ಮತ್ತಾಯೆ 20
20
ದ್ರಾಕ್ಷೆತೋಟದ ಕೂಲಿದಾಕುಲೆನ ಉದಾರಣೆ
1ಅವು ಎಂಚಂದ್ಂಡ, “ಪರಲೋಕ ರಾಜ್ಯ ಒಂಜಿ ಇಲ್ಲದ ಯಜಮಾನಗ್ ಸಮಾದುಂಡು. ಆಯೆ ತನ ದ್ರಾಕ್ಷೆತೋಟೊಗು ಕೂಲಿದಾಕುಲೆನ್ ನಾಡಿಯೆರೆ ಪುಲ್ಯಕಾಂಡೆ ಪಿದಾಡುವೆ. 2ಕೂಲಿದಾಕುಲೆಗ್ ದಿನೊಕು ಒಂಜಿ ಬೊಳ್ಳಿದ ಪಾವೊಲಿಗ್ ಕೂಲಿ ನಿಗಂಟ್ ಮಲ್ತ್‌ದ್ ಅಕ್ಲೆನ್ ದ್ರಾಕ್ಷೆತೋಟೊಗು ಕಡಪುಡಿಯೆ. 3ಐಡ್ದ್ ಬೊಕ್ಕ ಹೆಚ್ಚಿಕಡಿಮೆ ಒಂರ್ಬ ಗಂಟೆಗ್ ಪೋದು ಪೇಂಟೆಡ್ ಪೊಕ್ಕಡೆ ಉಂತುದಿತ್ತಿ ನನ ಕೆಲೆವೆರೆನ್ ತೂದು, 4‘ನಿಕುಲುಲಾ ಎನ ದ್ರಾಕ್ಷೆತೋಟೊಗು ಪೋಲೆ; ನಿಕ್ಲೆಗ್ ಸರಿಯಾಯಿನ ಕೂಲಿ ಕೊರ್ಪೆ,’ ಪಂಡಿನಪಗ 5ಅಕುಲು ತೋಟೊಗು ಪೋಯೆರ್. ಆಯೆ ಕುಡ ಹೆಚ್ಚಿಕಡಿಮೆ ಪದ್ರಾಡ್ ಗಂಟೆಗ್ ಬೊಕ್ಕ ಮೂಜಿ ಗಂಟೆಗ್ ಪೋದು ಅವ್ವೇ ರೀತಿ ಮಲ್ತೆ. 6ಕುಡ ಹೆಚ್ಚಿಕಡಿಮೆ ಬೈಯಡ್ ಐನ್ ಗಂಟೆಗ್ ಪೋದು ಬೇತೆ ಕೆಲೆವೆರ್ ಉಂತುದುಪ್ಪುನೆನ್ ತೂದು ಅಕ್ಲೆಡ, ‘ದಿನ ಇಡೀ ಮುಲ್ಪ ಪೊಕ್ಕಡೆ ದಾಯೆ ಉಂತುದರ್?’ ಅಂದ್‌ದ್ ಕೇಂಡಿನಪಗ 7ಅಕುಲು, ‘ಏರ್ಲಾ ಎಂಕ್ಲೆನ್ ಕೂಲಿಗ್ ಲೆತ್ತ್‌ಜೆರ್,’ ಪಂಡಿನಪಗ ಆಯೆ, ‘ನಿಕುಲುಲಾ ಎನ ದ್ರಾಕ್ಷೆತೋಟೊಗು ಪೋಲೆ,’ ಪಂಡೆ.
