Spegan 15
15
Gaya Ssapuh
1Rmengo Moseh ka Utux Tmninun: 2“Tgsai ka seediq Israel, rngagi ka dheya. Dehuk namu dxeral bnege mu yamu ciida, 3yamu we peeyah tnbugan namu dapa ma miric mbege namu snapuh puniq Utux Tmninun. Ani snapuh psqama, snapuh spuhan bbege mnoda namu smdehu ma, snapuh pneyah lhebun. Uxe uri we snapuh bbiqun daha snseman kntmaan ciida ka snapuh sknexan bbege Utux Tmninun. 4Mege namu snapuh we, asi ka sbege Utux Tmninun ka 1 tnugmxalan igipa nemu mugi ma, 1 tnugspatan sin sino ngalun snapuh pnhgalang. 5Ani snapuh psqama ma mege snapuh we, asi ka psramal 1 tnugspatan sin sino ngalun snapuh sino ka knkingal wawa miric. 6Asi ka psramal 2 tnugmxalan igipa nemu mugi ka knkingal balas miric rudu ma, 1 tnugtruwan sin abura ngalun snapuh pnhgalang. 7Kiya ma 1 tnugtruwan sin sino ngalun snapuh sino ngalun snapuh sknexan bbege Utux Tmninun. 8Psramal su dapa balas bbege su snapuh psqama ma snapuh Utux Tmninun we, gisu su mbrinah mege sndhegan su, uxe uri we snapuh ptbale. 9Kiya ma ngali snapuh pnhgalang ka 3 tnugmxalan igipa nemu mugi ma, dmeka 1 sin ka abura ngalun snapuh pnhgalang. Nii we ptheyaq balas dapa mege. 10Kiya ma ngali snapuh sino ka dmeka 1 sin sino ngalun snapuh sknexan bbege Utux Tmninun.
11Mege namu dapa balas, baus miric rudu, wawa miric rudu ma, wawa miric we, asi ka muyu namu so nii moda. 12Ani knhenu ka bnege namu we, pdai so bnege namu, pygaani so kiya moda kana. 13Kana snapuh sknexan bbege daha Utux Tmninun ka dseediq meniq hini we, asi ka so nii moda kana. 14Nasi meniq yamu hiya ka dseediq icil, uxe uri we bsiyaq riyung meniq ckceka namu ka duma seediq ge, mkmege snapuh sknexan Utux Tmninun ka dheya we, puyu so ndaan namu, kuso kiya moda uri. 15Quri so seediq, ani yamu ma dseediq tnooda pneeyah icil we, asi ka muyu gaya ma pntena nii kana. Gaya namu betaq ani knuwan ka nii. Meniq namu berah Utux Tmninun, hmuwa mesa ka ddaun namu we, asi ka so kiya mooda ka dseediq tnooda hiya uri. 16Yamu ma dseediq tnooda yamu hiya we, mntena ka gaya ma gaya bneku pyugun namu.”
17Rmengo Moseh ka Utux Tmninun: 18“Tgsai ka seediq Israel, rngagi ka dheya: Dehuk namu dxeral dnudul maku psteme ciida, 19mekan namu uqun nangal peeyah dxeral hiya ciida we, asi namu ka sbege Utux Tmninun ka snapuh pheyu. 20Angal mugi pnllayan mangal ptnemu namu mugi ma, smlei pang ngalun snapuh pheyu. Phyegun namu baro, mntena so snapuh pheyu meniq sbetan mugi hiya. 21Yamu ge, pang snmalu nemu mugi pneyah pnllayan mangal ka ngali snapuh pheyu bege Utux Tmninun knkingal knxalan ani betaq knuwan.
22Nasi namu mqnuuqu ma ini namu dai kana ka pnosa kari Utux Tmninun rnengo na Moseh. 23Kiya ka kana pnosa kari Utux Tmninun rnengo na Moseh pneyah ali ciida betaq ani knuwan. 24Nasi ini daha klai wada moda qnuuqu noda daha ka seediq, kana seediq de asi ka madis 1 wawa dapa balas ngalun snapuh psqama. Puyu gaya bneku ptheyaq mege snapuh sknexan Utux Tmninun ka snapuh pnhgalang ma snapuh sino. Kiya uri ma, bege 1 balas dapa ngalun snapuh psruwan qnquwan noda. 25Msapuh we asi ka psrwaun kana ka qnquwan noda seediq Israel. Kiya de maha ssrwaun ka qnnaqah daha. Uxe daha mnnangi moda ka qnquwan noda. Quri so qnquwan noda, uxe daha mnnangi moda we, asi ka mege snapuh psqama ma snapuh psruwa qnquwan noda desun daha berah Utux Tmninun. 26Kana seediq Israel ma dseediq icil tnooda hiya de maha srwaun, ado qnquwan noda daha we uxe daha mnnangi moda ka dheya.
27Nasi niqan ka seediq uxe na kmnseung ka qnquwan noda na de, asi ka mege 1 knkawas bubu miric ngalun na snapuh psruwa qnquwan noda. 28Seediq uxe mnseung moda qnquwan noda nii ge, msapuh we asi ka moda psruwa qnquwan daha meniq berah Utux Tmninun, kiya de maha srwaun ka dheya di. 29Seediq Israel meniq hini ma seediq icil tnooda ge, nasi uxe daha mnseung ka qnquwan noda daha we, asi ka muyu gaya mntena kana. 30Kiya de nasi mnsengun moda qnquwan noda ka seediq, ani seediq hini ma seediq tnooda smrutiq ngayan Utux Tmninun de, asi ka phqilun peeyah ckceka seediq. 31Ado smbiciq qmita kari Utux Tmninun ka heya ma, tbrinah pnosa kari Utux Tmninun. Seediq nii we asi ka phqilun. Qnquwan noda na we maha heyi na nanak.”
Seediq Tbrinah Ali Sngayan
32Meniq tadus brenux ka seediq Israel ciida, qtaan daha ka 1 seediq gisu lmamu qhuni ali sngayan. 33Seediq qmnita na we desun daha berah Moseh, Aharon ma, kana seediq hiya ka seediq lnamu qhuni. 34Shetur daha sapah kuung ka heya, ado ini daha klai huwa daha kesun pkdira ka heya. 35Rmengo Moseh ka Utux Tmninun: “Seediq nii we asi ka phqilun. Buun btunux phqilun kana seediq bukuy kobu ka heya.” 36Kiya de kana seediq we desun daha bukuy kobu phqilun daha btunux ka heya. Nii we pnuyu daha kari Utux Tmninun rnengo na Moseh.
Gaya Palic Rila Lukus
37Rmengo Moseh ka Utux Tmninun: 38“Tgsai ka seediq Israel, rngagi ka dheya. Lukus daha we asi ka ssais daha palic rila ka muxi lukus ma, pniqi snuyuk mblawa ka ssiyo na betaq ani knuwan knxalan. 39Asi namu llihun ka palic lukus nii. Qmita namu du we lnglungun namu kana ka pnugaya Utux Tmninun ma ppyugun namu. Ini namu puyu lhebun namu nanak ma, kmbesu doriq namu kmhemuc msuupu mtaqi. 40So kiya de, maha namu klaun ma pyugun namu ka kana pnosa mu kari. Prtaso namu mpnuUtux Baro namu.
41Yaku we Utux Tmninun, Utux Baro namu. Dmnudul ku yamu mlatac peeyah dxeral Micrayim ma mpuUtux Baro namu. Yaku we Utux Tmninun, Utux Baro namu.”
Currently Selected:
Spegan 15: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020