ಲೂಕೆ 7
7
ಶತಾಧಿಪತಿನ ಬೇಲೆದಾಯನ್ ಗುಣ ಮಲ್ತಿನವು
(ಮತ್ತಾಯೆ 8:5-13)
1ಜನೊಕುಲು ಕೇನುಲೆಕ್ಕ ತನ ಪಾತೆರೊಲೆನ್ ಪಂಡ್ದ್ ಮುಗಿತಿ ಬೊಕ್ಕ ಯೇಸು ಕಪೆರ್ನೌಮುಗು ಬತ್ತೆ. 2ಅಲ್ಪ ಸೈನಿಕೆರೆನ ಶತಾಧಿಪತಿನ ಪ್ರೀತಿದ ಚಾಕ್ರಿದಾಯೆ ಒರಿ ಸೀಕ್‌ಡ್ದ್ ಸೈಪಿಲೆಕ್ಕ ಇತ್ತೆ. 3ಶತಾಧಿಪತಿ ಯೇಸುನ ಸುದ್ಧಿನ್ ಕೇಂಡ್ದ್, ಯೆಹೂದ್ಯೆರೆ ಹಿರಿಯೆರೆನ್ ಆಯ ಕೈತಲ್‌ ಕಡಪುಡ್ದು, “ತನ ಚಾಕ್ರಿದಾಯನ್ ಗುಣ ಮಲ್ಪೆರೆ ಬರೊಡು,” ಅಂದ್‌ದ್ ಆಯಡ ನಟ್ಟೊಂಡೆ. 4ಅಕುಲು ಯೇಸು ಕೈತಲ್‌ ಬತ್ತ್‌ದ್ ಎಂಕ್ಲೆನ ಶತಾಧಿಪತಿ ನಿನಡ್ದ್ ಇಂಚಿತ್ತಿ ಉಪಕಾರೊನು ಪಡೆವೆರೆ ತಕ್ಕದಾಯೆ ಆದುಲ್ಲೆ ಪಂಡ್ದ್ ನಟ್ಟೊಂಡೆರ್. 5ಆಯೆ ಎಂಕ್ಲೆ ಇಸ್ರಾಯೇಲ ಜನೊಕುಲೆನ್ ಪ್ರೀತಿ ಮಲ್ಪುನಾಯೆ. ಆಯೆನೇ ಎಂಕ್ಲೆನ ಸಭಾಮಂದಿರೊನು ಎಂಕ್ಲೆಗಾದ್ ಕಟ್ಟಾದಿನಾಯೆ ಅಂದ್‌ದ್ ದಿಂಜ ನಟ್ಟೊನ್ನಗ 6ಯೇಸು ಅಕ್ಲೆಡೊಪ್ಪ ಪೋಯೆ. ಆಯೆ ನನಲಾ ಇಲ್ಲಗ್ ಮುಟ್ಟಿಯೆರೆ ಒಂತೆ ದೂರ ಉಪ್ಪುನಗನೇ ಶತಾಧಿಪತಿ ಆಯ ಸ್ನೇಹಿತೆರೆನ್‌ ಆಯನ ಕೈತಲ್‌ ಕಡಪುಡ್ದು, “ಕರ್ತವಾ, ಭಂಗ ದೆತ್ತೊನೊಡ್ಚಿ. ಈ ಎನ ಮಾಡ್‌ದ ಉಲಯಿ ಬರ್ಪಿನಾತ್ ಯೋಗ್ಯತೆ ಎಂಕಿಜ್ಜಿ. 7ಈ ಕಾರಣೊಡ್ದು ಯಾನ್ ನಿನ ಕೈತಲ್‌ ಬರಿಯೆರೆ ಪಿರ ನರ್ಗಿಯೆ. ಆಂಡ ಈ ಒಂಜಿ ಪಾತೆರ ಪನ್ಲ, ಎನ ಬೇಲೆದಾಯಗ್ ಗುಣ ಆವು. 