ಲೂಕೆ 13
13
ಪಶ್ಚಾತಾಪ ಪಡೆಲೆ ಇಜ್ಜಾಂಡ ಸೈಪರ್
1ಅವ್ವೆ ಪೊರ್ತುಡು ಕೆಲೆವೆರ್ ಯೇಸುನ ಕೈತಲ್ ಇತ್ತ್‌ದ್ ಪಿಲಾತೆ ಗಲಿಲಾಯದಾಕುಲೆನ ನೆತ್ತೆರ್‌ನ್ ಅಕುಲು ಬಲಿ ಕೊರಿನ ನೆತ್ತೆರ್‌ದ ಒಟ್ಟುಗು ಬೆರಕೆ ಮಲ್ತಿನೆನ್ ಯೇಸುಗು ತೆರಿಪಾಯೆರ್. 2ಐಕ್ ಆಯೆ ಅಕ್ಲೆಗ್, “ಆ ಗಲಿಲಾಯದಾಕುಲು ಅಂಚಿತ್ತಿ ಮಾನ್ಯ ಕೆರ್ಪಿನೆನ್ ಅನುಭವ ಮಲ್ತಿನೆಡ್ದ್ ಅಕ್ಲೆನ್ ಮಾತೆರೆನ್ ಗಲಿಲಾಯದಾಕುಲೆಡ್ದ್ ಪಾಪಿಷ್ಟೆರ್ ಅಂದ್‌ದ್ ಎನ್ನುವರಾ? 3-4ಇಜ್ಜಿ, ಅಂಚ ಎನ್ನಡೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ಪಶ್ಚಾತಾಪ ಪಡೆಯಿಜರ್ಡ ನಿಕುಲು ಮಾತೆರ್ಲಾ ಅಂಚೆನೇ ನಾಶಾದ್ ಪೋಪರ್, ಇಜ್ಜಿಡ, ಸಿಲೊವಾಮುಡು ಗೋಪುರ ಬೂರ್ದು ಸೈತಿ ಪದಿನೆಣ್ಮ ಜನೊಕುಲು ಯೆರೂಸಲೇಮುಡುಪ್ಪು ಮಾತ ನರಮಾನಿಲೆಡ್ದ್ ಮಲ್ಲ ಪಾಪಿಷ್ಟೆರ್ ಅಂದ್‌ದ್ ಎನ್ನುವರಾ? 5ಅಂಚ ಅತ್ತ್; ನಿಕ್ಲೆಗ್ ಪನ್ಪೆ, ಪಶ್ಚಾತಾಪ ಪಡೆಯಿಜರ್ಡ ನಿಕುಲು ಮಾತೆರ್ ಅಕ್ಲೆನ ಲೆಕ್ಕ ನಾಶಾದ್ ಪೋಪರ್,” ಅಂದ್‌ದ್ ಪಂಡೆ.
6ಐಡ್ದ್ ಬೊಕ್ಕ ಆಯೆ ಒಂಜಿ ಉಪಕತೆನ್ ಪಂಡೆ ಅವು ದಾನೆಂದ್ಂಡ, “ಒರಿ ತನ ದ್ರಾಕ್ಷೆತೋಟೊಡು ಒಂಜಿ ಅಂಜೂರದ ಮರೊನು ನಡ್ಪಾದಿತ್ತೆ. ಐಟ್ಟ್ ಪರ್ಂದ್ ಉಂಡಾ ಅಂದ್‌ದ್ ನಾಡೊಂದು ಬತ್ತೆ. ಆಂಡ ಆಯಗ್ ತಿಕ್ಕಿಜಿ; 7ಆಯೆ ತೋಟದ ಬೇಲೆದಾಯಡ, ‘ತೂಲ, ಯಾನ್ ಮೂಜಿ ವರ್ಸೊಡ್ಚಿಂಚಿ ಈ ಅಂಜೂರದ ಮರೊಟು ಪರ್ಂದ್ ನಾಡ್ಯೆ. ಆಂಡ ಎಂಕ್ ಇದ ಮುಟ್ಟ ತಿಕ್ಕ್‌ಜಿ. ಉಂದೆನ್ ಕಡ್ತ್‌ದ್ ಪಾಡ್; ಉಂದೆಡ್ದ್ ಭೂಮಿ ದಾಯೆ ಬಂಜೆ ಆವೊಡು,’ ಪಂಡ್ದ್ ಪಂಡೆ. 8ಐಕ್ ಆ ಬೇಲೆದಾಯೆ, ‘ಕರ್ತವಾ, ಈ ವರ್ಸ ಉಂದೆನ್ ಬುಡ್ಕ; ಯಾನ್ ನೆತ್ತ ಸುತ್ತಲಾ ಗರ್ತ್‌ದ್ ಗೊಬ್ಬರ ಪಾಡುವೆ. 9ದುಂಬಗ್ ಕಾಯಿ ತೋಜಿಜಿಂಡ ಅವೆನ್ ಕಡ್ತ್ ದಕ್ಕ್‌ಗ,’” ಅಂದ್‌ದ್ ಉತ್ತರ ಕೊರಿಯೆ.
