Spegan 22
22
Mlawa Bilam ka Qbsuran Paru Moab
1Theruy ka seediq Israel, betaq pkobu brenux Moab, quri nklaan hido yayung Yarden sipo Yerixo. 2Balaq laqi Cipor qmnita kana ndaan dseediq Israel quri seediq Amori. 3Ado hbaro riyung ka seediq Israel de miicu riyung ka Moab. Ado seediq Israel betaq pkrkerang miicu ka Moab. 4Rmengo ddrudan Midyan ka Moab: “Saya, dseediq nii we maha cmehaq kana ssiyo nami, mntena so dapa mekan kana speriq qnpahan.”
Ciida, Balaq laqi Cipor ka qbsuran paru Moab. 5Smkagul seediq mosa Petor ssiyo yayung Paru betaq alang Bilam laqi Beor. Mlawa Bilam ma rmengo: “Tai! Niqan 1 rahul seediq mnlatac pneyah Micrayim. Tai! Betaq qmhedu meniq dxeral, gisu meniq sipo mu. 6Saya, meyah ku mlawa sunan, syusi ka dseediq nii. Ado mgkala yaku beyax daha ka dheya. Uxe uri we ini mu baka mccebu ka dheya de, lwaqun mu peeyah dxeral hini. Ado klaun mu, psbleyaq su ima ka isu de, mpbleyaq ka heya. Ima ka syusan su we, maangal snyusan ka heya.”
7Ddrudan mpdudul Moab ma Midyan we madis pila bbege daha mpsbunul meyah Bilam hiya. Srengo daha heya ka kari Balaq. 8Rmengo dheya ka Bilam: “Krabi hini ka saya han, huwa mesa rrengo na kenan ka Utux Tmninun we rengo mu yamu.” Kiya de mkrabi hiya ka dqbsuran mpdudul Moab. 9Meyah Bilam hiya ka Utux Baro, rmengo: “Ima ka gaga meniq sunan hini?” 10Cmiyuk Utux Baro ka Bilam: “Balaq laqi Cipor qbsuran paru Moab we pnatis patis kenan: 11‘Tai! Seediq mnlatac pneyah Micrayim we gisu stenge bobo dxeral. Braho su, saya we syusi ka dheya, nhuwa ku mbeyax mccebu dheya ma lwaqun mu dheya.’” 12Rmengo Bilam ka Utux Baro: “Iya theyaq dheya mosa ka isu, iya syusi ka dseediq nii uri. Ado dseediq gaga sbleqan ka dheya.” 13Mtutuy mgrebu ka Bilam de, meyah rmengo dqbsuran mpdudul Balaq: “Osa mbrinah sapah namu han! Ado Utux Tmninun we ini sruwa kenan posa ptheyaq yamu.” 14Mtutuy ka dqbsuran mdudul Moab ma, meyah smneeru Balaq hiya: “Bilam we ini sruwa theyaq menan meyah.”
15Kiya de Balaq we mgkala hiya dungal qbsranan mdudul niqan ngayan seediq ka skgulan na. 16Mosa Bilam hiya ka dheya, rmengo heya: “Balaq laqi Cipor we so nii kari na: ‘Braho misu bale, iya hetur meyah kenan ho? 17Pkblequn misu mege paru ngayan. Ani maanu ka kmngalun su we bege mu sunan kana. Wano ba eyah cmiyus seediq nii ka isu’” 18Rmengo dqbsuran dmdudul Balaq ka Bilam: “Ani na sbege yaku kana ka king ma ging sapah na ka Balaq ge, uxe ku pqeepah ani maanu tbrinah tnugesa Utux Tmninun, Utux Baro mu. 19Yamu uri we krabi hini keeman saya. So maha mu klaun mmaanu ka rrengo na kenan ka Utux Tmninun.” 20Rabi ciida, meyah Bilam hiya ka Utux Baro, rmengo: “Meyah mesa riyung sunan ka dheya de, tutuy ma theyaq mosa dheya. Kiya de asi su ka muyu tnugesa mu moda ka isu.”