8ಯಾನ್ಲಾ ಬೊಕ್ಕೊರಿಯನ ಅಧಿಕಾರದ ಉಲಯಿ ಉಪ್ಪುನಾಯೆ. ಎನ ಕೈ ತಿರ್ತ್‌ಲಾ ಸಿಪಾಯಿಲು ಉಲ್ಲೆರ್; ಯಾನ್ ಅಕ್ಲೆಡ್ ಒರಿಯಗ್ ‘ಪೋ,’ ಪಂಡ್ಂಡ ಪೋಪೆ. ಬೊಕ್ಕೊರಿಯನ್ ‘ಬಲ,’ ಪಂಡ ಬರ್ಪೆ. ಎನ ಬೇಲೆದಾಯಗ್ ಇಂಚಿತ್ತಿನೆನ್ ಮಲ್ಪು,” ಪಂಡ್ಂಡ ಮಲ್ಪುವೆ. 9ಯೇಸು ಉಂದೆನ್ ಕೇಂಡ್ದ್ ಆಯನ ಬಗೆಟ್ ಅಚ್ಚಿರ ಆದ್ ತನ ಪಿರವುಡು ಬರೊಂದಿತ್ತಿನಾಕುಲೆಗ್ ತೂದು, “ಯಾನ್ ಇಂಚಿತ್ತಿ ಮಲ್ಲ ನಂಬಿಕೆನ್ ಇಸ್ರಾಯೇಲ್ ಜನೊಕುಲೆಡ್ಲಾ ತೂತುಜಿ ಅಂದ್‌ದ್ ಯಾನ್ ನಿಕ್ಲೆಗ್ ಪನ್ಪೆ,” ಪಂಡೆ. 10ಐಡ್ದ್ ಬೊಕ್ಕ ಆ ಶತಾಧಿಪತಿ ಕಡೆಡ್ದ್ ಬೈದಿನಾಕುಲು ಪಿರ ಇಲ್ಲಗ್ ಪೋದು ತೂನಗ ಚಾಕ್ರಿದಾಯೆ ಸೌಖ್ಯ ಆದಿತ್ತಿನೆನ್ ತೂಯೆರ್.
ಕಂಡನಿದಾಂತಿನಲೆನ ಮಗನ್ ಬದುಕಾಯಿನವು
11ಒಂತೆ ಸಮಯ ಆಯಿ ಬೊಕ್ಕ ಆಯೆ ನಾಯೀನ್ ಪನ್ಪಿ ಊರುಗು ಪೋಯೆ. ಆಯಡೊಪ್ಪ ಶಿಷ್ಯೆರ್‌ನಾಕುಲುಲಾ ಬೊಕ್ಕ ಮಸ್ತ್ ಜನೊಕುಲುಲಾ ಪೋವೊಂದಿತ್ತೆರ್. 12ಆಯೆ ಊರುದ ಬಾಕಿಲ್‌ದ ಕೈತಲ್‌ ಬನ್ನಗ ಒರಿ ಸೈತಿನಾಯನ್ ಪಿದಯಿ ಕನವೊಂದಿತ್ತೆರ್. ಉಂಬೆ ತನ ಅಪ್ಪೆಗ್ ಒರಿಯೇ ಮಗೆ; ಆಲ್ ಕಂಡನಿ ಸೈತಿನಾಲಾದಿತ್ತಲ್. ಆಲೆನ ಒಟ್ಟುಗು ಊರುದ ಮಸ್ತ್ ಜನ ಇತ್ತೆರ್. 13ಕರ್ತವೆ ಆಲೆನ್ ತೂದು ಕನಿಕರೊಡು, “ಬುಲ್ಪೊಡ್ಚಿ,” ಪಂಡ್ದ್ 14ಚಟ್ಟದ ಕೈತಲ್‌ ಪೋದು ಅವೆನ್ ಮುಟ್ಟುನಗ ತುಂಬೊಂದಿತ್ತಿನಾಕುಲು ಉಂತಿಯೆರ್. ಯೇಸು ಪಂಡೆ, “ಜವನ್ಯಾ, ಯಾನ್ ನಿಕ್ಕ್ ಪನ್ಪೆ ಲಕ್ಕ್‌ಲ.” 15ಪಂಡಿನಪಗನೇ ಸೈತ್‌ದಿತ್ತಿನಾಯೆ ಲಕ್ಕ್‌ದ್ ಕುಲ್ಲೊಂದು ಪಾತೆರಿಯೆರೆ ಸುರು ಮಲ್ತೆ. ಬೊಕ್ಕ ಯೇಸು ಆಯನ ಅಪ್ಪೆಗ್ ಇಂದಾ, ನಿನ ಮಗೆ ಅಂದ್‌ದ್ ಆಯನ್ ಒಪ್ಪಿಸಾಯೆ. 