Lewiy 22
22
Gaya Mekan Qyqeya Mrtaso
1Rmengo Moseh ka Utux Tmninun: 2“Rngagi ka Aharon ma lqlaqi na. Dseediq Israel we sthyai ka pnsnakan mu mrtaso ma qyqeya mrtaso nnaku. Kiya so namu uxe psrutiq ngayan mrtaso mu. Yaku we Utux Tmninun. 3Rngagi ka dheya: Lqlaqi ltlutuc namu ani betaq knuwan we, niqan rutiq kana, mosa smdaling pnsnakan mu mrtaso Israel ma, qyqeya mrtaso nnaku we, asi ka pkungalun peeyah berah mu ka seediq kiya. Yaku we Utux Tmninun.
4Lqlaqi mslutuc Aharon, kana niqan mnarux msburo heyi ma, niqan mnarux mmhemuc meyah we, iya bale ekan uqun mrtaso. Asi ka betaq bgurah ka dheya. Ani ima tmnelung heyi mnhuqil niqan rutiq ma, seediq kmmhemuc meyah ka utaq nrseno, 5uxe uri we tmnelung niqan rutiq mnkkarang dxeral ma, dseediq psrutiq heya, ani mnmanu ka qnrutiq seediq kiya. 6Tmnelung seediq, qyqeya nii de, asi ka niqan rutiq betaq keeman. Nasi ini angal qsiya trima heyi na we, asi ka ini ekan uqun mrtaso. 7Wada priyax ka hido de bgurah ka heya da. Kiya de ani nak mekan uqun mrtaso ka heya. Ado uqun na ka kiya. 8Mnhuqil nanak ma snliqan camac bbuyu we, iya bale uqi. Ado mpsrutiq isu nanak ka kiya. Yaku we Utux Tmninun. 9So kiya de, asi ka muyu bale kari pnosa mu ka dheya. Nasi daha wada srhuqan de, mphuqil mangal qnquwan noda daha da. Yaku we Utux Tmninun mprtaso dheya.
10Kana dseediq icil we iya bale ekan uqun mrtaso. Tnooda meniq sapah msapuh, uxe uri we dseediq pnlaanan su meyah meepah we, iya bale ekan uqun mrtaso. 11Nasi maruy seediq ka msapuh, bnaruy na pila ka seediq. Seediq kiya we asi ka ini ekan uqun mrtaso. Mntuting sapah na uri we, asi ka ini ekan uri. 12Nasi wada mqedil seediq icil ka weewa msapuh we, asi ka ini sapuh snapuh pheyu ka heya. 13Kiya de, nasi mqrinuc ka laqi mqedil msapuh we, uxe uri ma nlaxan rseno, uka laqi mslutuc na ma mbrinah meyah sapah tama na dungal, mntena so weewa ciida. So kiya de ani nak mekan uqun tama na ka heya. 14Nasi wada mqnuuqu mekan uqun mrtaso ka seediq we, asi ka spuyu nekan na, mpririh 1 tnugrmean mege msapuh dungal. 15Msapuh we iya bale kmmhemuc psrutiq snapuh mrtaso nseediq Israel bnege daha Utux Tmninun. 16So namu uxe maha mangal qnquwan noda ado mnekan namu uqun mrtaso. Ado yaku we Utux Tmninun, prtaso dheya ka yaku.”
Qqeya Qrasun Mangal
17Rmengo Moseh ka Utux Tmninun: 18“Rngagi ka Aharon ma lqlaqi laqi na ma, kana seediq Israel, uxe uri we dseediq tnooda ckceka seediq Israel hiya: Kana bbege daha snapuh we, ani bnege daha pnsdehu, bnege daha pneeyah lhebun. Kiya ka snapuh psqmaan bbege daha Utux Tmninun. 19Asi ka mttuku hnyegan ka balas dapa, miric rudu ma, miric ka snapuh namu. Ado so kiya ka qrasun mangal. 20Kana ini pttuku hnyegan na, iya bale ngali snapuh mege. Ado ini qrasi mangal ka kiya. 21Kana pneeyah rahul dapa ma miric, mege snapuh ptbale Utux Tmninun ma, mege pnsdehu na, uxe uri we mege snapuh pneeyah bale lhebun we, asi ka mttuku hnyegan ka bnege namu, kiya ka qrasun mangal. 22Mbudu, mpika, mnridil, niqan baso ma, niqan luqah we, iya bale spuhi Utux Tmninun. Iya bale ngali snapuh psqmaan mege Utux Tmninun. 23Ani balas dapa ma miric we, nasi mciicil ka heyi daha, uxe uri we ini ptuku maanu we, ngali snapuh pneeyah lhebun kiya. Ngalun namu mege snapuh pnsdhegan namu we, uxe qqrasun mangal. 24Mnaruh begax, uxe uri we sntmaqan, mperuq ma gnbgaxan we, iya bale ngali snapuh mbege Utux Tmninun. Meniq namu bobo dxeral we, iya bale oda so nii. 25Quri so nii we, nangal namu pneyah baga seediq icil we, iya bale ngali snapuh bbege Utux Baro. Ado nii we ini pttuku hnyegan ma tnqrqilan heyi na. Uxe qqrasun mangal ka nii.”
26Rmengo Moseh dungal ka Utux Tmninun: 27“Hani mtuting ka wawa dapa balas, uxe uri ma miric rudu ma miric we, pspui peeniq bubu na hiya ka mk7 ali. Bobo mk8 ali de, ani namu nak ngalun snapuh, kiya ka qqrasun mangal, ngali snapuh psqmaan bege Utux Tmninun. 28Ani bubu dapa ma bubu miric we, iya bale pspui mntena kingal ali smeeliq ka bubu ma wawa na. 29Asi namu ka mege snapuh qnaras Utux Tmninun ka yamu. Asi namu ka mege qqrasun na mangal. 30Asi su ka uqun ali ciida. Iya bale rngii betaq mgrebu so kusun. Yaku we Utux Tmninun.
31Yamu we asi namu ka muyu gaya pnooda mu. Yaku we Utux Tmninun. 32Iya srutiq ngayan mrtaso mu ka yamu. Meniq ku ckceka seediq Israel we, asi ka pspruun ba prtaso. Yaku we Utux Tmninun prtaso yamu. 33Yaku ka dmnudul yamu mlatac peeyah dxeral Micrayim, Utux Baro namu ka yaku. Yaku we Utux Tmninun.”
Currently Selected:
Lewiy 22: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020