ಮತ್ತಾಯೆ 28
28
ಯೇಸು ಲಕ್ಕ್ದ್ ಬರ್ಪಿನವು
(ಮಾರ್ಕೆ 16:1-10; ಲೂಕೆ 24:1-12; ಯೋಹಾನೆ 20:1-10)
1ಸಬ್ಬತ್ದಿನ ಆಯಿ ಬೊಕ್ಕ ವಾರದ ಸುರುತ್ತ ದಿನ ಬೊಲ್ಪಾನಗ ಮಗ್ದಲದ ಮರಿಯಲಾ, ಕುಡೊರ್ತಿ ಮರಿಯಲಾ ಸಮಾಧಿನ್ ತೂಯೆರೆ ಬತ್ತೆರ್. 2ಅಪಗ ಮಲ್ಲ ಭೂಕಂಪ ಆಂಡ್. ಕರ್ತವ ದೂತೆ ಪರಲೋಕೊಡ್ದು ತಿರ್ತ್ ಬತ್ತ್ದ್ ಆ ಕಲ್ಲ್ನ್ ಬಾಕಿಲ್ಡ್ದ್ ಪೊರೆಲ್ಪಾದ್ ಐತ ಮಿತ್ತ್ ಕುಲ್ಲೊಂಡೆ. 3ಆಯ ಮೋನೆದ ರೂಪ ಮಿಂಚಿದಲೆಕ್ಕಲಾ ಆಯ ಕುಂಟು ಹಿಮತಾತ್ ಬೊಲ್ದು ಆದಿತ್ತ್ಂಡ್. 4ಆ ಸಮಾಧಿದ ಕಾವಲ್ದಾಕುಲು ಆಯಗ್ ಪೋಡಿದ್ ನಡ್ಗ್ದ್ ಸೈತಿ ಲೆಕ್ಕ ಆಯೆರ್. 5ಅಪಗ ದೂತೆ ಆ ಪೊಂಜೊವುಲೆಡ, “ನಿಕುಲು ಪೋಡ್ಯಡೆ. ಕ್ರುಸ್ಸುಗು ಪಾಡ್ದಿತ್ತಿನ ಯೇಸುನು ನಾಡುವರ್ ಅಂದ್ದ್ ತೆರಿದೆ. ಆಯೆ ಮುಲ್ಪ ಇಜ್ಜೆ. 6ಆಯೆ ಪಂಡಿಲೆಕ್ಕನೇ ಆಯೆ ಜೀವಾದ್ ಲಕ್ಕ್ದೆ. ಬಲೆ, ಆಯನ್ ದೀತಿನ ಜಾಗ್ನ್ ತೂಲೆ. 7ಬೊಕ್ಕ ಬೇಗ ಪೋದು ಶಿಷ್ಯೆರೆಗ್ ಪನ್ಲೆ, ‘ಸೈತಿನಾಯೆ ಬದ್ಕ್ದೆ. ಆಯೆ ನಿಕ್ಲೆಡ್ದ್ ದುಂಬು ಗಲಿಲಾಯೊಗು ಪೋವೊಂದುಲ್ಲೆ. ನಿಕುಲು ಆಯನ್ ಅವುಲು ತೂವರ್,’ ಯಾನ್ ಪಂತಿನೆನ್ ನಿಕುಲು ನೆನೆಪು ಮಲ್ಪುಲೆ,” ಅಂದ್ದ್ ಪಂಡೆ. 8ಅಕುಲು ಪೋಡಿದ್ಲಾ, ಮಸ್ತ್ ಸಂತೋಷೊಡ್ಲಾ ಸಮಾಧಿಡ್ದ್ ಪಿದಾಡ್ದ್ ಶಿಷ್ಯೆರೆ ಕೈತಲ್ ಪನಿಯೆರೆ ಪಾರ್ದ್ ಪೋಯೆರ್. 9ಅಕುಲು ಸಾದಿಡುಪ್ಪುನಗ ಯೇಸು ಅಕಲ್ನ ಎದುರು ಬತ್ತ್ದ್, “ನಿಕ್ಲೆಗ್ ಸಮಾಧಾನ ಆವಡ್,” ಪಂಡೆ. ಅಕುಲು ಮುಟ್ಟ ಬತ್ತ್ದ್ ಆಯ ಕಾರಕೈತಲ್ ಅಡ್ಡಬೂರ್ದು ಆಯಗ್ ವಂದನೆ ಮಲ್ತೆರ್. 10ಯೇಸು ಅಕ್ಲೆಡ, “ಪೋಡ್ಯಡೆ, ಎನ ಸಹೋದರೆರೆ ಕೈತಲ್ ಪೋದು ಅಕುಲು ಗಲಿಲಾಯೊಗು ಪೋವೊಡಂದ್ದ್ ಪನ್ಲೆ. ಅವುಲು ಎನನ್ ತೂವೆರ್,” ಅಂದ್ದ್ ಪಂಡೆ.