ಸಬ್ಬತ್‌ದಿನೊಟು ಪೊಂಜೊವುನು ಗುಣ ಮಲ್ತಿನವು
10ಸಬ್ಬತ್‌ದಿನೊಟು ಯೇಸು ಒಂಜಿ ಸಭಾಮಂದಿರೊಡು ಬೋಧನೆ ಮಲ್ತೊಂದಿತ್ತೆ. 11ಅಲ್ಪ ಪದಿನೆಣ್ಮ ವರ್ಸೊಡ್ದಿಂಚಿ ದುರಾತ್ಮ ಪತ್ತ್‌ದಿತ್ತಿ ಒರ್ತಿ ಪೊಂಜೊವು ಇತ್ತಲ್. ಆಲ್ ಬಗ್ಗ್‌ದ್ ಪೋದು, ಸೊಂಟ ಸರ್ತ ಮಲ್ಪೆರೆ ಆವೊಂದು ಇಜ್ಜಾಂಡ್. 12ಯೇಸು ಆಲೆನ್ ತೂದು ಕೈತಲ್ ಲೆತ್ತ್‌ದ್ ಆಲೆಗ್, “ಅಮ್ಮಾ, ನಿಕ್ಕ್ ಸೀಕ್‌ಡ್ದ್ ಬುಡುಗಡೆ ಆಂಡ್,” ಪಂಡ್ದ್ ಆಲೆನ ಮಿತ್ತ್ ಕೈ ದೀಯೆ; 13ದೀಯಿ ಕೂಡ್ಲೆ ಆಲ್ ಸರ್ತ ಆಯಲ್, ದೇವೆರೆನ್ ಪುಗರಿಯಲ್. 14ಆ ಸಭಾಮಂದಿರದ ಅಧಿಕಾರಿ ನಡತಿ ಸಂಗತಿನ್ ತೂದು ಸಬ್ಬತ್‌ದಿನೊಟು ಯೇಸು ಸೀಕ್‌ಲೆನ್ ಗುಣ ಮಲ್ಪುವೆ ಅಂದ್‌ದ್ ಕೋಪೊಡು ಜನೊಕುಲೆಡ, “ಬೇಲೆ ಮಲ್ಪರೆ ಆಜಿ ದಿನೊಕುಲು ಉಂಡು; ಆ ದಿನೊಲೆಡೇ ನಿಕ್ಲೆನ ಸೀಕ್‌ಲೆನ್ ಗುಣ ಮಲ್ತೊನ್ಲೆ. ಸಬ್ಬತ್‌ದಿನೊಟು ಮಾತ್ರ ಬೊಡ್ಚಿ!” ಅಂದ್‌ದ್ ಪಂಡೆ. 15ಆ ಪಾತೆರೊನು ಕೇಂಡ್ದ್ ಕರ್ತವೆ ಅಕ್ಲೆಗ್, “ನಿಕುಲು ಕಪಟಿಲು, ನಿಕ್ಲೆಡ್ ಪ್ರತಿಯೊರಿಲಾ ಸಬ್ಬತ್‌ದಿನೊಟು ತನ ಬೋರಿನಾವಡ್ ಕತ್ತೆನಾವಡ್ ಬೈಪಣೆಡ್ದ್ ಗಿರ್ತ್‌ದ್ ನೀರ್ ಪರಿಯೆರೆಗಾದ್ ಕೊನೊಪರತ್ತಾ. 