Spegan 3
3
Lqlaqi Aharon
1Ali ka rmnengo Moseh meniq dgiyaq Sinay Utux Tmninun. So nii ka lqlaqi laqi Aharon ma Moseh: 2So nii ka ngayan lqlaqi Aharon, Nadab laqi na tgqbsuran ma Abihu, Elajar ma, Itamar. 3Dheya nii we lqlaqi Aharon ka cnwiqan abura mrtaso ma, mnangal qpahan msapuh pnheyu Moseh. 4Nadab ma Abihu we bnege mmhemuc puniq quri Utux Tmninun meniq Sinay tadus brenux ciida. Kiya de mhuqil berah Utux Tmninun. Uka laqi ka dheya. Elajar ma Itamar we qmeepah msapuh meniq berah Aharon tama daha ka dheya.
Qpahun Seediq Lewiy
5Rmengo Moseh ka Utux Tmninun: 6“Adis berah ka tnpusu rudan Lewiy, heyu berah Aharon msapuh ma mdayo heya. 7Mpririh heya ma kana seediq mpqeepah ddaun berah kobu mrtaso ma mooda ooda quri msapuh. 8Mpqlahang kana qyqeya kobu mrtaso ka dheya. Mdayo moda ooda ddaun kobu mrtaso dseediq Israel. 9Bqani Aharon ma lqlaqi na ka seediq Lewiy. Ado dheya we gneegan peeyah ckceka seediq Israel mpnuAharon ka dheya. 10Pqlhangi bale qpahun msapuh ka Aharon ma lqlaqi na. Meyah berah mu ka dseediq icil we asi ka phqilun.”
11Rmengo Moseh ka Utux Tmninun, 12“Tai! Gneegan mu peeyah ckceka seediq Israel ka seediq Lewiy, mpririh kana tgqbsuran lqlaqi seediq Israel. Mpnaku ka seediq Lewiy. 13Ado tgqbsuran ba laqi we nnaku kiya. Phuqil ku kana tgqbsuran meniq Micrayim ciida, wada mu psnakun mrtaso mpnaku ka tgqbsuran ckceka Israel, ani seediq ma tnbugan. Mpnaku ka dheya Kiya de saya we mpririh tgqbsuran seediq Israel ka seediq Lewiy ma mpnaku ka dheya. Yaku we Utux Tmninun.”
Smepu Dseediq Lewiy
14Utux Tmninun we rmnengo kari Moseh Sinay tadus brenux hiya: 15“Pdai tnsapah ma pnswayan pusu rudan smepu ka seediq Lewiy. Kana hmrinas 1 idas ka rseno we spegi kana.” 16Kiya de muyu kari Utux Tmninun ka Moseh ma, spooda tnugesa na moda smepu dheya. 17Lqlaqi Lewiy we Gerson, Qahat ma Merariy. 18Spooda tnpusu rudan, laqi Gerson we Libniy ma Simiy. 19Spooda tnpusu rudan, laqi Qahat we Amram, Yichar, Xebron ma Ujiel. 20Spooda tnpusu rudan, laqi Merariy we Maxliy ma Musi. Spooda tnpusu rudan, kana nii we tnpusu rudan dseediq Lewiy ka nii.
21Quri so Gerson we tnpusu rudan Libniy ma Simiy. Dheya we tnpusu rdrudan Gerson. 22Snpegan kana ka hmrinas 1 idas rseno daha we 75'00 heyi. 23Seediq Gerson we asi ka meniq pryaxan hido, pkobu bukuy kobu mrtaso ka dheya. 24Qbsuran mdudul tnsapah Gerson we Elyasap laqi Lael. 25Qpahun lqlaqi laqi Gerson meniq ckceka kobu mrtaso we, mpqlahang kobu mrtaso, bubung kobu, bubung kobu mpgbaro ma qeerung rhengun kobu mrtaso, 26kobu mrtaso ma pala mtqiri spuhan ma qeerung rhengun nganguc, kana snuyuk ddooyun ka dheya.