16ಉಂದೆನ್ ತೂದು ಮಾತೆರ್ಲಾ ಪೋಡಿಗೆಡ್, “ಮಲ್ಲ ಪ್ರವಾದಿ ನಮಡ್ದ್ ಲಕ್ಕ್‌ದೆ. ದೇವೆರ್ ತನ ಜನೊಕುಲೆನ್ ರಕ್ಷಣೆ ಮಲ್ಪೆರೆ ಬೈದೆ,” ಅಂದ್‌ದ್ ದೇವೆರೆನ್ ಪುಗರಿಯೆರ್. 17ಈ ಸುದ್ಧಿ ಯೂದಾಯೊಡ್ಲಾ ಸುತ್ತಮುತ್ತದ ಮಾತ ಪ್ರಾಂತೊಲೆಡ್ಲಾ ಪರಡ್ಂಡ್.
ಯೇಸು ಬೊಕ್ಕ ಸ್ನಾನಿಕೆ ಯೋಹಾನನ ಶಿಷ್ಯೆರ್
(ಮತ್ತಾಯೆ 11:2-19)
18ಯೋಹಾನನ ಶಿಷ್ಯೆರ್ ನಡತಿ ಮಾತ ಸಂಗತಿಲೆನ್ ಆಯಗ್ ತೆರಿಪಾನಗ 19ಆಯೆ ತನ ಶಿಷ್ಯೆರೆಡ್ದ್ ಇರ್ವೆರೆನ್ ಲೆತ್ತ್‌ದ್, “ಬರ್ಪಿನಾಯೆ ಈಯೆನಾ, ಎಂಕುಲು ಬೊಕ್ಕೊರಿಯನ ಸಾದಿನ್ ತೂವೊಡಾ?” ಅಂದ್‌ದ್ ಕರ್ತವಡ ಕೇನಿಯೆರೆ ಅಕ್ಲೆನ್ ಕಡಪುಡಿಯೆ. 20ಅಕುಲು ಆಯನ ಕೈತಲ್‌ ಬತ್ತ್‌ದ್, “ಬರ್ಪಿನಾಯೆ ಈಯೆನಾ? ಎಂಕುಲು ಬೊಕ್ಕೊರಿಯನ ಸಾದಿನ್ ತೂವೊಡಾ, ಅಂದ್‌ದ್ ಕೇನಿಯೆರೆಗಾದ್ ಸ್ನಾನಿಕೆ ಯೋಹಾನೆ ಎಂಕ್ಲೆನ್ ನಿನ ಕೈತಲ್‌ ಕಡಪುಡುದೆ,” ಪಂಡೆರ್. 21ಆ ಗಳಿಗೆಡ್ ಆಯೆ ಮಸ್ತ್ ಜನೊಕುಲೆನ್ ಸೀಕ್‌ಲೆಡ್ದ್, ದೆವ್ವದ ಉಪದ್ರೊಲೆಡ್ದ್, ದುರಾತ್ಮೊಲೆಡ್ದ್ ಬುಡ್ಪಾದ್ ಗುಣ ಮಲ್ತೊಂದಿತ್ತೆ; ಬೊಕ್ಕ ಮಸ್ತ್ ಜನ ಕುರುಡೆರೆಗ್ ಕಣ್ಣ್‌ನ್ ಒದಗಾದ್ ಕೊರಿಯೆ. 