16ಅಂಚಾಂಡ ಪದಿನೆಣ್ಮ ವರ್ಸೊಡ್ದಿಂಚಿ ಸೈತಾನನ ಬಂಧನೊಡು ಇತ್ತಿನಾಲಾದ್ ಅಬ್ರಹಾಮುನ ವಂಶದಾಲಾದುಪ್ಪು ಆಲೆನ್ ಸಬ್ಬತ್‌ದಿನೊಟು ಈ ಕಷ್ಟೊಡ್ದು ಬುಡ್ಪಾವೆರೆ ಬಲ್ಲಿಯಾ?” ಪಂಡೆ 17ಈ ಪಾತೆರೊಲೆನ್ ಆಯೆ ಪನೊಂದುಪ್ಪುನಗ ಆಯನ ಮಾತ ಪಗೆಮಾನಿಲೆಗ್ ನಾಚಿಗೆ ಆಂಡ್; ಅಲ್ಪ ಸೇರ್ದಿತ್ತಿ ಜನೊಕುಲು ಮಾತೆರ್ಲಾ ಆಯಡ್ದ್ ಆಪಿನ ಮೈಮೆದ ಕಾರ್ಯೊಲೆನ್ ತೂದು ಸಂತೋಷ ಪಡೆಯೆರ್.
ದಾಸೆಮಿ ಬಿತ್ತ್‌ದ ಉಪಕತೆ
(ಮತ್ತಾಯೆ 13:31,32; ಮಾರ್ಕೆ 4:30-32)
18ಬೊಕ್ಕ ಆಯೆ ಪಂಡಿನಿ, “ದೇವೆರೆ ರಾಜ್ಯ ಒಯಿಕ್ ಸಮ ಆದುಂಡು? 19ಅವೆನ್ ಯಾನ್ ಒಯಿಕ್ ಸಮ ಮಲ್ಪೊಲಿ? ಅವು ದಾಸೆಮಿದ ಬಿತ್ತ್‌ಗ್ ಸರಿ ಆದುಂಡು. ಒರಿ ನರಮಾನಿ ಅವೆನ್ ದೆತ್ತೊಂದು ಪೋದು ತನ ತೋಟೊಡು ಬಿತ್ತಿಯೆ; ಅವು ಮಲ್ಲ ಮರ ಆದ್ ಬಾನೊಡು ರಾಪಿನ ಪಕ್ಕಿಲು ಐತ ಗೆಲ್ಲ್‌ಲೆಡ್ ಗೂಡು ಕಟ್ಟ್‌ದ್ ವಾಸ ಮಲ್ಪುವ.”
ಪುಳಿಬಂದದ ಉಪಕತೆ
(ಮತ್ತಾಯೆ 13:33)
20ಬೊಕ್ಕ ಆಯೆ, “ದೇವೆರೆ ರಾಜ್ಯೊನು ಕುಡ ಒಯಿಕ್ ಸಮ ಮಲ್ಪೊಲಿ ಅಂದ್‌ದ್ ಪನ್ನಗ 21ಅವು ಪುಳಿ ಬಂದೊಗು ಸಮ ಆದುಂಡು. ಅವೆನ್ ಒಂಜಿ ಪೊಂಜೊವು ದೆತ್ತೊಂದು ಮೂಜಿ ಸೇರ್ ಬಂದೊಡು ಕಲತ್ ದೀಯಿನಪಗ ಆ ಬಂದ ಮಾತ ಪುಳಿ ಆಂಡ್ ಪಂಡೆ.”