ಸಮಾಧಿದ ಕಾವಲ್ದಾಕುಲೆನ ಸಾಕ್ಷಿ
11ಅಕುಲು ಪೋವೊಂದುಪ್ಪುನಗ ಕಾವಲ್ದಾಕುಲೆಡ್ ಕೆಲೆವೆರ್ ಪಟ್ಟಣದುಲಯಿ ಬತ್ತ್ದ್ ನಡತಿ ಸಂಗತಿಲೆನ್ ಪ್ರಧಾನಯಾಜಕೆರೆಗ್ ತೆರಿಪಾಯೆರ್. 12ಮೊಕುಲು ಹಿರಿಯೆರೆಡೊಪ್ಪ ಕೂಡುದು ಆಲೋಚನೆ ಮಲ್ತ್ದ್ ಆ ಕಾವಲ್ದಾಕುಲೆಗ್ ಮಸ್ತ್ ದುಡ್ಡು ಕೊರ್ದು, 13“ಆಯನ್ ಶಿಷ್ಯೆರ್ ರಾತ್ರೆಡ್ ಬತ್ತ್ದ್ ಎಂಕುಲು ನಿದ್ರೆ ಮಲ್ತೊಂದುಪ್ಪುನಗ ಕಂಡೊಂದು ಪೋಯೆರ್, ಅಂದ್ದ್ ಪನ್ಲೆ. 14ಈ ಸುದ್ಧಿ ದೇಶಾಧಿಪತಿನ ಕೆಬಿಕ್ ಬೂರುಂಡ ಎಂಕುಲು ಆಯನ್ ಸಮಾಧಾನ ಮಲ್ತ್ದ್ ನಿಕ್ಲೆಗ್ ದಾಲಾ ತೊಂದರೆ ಆವಂದಿಲೆಕ್ಕ ಮಲ್ಪುವ,” ಪಂಡೆರ್. 15ಮೊಕುಲು ಆ ದುಡ್ಡುನು ದೆತ್ತೊಂದು ತನ್ಕುಲೆಗ್ ಪಂಡ್ದ್ ಕೊರಿಲೆಕ್ಕನೇ ಮಲ್ತೆರ್. ಈ ಪಾತೆರ ಇನಿಕ್ಲಾ ಯೆಹೂದ್ಯೆರೆಡ್ ಪರಡ್ದುಂಡು.
ಯೇಸು ಶಿಷ್ಯೆರೆಗ್ ಕೊರಿ ಕಡೆತ ಆದೇಶೊಲು
(ಮಾರ್ಕೆ 16:14-18; ಲೂಕೆ 24:36-49; ಯೋಹಾನೆ 20:19-23; ಅಪೊ.ಕ್ರಿ 1:6-8)
16ಐಡ್ದ್ ಬೊಕ್ಕ ಪತ್ತೊಂಜಿ ಮಂದಿ ಶಿಷ್ಯೆರ್ ಗಲಿಲಾಯೊಗು ಪೋದು ಯೇಸು ತನ್ಕುಲೆಗ್ ಪಂಡಿ ಗುಡ್ಡೆಗ್ ಪೋಯೆರ್. 17ಅವುಲು ಆಯನ್ ತೂದು ಆಯಗ್ ಅಡ್ಡಬೂರ್ಯೆರ್. ಆಂಡ ಕೆಲೆವೆರ್ ಸಂಶಯ ಮಲ್ತೆರ್. 18ಅಪಗ ಯೇಸು ಕೈತಲ್ ಬತ್ತ್ದ್, “ಪರಲೋಕೊಡ್ಲಾ, ಭೂಲೋಕೊಡ್ಲಾ ಮಾತ ಅಧಿಕಾರ ಎಂಕ್ ಕೊರ್ತುಂಡು. 19ಅಂಚಾಯಿನೆಡ್ದ್ ನಿಕುಲು ಪೋದು ಮಾತ ಜನಾಂಗದ ಜನೊಕುಲೆನ್ ಶಿಷ್ಯೆರಾದ್ ಮಲ್ಪುಲೆ. ಅಕ್ಲೆಗ್ ಅಮ್ಮೆ ಮಗೆ ಪರಿಶುದ್ಧಾತ್ಮ ಪುದರ್ಡ್ ದೀಕ್ಷಾಸ್ನಾನ ಕೊರ್ಲೆ. 20ಯಾನ್ ನಿಕ್ಲೆಗ್ ಅಪ್ಪಣೆ ಕೊರಿನವು ಮಾತೆನ್ಲಾ ಕೈಕೊನ್ರೆ ಅಕ್ಲೆಗ್ ಬೋಧನೆ ಕೊರ್ಲೆ. ತೂಲೆ, ಯಾನ್ ಯುಗತ ಅಂತ್ಯ ಮುಟ್ಟಲಾ ಮಾತ ದಿನ ನಿಕ್ಲೆಡೊಪ್ಪ ಉಪ್ಪುವೆ,” ಅಂದ್ದ್ ಪಂಡೆ.
Currently Selected:
ಮತ್ತಾಯೆ 28: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature