Lewiy 16
16
Ali Psruwa Qnquwan Noda
1Bobo wada mhuqil ka 2 laqi Aharon smdaling berah Utux Tmninun. Bobo hnqilan daha nii, rmengo Moseh ka Utux Tmninun, 2Rmengo Moseh ka Utux Tmninun: “Rngagi ka Aharon qbsuran su. Iya kmmhemuc mremux ckceka pala kobu mrtaso, berah kulu pnsdhegan tluungan mrtaso. So su uxe mphuqil. Ado mpeeyah ku ckceka plabu mptqita ku bobo tluungan mrtaso nii. 3Mremux kobu mrtaso ka Aharon we, asi ka madis 1 wawa dapa balas ngalun na snapuh psruwa qnquwan noda. 1 baus miric ngalun na snapuh psqmaan. 4Mplukus lukus rila mrtaso strmaun tninun nuqah malu. Plkusun na ka puto caic tninun nuqah, hmabik habik pniri nuqah ma, knbunuh bunuh tninun nuqah malu. Nii we lukus mrtaso kana. Heya we asi ka tnrima heyi, plukus lukus nii. 5Angal 2 baus miric peeyah dseediq Israel, ngali snapuh psruwa qnquwan noda. 1 baus miric ngali snapuh psqama.
6Msapuh snapuh psruwa qnquwan noda ka Aharon, mpsruwa qnquwan noda na nanak ma tnsapah na. 7Kiya ma psaun na berah Utux Tmninun ka 2 baus miric, psaun na rhengun kobu mrtaso. 8Aharon we asi ka sblebil na qreti 2 miric nii. 1 we bege na Utux Tmninun, kingal we bege na Asadil. 9Aharon ge, snpuhan bbege na Utux Tmninun we sapuh psruwa qnquwan noda kiya. 10Kiya de, asi ka pkdusun ka snpuhan bbege Asadil, psaun na berah Utux Tmninun, ptuura psruwa qnquwan noda. Mpskagul seediq, desun daha tadus brenux ka miric nii, bege daha Asadil.
11Aharon ge, madis dapa balas ngalun na spuhan psruwa qnquwan noda. Sliqun na ma psruwa qnquwan na nanak ma tnsapah na. 12Mangal sara spuhan skenux, psteme bagah puniq peeyah spuhan berah Utux Tmninun. Kiya uri ma mangal 1 kemux baga nemu sknexan, spuun na madis toma pusu mrtaso. 13Meniq berah Utux Tmninun, psaun na bobo puniq ka sknexan. Qrengul na de maha so plabu qmeerung tluungan mrtaso bobo kulu pnsdhegan. Kiya ka uxe mphuqil ka heya. 14Mangal dara dapa uri ma, rbegun dara ka tluding baga na ma, bresun na kulu pnsdhegan gaga quri nklaan hido. Kiya ma berah tluungan mrtaso uri bresun na mn7 dara uri.
15Bobo na de, sliqun na ka baus miric snapuh na psruwa qnquwan noda dseediq. Desun na truma pusu mrtaso hiya ka dara miric, berus na bobo tluungan mrtaso ma berah na, mntena so dara dapa balas. 16Nii we ririh lmlamu qnquwan noda, qnnaqah, kiya ka kana qnquwan snrtiqan dseediq Israel ka moda gaya snapuh psruwa qnquwan noda nii meniq kobu mrtaso. Asi ka so nii moda uri ka psbgurah ndaan daha psrutiq ckceka kobu mrtaso. 17Mremux truma pusu mrtaso hiya ka heya we, asi ka uka seediq ka kobu mrtaso. Asi ka betaq mhedu psruwa qnquwan noda na nanak ma, qnquwan noda kana seediq Israel ma meyah nganguc ka heya. 18Meyah nganguc ka heya de, mosa spuhan berah Utux Tmninun hiya ka heya. Heya we meniq bobo spuhan hiya moda gaya smapuh psruwa qnquwan noda. Kiya ma mangal dara balas dapa ma dara baus miric, rcuhun na 4 urung gaga mxmuxi spuhan. 19Srebu na dara ka tluding baga na maha mn7 merus spuhan, psbgurah spuhan. Meniq bobo spuhan nii mpsruwa lmlamu qnquwan noda seediq Israel ma prtaso spuhan.
Miric Rmirih Qnquwan Noda
20Mhedu mege snapuh psruwa qnquwan pusu truma mrtaso truma ma kobu mrtaso ka Aharon de, asi na ka sbege ka baus miric gaga muudus. 21Baga Aharon we psaun na bobo tunux miric nii ka baga na. Mptuura lmlamu qnquwan noda seediq Israel, kiya ka kana qnquwan daha moda. Psaun na bobo tunux miric ka kana qnquwan noda nii. Kiya de mpskagul seediq, desun daha tadus brenux ka miric nii. 22Asi daha ka psaun tadus brenux ka miric nii, desun daha dxeral uka seediq hiya.
23Aharon we, asi ka mremux kobu mrtaso, saun na mangal hiya ka lukus snmalu nuqah malu ma psaun na hiya. 24Kiya de mangal qsiya trima heyi na, mplukus lukus ma meyah nganguc de, bege na ka snapuh psqmaan na ma nseediq. Kiya de psbgurah qnquwan noda na ma kana seediq. 25Psqmaun na bobo spuhan hiya ka kadi snapuh psruwa qnquwan noda. 26Seediq mnosa paalix miric Asadil we, asi ka mahu lukus na, mangal qsiya trima heyi na, kiya ka tduwa mremux kobu. 27Wada desun truma kobu mrtaso ka mooda psruwa qnquwan noda ka dara balas dapa ma dara baus miric snapuh psruwa qnquwan de, desun daha nganguc kobu ka dapa ma miric nii. Psqmaun daha ka qraqil, heyi ma, quti na. 28Seediq mnosa psqama we, asi ka mahu lukus na ma mangal qsiya trima heyi na. Kiya de tduwa mremux kobu.
Muyu Ali Psruwa Qnquwan Noda
29Meniq knkingal knkawas ka ali 10 idas 7 we: Asi namu ka pqraqil lhebun namu. Ani seediq mneniq hini, ani dseediq tnooda ckceka namu we, iya bale qeepah kana. Gaya pnheyu betaq ani knuwan yamu ka nii. 30Ado mooda smapuh qnquwan noda namu ma psbgurah yamu ka ali nii. Asi namu ka psbgurah ma malix kana qnquwan noda namu meniq berah Utux Tmninun ka yamu. 31Ali nii we ngali mrtaso sngayan ma pqraqil lhebun namu. Gaya betaq ani knuwan ka nii. 32Mplutuc msapuh mrtaso qmeepah msapuh nii we, asi ka hnrigan abura, mlukus lukus mrtaso snmalu malu nuqah, kiya ka moda gaya smapuh psruwa qnquwan noda. 33Heya we moda gaya smapuh psruwa qnquwan noda meniq truma pusu mrtaso ma spuhan ka heya. Kiya ma psruwa qnquwan noda kana dmsapuh ma kana seediq ka heya. 34Gaya betaq ani knuwan ka nii: Kiya ka mntexan bale ddaun knkingal knkawas psruwa kana qnquwan noda seediq Israel ka nii.” Kiya de Aharon we muyu Utux Tmninun tnugesa sa Moseh moda ka heya.
Currently Selected:
Lewiy 16: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020