22ಇಂಚ ಉಪ್ಪುನಗ ಆಯೆ ಅಕ್ಲೆಗ್, “ನಿಕುಲು ಪೋದು ತೂದು ಕೇಂಡಿನೆನ್ ಮಾತೆನ್ ಯೋಹಾನಗ್ ತೆರಿಪಾಲೆ. ಕುರುಡೆರೆಗ್ ಕಣ್ಣ್ ತೋಜುಂಡು, ಕುಂಟೆರೆಗ್ ಕಾರ್ ಬರ್ಪುಂಡು, ಕೊಷ್ಟದಾಕುಲು ಶುದ್ಧ ಆಪೆರ್, ಕೆಪ್ಪೆರೆಗ್ ಕೆಬಿ ಕೇನುಂಡು. ಸೈತಿನಾಕುಲು ಲಕ್ಕುವೆರ್, ಬಡವೆರೆಗ್ ಸುವಾರ್ತೆ ಸಾರುಂಡು. 23ಎನ ಸಂಗತಿಡ್ ಸಂಶಯ ಮಲ್ಪಂದಿನಾಯೆನೇ ಭಾಗ್ಯವಂತೆ,” ಪಂಡ್ದ್ ಪಂಡೆ. 24ಯೋಹಾನನ ದೂತೆರ್ ಪಿರ ಪೋಯಿನೆಡ್ದ್ ಬೊಕ್ಕ ಆಯೆ ಜನೊಕುಲೆ ಗುಂಪುಲೆಗ್ ಯೋಹಾನನ ಸಂಗತಿನ್ ಪನಿಯೆರೆ ಸುರು ಮಲ್ತೆ, “ನಿಕುಲು ಎಂಚಿನ ತೂವೊಡು ಅಂದ್‌ದ್ ಕಾಡ್‌ಗ್ ಪೋದಿತ್ತರ್? ಗಾಳಿಗ್ ಪಂದುನ ದಂಟ್‌ನಾ? 25ಅವು ಅತ್ತಂದೆ ಎಂಚಿನ ತೂವೊಡು ಅಂದ್‌ದ್ ಪೋದಿತ್ತರ್? ನಯತ್ತ ಕುಂಟುನು ಪಾಡ್ದಿನ ನರಮಾನಿನಾ? ಐಶ್ವರ್ಯದ ವೈಭವೊಡು ಕುಂಟು ಪಾಡುನಾಕುಲು ಸಂಪೊತ್ತುಡು ಬದುಕುನಾಕುಲು ಅರಸುನ ಅರಮನೆಡ್ ಉಪ್ಪುವೆರತ್ತಾ? 26ಅಪಗಾಂಡ ಒವೆನ್ ತೂಯೆರೆ ಪೋಯೆರ್? ಪ್ರವಾದಿನಾ? ಅಂದ್ ಪ್ರವಾದಿಡ್ದ್‌ಲಾ ಹೆಚ್ಚ್‌ದಾಯನ್ ತೂಯರ್ ಅಂದ್‌ದ್ ನಿಕ್ಲೆಗ್ ಪನ್ಪೆ. 27‘ಇಂದಾ, ಎನ ದೂತನ್ ನಿನ ದುಂಬು ಕಡಪುಡ್ವೆ. ಈ ಪೋಪಿನ ಸಾದಿನ್ ಆಯೆ ಸಮ ಮಲ್ಪುವೆ,’ ಅಂದ್‌ದ್ ಏರೆನ ಬಗೆಟ್ ಗ್ರಂಥೊಡು ಬರೆತ್ಂಡಾ ಆ ನರಮಾನಿ ಉಂಬೆನೇ. 28ಪೊಂಜೊವುಲೆಡ್ದ್ ಪುಟ್ಟಿನಾಕುಲೆಡ್ ಯೋಹಾನಡ್ದ್ ಮಲ್ಲಾಯೆ ಒರಿಲಾ ಇಜ್ಜೆ; ಆಂಡಲಾ ದೇವೆರೆ ರಾಜ್ಯೊಡು ಬಜೀ ಎಲ್ಯಾಯೆ ಯೋಹಾನಡ್ದ್‌ಲಾ ಮಲ್ಲಾಯೆ ಆದುಲ್ಲೆ,” ಅಂದ್‌ದ್ ನಿಕ್ಲೆಗ್ ಪನ್ಪೆ.
29ಉಂದತ್ತಂದೆ ಜನೊಕುಲುಲಾ ಸುಂಕದಾಕುಲುಲಾ ಯೋಹಾನನ ಬೋಧನೆನ್ ಕೇಂಡ್ದ್ ಆಯಡ್ದ್ ದೀಕ್ಷಾಸ್ನಾನ ಮಲ್ತೊಂಡಿನೆಡ್ದ್ ದೇವೆರ್ ನೀತಿವಂತೆ ಅಂದ್‌ದ್ ಒಪ್ಪಿಯೊಂಡೆರ್. 30ಆಂಡ ಪರಿಸಾಯೆರ್‌ಲಾ ನ್ಯಾಯಕಟ್ಟ್‌ದ ಬೋಧಕೆರ್‌ಲಾ ಆಯಡ ದೀಕ್ಷಾಸ್ನಾನ ಮಲ್ತೊನಂದೆ ಪೋಯಿನೆಡ್ದ್ ತನ್ಕುಲೆ ಬಗೆಟ್ ದೇವೆರೆ ಆಲೋಚನೆನ್ ತಿರಸ್ಕಾರ ಮಲ್ತೆರ್.
31ಬೊಕ್ಕ ಕರ್ತವೆ ಪಂಡಿನಿ, “ಈ ಕಾಲದ ಜನೊಕುಲೆನ್ ಏರೆಗ್ ಸಮ ಮಲ್ಪೊಲಿ? ಅಕುಲು ಏರೆಗ್ ಸಮ ಆಪೆರ್? 32‘ಎಂಕುಲು ನಿಕ್ಲೆಗಾದ್ ಕೊಳಲ್ ಉರ್ತ ನಿಕುಲು ನಲ್ತ್‌ಜರ್, ನಿಕ್ಲೆಗ್ ಮುರೆಡಿಯ, ನಿಕುಲು ಬುಲ್ತುಜರ್,’ ಅಂದ್‌ದ್ ಪೇಂಟೆಡ್ ಕುಲ್ಲುದು ಒರಿ ಒರಿಯಗ್ ಬೊಬ್ಬೆ ಪಾಡುನ ಜೋಕುಲೆ ಲೆಕ್ಕ ತೋಜುವರ್. 33ಎಂಚಂದ್ಂಡ ಸ್ನಾನಿಕೆ ಯೋಹಾನೆ ಬೈದೆ; ಆಯೆ ರೊಟ್ಟಿ ತಿನಂದಿನಾಯೆ, ಅಮಲ್‌ದ ದ್ರಾಕ್ಷಾರಸ ಪರಂದಿನಾಯೆ. ನಿಕುಲು ಆಯಗ್, ‘ದೆವ್ವ ಪತ್ತ್‌ದ್ಂಡ್,’ ಪನ್ಪರ್. 34ನರಮಾನಿ ಮಗೆ ಬೈದೆ, ಆಯೆ ನುಪ್ಪು ನೀರ್‌ನ್ ದೆತ್ತೊನುನಾಯೆ ಆದುಲ್ಲೆ; ಅಪಗ ನಿಕುಲು, ‘ಇಂದಾ, ಇಂಬೆ ಬಂಜೆಲೆ, ಪರ್ಪೆಲೆ, ಸುಂಕದಾಕುಲೆ ಬೊಕ್ಕ ಪಾಪಿಷ್ಟೆರೆ ಸ್ನೇಹಿತೆ,’ ಅಂದ್‌ದ್ ಪನ್ಪರ್. 35ಆಂಡ ಬುದ್ಧಿ ಪನ್ಪಿನವು ಅವು ನೀತಿದವು ನಿಜವಾಯಿನ ಗೇನೊಡು ದಿಂಜಿನಾಕುಲೆಡ್ದೇ ತೆರಿದ್ ಬರು,” ಅಂದ್‌ದ್ ಪಂಡೆ.