8“ಬೈಯದ ಪೊರ್ತುಡು ದ್ರಾಕ್ಷೆತೋಟದ ಯಜಮಾನೆ ತನ ಪಾರುಪತ್ತೆದಾಯಗ್, ‘ಆ ಕೂಲಿದಾಕುಲೆನ್ ಲೆತ್ತ್‌ದ್ ಕಡೆಕ್ಕ್ ಬೈದಿನಾಕುಲೆನ್ ಪತ್ತ್‌ದ್ ದುಂಬು ಕೆಲಸೊಗು ಬೈದಿನಾಕುಲೆ ಮುಟ್ಟ ಕೂಲಿ ಕೊರ್ಲ,’ ಅಂದ್‌ದ್ ಪಂಡೆ. 9ಅಪಗ ಬೈಯಡ್ ಐನ್ ಗಂಟೆಗ್ ಬತ್ತಿನಾಕುಲೆಗ್ ಒಂಜೊಂಜಿ ಬೊಳ್ಳಿದ ಪಾವೊಲಿ ತಿಕ್ಕ್ಂಡ್. 10ಬೊಕ್ಕ ದುಂಬತ್ತ ಬೈದಿನಾಕುಲು ತನ್ಕುಲೆಗ್ ಹೆಚ್ಚ್ ತಿಕ್ಕು ಅಂದ್‌ದ್ ಎನ್ನಿಯೆರ್, ಆಂಡ ಮೊಕ್ಲೆಗ್ಲಾ ಒಂಜೊಂಜಿ ಬೊಳ್ಳಿದ ಪಾವೊಲಿ ತಿಕ್ಕ್ಂಡ್. 11ಅವೆನ್ ದೆತ್ತೊಂದು ಇಲ್ಲದ ಯಜಮಾನನ ಮಿತ್ತ್ ಗುಣುಗುಟ್ಟುದು, 12‘ಕಡೆಕ್ಕ್ ಬೈದಿ ಮೊಕುಲು ಒಂಜಿ ತಾಸ್ ಮಾತ್ರ ಬೇಲೆ ಮಲ್ತ್‌ದೆರ್. ಎಂಕುಲು ಇಡೀ ದಿನ ಕಷ್ಟ ಬತ್ತ್‌ದ್ ಆ ದೊಂಬುದ ಪೆಟ್ಟ್ ತಿಂದ್‌ದ್ ಬೇಲೆ ಮಲ್ತ್‌ದ ಎಂಕ್ಲೆನ್ ಅಕ್ಲೆಗ್ ಸಮ ಮಲ್ತ್‌ದನಾ?’ ಪಂಡ್ದ್ ಪಂಡೆರ್. 13ಐಕ್ ಆಯೆ ಅಕ್ಲೆಡ್ ಒರಿಯಗ್, ‘ದಾನೆಪ್ಪಾ, ಯಾನ್ ನಿಕ್ಕ್ ಅನ್ಯಾಯ ಮಲ್ತ್‌ಜಿ. ಈ ಎನಡೊಪ್ಪ ಒಂಜಿ ಬೊಳ್ಳಿದ ಪಾವೊಲಿಗ್ ನಿಗಂಟ್ ಮಲ್ತೊಂಡತ್ತಾ? 14ನಿನ ಕೂಲಿ ದೆತ್ತೊಂದು ಪೋಲ. ನಿಕ್ಕ್ ಕೊರಿ ಲೆಕ್ಕ ಕಡೆಕ್ಕ್ ಬೈದಿನ ಇಂಬ್ಯಗ್ಲಾ ಕೊರಿಯೆರೆ ಎಂಕ್ ಮನಸುಂಡು. 15ಎನ ಬದ್‌ಕ್‌ನ್ ಎಂಕ್ ಬೋಡಾಯಿನಂಚ ಮಲ್ಪೆರೆ ಎಂಕ್ ಹಕ್ಕ್ ಉಂಡತ್ತಾ? ಯಾನ್ ಉದಾರ ಮನಸ್ ಮಲ್ತಿನೆಕ್ಕ್ ನಿಕ್ಕ್ ನಂಜಿ ಆಪುಂಡಾ?’ ಅಂದ್‌ದ್ ಪಂಡೆ. 16ಈ ಪ್ರಕಾರೊಡು ಕಡೆತ್ತಾಕುಲು ಸುರುತ್ತಾಕುಲು ಆಪೆರ್, ಸುರುತ್ತಾಕುಲು ಕಡೆತ್ತಾಕುಲು ಆಪೆರ್,” ಅಂದ್‌ದ್ ಪಂಡೆ.
ಯೇಸುನ ಮರಣೊನು ಮೂಜನೆ ಸರ್ತಿ ತೆರಿಪಾಯಿನವು
(ಮಾರ್ಕೆ 10:32-34; ಲೂಕೆ 18:31-34)
17ಯೇಸು ಯೆರೂಸಲೇಮುಗು ಪೋವೊಂದುಪ್ಪುನಗ ಪದ್ರಾಡ್ ಶಿಷ್ಯೆರೆನ್ ಒಟ್ಟುಗು ಲೆತ್ತೊಂದು ಸಾದಿಡ್ ಅಕ್ಲೆಡ 18ತೂಲೆ, “ನಮ ಯೆರೂಸಲೇಮುಗು ಪೋವೊಂದುಲ್ಲ. ನರಮಾನಿ ಮಗನ್ ಪ್ರಧಾನಯಾಜಕೆರೆ ಬೊಕ್ಕ ಶಾಸ್ತ್ರಿಲೆನ ಕೈಕ್ ಪತ್ತ್‌ದ್ ಕೊರುವೆರ್. ಆಯಗ್ ಮರಣ ದಂಡನೆ ಆವು. 19ಆಯನ್ ಪಿದಯಿದ ಜನೊಕುಲೆ ಕೈಕ್ ಒಚ್ಚಿದ್ ಕೊರುವೆರ್. ಆಯಗ್ ಗೇಲಿ ಮಲ್ತ್‌ದ್ ಚಾಟಿಡ್ ಹಾಕ್‌ದ್ ಕ್ರುಸ್ಸುಗು ಪಾಡ್ವೆರ್, ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರ್ಪೆ.” ಅಂದ್‌ದ್ ಪಂಡೆ.
ಜೋಕುಲೆಗಾದ್ ಅಪ್ಪೆನ ಬಯಕೆ
(ಮಾರ್ಕೆ 10:35-45)
20ಅಪಗ ಜೆಬೆದಾಯನ ಜೋಕುಲೆನ ಅಪ್ಪೆ ಆಯಡ್ದ್ ದಾದನ ಕೇನೊಡಂದ್ ತನ ಜೋಕುಲೆನ್ ಲೆತ್ತೊಂದು ಬತ್ತ್‌ದ್ ಆಯಗ್ ಅಡ್ಡಬೂರ್ಯಲ್. 21ಆಯೆ ಆಲೆಡ, “ನಿಕ್ಕ್ ದಾದ ಬೋಡಮ್ಮಾ,” ಅಂದ್‌ದ್ ಕೇನ್ನಗ ಆಲ್, “ನಿನ ರಾಜ್ಯೊಡು ಈ ಎನ ರಡ್ಡ್ ಜೋಕುಲೆಡ್ ಒರಿ ನಿನ ಬಲತ್ತ ಮರ್ಗಿಲ್‌ಡ್ ಬೊಕ್ಕೊರಿ ನಿನ ದತ್ತ ಮರ್ಗಿಲ್‌ಡ್ ಕುಲ್ಲುಲೆಕ್ಕ ಅಪ್ಪಣೆ ಕೊರೊಡು,” ಪಂಡಲ್.
22ಐಕ್ ಯೇಸು, “ನಿಕುಲು ನಟ್ಟೊಂಡಿನವು ದಾನೆಂದ್ ನಿಕ್ಲೆಗ್ ತೆರಿಯಂದ್. ಎನ ಕಷ್ಟೊಡು ಪಾಲ್‌ದಾರೆರಾವೆರೆ ನಿಕ್ಲೆಗ್ ಸಾದ್ಯನಾ?” ಅಂದ್‌ದ್ ಕೇನ್ನಗ ಅಕುಲು, “ಎಂಕ್ಲೆಡ್ದ್ ಆವು,” ಪಂಡೆರ್.
23ಅಪಗ ಆಯೆ ಅಕ್ಲೆಡ, “ಎನ ಕಷ್ಟೊಡು ನಿಕುಲು ಪಾಲ್‌ದಾರೆರ್ ಆವರ್ ಸರಿ. ಆಂಡ ಎನ ಬಲತ್ತ ಮರ್ಗಿಲ್ಡಾವಡ್ ದತ್ತ ಮರ್ಗಿಲ್ಡಾವಡ್ ಕುಲ್ಲಾವುನ ಎನ ಬೇಲೆ ಅತ್ತ್. ಎನ ಅಮ್ಮೆರೆಡ್ದ್ ಅವು ಏರೆಗ್ ತಯಾರ್ ಮಲ್ತ್‌ದುಂಡಾ ಅಕ್ಲೆಗ್ ತಿಕ್ಕುಂಡು,” ಅಂದ್‌ದ್ ಪಂಡೆ.
