Ruka 24

Muudus Peeyah Hnqilan ka Yesu

(Mat 28:1-10. Mrk 16:1-8. Yoh 20:1-10)

1Prading ali 1 cenga sngayan mgrebu bale ciida, madis pnsramal rricuh malu sknexan ma mosa habung ka dmqedil kiya. 2Taan daha tena wada rwahun peeyah habung ka tasil. 3Mremux hiya ka dheya de ini daha qtai ka heyi Yesu Bukung. 4Mgeedang ka lnglungan daha ciida, tai, asi lux mheyu ssiyo daha ka 2 heyi mlukus tqwilaq. 5Miicu ka dheya duma asi sqapah dxeral ka dqeras daha. Kiya de rmengo dheya ka 2 seediq: “Hmuwa, ma namu gimun ckceka mhuqil seediq ka wada muudus ho? 6Uka hini ka heya, wada muudus peeyah hnqilan da. Psbgrnahi lmngelung, wada huwa mesa rmengo yamu ka heya mneniq Galil ciida han, 7rmnengo: ‘Ida asi ka sbege baga seediq niqan qnquwan noda ka Laqi Seediq, spteetu daha jyujika ma mk3 de mpkuudus peeyah hnqilan.’” 8Kiya de wada daha lnglungun ka kari na, 9kiya de mbrinah peeyah habung de ssneeru daha 11 tnugsaan ma duma na seediq hiya dungal ka kana noda nii. 10Dmqedil rmengo snkgulan we kika Maria seediq Magdalene ma Yoanna, Maria bubu Yakobu ma duma na hiya dungal mqedil mnsuupu dheya. 11Kari daha dheya nii we ngalan daha so nii mkuni ma ini daha snhii. 12Kiya de mtutuy ka Petros ma tmalang mosa habung. Thmuku tunux na mita truma de taan na ga nanak quri icil ka lukus tninun malu ware keguy. Kiya de skluwi lhebun na kana so noda nii.

Elu Mquri Imaus

(Mrk 16:12-13)

13Ida ali ciida, mquri Imaus kesun alang biciq ka 2 heyi ckceka tnugsaan. Peeyah Yerusalem 60 stati kntheya na ka alang nii. 14Dheya we mpprengo ntaan daha kana ndaan so nii. 15Mpprengo ma mssiling ciida, meyah smdaling dheya ka Yesu ma msuupu dheya mosa. 16Kiya de msurung ka doriq daha ma ini daha klai ka heya. 17Rmengo heya ka Yesu: “Maanu ka nii namu spprengo mkleelu mkkesa ho?” Mheyu ka dheya duma naqah kuxul dqeras daha. 18Kiya de Kleotas kesun ka taxa we cmiyuk rmengo: “Wano 1 ba isu ka seediq Yerusalem ini kela mmaanu ka ndaan hiya nana ho?” 19Rmengo ka Yesu: “Maanu ho?” Rmengo ka dheya: “Kiya ka quri Yesu seediq Najare! Heya ge mpgeela kari. Meniq berah Utux Baro ma kana seediq we niqan bale beyax ka kari na ma qneepah na. 20Dpusu msapuh ma dmpqlahang miyan we wada daha sbege, ngalan daha mndungus phqilun ma wada daha spteetu jyujika ka heya. 21Ida heya ka sntangan nami meyah rmirih maruy Israel! Uxe wano kiya, peeyah noda so nii we mk3 ali saya da. 22Kiya uri, pskluwi menan ka duma mmqedil ckceka nami. Mnosa habung hiya mgrebu bale ka dheya, 23ini daha qtai ka heyi na. Kiya de meyah rmengo yami, ntaan daha meyah mtqita ka snkgulan baro, rmengo wada muudus ka heya da. 24Kiya uri we mnosa qmita habung ka duma nami we ida so rnengo mmqedil ka qntaan daha. Kiya de ini daha tai ka heya.” 25Rmengo dheya ka Yesu: “Ah, yamu mngataq seediq! Kari rnengo kana dmpgeela kari we sgcuqi riyung snhii ka lhebun namu. 26Uxe asi ka moda so nii mqraqil ka Kiristo ma mpremux knledax na peni?” 27Kiya de pnrdingan peeyah Moseh ma dmpgeela kari, kana kari wada spatis Patis quri heya nanak we spkleexan na ba tmgesa dheya.

