Spegan 13
13
Smkagul Mpkuuruy Mremux Kenaan
(Meg 1:19-33)
1Rmengo Moseh ka Utux Tmninun: 2“Isu we skagul seediq mpkuuruy dxeral Kenaan bbege mu seediq Israel. Txtaxa pnswayan pusu rudan we mpskagul 1 heyi, kiya ka mdudul pnswayan pusu rudan daha.” 3Muyu tnugesa Utux Tmninun ka Moseh, peeyah tadus brenux Paran smkagul dheya. Dheya nii we mdudul seediq Israel ka dheya. 4Ngayan daha we so nii:
Quri pnswayan rudan Reuben we Samua laqi Jakur.
5Quri pnswayan rudan Simeon we Sapa laqi Xori.
6Quri pnswayan rudan Yehudah we Kaleb laqi Yepuneh.
7Quri pnswayan rudan Yisaskar we Yigal laqi Yose.
8Quri pnswayan rudan Eprayim we Hosea laqi Nun.
9Quri pnswayan rudan Binyamin we Paltiy laqi Rapu.
10Quri pnswayan rudan Jebulun we Gadiel laqi Sodiy.
11Quri pnswayan rudan Yosehu we kiya ka pnswayan rudan Menaseh we Gadi laqi Susiy.
12Quri pnswayan rudan Dan we Amiel laqi Gemaliy.
13Quri pnswayan rudan Aser we Setur laqi Mikael.
14Quri pnswayan rudan Naptaliy we Naxbiy laqi Wapsiy.
15Quri pnswayan rudan Gad we Geuel laqi Makiy.
16Kana ngayan nii we kiya ka snkgulan Moseh mpkuuruy dxeral kiya. Ngalan na Yehosua tmngayan ka Hosea laqi Nun.
17Smkagul dheya mmaha kmuuruy dxeral Kenaan ka Moseh, rmengo dheya: “Osa mgkala Negeb hiya ka yamu ma osa steetu dgiyaq hiya. 18Qtai hmuwa mesa ka dxeral kiya: Seediq meniq hiya we ya ga mbeyax ma ya ga muuwic ho? Ya hbaro ya hgeho ho? 19Dxeral gaga daha niqan we ya malu ma ya naqah ho? Alang nniqan daha we ya ga pkobu ma ye ga phradan mtqiri ka alang ho? 20Dxeral daha we ya dxeral malu ma ya mqqahur ho? Gaga hrean qhuni ma ya uka qhuni ho? Kremun ba mosa ka yamu ma, adis ka duma heyi pnhgalang dxeral hiya.” Ciida we pkelu mhada lipas.
21Mosa kmuuruy dxeral kiya ka dheya, peeyah tadus brenux Cin moda Rexob ma, betaq dxeral tmayan Xamat. 22Steetu peeyah Negeb ka dheya dehuk Xebron. Gaga meniq hiya we tnpusu rudan Anaq, kiya ka seediq Aximan, Sesay ma, Talmay. Alang Xebron we pnlaale 7 smmalu dhaka Coan alang Micrayim. 23Dehuk ayu Eskol ka dheya de sqitun daha ka cida lipas gaga thiqan 1 tnunan heyi ma tlbuan daha phelan mheal 2 heyi. Kiya ma madis duma qutirodux ma heyi qhuni nunuh. 24Seediq Israel we peeyah hiya smneqic 1 gelang lipas, kiya de Eskol kesun daha tmngayan ka dxeral kiya.
Meyah Smneeru ka Dmpkuuruy
25Bobo 40 ali nsaan daha kmuuruy ka dxeral kiya de, meyah mbrinah ka dheya. 26Meyah Qades tadus brenux Paran, gaga hiya ka Moseh, Aharon ma, dseediq Israel. Kiya de meyah smneeru ka dheya ma, pqtaan daha dheya ka heyi pneeyah dxeral hiya. 27Rmengo Moseh ka dheya: “Mnosa miyan kmuuruy dxeral hiya ka yami, bale ba dxeral psbyeqan nunuh ma walu ka hiya. Nii ka pnugheyi pneeyah dxeral hiya. 28Kiya de seediq dxeral hiya we mgmanang mbeyax ma alang daha we paru ma mharac mgdehu bale. Meniq nami hiya we wada nami qtaun ka seediq Anaq. 29Gaga meniq Negeb ka seediq Amaleq. Dseediq Xet, Yebus ma, Amori we gaga meniq dgiyaq. Dseediq Kenaan we gaga meniq ssiyo rcilung ma ssiyo yayung Yarden.”
30Kaleb we pgseesu seediq meniq berah Moseh, rmengo: “Asi ta osa mangal dxeral kiya! Maha ta ngalun ka dxeral kiya.” 31Kiya de dseediq mnsuupu mosa Kaleb we rmengo: “Iya ta osa cmebu seediq hiya. Ado mgkala ita ka beyax daha.” 32Kiya de pkgarang prana rmengo dseediq Israel, naqah kari quri dxeral nsaan daha kmuuruy ka duma ckceka daha: “Ndaan miyan ma dxeral knuuruy miyan kiya we, rmequn seediq ka kiya. Kiya uri we seediq qntaan miyan hiya we tnugao seediq prparu kana. 33Seediq paru ka ntaan miyan hiya, kiya ka seediq Anaq prparu. Mntena miyan so utun qtaan ka yami. Bale ba so kiya qnita daha menan ka dheya uri.”
Currently Selected:
Spegan 13: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020