ಮತ್ತಾಯೆ 16
16
ಪರಿಸಾಯೆರ್ ಬೊಕ್ಕ ಸದ್ದುಕಾಯೆರೆ ಬಗೆಟ್
(ಮಾರ್ಕೆ 8:11-13; ಲೂಕೆ 12:54-56)
1ಅಪಗ ಪರಿಸಾಯೆರ್‌ಲಾ ಸದ್ದುಕಾಯೆರ್‌ಲಾ ಬತ್ತ್‌ದ್ ಯೇಸುನು ಪರೀಕ್ಷೆ ಮಲ್ಪೆರೆಗಾದ್, ಈ ಬಾನೊಡು ಒಂಜಿ ಗುರ್ತ ತೋಜಾದ್ ಕೊರೊಡು ಅಂದ್‌ದ್ ಕೇಂಡೆರ್. 2ಐಕ್ ಆಯೆ ಉತ್ತರ ಕೊರ್ದು ಅಕ್ಲೆಡ ಪಂಡಿನಿ, “ಬೈಯದಗ ಬೊಲ್ಕಿರ್ ಆವು, ಬಾನ ಕೆಂಪಾದುಂಡು, ಪನ್ಪರ್, 3ಕಾಂಡೆ, ಬಾನ ಮುಗಲ್ ಮುಚ್ಚೊಂದು ಕೆಂಪಾತ್ತ್ಂಡ್, ಇನಿ ಗಾಳಿ ಬರ್ಸ ಪನ್ಪರ್, ಬಾನದ ಸ್ಥಿತಿನ್ ತೂದು ಹೆಚ್ಚಿಕಡಿಮೆ ಪನಿಯೆರೆ ತೆರಿಯೊನ್ವರ್ ಆಂಡ ನಿಕ್ಲೆಗ್ ಈ ಕಾಲದ ಗುರ್ತೊಲೆನ್‌ ತೆರಿಯೊನಿಯೆರೆ ಆಪುಜಿ? 4ಹಾದ್ರದಂಚಿತ್ತಿ ಹಾಳ್ ಸಂತಾನ ಗುರ್ತ ಮಲ್ಪುನಂಚಿ ಕಾರ್ಯೊನು ತೂವೊಡು ಅಂದ್‌ದ್ ಬಯಕುಂಡು. ಆಂಡ ಯೋನಗ್ ಆಯಿನ ಗುರ್ತ ಮಲ್ಪುನಂಚಿ ಕಾರ್ಯೊನೇ ಅತ್ತಂದೆ ಬೇತೆ ಒವುಲಾ ನೆಕ್ಕ್ ತಿಕ್ಕಂದ್,” ಪಂಡ್ದ್ ಉತ್ತರ ಕೊರ್ದು ಅಕ್ಲೆನ್ ಬುಡ್ದು ಪೋಯೆ.