24ಒರಿದಿ ಪತ್ತ್ ಶಿಷ್ಯೆರ್ ಉಂದೆನ್ ಕೇಂಡ್ದ್ ಆ ಇರ್ವೆರ್ ಮೆಗ್ಯೆಪಲಯಾಡ್ಲೆ ಮಿತ್ತ್ ಕೋಪ ಮಲ್ತೆರ್. 25ಆಂಡ ಯೇಸು ಅಕ್ಲೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಡ, “ಪಿದಯಿದ ಜನೊಕುಲೆನ್ ಆಳುನಾಕುಲು ಅಕ್ಲೆನ ಮಿತ್ತ್ ಅಹಂಕಾರೊಡು ಅಧಿಕಾರ ನಡಪಾವೆರ್ ಬೊಕ್ಕ ಮಲ್ಲಾಕುಲು ಬಲತ್ಕಾರೊಡ್ದು ಅಧಿಕಾರ ನಡಪಾವೆರ್ ಅಂದ್‌ದ್ ನಿಕುಲು ತೆರಿದರತ್ತಾ? 26ಆಂಡ ನಿಕ್ಲೆಡ್ ಅಂಚ ಉಪ್ಪೆರೆ ಬಲ್ಲಿ. ನಿಕ್ಲೆಡ್ ಮಲ್ಲಾಯೆ ಆವೊಡುಂದು ಉಪ್ಪುನಾಯೆ ಚಾಕ್ರಿದಾಯೆ ಆದುಪ್ಪೊಡು. 27ಆಂಡ ನಿಕ್ಲೆಡ್ ಸುರುತ್ತಾಯೆ ಆವೊಡು ಇನ್ಪಿನಾಯೆ ನಿಕ್ಲೆ ಅಡಿಯಾಳ್ ಆದುಪ್ಪೊಡು. 28ಅಂಚೆನೆ ನರಮಾನಿ ಮಗೆಲಾ ಚಾಕ್ರಿ ಮಲ್ಪಾವೊನ್ರೆ ಅತ್ತ್, ಚಾಕ್ರಿ ಮಲ್ಪೆರೆಲಾ ತನ ಪ್ರಾಣೊನು ಮಸ್ತ್ ಜನೊಕುಲೆನ ಬುಡುಗಡೆಗಾದ್ ಕೊರಿಯೆರೆ ಬತ್ತೆ.” ಅಂದ್‌ದ್ ಪಂಡೆ.
ಕುರುಡೆರೆನ್ ಗುಣ ಮಲ್ತಿನವು
(ಮಾರ್ಕೆ 10:46-52; ಲೂಕೆ 18:35-43)
29ಅಕುಲು ಯೆರಿಕೊಗು ಪಿದಾಡ್ದ್ ಪೋವೊಂದುಪ್ಪುನಪಗ ಜನೊಕುಲೆ ಮಲ್ಲ ಗುಂಪು ಆಯನ ಬೆರಿಯೆ ಪೋಂಡು. 30ಅಪಗ ಸಾದಿದ ಬರಿಟ್ಟ್ ಕುಲ್ಲೊಂದಿತ್ತಿ ಇರ್ವೆರ್ ಕುರುಡೆರ್, ಯೇಸು ಆ ಸಾದಿಡ್ ಪೋವೊಂದುಲ್ಲೆ ಅಂದ್‌ದ್ ತೆರಿದ್, “ಕರ್ತವಾ, ದಾವೀದ್ ಮಗಾ! ಎಂಕ್ಲೆನ್ ಕರುಣೆ ಮಲ್ಪುಲ!” ಅಂದ್‌ದ್ ಬೊಬ್ಬೆ ಪಾಡಿಯೆರ್. 31ಆ ಗುಂಪುದಾಕುಲು, “ಮನಿಪಂದೆ ಉಪ್ಪುಲೆ!” ಅಂದ್‌ದ್ ಅಕ್ಲೆನ್ ದಟ್ಟಿನಗ ಅಕುಲು, “ದಾವೀದ ಮಗಾ, ಎಂಕ್ಲೆಗ್ ಕನಿಕರ ತೋಜಾಲ,” ಅಂದ್‌ದ್ ಬೊಕ್ಕಲಾತ್ ಬೊಬ್ಬೆ ದೀಯೆರ್. 32ಅಪಗ ಯೇಸು ಉಂತುದು ಅಕ್ಲೆನ್ ಲೆತ್ತ್‌ದ್, “ಯಾನ್ ನಿಕ್ಲೆಗ್ ದಾದ ಮಲ್ಪೊಡಂದ್‌ದ್ ಬಯಕುವರ್,” ಅಂದ್‌ದ್ ಕೇನ್ನಗ 33ಅಕುಲು, “ಕರ್ತವಾ, ಎಂಕುಲೆ ಕಣ್ಣ್ ಜಪ್ಪುಲೆಕ್ಕ ಮಲ್ಪುಲ,” ಪಂಡೆರ್. 34ಯೇಸು ಕನಿಕರ ಪಡೆದ್ ಅಕ್ಲೆನ ಕಣ್ಣ್‌ಲೆನ್ ಮುಟ್ಟಿಯೆ. ಅಪಗನೆ ಅಕ್ಲೆಗ್ ಕಣ್ಣ್ ತೋಜ್ಂಡ್. ಅಕುಲು ಆಯ ಬೆರಿಯೆ ಪೋಯೆರ್.
Currently Selected:
ಮತ್ತಾಯೆ 20: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