ಪಾಪಿ ಪೊಂಜೊವು ಯೇಸುನ ಪಾದಸೇವೆ ಮಲ್ಪುನವು
36ಪರಿಸಾಯೆರೆಡ್ ಒರಿ ಯೇಸುನು ತನಡೊಪ್ಪ ವಣಸ್ ಮಲ್ಪೊಡಂದ್‌ದ್ ಕೇನೊನ್ನಗ 37ಆಯೆ ಆ ಪರಿಸಾಯನ ಇಲ್ಲಗ್ ಪೋದು ವಣಸ್‌ಗ್ ಕುಲ್ಲಿಯೆ. ಅಪಗ ಆ ಊರುಡಿತ್ತಿ ಒಂಜಿ ಪಾಪಿ ಪೊಂಜೊವು, ಯೇಸು ಆ ಇಲ್ಲಡ್ ವಣಸ್‌ಗ್ ಕುಲ್ಲುದೆ ಅಂದ್‌ದ್ ತೆರಿಯೊಂದು ಒಂಜಿ ಮಸ್ತ್ ಬಿಲೆ ಇತ್ತಿ ಕಮ್ಮೆನದ ಎಣ್ಣೆದ ಕುಪ್ಪಿನ್ ಪತ್ತೊಂದು; 38ಪಿರವುಡು ಆಯ ಕಾರಕೈತಲ್ ಉಂತುದು; ಬುಲ್ತೊಂದು ತನ ಕಣ್ಣೀರ್‌ಡ್ ಆಯ ಕಾರುಲೆನ್ ಚಂಡಿ ಮಲ್ತ್‌ದ್ ತನ ತರೆ ಕುಜಲ್‌ಡ್ದ್ ಒಚ್ಚಿದ್ ಐಕ್ ಮುತ್ತು ಕೊರ್ದು, ಆ ಎಣ್ಣೆನ್ ಪೂಜಿಯಲ್. 39ಆಂಡ ಆಯನ್ ವಣಸ್‌ಗ್ ಲೈದಿನ ಪರಿಸಾಯೆ ಉಂದೆನ್ ತೂದು, “ಮೋಲು ಪಾಪಿ; ಉಂಬೆ ಪ್ರವಾದಿ ಆದಿತ್ತೆಡ ತನನ್ ಮುಟ್ಟಿನ ಈ ಪೊಂಜೊವು ಎಂಚಿತ್ತಿನಾಲ್, ಅಂದ್‌ದ್ ತೆರಿಯೊಂದುವೆ,” ಅಂದ್‌ದ್ ಎನ್ನಿಯೆ. 40ಅಪಗ ಯೇಸು ಆಯಡ, “ಸೀಮೋನಾ, ಯಾನ್ ನಿಕ್ಕ್ ಪನೊಡಾಯಿನ ಒಂಜಿ ಪಾತೆರ ಉಂಡು.” ಐಕ್ ಆಯೆ, “ಅಂದ್ ಬೋಧಕಾ, ಪನ್ಲ,” ಪಂಡೆ. 41ಅಪಗ ಯೇಸು, “ಒಂಜಿ ಸಾವುಕಾರಗ್ ಇರ್ವೆರ್ ಸಾಲ ಕೊರೊಡಿತ್ತ್‌ಂಡ್. ಒರಿ ಐನೂದು ಬೊಳ್ಳಿದ ಪಾವೊಲಿ, ಬೊಕ್ಕೊರಿ ಐವ ಬೊಳ್ಳಿದ ಪಾವೊಲಿ ಕೊರೊಡಿತ್ತ್‌ಂಡ್. 42ದೆತ್ತೊಂದಿನ ಕಾಸ್‌ನ್ ಪಿರ ಕೊರಿಯೆರೆ ಅಕ್ಲೆಗ್ ಗತಿ ಇಜ್ಜಂದಿನೆಡ್ದಾದ್ ಆ ಇರ್ವೆರೆ ಸಾಲೊನ್ಲಾ ಬುಡ್ದು ಬುಡಿಯೆ. ಅಪಗಾಂಡ ಅಕ್ಲೆಡ್ ಏರ್ ಆ ಸಾಹುಕಾರನ್ ಹೆಚ್ಚಾದ್ ಪ್ರೀತಿ ಮಲ್ಪುವೆರ್?” ಅಂದ್‌ದ್ ಕೇಂಡೆ. 