ಪುಳಿಬಂದದ ಬಗೆಟ್
(ಮಾರ್ಕೆ 8:14-21)
5ಶಿಷ್ಯೆರ್ ಆಪೆದ ಕರೆಕ್ ಪೋನಗ ರೊಟ್ಟಿದ ಬುತ್ತಿ ಕಟ್ಟೊನಿಯೆರೆ ಮದತೆರ್. 6ಯೇಸು ಅಕ್ಲೆಡ, “ಜಾಗ್ರತೆಡುಪ್ಪುಲೆ! ಪರಿಸಾಯೆರೆ ಬೊಕ್ಕ ಸದ್ದುಕಾಯೆರೆ ಪುಳಿಬಂದದ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪನ್ನಗ. 7ಅಕುಲು, “ಎಂಕುಲು ರೊಟ್ಟಿದ ಬುತ್ತಿ ದೆತ್ತೊನಂದೆ ಬತ್ತತ್ತಾ?” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್. 8ಯೇಸು ಅವೆನ್ ತೆರಿದ್, “ಒಂತೆ ನಂಬುನಾಕುಲೇ! ರೊಟ್ಟಿ ಇಜ್ಜತ್ತಾ ಪಂಡ್ದ್, ನಿಕ್ಲೆ ಉಲಯಿ ದಾಯೆಗ್ ಪಾತೆರುವರ್? 9ನಿಕ್ಲೆಗ್ ನನಲಾ ತೆರಿಯುಜಾ? ನಿಕ್ಲೆಗ್ ನೆನೆಪು ಇಜ್ಜಾ? ಆ ಐನ್ ರೊಟ್ಟಿ ಐನ್ ಸಾರ ಜನೊಕುಲೆಗ್ ಪಟ್ಟಿನಪಗ ಏತ್ ಪುಡಯಿ ದಿಂಜಾಯರ್? 10ಅವು ಅತ್ತಂದೆ, ಆ ಏಳ್ ರೊಟ್ಟಿ ನಾಲ್ ಸಾರ ಜನೊಕುಲೆಗ್ ಪಟ್ಟಿನಪಗ ಏತ್ ಪುಡಯಿ ದಿಂಜಾಯರ್? 11ಅಂಚ ಉಪ್ಪುನಗ ಅವು ನಿಕುಲೆಗ್ ದಾಯೆಗ್ ಅರ್ಥ ಆಪುಜಿ? ರೊಟ್ಟಿದ ಸಂಗತಿಡ್ ಪಾತೆರಿದಿನಿ ಅತ್ತ್ ಆಂಡ ನಿಕ್ಲೆಗ್ ಕುಡ ಪನ್ಪಿನಿ, ಪರಿಸಾಯೆರೆ ಬೊಕ್ಕ ಸದ್ದುಕಾಯೆರೆ ಪುಳಿಬಂದದ ಸಂಗತಿಡ್ ಜಾಗ್ರತೆಡ್ ಉಪ್ಪುಲೆ.”
12ಅಪಗ ಶಿಷ್ಯರೆಗ್ ರೊಟ್ಟಿಗ್ ಪಾಡುನ ಪುಳಿತ ಬಂದದ ಸಂಗತಿಡ್ ಅತ್ತ್, ಪರಿಸಾಯೆರ್ ಬೊಕ್ಕ ಸದ್ದುಕಾಯೆರೆ ಬೋಧನೆದ ಸಂಗತಿಡ್ ಎಚ್ಚರಿಕೆ ಆದುಪ್ಪೊಡಂದ್‌ದ್ ಪಂಡೆ ಅಂದ್‌ದ್ ತೆರಿಯೊಂಡೆರ್.
ಯೇಸುನು ಕ್ರಿಸ್ತೆ ಪಂಡ್ದ್ ಪೇತ್ರನ ಅರಿಕೆ
(ಮಾರ್ಕೆ 8:27-30; ಲೂಕೆ 9:18-21)
13ಯೇಸು ಫಿಲಿಪ್ಪಿ ಕೈಸರೆಯ ಪನ್ಪಿ ಪಟ್ಟಣದ ಪ್ರಾಂತೊಗು ಬತ್ತಿನಪಗ ಆಯೆ ತನ ಶಿಷ್ಯೆರೆಡ, “ಜನೊಕುಲು, ನರಮಾನಿ ಮಗೆ ಆದುಪ್ಪು ಎನನ್ ಏರ್ ಅಂದ್‌ದ್ ಪನ್ಪೆರ್?” ಅಂದ್‌ದ್ ಕೇಂಡಿನೆಕ್ಕ್
14ಅಕುಲು ಪಂಡಿನಿ, “ನಿನನ್ ಕೆಲೆವೆರ್ ಸ್ನಾನಿಕೆ ಯೋಹಾನೆ ಪನ್ಪೆರ್, ಕೆಲೆವೆರ್ ಎಲೀಯೆ ಪನ್ಪೆರ್, ಬೇತೆ ಕೆಲೆವೆರ್ ಯೆರೆಮೀಯೆ, ಇಜ್ಜಾಂಡ ಪ್ರವಾದಿಲೆಡ್ ಒರಿ,” ಪಂಡ್ದ್ ಪನ್ಪೆರ್.