ಇಕ್ಕಟ್ಟಾಯಿನ ಬಾಕಿಲ್‌ದ ಉಲಯಿ ಪೋವೆರೆ ಪೇಚಾಡ್ಲೆ
(ಮತ್ತಾಯೆ 7:13,14; 7:21-23)
22ಯೇಸು ಊರೂರುಗ್ಲಾ ಗ್ರಾಮಗ್ರಾಮೊಗ್ಲಾ ಪೋದು ಬೋಧನೆ ಮಲ್ತೊಂದು ಯೆರೂಸಲೇಮುದಂಚಿ ಪೋವೊಂದಿತ್ತೆ. 23ಅಪಗ ಒರಿ, “ಸ್ವಾಮಿ, ರಕ್ಷಣೆ ಹೊಂದುನಾಕುಲು ಒಂತೆ ಜನೊಕುಲು ಮಾತ್ರನಾ?” ಅಂದ್‌ದ್ ಕೇನ್ನಗ 24ಆಯೆ ಅಕ್ಲೆಗ್, “ಇಕ್ಕಟ್ಟಾಯಿ ಬಾಕಿಲ್‌ಡ್ದ್ ಉಲಯಿ ಪೋವೆರೆ ಪೇಚಾಡ್ಲೆ. ದಾಯೆಗಂದ್ಂಡ ಮಸ್ತ್ ಜನ ಉಲಯಿ ಪೋವೆರೆ ತೂಪೆರ್, ಆಂಡ ಅಕ್ಲೆಡ್ದ್ ಪೋವೆರೆ ತೀರಂದ್ ಅಂದ್‌ದ್ ನಿಕ್ಲೆಗ್ ಪನ್ಪೆ. 25ಇಲ್ಲದ ಧನಿ ಬಾಕಿಲ್ ಮುಚ್ಚಿ ಬೊಕ್ಕ ನಿಕುಲು ಪಿದಯಿ ಉಂತುದು ಬಾಕಿಲ್ ಬೊಟ್ಟೊಂದು ಕರ್ತವಾ, ‘ಎಂಕ್ಲೆಗ್ ಬಾಕಿಲ್ ಜಪ್ಪುಲೆ!’ ಅಂದ್‌ದ್ ಪನ್ನಗ ಆಯೆ ಉತ್ತರ ಕೊರ್ದು, ‘ನಿಕುಲು ಒಲ್ತಾಕುಲು, ನಿಕ್ಲೆನ ಗುರ್ತ ಎಂಕ್ ಗೊತ್ತಿಜ್ಜಿ,’ ಅಂದ್‌ದ್ ಪನುವೆ, 26ಐಕ್ ನಿಕುಲು, ‘ಎಂಕುಲು ನಿನಡೊಪ್ಪ ಉನ್ತ, ಪರ್ತ, ಎಂಕ್ಲೆನ ಊರುಡು ಈ ಬೋಧನೆ ಮಲ್ತ್‌ದ,’ ಅಂದ್‌ದ್ ಪನಿಯೆರೆ ಸುರು ಮಲ್ಪುವರ್. 27ಆಂಡ ಆಯೆ ನಿಕುಲು ಏರಾ, ‘ನಿಕ್ಲೆನ ಗುರ್ತ ಎಂಕಿಜ್ಜಿ, ಅನ್ಯಾಯ ಮಲ್ಪುನಾಕುಲೇ ನಿಕುಲು ಮಾತೆರ್ಲಾ ಎನನ್ ಬುಡ್ದು ಪೋಲೆ!’ ಅಂದ್‌ದ್ ಪನ್ಪೆ. 28ಅಬ್ರಹಾಮು, ಇಸಾಕ್ ಯಾಕೋಬು ಬೊಕ್ಕ ಮಾತ ಪ್ರವಾದಿಲುಲಾ ದೇವೆರೆ ರಾಜ್ಯೊಡು ಉಪ್ಪುನೆನ್, ನಿಕ್ಲೆನ್ ಮಾತ್ರ ಪಿದಯಿ ಪಾಡ್ದಿನೆನ್ ನಿಕುಲು ತೂನಗ ನಿಕ್ಲೆಗ್ ಅಲ್ಪ ಅರಬಾಯಿಲಾ ಕೂಲಿ ಕಡೆಪಿನವುಲಾ ಉಪ್ಪುಂಡು. 29ಮೂಡಯಿ ಪಡ್ಡಯಿ ಬಡಕಯಿ ತೆನ್‌ಕಯಿ ದಿಕ್ಕ್‌ಲೆಡ್ದ್ ಜನೊಕುಲು ಬತ್ತ್‌ದ್ ದೇವೆರೆ ರಾಜ್ಯೊಡು ವಣಸ್‌ಗ್ ಕುಲ್ಲುವೆರ್. 30ಇಂದಾ, ಕಡೆಟ್ಟ್ ಇತ್ತಿನಾಕುಲು ಸುರುತ್ತಾಕುಲು ಆಪೆರ್ ಬೊಕ್ಕ ಸುರುಟಿತ್ತಿನಾಕುಲು ಕಡೆತ್ತಾಕುಲು ಆಪೆರ್.”