28Smdaling alang ssaun daha ka dheya de ida so mquri elu berah nana ka Yesu. 29Kiya de hridun daha ka heya, rmengo: “Suupu meniq menan hini, ado gbiyan dima uxe beyo mnkeman ka ali nii da!” Maanu so kiya de mremux sapah ma msuupu dheya ka Yesu. 30Msuupu dheya mekan ciida, Yesu we mangal pang ma mnama mqaras dmurun de gbingun na ma sbege na dheya. 31Kiya de mtraguh ka doriq daha duma hani nii mkela sa heya. Asi lux ini qtai ka Yesu da. 32Mpprengo ka dheya: “Rmengo ita ma pgkela tmgesa Patis Mrtaso ita mkleelu ta ciida we uxe mntena so mttilux ka lhebun ta peni?”

33Kiya de mtutuy maha ka dheya ma mosa Yerusalem. Taan daha ga msseli hiya ka 11 tnugsaan msuupu seediq ga theyaq dheya. 34Rmengo: “Bale ba wada muudus peeyah hnqilan ka Bukung ma tnqita Simon da!” 35Kiya de 2 heyi we ssneeru daha dheya ka ntaan daha mkleelu ma wada huwa mesa klaun daha pkelu gmebing pang ciida ka Bukung.

Mtqita Tnugsaan Na ka Yesu

(Mat 28:16-20. Mrk 16:14-18. Yoh 20:19-23. Qne 1:6-8)

36Gisu rmengo so kari nii ciida, asi lux mheyu ckceka daha hiya ka Yesu ma rmengo: “Tai namu so mpsbleyaq!” 37Ngalan daha gisu ta mita utux mesa ka dheya ma ani kana nklwiyan daha ma kniicu daha. 38Rmengo ka Yesu: “Hmuwa, ma mrrudu ma tiiyax lhebun namu ho? 39Yamu we qtai ka baga mu ma papak mu. Kiya de maha namu klaun bale ba yaku di. Tlengi ku ma qtai! Utux we uka buuc ma uka heyi. Yamu we, qtai. Niqan ka naku.” 40Mnhedu rmnengo kari nii de spqita na dheya ka baga na ma papak na. 41Msgcuqi qaras mskluwi ini kmsnhiyi ciida ka dheya ma rmengo dheya ka Yesu: “Niqan uqun maanu ka yamu hini ho?” 42Sbege daha heya ka 1 knretan qcurux nuduh. 43Kiya de ngalun na ma uqun na berah daha.

44Rmengo dheya ka Yesu: “Kiya ka kari rnengo mu yamu mntheyaq ku yamu cuuxal: Kana kari quri kenan ga spatis gaya pndakar Moseh, ga patis dmpgeela kari ma patis uyas we ida asi ka ma bale kana.” 45Kiya de wada na rwahan ka lhebun daha kkela daha Patis Mrtaso, 46rngagan na dungal: “So nii ka ga spatis Patis: Kiristo we asi ka moda mqraqil ma mk3 ali de mpkuudus peeyah hnqilan. 47Kiya de asi ka pooda ngayan na gmarang ppriyux lnglungan ka seediq ma ssruwa qnquwan peeyah Yerusalem betaq kana qlhangan. 48Yamu ka mpkela so noda nii. 49Tai, pyahun mu yamu ka sntangan Tama mu. Mptara namu alang paru hini betaq dehuk yamu ka beyax peeyah baro.”

Desun Baro ka Yesu

(Mrk 16:19-20. Qne 1:9-11)

50Madis dheya betaq sipo Betania ka Yesu. Kiya de hmkero baga na ma smbleyaq dmurun dheya. 51Smbleyaq dmurun ciida, mlatac dheya ka heya. Wada desun baro ka heya da. 52Thmuku heya ka dheya ma tqqaras bale mosa dungal Yerusalem, 53meniq Sapah Thmkuwan klaali tmdahu Utux Baro.

Currently Selected:

Ruka 24: Stgdaya

Highlight

Copy