Bilam ma Dapa Roba na
21Mtutuy mgrebu ka Bilam de, psramal dapa roba. Mtheyaq dqbsuran mdudul Moab mosa ka heya. 22Ado wada ka heya de, mseang ka Utux Baro. Mheyu tudu ba elu hmetur heya ka snkgulan Utux Tmninun. Paapa dapa roba ka heya ma, smnegul heya ka 2 tnqliyan. 23Dapa roba we qtaan na gisu mheyu tudu elu ka snkgulan Utux Tmninun ma, baga na we gaga hmgeluq dmoi hlmadac de, tsridil peeyah elu mremux qnpahan. Smebuc dapa roba ka Bilam ma, satang na pbrnahun elu ka heya. 24Mheyu dgehing ba elu cenga qnpahan lipas pnhradan ssiyo ka snkgulan Utux Tmninun. 25Qmita snkgulan Utux Tmninun ka dapa roba de psdahar pnharac ka heyi na. Kiya de tsapil ba cenga hiya ka papak Bilam. Smebuc dapa roba dungal ka Bilam. 26Mquri berah dungal ma mosa mheyu dgehing elu ka snkgulan Utux Tmninun. Uka klaan mspgeriq ssiyo ka elu hiya. 27Qmita snkgulan Utux Tmninun ka dapa roba de, asi tskemu toma Bilam. Mseang riyung ka Bilam ma, mangal hukuc beebu dapa roba. 28Utux Tmninun we rmaguh quwaq dapa roba ma, rmengo Bilam: “Maanu ka wada mu daun sunan, betaq su so nii smebuc mn3 kenan ho?” 29Cmiyuk dapa roba ka Bilam: “Ado gisu su tmsiiyax kenan ka isu. Nasi niqan hlmadac ka baga mu de, naka misu phqilun da.” 30Rmengo Bilam ka dapa roba: “Uxe dapa roba saku ka yaku ma, tnpaan saku peeyah slaqi betaq ali saya peni? Wada ku so nii sunan klaali peni?” Cmiyuk ka heya: “Uka.”
31Kiya de pkledax doriq Bilam ka Utux Tmninun. Qtaan na gisu mheyu ceka elu ka snkgulan Utux Tmninun ma, baga na we gaga hmgeluq hlmadac. Asi tqtemaq dxeral thmuku ka heya. 32Rmengo heya ka snkgulan Utux Tmninun: “Hmuwa, ma su wada mn3 smebuc dapa roba su ho? Tai! Meyah ku hmetur isu, ado wada mridil ka elu berah mu nii da. 33Qmnita kenan ka dapa roba de, mn3 tgkiwax kenan. Nasi ini tgkiwax kenan ka dapa roba de, naka misu phqilun ma pkdusun mu ka heya.” 34Rmengo snkgulan Utux Tmninun ka Bilam: “Niqan qnquwan noda mu da. Ini ku kela gisu su mheyu ceka elu ma hmetur kenan ka isu. Saya, nasi su taan mqnuuqu de, mpbrinah ku dhenu.” 35Rmengo Bilam ka snkgulan Utux Tmninun: “Osa ka isu ma dseediq nii! Wano kari rnengo mu sunan ka rrngaani.” Kiya de msuupu dqbsuran mdudul Balaq wada ka Bilam da.
Mqaras Smterung ka Balaq
36Balaq we, mbahang gisu nii ka Bilam de, mosa smterung heya meniq alang paru Moab ka heya. Alang nii we gaga meniq ayus dxeral ssiyo yayung Arnon hiya. 37Rmengo Bilam ka Balaq: “Uxe ku nii ptkeeyux smkagul seediq mosa isu hiya ma, mlawa isu peni? Ma su ini eyah kenan hini ho? Uxe ku mbege paru knledax sunan ka yaku peni?” 38Cmiyuk rmengo Balaq ka Bilam: “Tai! Gisu ku hini ka yaku da! Saya, mptduwa ku mmhemuc rmengo peni? Kari maanu ka pnosa na quwaq mu ka Utux Baro de, kiya ka rrengo mu.” 39Theyaq mosa Balaq ka Bilam ma, dehuk Qiryat Hucot. 40Phuqil dapa ma miric ngalun na snapuh ka Balaq. Sbege na Bilam ma dqbsuran mdudul tnheyaq heya.
Mnugaya Rmengo Kari Pgeela ka Bilam
41Mgrebu so kusun, Balaq we madis Bilam mosa Bamot Baal. Peeyah hiya we qtaan ka duma dseediq Israel.
Currently Selected:
Spegan 22: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020