mangal 1 baus miric bege na snapuh prtaso qnquwan. 1 irok abura we ngalun na snapuh slgelu, slgelu na berah Utux Tmninun. 13Sliqun na nniqan mrtaso, kiya ka nniqan smeeliq snapuh psruwa qnquwan noda ma snapuh prtaso qnquwan hiya. Bege msapuh ka snapuh prtaso qnquwan. Mntena so snapuh psruwa qnquwan noda, mrtaso riyung kana ka nii. 14Msapuh we asi ka mangal duma dara snapuh prtaso qnquwan. Sricuh na waso narac birac, bbaki narac baga ma, bbaki narac papak seediq meyah psbgurah kiya ka dara. 15Msapuh we mangal peeyah 1 irok hiya psaun na qapal baga na. 161 tluding narac baga na we mprebu abura gaga iril qapal baga na. Maha mn7 srehak na berah Utux Tmninun ka abura. 17Mnsngari abura mneniq qapal baga na we, sricuh na waso narac birac, bbaki narac baga ma, bbaki narac papak seediq meyah psbgurah kiya. Kiya ka dara snapuh prtaso qnquwan. 18Mnsngari abura qapal baga msapuh we asi ka sricuh na tunux seediq meyah psbgurah kiya. Kiya de pririh mpsruwa qnnaqah noda na meniq berah Utux Tmninun. 19Msapuh we mbege snapuh psruwa qnquwan noda. Mpririh niqan rutiq ma meyah psbgurah pssruwa qnquwan noda na. Kiya de mpseeliq snapuh psqmaan. 20Psaun na bobo spuhan hiya ka snapuh psqmaan ma snapuh pnhgalang. Mpririh psruwa qnquwan noda na. Kiya de bgurah ka heya da.
21Nasi qrinuc ka heya ma, ini knptuku pnsramal na de, asi ka madis 1 baus miric ngalun na snapuh prtaso qnquwan. Ani nanak na ngalun snapuh slgelu psruwa qnquwan noda na. Kiya uri ma asi ka mege 1 tnugmxalan igipa nemu mugi pnugmxalan abura ma 1 irok ka abura spuun na madis ngalun snapuh pnhgalang. 22Dungal we spooda beyax na, madis 2 derang, uxe uri we 2 byugu ka heya. 1 we ngalun snapuh psruwa qnquwan noda. 1 we ngalun prtaso qnquwan. 23Tg8 ali quri psbgrahun de, asi ka desun na rhengun kobu mrtaso, berah Utux Tmninun bege na msapuh ka kana nii. 24Msapuh we mangal wawa miric snapuh prtaso qnquwan, irok abura pspuun na smapuh mlgelu. Slgelu na berah Utux Tmninun. 25Asi ka sliqun ka wawa miric snapuh prtaso qnquwan. Mangal duma dara snapuh nii, sricuh na waso narac birac, bbaki narac baga ma, bbaki narac papak seediq meyah psbguurah kiya. 26Msapuh we mpheruy abura iril karuk baga na. 27Meniq iril gaga na ka abura, kiya ma dmoi tluding narac qapal baga na mn7 srehak na berah Utux Tmninun. 28Dungal we abura meniq baga na we, sricuh na waso narac birac, bbaki narac qapal baga ma, bbaki narac papak seediq meyah psbguurah. Asi ka meniq nniqan rmnicuh abura snapuh prtaso qnquwan hiya ka nii. 29Abura mnsngari qapal baga msapuh we, asi ka rcuhun na tunux seediq meyah psbgurah kiya. Mpririh psruwa qnquwan noda na meniq berah Utux Tmninun. 30Seediq kiya we asi ka spooda beyax na, mege 1 derang, uxe uri we 1 wawa byugu. 31Kiya ka dhekun na moda. 1 we ngalun na snapuh psruwa qnquwan noda. 1 we ngalun na prtaso qnquwan, pspui snapuh pnhgalang mege kana. Kiya de msapuh we rmirih psruwa qnquwan noda na meniq berah Utux Tmninun. 32Gaya nii we kiya ka quri dseediq mnarux msburo heyi, quri so pttuku bbege daha quri psbgurah ka nii.”