15ಆಯೆ ಅಕ್ಲೆಡ, “ಆಂಡ ನಿಕುಲು ಎನನ್ ಏರ್ ಅಂದ್‌ದ್ ಪನ್ಪರ್?” ಅಂದ್‌ದ್ ಕೇಂಡಿನೆಕ್ಕ್
16ಸೀಮೋನ್ ಪೇತ್ರೆ, “ಈ ಬರೊಡಾಯಿನ ಕ್ರಿಸ್ತೆ, ಜೀವಸ್ವರೂಪಿ ಆದುಪ್ಪು ದೇವೆರೆ ಮಗೆ,” ಅಂದ್‌ದ್ ಉತ್ತರ ಕೊರಿಯೆ.
17ಐಕ್ ಯೇಸು, “ಯೋನನ ಮಗೆ ಆದುಪ್ಪು ಸೀಮೋನ, ಈ ಭಾಗ್ಯವಂತೆ; ಈ ಗುಟ್ಟುನು ನಿಕ್ಕ್ ತೆರಿಪಾಯಿನಾಯೆ ಮಾಸ ನೆತ್ತೆರ್‌ದ ನರಮಾನಿ ಅತ್ತ್, ಪರಲೋಕೊಡುಪ್ಪು ಎನ ಅಮ್ಮೆನೇ ತೆರಿಪಾಯಿನಿ. 18ಬೊಕ್ಕ ಯಾನ್ಲಾ ನಿಕ್ಕ್ ಒಂಜಿ ಪಾತೆರ ಪನ್ಪೆ. ಅವು ದಾನೆಂದ್ಂಡ, ಈ ಪೇತ್ರೆ, ಈ ಪಾದೆದ ಮಿತ್ತ್ ಎನ್ನ ಸಭೆನ್ ಕಟ್ಟುವ; ಪಾತಾಳದ ಬಲ ಅವೆನ್ ಸೋಪಾವಂದ್. 19ಪರಲೋಕ ರಾಜ್ಯದ ಬೀಗದ ಕೈನ್ ನಿಕ್ಕ್ ಕೊರ್ಪೆ. ಭೂಲೋಕೊಡು ಈ ಒವೆನ್ ಕಟ್ಟುವನಾ, ಅವು ಪರಲೋಕೊಡ್ಲಾ ಕಟ್ಟ್‌ದುಪ್ಪು. ಬೊಕ್ಕ ಭೂಲೋಕೊಡು ಈ ಒವೆನ್ ಗಿರ್ಪುವನಾ ಅವು ಪರಲೋಕೊಡ್ಲಾ ಗಿರ್ಪುಂಡು,” ಪಂಡೆ. 20ಅಪಗ ಆಯೆ, ತಾನ್ ಕ್ರಿಸ್ತೆ ಅಂದ್‌ದ್ ಏರೆಗ್ಲಾ ಪನಡೆ ಅಂದ್‌ದ್ ಶಿಷ್ಯೆರೆಗ್ ಕಂಡಿತಾದ್ ಪಂಡೆ.
ಯೇಸು ತನ ಮರಣದ ಸಂಗತಿನ್ ತೆರಿಪಾಯಿನವು
(ಮಾರ್ಕೆ 8:31—9:1; ಲೂಕೆ 9:22-27)
21ಆನಿಡ್ದ್ ಯೇಸು, “ಯಾನ್ ಯೆರೂಸಲೇಮುಗು ಪೋವೊಡು. ಅವುಲು ಹಿರಿಯೆರೆಡ್ದ್‌ಲಾ ಪ್ರಧಾನಯಾಜಕೆರೆಡ್ದ್‌ಲಾ ಶಾಸ್ತ್ರಿಲೆಡ್ದ್‌ಲಾ ಮಸ್ತ್ ಕಷ್ಟ ಅನುಭವ ಮಲ್ತ್‌ದ್ ಕೆರ್ವೆರ್. ಮೂಜನೇ ದಿನೊಟು ಜೀವಾದ್ ಲಕ್ಕುವೆ,” ಅಂದ್‌ದ್ ತನ ಶಿಷ್ಯೆರೆಗ್ ತೆರಿಪಾಯೆರೆ ಸುರು ಮಲ್ತೆ.