27NQahat we seediq Amram, Yichar, Xebron ma, Ajiel. Kingal rudan Tnsapah Qahat ka dheya. 28Kana snpegan hmrinas 1 idas ka rseno daha we 86'00 heyi. 29Lqlaqi laqi kingal rudan tnsapah Qahat we asi ka pkobu tgrahuc kobu mrtaso hiya. 30Qbsuran mdudul tnsapah Qahat we Elicapan laqi Ujiel. 31Qpahun daha we mpqlahang kulu pnsdhegan, psaan spuhan, pcmagan, spuhan, qyqeya ddooyun smapuh mrtaso truma ma qeerung rhengun pusu mrtaso truma ma, kana ooda quri qyqeya ka dheya. 32Qbsuran kana dqbsuran seediq Lewiy we Elajar laqi Aharon. Heya we mpqlahang dseediq gaga qmeepah Mrtaso Truma.
33NMerariy we seediq Maxliy ma Musi. Tnsapah Merariy ka dheya. 34Kana snpegan hmrinas 1 idas ka rseno daha we 62'00 heyi. 35Qbsuran mdudul Merariy we Curiel laqi Abihayil. Pkobu daya kobu mrtaso ka dheya. 36Qpahun lqlaqi laqi Merariy we mpqlahang qrtinuh qnabil, rgero, eruc ma tluungan niqan doriq eruc kobu mrtaso ma, kana qyqeya ddooyun smalu. Mpqeepah qpahun qyqeya quri so nii ka dheya. 37Dungal we eruc, tluungan eruc niqan doriq, xiluy ma negul.
38Pkobu meniq berah kobu mrtaso nklaan hido mquri nklaan hido we Moseh, Aharon ma, lqlaqi Aharon. Rmirih seediq Israel mpqlahang mrtaso kobu ka dheya. Meyah berah ka seediq icil we asi ka phqilun. 39Kana ka snpegan seediq Lewiy, kiya ka pnuyu daha Moseh ma Aharon tnugesa Utux Tmninun, spooda daha kingal rudan tnsapah smepu ka hmrinas 1 idas rseno daha we 2 mang 20'00 heyi.
Rmirih Laqi Tgqbsuran ba ka Seediq Lewiy
40Rmengo Moseh ka Utux Tmninun: “Kana hmrinas 1 idas ka rseno seediq Israel we, sai smepu ma ptasi ka ngayan daha. 41Yaku we Utux Tmninun. Geegi ka seediq Lewiy mpnaku ma mpririh kana tgqbsuran laqi rseno seediq Israel. Dungal we tnbugan dseediq Israel we mpririh kana tgqbsuran tnbugan dseediq Israel.” 42Moseh we muyu tnugesa Utux Tmninun moda smepu kana tgqbsuran seediq Israel. 43Spooda ngayan seediq smepu ka kana hmrinas 1 idas rseno we 2 mang 22'73 heyi.
44Rmengo Moseh ka Utux Tmninun, 45“Geegi ka seediq Lewiy mpririh kana tgqbsuran laqi rseno seediq Israel. Kiya uri ma ngali ka tnbugan dseediq Lewiy mpririh kana tnbugan dseediq Israel. Mpnaku ka seediq Lewiy, yaku ka Utux Tmninun. 46Kneegu tgqbsuran laqi rseno seediq Israel we hmrinas 2'73 heyi kneegu seediq Lewiy. Heyi seediq hmrinas nii we asi ka rrihan maruy pila. 47Spooda rseno ma sneengan skere nniqan mrtaso, txtaxa namu we asi ka mege 5 skere pila. 48Pila pnririh namu maruy dseediq hmrinas nii we asi namu ka sbege Aharon ma lqlaqi na.” 49Kiya de Moseh we maangal pila pnririh daha maruy ka dseediq hmrinas dseediq Lewiy. 50Spooda rseno pnlaale ba mtuting seediq Israel nangal daha ging ma, nuyu daha skere nniqan mrtaso we 13'65 skere pila. 51Muyu kari Utux Tmninun ka Moseh, sbege na Aharon ma lqlaqi na ka pila pnririh maruy. Mntena so tnugesa Utux Tmninun.
Currently Selected:
Spegan 3: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020