Gaya Srpungan Sapah
33Rmengo Moseh ma Aharon ka Utux Tmninun, 34“Dehuk namu dxeral Kenaan bbege mu yamu ka yamu de, nasi mu psaun mnarux msburo heyi ka sapah dxeral ssaun namu mangal hiya de, 35tnsapah de asi ka mosa rmengo msapuh: ‘Qnita mu we, niqah mnarux ka ckceka sapah.’ 36Berah ini osa mita sapah nii ka msapuh hayan we, asi ka gmnama rmengo seediq, hqulun daha kana ka qyqeya truma sapah. So kiya de, so uxe mpniqan rutiq kana ka ckceka truma sapah hiya. Bobo na de, ani nak mosa mita ka msapuh da. 37Heya we mqita mnarux kiya. Nasi gaga srpungan rapung mgsama, uxe uri we rapung mtanah mgrebuq rako na ka qnabil de, 38mosa nganguc sapah ka msapuh. Asi na ka lebun mk7 ali ka sapah. 39Tg7 ali de, meyah mita dungal ka msapuh. Nasi wada mkgarang qnabil ka mnarux nii de, 40mpskagul seediq mangal btunux gaga srpungan mnarux. Qdaanun daha nganguc alang, kiya ka psaun nniqan niqan rutiq. 41Kiya uri ma mplawa seediq meyah kmugus rnicuh rumu qnabil kana ssiyo. Knugus daha we asi ka sqada daha nganguc alang, kiya ka psaun nniqan niqan rutiq. 42Mangal btunux bgurah prihun na btunux wada ngalun. Kiya dungal we sbgrahun na rmicuh dungal ka kana qnabil.
43Heya we ngalun na ka btunux, kgusun na ka qnabil, bobo mnhedu rmicuh de, gaga qtaan ckceka hiya dungal ka mnarux de, 44msapuh we asi ka mremux sapah truma mosa qmita. Nasi wada mkgarang sapah truma hiya ka mnarux de, gisu uqun mnarux msburo heyi ka sapah nii. Kiya de niqan rutiq ka nii. 45Heya de, asi ka hrahun na ka sapah nii. Btunux, qhuni ma kana rnicuh mrumu we, asi ka hqulun na nganguc alang, psaun na nniqan rutiq hiya. 46Gaga lebun ciida ka sapah, seediq mnremux hiya we, asi ka mrutiq betaq keeman. 47Mnoda sbaang hiya ka seediq we, asi ka pheun ka lukus na. Mnekan uqun sapah hiya ka seediq we, asi ka mahu lukus na uri.
48Bobo snbgrahan rmicuh ka sapah, mosa mremux mita hiya ka msapuh. Qtaan na mnarux nii we ini kgarang sapah truma hiya de, ngalun na bgurah ka sapah nii. Ado wada uka ka mnarux nii da. 49Kiya de quri so psbgurah nii de, asi ka madis 2 qbheni, 1 qulic bale, ware snuyuk mtanah ma, waso dapa. 50Madis rusuq tnqriyan qsiya mrtaso, sliqun na bobo hiya ka qbheni. 51Pspuun na rmebu dara qbheni gaga ckceka qsiya mrtaso hiya ka qulic bale, waso dapa, ware snuyuk mtanah ma, qbheni muudus. Kiya de mn7 na merus dara sapah kiya. 52Kiya ma dmoi dara qbheni, qsiya mrtaso, qbheni muudus, qulic bale ma, waso dapa. Kiya uri ma ware snuyuk mtanah moda psbgurah sapah kiya. 53Kiya de, qbheni muudus we, asi ka saun na paalix qnpahan nganguc alang kiya. Kiya de pnkbgurah sapah de, bgurah ka sapah nii da.”
54Nii we kiya ka mnarux lmlamu msburo heyi ma mluqah tunux, 55quri so lukus ma niqan mnarux msburo heyi ka sapah. 56Kiya uri ma quri mnarux luqah, mgheguh ma, mbeeba kana ka gaya nii. 57Gisu pgkela so knuwan ka bgurah ma, so knuwan ka niqan rutiq. Gaya mnarux sburo heyi ka nii.
Currently Selected:
Lewiy 14: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020