22ಅಪಗ ಪೇತ್ರೆ ಆಯನ ಕೈ ಪತ್ತ್‌ದ್ ಬರಿಕ್ಕ್ ಲೆತ್ತ್‌ದ್, “ಕರ್ತವಾ, ದೇವೆರ್ ಉಂದೆನ್ ಉಂತಾವಡ್, ನಿಕ್ಕ್ ಇಂಚ ಏಪೊಗ್ಲಾ ಆವೆರೆ ಬಲ್ಲಿ.” ದಟ್ಟಿಯೆರೆ ಸುರು ಮಲ್ತೆ.
23ಐಕ್ ಆಯೆ ತಿರ್ಗ್‌ದ್ ಪೇತ್ರಡ, “ಸೈತಾನ, ಎನ ದುಂಬು ಉಂತಡ, ಎಂಕ್ ಈ ಅಡ್ಡಿ ಆದುಲ್ಲ; ನಿನ ಆಲೋಚನೆ ನರಮಾನಿನ ಆಲೋಚನೆ ಅತ್ತಂದೆ ದೇವೆರೆನವು ಅತ್ತ್,” ಅಂದ್‌ದ್ ಪಂಡೆ.
24ಬೊಕ್ಕ ಯೇಸು ತನ ಶಿಷ್ಯೆರೆಗ್ ಪಂಡಿನಿ, “ಏರೆಗಾಂಡಲಾ ಎನ ಬೆರಿಯೆ ಬರಿಯೆರೆ ಮನಸಿತ್ತ್‌ಂಡ ಆಯೆ ತನನ್ ತಾನ್ ತಿರಸ್ಕಾರ ಮಲ್ತ್‌ದ್ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರಡ್. 25ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ; ಆಂಡ ಎಂಕಾದ್ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಕಾತೊನ್ವೆ. 26ಒರಿ ನರಮಾನಿ ಇಡೀ ಲೋಕೊನು ಸಂಪಾದನೆ ಮಲ್ತೊಂಡೆಡಲಾ ತನ ಪ್ರಾಣೊನು ಹಾಳ್ ಮಲ್ತೊಂಡೆಡ ಆಯಗ್ ದಾದ ಪ್ರಯೋಜನ ಉಂಡು? ಇಜ್ಜಿಡ ಒರಿ ತನ ಪ್ರಾಣದ ಪಗತೆಗ್ ಎಂಚಿನ ಕೊರಿಯೆರೆಗಾವು? 27ನರಮಾನಿ ಮಗೆ ಅಮ್ಮೆ ಮೈಮೆಡ್ ತನ ದೂತೆರೆಡೊಪ್ಪ ಬರ್ಪೆ; ಅಪಗ ಆಯೆ ಒರಿ ಒರಿಯಗ್ ಆಯಾಯ ಕೆಲಸೊಗು ತಕ್ಕ ಪ್ರತಿಫಲ ಕೊರುವೆ. 28ನಿಕ್ಲೆಗ್ ನಿಜಾದ್ ಪನ್ಪೆ. ಮುಲ್ಪ ಉಂತುದಿನಾಕುಲೆಡ್ ಕೆಲೆವೆರ್ ನರಮಾನಿ ಮಗೆ ತನ ರಾಜ್ಯೊಡು ಬರ್ಪಿನೆನ್ ತೂವ ಮುಟ್ಟ, ಸೈಪುಜರ್,” ಪಂಡೆ.
Currently Selected:
ಮತ್ತಾಯೆ 16: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
