Spegan 30
30
Gaya Smdehu
1Rmengo dqbsuran mdudul pnswayan rudan Israel ka Moseh: “So nii ka kari rnengo Utux Tmninun. 2Nasi mquri Utux Tmninun posa kari ma smdehu ka seediq we, asi ka qmlahang dheya nanak, iya bale qberiq. Asi su ka daun ka kana rnengo su pneyah quwaq su.
3So ka weewa, meniq sapah tama na ciida han we, nasi smdehu quri Utux Tmninun ka heya de, asi ka qmlahang heya nanak. 4Mnbahang sndehu na ma kari mpqlahang heya ka tama na we, mlmelux ini tgesa ka heya de, asi ka daun ka sndehu na ma kari qmlahang heya. 5Kiya de, nasi mbahang kari na ka tama na ali ciida, kiya de ini sruwa sndehu na ma kari qlhangan na heya de, ani ini dai ka kiya di. Mpsruwa heya ka Utux Tmninun uri, ado ini sruwa ka tama na.
6Nasi wada seno ka heya de, niqan ka sndehu na de, uxe uri peeyah kmmhemuc kari qmlahang heya, 7mbahang ka seno na ali ciida ma, mmelux ini tgesa ka heya de, asi ka daun ka sndehu na ma kari qmlahang heya. 8Kiya de, nasi mbahang ali ciida ka seno na ma, ini sruwa ka heya de, wada malix sndehu na ma kmhemuc kari pnosa na ka seno na da. Utux Tmninun we mpsruwa heya uri.
9Sndhegan Mqedil mqrinuc ma mqedil wada laxan seno daha we, sndehu na ma kari mpqlahang heya we, asi ka daun na kana. 10Nasi smdehu ma wada posa kari meniq sapah seno na we, asi ka qmlahang heya nanak. 11Mnbahang ka seno na, mlmelux ini rengo heya ma, smruwa uri we, kana sndehu na ma kari mpqlahang heya we, asi ka daun na kana. 12Ali qnbhangan seno na ciida, nasi wada lixun kana de, kana sndehu na ma kari mpqlahang heya we, ani na ini dai ka kiya. Ado wada lixun seno na kana ka kiya di. Utux Tmninun we mpsruwa heya uri. 13Kana sndehu na ma kana kari pnosa na mpqlahang heya nanak we, ani nak pskere ma ani nak malix ka seno na. 14Kiya de, nasi mlmelux klaali ka seno na de, ririh gisu pskere kana sndehu na ma kana kari mpqlahang heya nanak kiya di. Ado ali qnbhangan na ciida we mlmelux ka seno na. Kiya de gisu pskere kari nii kiya di. 15Kiya de, nasi mnbahang ka rseno na, hani malix bobo ali nii de, asi ka mheal qnquwan noda mqedil nii ka heya da.”
16Quri so gaya mqedil rseno, weewa tama ma, weewa ini osa seno ka nii. Tnugesa Utux Tmninun rnengo na Moseh ka gaya nii.
Currently Selected:
Spegan 30: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020