43ಸೀಮೋನೆ ಉತ್ತರ ಕೊರ್ದು, “ಏರೆಗ್ ಹೆಚ್ಚ್ ಕಾಸ್ ಬುಡಿಯೆನಾ ಆಯೆನೇ.” ಪಂಡ್ದ್ ಎನ್ನುವೆ ಪಂಡೆ. ಯೇಸು ಆಯಗ್, “ಈ ಸರಿಯಾದ್ ತೀರ್ಪು ಮಲ್ತ.” 44ಆ ಪೊಂಜೊವುನ ಕಡೆಕ್ಕ್ ತೂದು ಸೀಮೋನಗ್, “ಈ ಪೊಂಜೊವುನು ತೂಯನಾ? ಯಾನ್ ನಿನ ಇಲ್ಲಗ್ ಬತ್ತಿನಪಗ ಈ ಎನ ಕಾರ್‌ಗ್ ನೀರ್ ಕೊರ್ತುಜ. ಆಂಡ ಮೋಲು ಎನ ಕಾರ್‌ಲೆನ್ ಕಣ್ಣೀರ್‌ಡ್ ದೆಕ್ಕ್‌ದ್ ತನ ತರೆಕುಜಲ್‌ಡ್ ಒರೆಸಿಯಲ್. 45ಈ ಎಂಕ್ ಮುತ್ತು ಕೊರ್ಜ. ಮೋಲು ಯಾನ್ ಉಲಯಿ ಬತ್ತಿನೆಡ್ದಿಂಜಿ ಎನ ಕಾರ್‌ಗ್ ಮುತ್ತು ಕೊರ್ಪಿನೆನ್ ಬುಡ್ತುಜಲ್. 46ಈ ಎನ ತರೆಕ್ ಎಣ್ಣೆ ಪೂಜಿಜ; ಮೋಲು ಕಮ್ಮೆನದ ಎಣ್ಣೆನ್ ಕಾರ್‌ಗ್ ಪೂಜಿಯಲ್. 47ಇಂಚ ಉಪ್ಪುನಗ ಯಾನ್ ಪನ್ಪಿನಿ ದಾನೆಂದ್ಂಡ ಮೋಲು ಮಲ್ತಿ ಪಾಪ ಮಸ್ತ್ ಆಂಡಲಾ ಅವು ಮಾಪು ಆತ್ಂಡ್. ನೆಕ್ಕ್ ಕಾರಣ ಆಲ್ ತೋಜಾಯಿನ ಪ್ರೀತಿಯೇ. ಆಂಡ ಏರೆಗ್ ಒಂತೆ ಮಾಪು ಆತ್ಂಡ ಆಯೆ ತೋಜಾಯಿನ ಪ್ರೀತಿಲಾ ಒಂತೆನೇ ಆದುಂಡು.” 48ಬೊಕ್ಕ ಆಯೆ ಆಲೆಗ್, “ನಿನ ಪಾಪೊಲು ಮಾಪು ಆತ್ಂಡ್,” ಅಂದ್‌ದ್ ಪಂಡೆ. 49ಆಯನ ಒಟ್ಟುಗು ವಣಸ್‌ಗ್ ಕುಲ್ಲೊಂದಿತ್ತಿನಾಕುಲು, “ಪಾಪೊಲೆನ್ ಮಾಪು ಮಲ್ಪುನಾಯೆ ಉಂಬೆ ಏರ್?” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್. 50ಆಂಡ ಆಯೆ ಆ ಪೊಂಜೊವುಗು, “ನಿನ ನಂಬಿಕೆನೇ ನಿನನ್ ರಕ್ಷಣೆ ಮಲ್ತ್ಂಡ್, ಸಮಾಧಾನೊಡು ಪೋಲ,” ಅಂದ್‌ದ್ ಪಂಡೆ.
Currently Selected:
ಲೂಕೆ 7: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