ಯೆರೂಸಲೇಮುಗು ಬೋಡಾದ್ ದುಃಖ ಪಡೆಯಿನವು
(ಮತ್ತಾಯೆ 23:37-39)
31ಅವ್ವೆ ಗಳಿಗೆಡ್ ಕೆಲವು ಜನ ಪರಿಸಾಯೆರ್ ಕೈತಲ್ ಬತ್ತ್‌ದ್, “ಯೇಸುಗು ಈ ಮುಲ್ತುಡ್ದು ಪಿದಾಡ್ದ್ ಪೋ. ದಾಯೆಗಂದ್ಂಡ ಹೆರೋದೆ ನಿನನ್ ಕೆರೊಡು ಅಂದ್‌ದ್ ಉಲ್ಲೆ,” ಅಂದ್‌ದ್ ಪಂಡೆರ್. 32ಐಕ್ ಯೇಸು, “ನಿಕುಲು ಪೋಲೆ, ‘ಯಾನ್ ಇನಿಲಾ ಎಲ್ಲೆಲಾ ದೆವ್ವ ಪತ್ತ್‌ದಿನಕುಲೆನ್ ಬುಡ್ಪಾವೊಂದು ಸೀಕ್‌ಲೆನ್ ಗುಣ ಮಲ್ತೊಂದು ಇತ್ತ್‌ದ್ ಮೂಜನೇ ದಿನೊಟು ಬೇಲೆ ಪೂರ್ತಿ ಮಲ್ತ್‌ದ್ ಬರ್ಪೆ,’ ಅಂದ್‌ದ್ ಆ ಕುದ್‌ಕಗ್ ಪನ್ಲೆ. 33ಎಂಚಲಾ ಯಾನ್ ಇನಿ ಎಲ್ಲೆ ಎಲ್ಲೆಂಜಿ ಮುಲ್ಪನೇ ಪ್ರಯಾಣ ಮಲ್ಪೊಡು; ಪ್ರವಾದಿ ಆದುಪ್ಪುನಾಯೆ ಯೆರೂಸಲೇಮು ಅತ್ತಂದೆ ಬೇತೆ ಓಲುಲಾ ಕೆರ್ಪಾವುನುನವು ಸಮ ಅತ್ತ್.
34“ಯೆರೂಸಲೇಮೋ, ಯೆರೂಸಲೇಮೋ ಪ್ರವಾದಿಲೆ ಪ್ರಾಣ ದೆಪ್ಪುನಾಲೇ, ದೇವೆರ್ ನಿನ ಕೈತಲ್ ಕಡಪುಡ್ದು ಕೊರ್ತಿನಾಕುಲೆನ್ ಕಲ್ಲ್ ದಕ್ಕ್‌ದ್ ಕೆರ್ಪಿನಾಲೇ, ಕೋರಿ ತನ ಕಿನ್ನಿಲೆನ್ ರೆಂಕೆದ ಅಡಿಟ್ಟ್ ಕುಲ್ಲಾವುಲೆಕ್ಕ ನಿನ ಜೋಕುಲೆನ್ ಕುಲ್ಲಾಯೆರೆ ಎಂಕ್ ಏತೋ ಸರ್ತಿ ಮನಸಿತ್ತ್‌ಂಡ್. ಆಂಡ ನಿಕ್ಲೆಗ್ ಮನಸ್‌ದಾಂತೆ ಪೋಂಡು. 35ತೂಲೇ, ನಿಕ್ಲೆನ ಆಲಯ ಕಾಲಿ ಆದ್ ಬೂರ್ದುಂಡು. ‘ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ,’ ಪಂಡ್ದ್ ಪನ್ಪಿನ ಮುಟ್ಟ ನಿಕುಲು ಎನನ್ ತೂಪಿನೇ ಇಜ್ಜಿ,” ಅಂದ್‌ದ್ ನಿಕ್ಲೆಗ್ ಪನ್ಪೆ ಪಂಡೆ.
Currently Selected:
ಲೂಕೆ 13: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
